1-2. Kunnasi tam nga matuttul i dakkua ira ni Jesus? Iyilustra.

IMAJINAMMU nga parte ka na tadday nga grupo nga ma-hiking ta delikadu nga katanapan nga nakallabban tu niebe. Tadday nga ekspiriensadu nga guide i mangiyorollu nikamu. Ta pallakagna, egga ira i gafan na takkina ta niebe. Tapus nakarayyu ngana i guide yatutta ariammu ngana yayya nga masingan! Ngem ari ka nga mavurung megafu ta tuttuttulammu tu mapia anna na kakavvulu mu i gafan ira na takki na guide!

² Megitta yaw nga marake nga mundo ta tadday nga delikadu nga katanapan anna sittam nga kurug nga Cristiano i ma-hiking tatun. Pia ngana laman ta niyawa ni Jehova i perfekto nga guide, i Anana nga si Jesu-Cristo. Awayya tam nga tuttulan tu mapia i dakkuana ira. (1 Ped. 2:21) Segun ta tadday nga referensia ta Biblia, nikumpara ni Pedro ta tadday nga guide si Jesus. Kagitta na tadday nga guide, nangibattang gapa si Jesus tu gafan ira na takki onu dakkua nga awayya tam nga tuttulan. Anni i kayà kagian na panuttul ta dakkua ira ni Jesus? Ngatta mawag nga kuattam yatun? Kunnasi tam nga kuan yatun? Tabbagattam danatun nga tallu nga pakkiavu.

3. Anni i kebalinan na panuttul ta dakkua ira na tadday nga tolay?

³ Anni i kebalinan na panuttul ta dakkua ira na tadday nga tolay? Ta Biblia, meyusa nu karuan i uvovug ira nga ‘lumakag’ anna ‘takki’ tapenu tukuyan i pattolay na tadday. (Gen. 6:9; Prov. 4:26) Mekumpara i ehemplo natun nga tolay ta gafan ira na takki, onu dakkua ira nga nibattanna ta pallakagna. Kayàna gafu kagian nga nu tuttulammu i dakkua ira na tadday nga tolay, tuttulammu i ehemplona onu parigammu yayya.

4. Anni i kayà kagian na panuttul ta dakkua ira ni Jesus?

 ⁴ Anni gafu i kebalinan na panuttul ta dakkua ira ni Jesus? Parigattam i ehemplona. Ta tema nga teksto, espesipiko nga tinukoy ni apostol Pedro i makasta nga ehemplo ni Jesus megafu ta inattammanna i ziga-riga. Ngem aru paga i kingngua ni Jesus nga awayya tam nga parigan. (1 Ped. 2:18-25) Kakuruganna, awayya tam nga parigan i interu nga pinattolay ni Jesus, kasali ngana i ngamin nga kinagi anna kingnguana.

5. Matuttul kari na imperfekto nga totolay i perfekto nga ehemplo ni Jesus? Ipakanawag.

⁵ Matuttul tam kari i ehemplo ni Jesus maski nu imperfekto ittam? Wan. Daddammammu nga kinagi ni Pedro nga ‘tuttulattam tu mapia’ i dakkua ira ni Jesus. Arianna kinagi nga perfekto nga matuttul tam yatun. Ngem nu kuattam i adde na mawayya tam maski nu imperfekto ittam, matuttul tam yaw nga kinagi ni apostol Juan: “Mawag tu mattolay tu kagitta na nipattolay ni Jesu-Cristo.”​—1 Juan 2:6.

6-7. Ngatta makagi tam nga mas maddukko ittam kani Jehova nu tuttulattam i dakkua ira ni Jesus?

⁶ Nu tuttulattam i dakkua ira ni Jesus, mas maddukko ittam kani Jehova. Ngatta makagi tam yatun? Ollu, nipasingan ni Jesus i kapianan nga ehemplo na pattolay nga mamagayayya ta Dios. (Juan 8:29) Yayya nga nu tuttulattam i dakkua ira ni Jesus, mapagayayya tam si Jehova. Makasiguradu ittam gapa nga mas maddukko i nelangitan nga Yama tam turi ira ta mappuppursigi nga mabbalin tu kofunna.​—Sant. 4:8.

