1. Anni i masingi-singan ni Jehova ta totolena?

SI Jehova nga Dios ay ‘magayayya ta totolena.’ (Sal. 149:4) Mamagayayya yatun nittam! Masingi-singan ni Jehova i makasta ira nga kualidad tam. Masinganna i potensial tam anna iyarannina ittam nisa. Nu mattalupaddiattam nga matalo nisa, maddukko gapa yayya nittam adde ta mannanayun!—Juan 6:44.

2. Ngatta marigatan i karuan nga kurugan nga ayatan ira ni Jehova?

² Awayyana nga ikagi na karuan, ‘Ammù tu iddukan ni Jehova i totolena bilang grupo, ngem talaga kari nga ayatannà mismu ni Jehova?’ Ngatta meyavu yatun na tadday nga tolay? Kaddaraddam i nesimmu kani Oksana * ta kabbinna. Kunna: “Magayayya ngà turi ta nabawtisowan ngà anna turi ta nappayunir ngà. Ngem nappasa i 15 dagun, nanono ku uli i kiteddake ira nga nesimmu niakan ta kabbikku. Ninono ku nga awan ngana tu fabor niakan ni Jehova anna ari ngà ngana nga mepangngo ta ayana.” Aru gapa i nappasan na payunir nga si Sister Yua ta kabbinna. Kunna: “Nidedikà i baggì kani Jehova megafu ta kayà ku yayya nga pagayayyatan. Ngem siguradu ngà nga ariannà vuluvuga ayatan ni Jehova.”

3. Anni i gigiammuattam taw nga artikulo?

³ Gitta na nakagi na dua nga matalo nga sister, awayyana nga talaga ayatammu si Jehova ngem madduda ka nu ayatan naka.  Ngatta mawag nga kumbinsidu ka nga ikavurungan naka? Anni i makoffun nikaw nu madduda ka nga ayatan naka ni Jehova? Tabbagattam danatun nga pakkiavu.

4. Ngatta marake i efektona nu paddudattam nga ayatan ittam ni Jehova?

⁴ Nu siguradu ittam nga ayatan ittam ni Jehova, mapaguyu ittam nga passerbian yayya ta kapianan maski nu egga ira i problema tam. Ngem nu madduda ittam nga ikavurunganna ittam, ‘bumaddi i sikattam.’ (Prov. 24:10) Oras tu madismaya ittam anna nu nonopattam nga ari ittam ayatan ni Jehova, marigatan ittam nga labanan i panenta ira ni Satanas.​—Efe. 6:16.

5. Anni i efektona ta karuan nga wawwaragi nga nadduda nu ayatan ira na Dios?

⁵ Nakkafi i pangurug na karuan nga matalo nga Cristiano megafu ta nadduda ira. Kinagi na elder nga si James: “Maski nu massesserbi ngà ta Bethel anna enjoy ku i ministeriò ta foreign-language nga kongregasion, nononopakku nu talaga kari akseptan ni Jehova i sakrifisiò ira para nisa. Egga paga lagu ira tiempo nga paddudakku nu gigginnanna i pakimallo ku ira.” Kagian gapa ni Eva nga massesserbi ta ngamin-tiempo: “Delikadu nu paddudammu i aya ni Jehova nikaw megafu ta afektan natun i ngamin nga kukukuammu ta passerbim nisa. Mawawan i ganas mu ta espiritual ira nga gannug kunne na gapa i pagayayya mu ta passerbi kani Jehova.” Kinagi gapa ni Michael na tadday nga payunir anna elder: “Nu ari ka mangurug nga ikavurungan naka ni Jehova, meyarayyu ka nisa.”

