1. Sinni i narregalu ta abilidad tam nga maguvovug?

 REGALU nga naggafu ta Dios i abilidad tam nga maguvovug. Turi ta naparatu i ollu nga tolay nga si Adan, makeyusa yayya tu uvovug ira tapenu kibbidan i Yama na ta langi. Makanono gapa yayya tu bagu ira nga uvovug. Inusa ni Adan yatun nga abilidad turi ta ningaganan na i ngamin nga aya-ayam. (Gen. 2:19) Siguradu nga excited yayya turi ta first time na i makibbida ta kagitta na nga tolay—ta guapa nga atawa na nga si Eva!—Gen. 2:22, 23.

2. Anni i mangipasingan nga ari nga neyusa ta mepangngo i regalu nga paguvovug ta ollu nga tiempo anna sangawe?

² Ari nabbayag, ari ngana nga mepangngo i nikeyusa na regalu nga paguvovug. Nalladdug si Satanas nga Diablo kani Eva anna megafu tatun, nakaliwa anna nabbalin tu imperfekto i tolay. (Gen. 3:1-4) Marake i pinangusa ni Adan ta regalu nga paguvovug turi ta pinaliwa na si Eva anna si Jehova maski yayya mabba i nakaliwa. (Gen. 3:12) Nalladdug gapa si Cain kani Jehova kabalin na nga patayan i wagi na nga si Abel. (Gen. 4:9) Turi kua, egga gapa i nitura na gaka ni Cain nga si Lamec nga mangipasingan nu kunnasi kavayolente i totolay ta tiempo na. (Gen. 4:23, 24) Kumusta gapa ta tiempo tam? Maobserba tam nga ari ngana mappasiran nga maggageg ta publiko i pulitiko ira. Mariga ngana gapa nga makaleg tu pelikula nga awan tu maka-insulto onu bastus nga paguvovug. Ta eskuela onu ta pattrabahuan gapa, gagangay ngana laman nga makaginna tu paggageg. Normal ngana laman sangawe i marake nga paguvovug. Ipasingan laman natun nga kitaddake ngana i mundo.

3. Ta anni ittam nakuan magimmugug, anna anni i gigiammuattam taw nga artikulo?

 ³ Nu kanayun ittam makaginna tu marake ira nga paguvovug, baka mabbalin ngana gapa tu kunnatun i paguvovug tam nu ari ittam nga magimmugug. Bilang Cristiano, kayà tam nga mapagayayya si Jehova. Ngem ari makalanno nga ibita tam laman i marake nga paguvovug. Kayà tam nga usan i abilidad tam nga maguvovug tapenu medayaw i Dios. Gigiammuattam taw nga artikulo nu kunnasi tam nga makua yatun ta (1) pallayyagayya, (2) study, anna (3) pakibbida tam ta tanakuan. Ngem ikonsidera tam labbi nu ngatta interesadu si Jehova ta paguvovug tam.

4. Base ta Malakias 3:16, ngatta interesadu si Jehova ta paguvovug tam?

⁴ Bibbigan i Malakias 3:16. Ngatta tamma nitura ni Jehova ta “libru nga panaddamman” i ngagan danuri na masingan ta paguvovug da nga ikassidda yayya anna monag nga pannonopadda i ngagan na? Masingan ta paguvovug tam i mayan na futu tam. Kinagi ni Jesus: “Nu anni i egga ta nono [“futu,” NW], yatun laggapa i mallawan ta simu.” (Mat. 12:34) Masingan ni Jehova ta paguvovug tam nu kunnasi kadakal i pangaya tam ta nisa. Kayà na nga mattolay tu mannanayun ta paraiso danuri mangiddu ta nisa.

5. (a) Kunnasi nga afektan na paguvovug tam i paddayaw tam? (b) Gitta na masingan ta picture, anni nakuan nga paguvovug i ibita tam?

⁵ Nu marake i paguvovug tam, ari nga alawatan ni Jehova i paddayaw tam. (Sant. 1:26) Maporay, makapataki, anna opog i paguvovug na karuan nga ari nga mangaya ta Dios. (2 Tim. 3:1-5) Manaki tam nga mabbalin tu kagitta da. Kakayà tam gare nga mapagayayya si Jehova ta paguvovug tam. Ngem mapagayayya tam kari si Jehova nu masippo ittam nga makibbida nu egga ittam ta study onu ta ministerio, ngem makapataki anna maporay ittam mabba nga makibbida ta kafamilia tam ira nu awan tu tanakuan nga makaginna onu makasingan?​—1 Ped. 3:7.