⁷ Mekadua, perfekto nga naparigan ni Jesus i Yamana. Yatutta makagi ni Jesus: “I nakasingan niakan ay nasingan na ngana gapa i Yama.” (Juan 14:9) Nu parigattam i kualidad ira ni Jesus anna i pattratuna ta tanakuan, paparigattam ngana gapa si Jehova. Angngariganna, awayya tam nga parigan i pangikallona ta tadday nga leproso, i empatiana ta babay  nga grabe i takina, anna i pangikabbina turi ira ta natayan. (Mar. 1:40, 41; 5:25-34; Juan 11:33-35) Nu mas parigattam si Jehova, mas gapa nga maddukko ittam nisa.

8. Ipakanawag nu kunnasi tam nga ‘mapatulu’ i mundo nu tuttulattam i dakkua ira ni Jesus.

⁸ Nu tuttulattam i dakkua ira ni Jesus, ariattam ipamavulun nga pawanan naw nga marake nga mundo i fokus tam ta passerbi kani Jehova. Ta ultimu nga gabi na pinattolay ni Jesus taw ta davvun, kinagina: “Inaffu ku ngana i mundo!” (Juan 16:33) Kinagi ni Jesus nga arianna nipamavulun nga mainfluwensian yayya na appana-panono, addetan, anna annangngua naw nga mundo. Ari vuluvuga nakattaman ni Jesus nu ngatta nadog yayya taw ta davvun—tapenu idefensa si Jehova. Kumusta gapa ittam? Taw nga mundo, napakaru i makalsa ta fokus tam ta passerbi kani Jehova. Ngem nu kagitta tam si Jesus nga nakafokus ta pagangngua ta uray ni Jehova, ‘mapatulu’ onu maffu tam gapa i mundo.​—1 Juan 5:5.

9. Anni i mawag nga kuattam tapenu makapattolay ittam tu mannanayun?

⁹ Nu tuttulattam i dakkua ira ni Jesus, awayya tam nga mattolay tu mannanayun. Turi ta niyavu na mabbing anna mariku nga lalaki nu anni i mawag nga kuanna tapenu makapattolay yayya tu mannanayun, kunnaw i nitabbag ni Jesus: “Tumuttul ka ngana niakan.” (Mat. 19:16-21) Kinagi ni Jesus ta karuan nga Judio nga ari nga mangurug nga yayya i Cristo: ‘Dumaddan i karnerù ira niakan. Iddakku ira ta inango nga adde ta ngangangay.’ (Juan 10:24-29) Naginteres ta tuttuddu ira ni Jesus i tadday nga miembro na Sanhedrin nga si Nicodemo. Kinagi nisa ni Jesus nga ‘matolay adde ta ngangangay’ danuri “mangurug sa.” (Juan 3:16) Mepasingattam nga mangurug ittam kani Jesus nu iyaplika tam i nitudduna anna parigattam i kingnguana. Nu kuattam danatun, mawayya tam nga mattolay tu mannanayun.​—Mat. 7:14.

10. Anni i mawag nga kuattam tapenu mas ‘kannammuattam’ si Jesus? (Juan 17:3)

¹⁰ Nige tam nga matuttul tu mapia i dakkua ira ni Jesus, mawag nga kannammuattam labbi yayya. (Bibbigan i Juan 17:3.) Mawag nga tulu-tuloy tam nga ‘kannammuan’ si Jesus. Mas nga gigiammuattam i kualidadna ira, i appana-panonona, anna i estandartena ira. Maski nu nabayag ittam ngana ta kinakurug, mawag tu tulu-tuloy tam nga ‘kannammuan’ si Jehova anna i Anana.

11. Anni i mabibbig ta appa nga Evanghelio?

¹¹ Nipesali ni Jehova i appa nga Evanghelio ta Uvovugna, nu sitaw mabibbig tam i pattolay anna i ministerio ni Jesus. Kingnguana yatun tapenu makannammuattam i Anana. Mabibbig tam tatun i kinakkagi ni Jesus, i kikkingnguana, anna i nataga-tagenona. Uffunan  ittam gapa danatun nga appa nga libru tapenu nonopan tu mapia i ehemplo ni Jesus. (Heb. 12:3) Gittana masingi-singattam tatun i dakkua ira nga nibattang ni Jesus. Yayya nga nu gigiammuattam i Evanghelio ira, mas makilala tam si Jesus. Tapus mas matuttul tam tu mapia i dakkuana ira.