6. Anni i mawag nga kuattam nu manono tam nga ari ittam nga ayatan ni Jehova?

⁶ Ipasingan danatun nga ekspiriensa nga talaga mafektan i pangurug tam nu mannegatibo ittam. Ngem anni nakuan i kuattam nu manono tam nga ari ittam ayatan ni Jehova? Insigida nga alsattam yatun ta nono tam! Uffunan naka ni Jehova nga talianan danatun nga “mamagulu ta nono mu” tu ‘imammo na Dios nga manangngal ta nono anna ta futum.’ (Sal. 139:23, NW; ftn.; Fil. 4:6, 7) Daddammammu nga ari ka nga magitetadday. Nannegatibo gapa maski i karuan nga matalo nga wawwaragi. Naekspiriensa gapa yatun maski na aripan ira ni Jehova ta nappasa. Ikonsidera tam nu anni i magigiammu tam ta ehemplo ni apostol Pablo.

7. Anni ira i problema ni Pablo?

⁷ Nu karuan, matageno mu kari nga napakaru i responsibilidad mu anna mariga nga balinan ngamin danatun? Nu wan, matindiammu si Pablo. Ari yayya nga makapagimammo megafu ta agga-nonona ari laman tu i tadday, nu ari, i “ngamin” nga kongregasion. (2 Cor. 11:23-28) Egga kari i taki mu nga makalsa ta pagayayya mu? Posible nga egga i taki nga inattamman ni Pablo nga kayàna nakuan nga mawawan. (2 Cor. 12:7-10) Madismaya ka kari megafu ta kina-imperfektom? Kunnatun gapa si Pablo nu karuan. Natagenona nga “pakallallo” yayya megafu ta kanayun nga labananna i kina-imperfektona.​—Roma 7:21-24.

8. Anni i nakoffun kani Pablo tapenu maattamman i problemana ira?

⁸ Maski nu aru i inattamman ni Pablo nga problema, nitulu-tuloyna i masserbi kani Jehova. Kunnasina nakua yatun? Maski nu ammuna i pakkafianna ira, masikan i pangurugna ta tavvu. Ammuna i promesa ni Jesus nga “ngamin i mangurug [kani Jesus] ay . . . matolay ira adde ta ngangangay.” (Juan 3:16; Roma 6:23) Wan, mangurug si Pablo ta tavvu. Kumbinsidu yayya nga sigga-paran nga pakoman ni Jehova maski danuri nakaliwa tu madammo nu mabbabawi ira.​—Sal. 86:5.

9. Anni i magigiammu tam ta kinagi ni Pablo ta Galacia 2:20?

⁹ Mangurug si Pablo nga kuruga ayatan yayya na Dios megafu ta kingngua ni Cristo. (Bibbigan i Galacia 2:20.) Masingan yatun ta kinagi ni Pablo ta ultimu na versikulo: ‘Mangurug ngà ta Ana na Dios nga nangaya niakan anna nangitavvung ta inangona megafu niakan.’ Ari vuluvuga ninono ni Pablo nga sobra ngana mabba i kadakena anna ari ngana yayya puede nga ayatan na Dios. Arianna ninono yaw: ‘Matindiakku nu ngatta ayatan ni Jehova i wawwaragì. Ngem imposible nga ayatannà.’ Niperaddam ni Pablo ta taga-Roma: “Minattagaruli ittam pagalaman turi ta natay si Cristo para nittam!” (Roma 5:8) Awan gafu tu pagaddetan na pangaya na Dios nittam!

10. Anni i magigiammu tam ta Roma 8:38, 39?

¹⁰ Bibbigan i Roma 8:38, 39. Kumbinsidu si Pablo nga mafuersa i aya na Dios. Niturana nga “awan vuluvuga tu makawayya nga mangigungay nittam ta aya na Dios.” Ammu ni Pablo nga pinasensian ni Jehova i Israelita ira. Ammuna gapa nu kunnasi nangipasingan tu allo nisa si Jehova. Gittana kunnaw i kakkagian  ni Pablo: ‘Megafu ta nidog ni Jehova i Anana mismu nga matay para niakan, ariakku nakuan gafu paddudan i ayana niakan.’—Roma 8:32.