6. Anni i makasta nga resulta na mapia nga paguvovug ni Kimberly?

⁶ Nu mapia i pangusa tam ta regalu nga paguvovug, mepasingattam nga tadday ittam nga  maddayaw kani Jehova. Masingan na tanakuan i nadduman “na tadday nga massesserbi ta Dios anna na tadday nga ari tu massesserbi sa.” (Mal. 3:18) Kunnatun i nesimmu kani Sister Kimberly. b Turi ta kahaiskul na, nepartner yayya ta kaklase na ta tadday nga school project. Ta pakkavulu da, napansin na kaklase ni Kimberly nga nerumu-ruma yayya ta tanakuan ira nga estudiante. Ari nga nabbida si Kimberly tu marake meyannung ta tanakuan, masippo yayya nga mabbida, anna ari nga maggageg. Megafu tatun, nappa-Bible study i kaklase na ta nisa. Siguradu nga magayayya si Jehova nu maginteres i tanakuan ta kinakurug megafu ta paguvovug tam!

7. Anni nakuan i pangusammu ta regalu na Dios nga abilidad nga maguvovug?

⁷ Kayà tam nga medayaw si Jehova anna mas maddukko ta wawwaragi gukaban na paguvovug tam. Ikonsidera tam ngana gafu i makua tam tapenu mabbalin ittam tu “papparigan ta paguvovug.”

8. Nu mallayyagayya ittam, kunnasi tam maparigan i paguvovug ni Jesus?

⁸ Masippo anna marespeto ka nakuan nga mabbida nu marake i kinagi da nikaw. Ta kegga ni Jesus ta davvun, napara-parake yayya. Kinagi da tu minaggillellaw yayya, vutu, doroban na Diablo, ari nga mattuppal ta Sabbath, anna maguvovug tu marake kontra ta Dios. (Mat. 11:19; 26:65; Luc. 11:15; Juan 9:16) Ngem ari nga nabbali si Jesus. Awan tu makapataki nga kinagi na ta nira. Gitta ni Jesus, maski nu mataki i paguvovug na tanakuan ta nittam, ari ittam nakuan maguvovug tu makapataki ta nira. (1 Ped. 2:21-23) Ngem mariga nga kuan yatun. (Sant. 3:2) Anni gafu i makoffun ta nittam?

9. Anni i makoffun tapenu makontrol tam i paguvovug tam nu mallayyagayya ittam?

⁹ Nu marake i pinakibbida nittam na layyagayyattam, ari nakuan ittam nga mallussaw. Kinagi ni Brother Sam, “Nonopakku ngana laman nga mawag na householder nga maginna i kinakurug anna posible paga nga manguli yayya.” Nu karuan, mapporay i householder megafu ta wrong timing i pinaddattal tam. Nu egga gafu i makibbida tam nga mapporay, kuattam i kingngua ni Sister Lucia. Awayya tam nga makimallo tu ababba tapus ikiddaw tam kani Jehova nga mabbalin ittam laman tu kalmadu tapenu ari ittam nga makekagi tu makapataki onu bastus nga uvovug.

10. Segun ta 1 Timoteo 4:13, anni nakuan i goal tam?

¹⁰ Pakastammu i panuddum. Malalaki ngana ta pallayyagayya si Timoteo, ngem mawag na paga nga pakastan i panuddu na. (Bibbigan i 1 Timoteo 4:13.) Kunnasi tam nga mapakasta  i panuddu tam? Mawag tu mapprepara ittam tu mapia. Pia ngana laman ta aru i rimienta nga makoffun ta nittam tapenu mas mabbalin tu malalaki ta panuddu. Makoffun ta nikaw i brosiur nga Mabbalin tu Efektibo ta Pabbibbig Anna Pattuddu anna i “Mabbalin tu Efektibo ta Ministerio” nga seksion na Pattolay Anna Ministerio Tam nga Cristiano​—Workbook ta Study. Usu-usammu kari danatun? Nu mapprepara ittam tu mapia, ari ittam kuruga maggudu-gudu anna mas komfiansa ittam nga mabbida.