12. Kunnasi ittam nga mas mabbenefisio ta Evanghelio ira?

¹² Tapenu mas mabbenefisio ittam ta Evanghelio ira, ari nga makalanno i basta pabbibbig tam tatun. Mawag tu egga i tiempo tam tapenu gigiammuan anna pannonopan tu mapia danatun. (Ikumpara i Josue 1:8, footnote.) Gigiammuattam i dua nga awayya tam nga kuan tapenu mapannonopan anna meyaplika i mabibbig tam ta Evanghelio ira.

13. Anni ira i kuammu tapenu mabbalin tu matotolay i mabibbig mu ira ta Evanghelio?

¹³ Ollu, kuammu tu matotolay i mabibbig mu ta Evanghelio. Usammu i imahinasiommu tapenu masingan, maginna, anna matageno mu i mesissimmu. Tapenu makuam yatun, marresearch ka ta publikasion ira nga niyawa ni Jehova. Gigiammuammu i konteksto—i nesimmu ira nige onu kabalin na parte nga bibbigammu ta Evanghelio. Magaleg ka tu informasion nga mangipakanawag ta totolay anna lugu-lugar nga nakagi ta bibbibbigammu. Ikumparam i giggigiammuammu nga istoria ta tadday nga Evanghelio ta kaparehuna nga istoria ta tanakuan nga Evanghelio. Awayyana gare tu egga ira i detalye nga nisali na tadday nga nattura ta Evanghelio nga awan ta tanakuan.

14-15. Kunnasi tam nga meyaplika i magigiammu tam ira ta Evanghelio?

¹⁴ Mekadua, iyaplikam ta pattolem i mabibbig mu ta Evanghelio. (Juan 13:17) Kabalimmu nga gigiammuan tu mapia i tadday nga istoria ta Evanghelio, iyavu mu ta baggim: ‘Egga kari i leksion taw nga istoria nga awayyà nga iyaplika ta pattolè? Kunnasì nga meyusa yaw tapenu moffunakku i tanakuan?’ Mannono ka tu espesipiko nga tolay nga kayà mu uffunan. Tapus ta mepangngo nga tiempo, awayyam  nga meddu anna mataktika nga ibillay yatun nga nagigiammum.

¹⁵ Ikonsidera tam i tadday nga ehemplo nu kunnasi tam nga meyaplika yatun nga dua nga suhestion. Gigiammuattam i istoria na pobre nga balu nga nasingan ni Jesus ta templo.

16. Iyistoria i maimajimmu nga mesissimmu base ta Marcos 12:41.

¹⁶ Kuammu tu matotolay i istoria. (Bibbigan i Marcos 12:41.) Imajinammu i nesimmu piga aggaw ngana laman nige nga matay si Jesus. Nisan 11, 33 C.E. yatun nga aggaw. Inufu ni Jesus i tiempona tapenu mattuddu ta templo. Ngem kokkontran yayya na relihioso ira nga lider. Nige natun, kinuestion paga na karuan i autoridadna. Namalattuag gapa i tanakuan tu pakkiavu ira nga abboda tu ari nga matabbag ni Jesus. (Mar. 11:27-33; 12:13-34) Sangaw, nagali ngana si Jesus ta tanakuan nga parte na templo, awayyana tu ta Attallungan na Babbay nu sitaw masingi-singanna i aggipayyan tu kuartu. Nagitubang yayya tapus inobserbana i totolay nga mangidanna tu donasiodda ta aggipayyan tu kuartu. Masingi-singanna i aru nga mariku nga totolay nga mangidanna tu napakaru nga barya. Posible nga aranni yayya ta aggipayyan tu kuartu, yayya nga maginnana i masikan nga guni na makkaradanna nga barya.

17. Anni i kingngua na pobre nga balu ta Marcos 12:42?

¹⁷ Bibbigan i Marcos 12:42, NW. Ari nabbayag, napansin ni Jesus i tadday nga “kuruga mariga nga balu nga babay.” (Luc. 21:2) Mariga i pattolena anna awayyana tu ari paga nga makalanno i kuartuna nga paggatang tu pakawaganna ira. Ngem maski nu kunnatun, minaranni yayya ta tadday nga aggipayyan tu kuartu tapus nangidanna yayya tu dua nga baraddi nga barya. Ari paga lagu nga maginna i pinangidannana tatun ira. Ngem ammu ni Jesus nu anni i nidannana—dua nga lepta nga barya, i kabadditan nga barya nga meyusu-usa tatun nga tiempo. Ari nga makalanno yatun nga kuartu nga paggatang tu tadday nga mammanu na balay. Yatun nga mammanu i tadday ta pinakamappo nga makan nga mammanu nga melaku.

