Nige nga natay si Jesus, ngatta kinagina i uvovug ira ni David ta Salmo 22:1?

Mabibbig ta Mateo 27:46 i tadday ta ultimu nga kinagi ni Jesus: “Dios ku, Dios ku, ngatta ta pinagurayam-mà?” Ta pakkagi ni Jesus tatun sinuppalna i profesiya nga nakagi ni salmista David ta Salmo 22:1. (Mar. 15:34) Ariattam puede nonopan nga kinagi ni Jesus danatun nga uvovug megafu ta nadismaya yayya onu nakkafi i pangurugna tatun nga oras. Matindian ni Jesus nu ngatta mawag tu matay yayya anna sigga-paran yayya nga kuan yatun. (Mat. 16:21; 20:28) Ammuna gapa nga ta oras na patena alsan ni Jehova i ‘pangiyeguna’ nisa. (Job 1:10) Kingngua ni Jehova yatun tapenu mapakurug ni Jesus nga mattalupaddian lagapa yayya nga matalo maski nu kuruga mariga i nikapatena.​—Mar. 14:35, 36.

Ngatta gafu ta kinagi ni Jesus i uvovug ira taw nga salmo? Maski nu ariattam nga masiguradu, ammuattam i karuan ta posible nga rason. *

Ta pakkagi ni Jesus taw ira nga uvovug, posible nga ipasa-pasigona nga ari fugaddan ni Jehova i kapatena. Mawag tu iyawa ni Jesus i tavvu nga awan tu uffun ni Jehova. Mawagna i matay tapenu “pammakapianan ngamin na totolay i patay na.”​—Heb. 2:9.

Ta pangusa ni Jesus ta karuan nga uvovug tatun nga salmo, posible nga kayàna nga manono na karuan i buu nga salmo. Ta tiempo ni Jesus, gagangay laman para ta Judio ira nga kabisaduan i aru nga salmo. Nu maginnada i  tadday nga versikulo na salmo, magga manonoda i buu nga salmo. Nu kunnatun i gakkag ni Jesus, posible nga nepanonona ta Judio ira nga tagatuttulna i aru nga profesiya tatun nga salmo meyannung ta mesimmu ta patena. (Sal. 22:7, 8, 15, 16, 18, 24) Ta ultimu ira nga versikulo natun gabbalaman nga salmo, nedayaw si Jehova anna nakagi gapa nga yayya i patul na interu mundo.​—Sal. 22:27-31.

Ta pakkagi ni Jesus taw ira nga uvovug ni David, posible nga kakkagianna nga inosente yayya. Nige nga natay si Jesus, ilegal i nikabistana, tapus inakusadda yayya nga awan tu pangirespetona ta Dios. (Mat. 26:65, 66) Gaba-gabi ngana turi ta kingnguada i kabistana tapus ari paga natuttul i fustu nga proseso na kabista. (Mat. 26:59; Mar. 14:56-59) Turi ta niyavu gafu ni Jesus nga “Dios ku, Dios ku, ngatta ta pinagurayam-mà?” kakkagianna nga awan tu liwana anna ari yayya mepangngo nga matay.

Posible nga nipanono ni Jesus ta tanakuan nga tolay nga maski nu nazziga-riga i nattura taw nga salmo nga si David, arianna nga nawawan i fabor ni Jehova. Ari nga kayà kagian na pakkiavu ni David nga “Dios ku, Dios ku, ngatta ta pinagurayam-mà?” nga nakkafi i pangurugna ta Dios. Kakuruganna, kabalinna nga niyavu yatun, kinagina nga makkomfiansa yayya nga ipaliag anna bendisionan yayya ni Jehova. (Sal. 22:23, 24, 27) Kunnatun gapa i nesimmu ta “Ana ni David” nga si Jesus. Maski nu nazziga-riga yayya ta estaka, ari nga kayà kagian natun nga ari ngana yayya faboran ni Jehova.​—Mat. 21:9.

Posible nga kinagi yatun ni Jesus megafu ta maraddam yayya nga mawag nga alsan ni Jehova i proteksionna nisa tapenu mapakurugna nga mattalupaddian yayya nga matalo. Ari nga parte na orihinal nga gakkag ni Jehova nga mazziga-riga i Anana anna matay. Ngem nanguli yatun kabalin na ollu nga rebelyon. Awan tu liwa ni Jesus ngem mawag tu mazziga-riga yayya anna matay tapenu matabbag i isyu nga pinalattuag ni Satanas anna meyawa i tavvu nga kawagan tapenu metoli i nawawan na tolay. (Mar. 8:31; 1 Ped. 2:21-24) Mesimmu laman yatun nu alsan labbi ni Jehova i proteksionna kani Jesus. Tatun laman nga kingngua ni Jehova yatun.

Posible nga uuffunan ni Jesus i tagatuttulna ira nga malippawa nu ngatta nipamavulun ni Jehova nga matay yayya ta pakazigarigatan nga estaka. * Ammu ni Jesus nga aru i mesiddukal ta kapatena nga kunna tadday nga kriminal. (1 Cor. 1:23) Nu malippawa na tagatuttulna ira i kurug nga rason nu ngatta natay yayya, manonoda nga talaga importante yatun. (Gal. 3:13, 14) Imammatadda nukua yayya bilang tadday nga Mamaliag, ari tu tadday nga kriminal.

Maski nu anni paga i rason nu ngatta kinagi ni Jesus danaw nga uvovug, ammuna nga kukukuanna i uray na Dios nu matay yayya ta estaka. Kabalinna nga kagian yaw nga salmo, nivuyana: “Netuppal ngana!” (Juan 19:30; Luc. 22:37) Megafu ta pinangalsa labbi ni Jehova ta proteksionna kani Jesus, netuppal ni Jesus i pinaddoban nisa taw ta davvun. Natuppalna gapa i ngamin nga profesiya meyannung nisa nga “nitura ni Moises anna profeta ira tuange ta egga ta Salmo Ira.”​—Luc. 24:44.