11. Maski nu aru i liwa nga nakua ni Pablo segun ta 1 Timoteo 1:12-15, ngatta siguradu yayya nga ayatan yayya na Dios?

¹¹ Bibbigan i 1 Timoteo 1:12-15. Awayyana nga makokkonsensia si Pablo nu manonona i kingnguana ira nige yayya nabbalin tu Cristiano. Ari gafu kattaka-taka nga kinagina nga yayya i “karaketan” ta ngamin nga minattagaruli. Nige nga nakannammuan ni Pablo i kinakurug, pineppersigina i Cristiano ira ta aru nga siudad. Nipefuku anna sinuportanna i pamatay ta karuan nga Cristiano. (King. 26:10, 11) Maimajimmu kari i natageno ni Pablo nu masimmuanna i tadday nga abbing nga Cristiano nga natay i maganana megafu nisa? Nabbabawyan ni Pablo danatun nga liwana. Ngem ammuna nga arianna ngana moli i nappasa. Nangurug yayya nga natay si Cristo para nisa, yatun ta niturana: “Megafu ta allo na Dios, nabbalin ngà tu apostol.” (1 Cor. 15:3, 10) Anni i magigiammu tam? Mawag tu kumbinsidu ka nga natay si Jesus para nikaw yatutta posible nga mapeggakka tu madukko nga relasion kani Jehova. (King. 3:19) I kukukuattam sangawe anna ta mappange i importante ta Dios, ari nga i liwi-liwa nga nakua tam ta nappasa, maski nu Saksi ni Jehova tam ngana tatun nga tiempo, onu ari paga.​—Isa. 1:18.

12. Kunnasi makoffun nittam i 1 Juan 3:19, 20 nu matageno tam nga awan tu kwenta tam anna ari ittam nga mepangngo ta pangaya?

¹² Nu nonopammu i nikapatay ni Jesus tapenu mapakoma i liwi-liwa mu, baka mekagim: ‘Ari ngà nga mepappangngo tatun nga nabalor nga regalu.’ Ngatta tamma makatageno ka tu kunnatun? Baka ilologo ittam  laman na imperfekto nga futu tam, yatutta matageno tam nga awan tu kwenta tam onu ari ittam mepangngo ta pangaya. (Bibbigan i 1 Juan 3:19, 20.) Nu kunnatun i matageno mu, daddammammu nga “mas makawayya i Dios anne ta konsensia” onu futu tam. Maski nu matageno tam nga ari ittam ayatan ni Jehova onu arianna ittam mapakoma, iddukan anna pakomanna lagapa ittam. Mawag nga kumbinsiattam i baggi tam nga ayatan ittam ni Jehova. Tapenu makua yatun, mawag nga kanayun nga gigiammuattam i Uvovugna, kanayun nga makimallo nisa, anna kanayun nga makikavulu ta matalo nga totolena. Ngatta importante nga kuattam danatun?

13. Kunnasi makoffun nittam i paggigiammu tu Biblia? (Innan gapa i kahon nga “ Nu Kunnasi Ira Inuffunan na Uvovug na Dios.”)

¹³ Gigiammuan i Biblia kadaggaw tapenu mas malippawa mu i makasta ira nga kualidad ni Jehova anna masingammu nga talaga ayatan naka. Nu pannonopammu tu mapia yatun, ‘metunung i ugo’ nga pannonono anna panageno mu. (2 Tim. 3:16) Laba-labanan na elder nga si Kevin i panagenona nga awan tu kwentana. Kunna: “Nakoffun i pabbibbig ku ta Salmo 103 anna i pannono tu mapia tatun tapenu itunung i appana-panono ku anna malippawa ku i kurug nga paningan ni Jehova niakan.” Kunnaw i kinagi ni Eva nga nakagi ta gafu: “Ta kabalin na aggaw, pannonopakku tu mapia i mataga-tageno ni Jehova. Megafu tatun, memammo i futù anna massikan i pangurug ku.”