18. Segun ta Marcos 12:43, 44, anni i kinagi ni Jesus ta nidanna na balu?

¹⁸ Bibbigan i Marcos 12:43, 44. Kuruga nappabbaw si Jesus tatun nga balu. Yatutta inagalanna i disipulosna. Kinagina nga innadda i babay, anna kunna: “Yatun nga pobre nga balu ay mas aru i nipay na anne nira ngamin.” Kunna paga: “I karuan nira [nerulay i mariku ira] ay turu laman na kuartu da nga ariad-da nga mawag i niyawa da. Ngem yoye i balu, kunne na paga nu pobre, nipay na i pilippiga nga kuartu na nga pakkatolayan na.” Turi ta niyawa naw nga matalo nga balu i nababbattang nga kuartuna, nattalo yayya nga si Jehova ngana i manangngal nisa.​—Sal. 26:3.

19. Anni i magigiammu tam ta kinagi ni Jesus meyannung ta pobre nga balu?

¹⁹ Iyaplikam ta pattolem i istoria. Iyavu mu ta baggim, ‘Anni i magigiammù ta kinagi ni Jesus meyannung ta pobre nga balu?’ Ipem i baggim ta situasion na balu. Magga kayàna nakuan nga mas aru i meyawana kani Jehova. Ngem maski nu kunnatun, kingnguana i adde na mawayyana. Niyawana i kapianan para kani Jehova. Ammu gapa ni Jesus nga nabala-balor ta Yamana i nidanna natun nga balu. Yaw gafu i magigiammu tam: Magayayya si Jehova nu iyawa tam nisa i kapianattam—i interu futu anna i interu kararua nga passerbi tam. (Mat. 22:37; Col. 3:23) Magayayya si Jehova nu masingi-singanna nga kukukuattam i ngamin nga mawayya tam. Meyaplika yatun nga prinsipio ta tiempo anna sikan nga  usu-usattam ta paddayaw tam, kasali ngana tatun i ministerio anna i study tam ira.

20. Kunnasim meyaplika i nagigiammum ta istoria na balu? Mangiyawa tu angngarigan.

²⁰ Kunnasim nga meyaplika i nagigiammum ta istoria na balu? Mannono ka tu espesipiko ira nga totolay nga mapagaram nu iperaddammu nira nga magayayya si Jehova ta kukukuadda para nisa. Angngariganna, egga kari i ammum nga bako nga makokkonsensia nu manonona nga awan tu kwentana megafu ta ari ngana tu gitta na dati i makuana ta ministerio megafu ta egga i takina onu makafi ngana yayya? Onu egga kari i kilalam nga brother nga egga i grabe anna kumata-katu nga takina, yayya nga nakkafi i nonona megafu ta ari yayya nga regular nga maka-study ta Kingdom Hall? Moffunammu ira nu maguvovug ka tu ‘mapia anna mepangngo.’ (Efe. 4:29) Ibillem nira i makapagaram nga nagigiammu tam ta istoria na pobre nga balu. Nu kuammu yatun, meperaddammu nira nga magayayya si Jehova nu iyawa tam nisa i kapianan. (Prov. 15:23; 1 Tes. 5:11) Nu komendammu i tanakuan megafu ta iyayawada i kapianadda kani Jehova maski nu gittana baddi laman yatun, tuttuttulammu tu mapia i dakkua ira ni Jesus.

21. Anni i pappursigiammu nga kuan?

²¹ Dakal i appabalo tam nga aru nga detalye meyannung ta pattolay ni Jesus i mabibbig tam ta Evanghelio ira. Megafu tatun, maparigattam yayya, anna matuttul tam tu mapia i dakkuana ira! Makasta nu kuannu tu addetan nga gigiammuan i Evanghelio ira ta personal study-nu onu ta Family Worship-nu. Ngem daddammattam nga tapenu mas mabbenefisio ittam tatun ira nga paggigiammu, mawag tu kuattam tu matotolay i istoria ira anna iyaplika tam danatun ta pattoletam. Fuera paga ta pamarig ta kingngua ira ni Jesus, mawag gapa nga ginnattam i kinagina ira. Ta tumunug nga artikulo, ammuattam nu anni ira i magigiammu tam ta ultimu ira nga kinagi ni Jesus nige yayya nga natay.