14. Kunnasi makoffun nittam i pakimallo?

¹⁴ Makimallo kanayun. (1 Tes. 5:17) Nu kayà mu i makikkofun ta tadday nga tolay, mawag nga kanayukka makibbida nisa anna ikagim nisa i mataga-tageno mu. Kunnatun gapa i pakikkofun kani Jehova. Nu ikagi tam nisa i mataga-tageno tam, i nononopattam, anna i kavurungattam ira, mepasingattam nga mattalo ittam nisa anna ammu tam nga ayatanna ittam. (Sal. 94:17-19; 1 Juan 5:14, 15) Kunnaw i kinagi ni Yua nga nakagi ta gafu: “Nu makimallo ngà, ariakku laman saggi-taddayan kani Jehova i nesimmu ira niakan ta interu aggaw. Ikagì nisa i talaga manonono ku anna mataga-tageno ku. Megafu tatun, sisinu ku ngana nga imammatan si Jehova ari tu gittana boss na tadday nga dakal nga kompania, nu ari, Yama nga talaga iddukanna i ánana.”​—Innan i kahon nga “ Nabibbig Mu Ngana Kari Yatun?”

15. Kunnasi nangipasingan si Jehova tu personal nga interes nittam?

¹⁵ Makikavulu ta matalo ira nga kokkofun. Regalu ira ni Jehova. (Sant. 1:17) Nangipasingan nittam tu personal nga interes i nelangitan nga Yama tam gukaban na pangiyawana ta wawwaragi ta kongregasion nga mangipasingan  tu “aya ta ngamin nga tiempo.” (Prov. 17:17) Ta tura ni Pablo ta taga-Colosas, kinagina i Cristiano ira nga ‘kuruga dakal i neyuffudda nisa’ anna binanna-bannayadda yayya. (Col. 4:10, 11) Nagawag gapa si Jesus anna inappresiana i uffun na kokkofunna nga anghel anna totolay.​—Luc. 22:28, 43.

16. Kunnasi makoffun i matalo nga kokkofun tapenu mas madukko ittam kani Jehova?

¹⁶ Ala-alawatammu kari i uffun na kokkofummu ira ta kongregasion? Arianna kayà kagian nga makafi i pangurug tam nu iyistoria tam ta manakam ta espiritual nga kokkofuttam i problema tam ira. Proteksion lallagu yatun nittam. Kunni James nga nakagi ta gafu: “Talaga nakoffun nio i madukko nga pakikkofun ta matalo ira nga Cristiano. Nu sobra i pannegatibò, mapasensia nga magginna danaw nga nabalor nga kokkofukku anna ikagida nio nga ayataddà. Megafu nira, matageno ku nga ayatan anna ikavurungannà ni Jehova.” Talaga importante gafu nga madukko i pakikkofuttam ta wawwaragi!

17-18. Sinni i mawag nga kurugammu, anna ngatta?

¹⁷ Kayà ni Satanas nga magimmang ittam nga kuan i fustu. Kayàna nga kurugattam nga ari ittam nga ayatan ni Jehova, anna ari ittam mepangngo ta pangipaliagna. Ngem gitta na nagigiammu tam ngana, ari tu kurug yatun.

¹⁸ Ayatan naka ni Jehova. Nabala-balor ka nisa. Nu tuttulammu yayya, ‘mannanayukka ta ayana’ gitta ni Jesus. (Juan 15:10) Yatutta ariammu kurugan si Satanas onu i panageno mu nga ariannaka ayatan ni Jehova. Si Jehova lallagu i kurugammu megafu ta masingi-singanna i mapia ta kada tadday nittam. Kumbinsidu ka nakuan nga “magayaya i YAFU ta totolay na,” nelavu ka ngana!