11. Kunnasi nga napakasta na wawwaragi i panuddu da?

¹¹ Mapakasta tam paga i panuddu tam nu parigattam i tanakuan nga wawwaragi. Nononopan ni Sam, nga nakagi ta nappasa ira nga parapo, nu ngatta malalaki ta panuddu i karuan nga wawwaragi. Gininna na tu mapia nu kunnasi nga manuddu i wawwaragi tapus pinarigan na ira. Ginnan gapa tu mapia ni Sister Talia i appalappa na ekspiriensadu ira nga ispiker. Megafu tatun, nagigiammu na nu kunnasi nga ipakibbida i topiko ira nga maruddu nga iyavu na totolay ta ministerio.

12. Ta anni nga marigatan i karuan?

¹² Makapartisipa ittam ngamin ta study nu makipakkansion ittam kavulu i wawwaragi anna nu makkomento ittam nga neprepara tu mapia. (Sal. 22:22) Marigatan i karuan nga makkansion onu makkomento ta study. Kunnatukka kari gapa? Ammuan i nakoffun ta tanakuan tapenu ari ngana ira nga mappasiran nga kuan danatun.

13. Anni i makoffun tapenu napafutuan i pakkansiommu ta study?

¹³ Napafutuan nga makkansion. Daddammattam nakuan nga makkansion ittam tu Kingdom song ira megafu ta kayà tam nga dayawan si Jehova. Ammu ni Sister Sara nga ari yayya kuruga malalaki nga makkansion. Ngem kayà na nga dayawan si Jehova ta pakkansion. Yari tu nu mapprepara yayya para ta study, itangeprepara na yari ira i makansion. Mappraktis yayya anna pannonopan na nu anni i koneksion na lyrics ta magigiammu ta study. “Megafu tatun, nakafokus ngà ta kakkansionakku ari tu ta pakkansiokku,” kunna.

14. Nu maggudu-gudu ka, anni i makoffun tapenu makapakkomento ka lagapa ta study?

¹⁴ Kanayun nga makkomento. Kuruga mariga yaw para ta karuan. Istorian ni Talia nga nakagi ta nappasa ira nga parapo: “Kitazziga para ta nio i makkomento. Maggudu-gudu ngà gare nu mabbida ngà ta arubang na totolay. Ari laman nga halata yatun megafu ta kalmadu mabba i boses ku.” Ngem makkomento lagapa si Talia. Durante nga mapprepara yayya para ta study, nonopan na nga mawag tu ababba anna direkta i ollu nga tabbag ta pakkiavu. Kinagi na: “Okay laman  gafu tu ababba, simple, anna direkta ta punto i komentò, ta kunnatun mabba i kayà na mangikondukta.”

15. Anni nakuan i daddammattam nu makkomento ittam?

¹⁵ Magalangan gapa nga makkomento i karuan nga wawwaragi maski nu ari mabba ira nga minappasiran onu maggudu-gudu. Ngatta? Kinagi ni Sister Juliet, “Nu mittan, magalangan ngà nga makkomento megafu ta mavurung ngà tu sissimple anna ari kuruga makasta i komentò.” Ngem daddammattam nakuan nga kayà ni Jehova nga iyawa tam i kapianan nga komento tam base ta mawayya tam. c Kuruga magayayya yayya nu kuattam i ngamin nga mawayya tam ta pakkomento ta study maski nu mappasiran onu maggudu-gudu ittam.

16. Anni nga paguvovug i mawag nga ibita tam?

¹⁶ Ibitam i ngamin nga klase na “abusadu nga paguvovug.” (Efe. 4:31, NW ) Ari vuluvuga nga maggageg i Cristiano ira gitta na nakagi ta nappasa ira nga parapo. Ngem egga ira i klase na abusadu nga paguvovug nga ari kuruga halata. Yari tu mawag nga pagimmugurattam yatun. Angngarigan na, ari ittam makkagi tu marake ira nga gannug nu maggiristoria ittam meyannung ta totolay nga tanakuan i kultura da, tribu, onu lahi. Ari ittam gapa nga makkagi ta tanakuan tu makapa-insulto ira nga uvovug. Inamin na tadday nga brother: “Nu mittan, egga i kakkagiakku ta tanakuan nga abbo ku tu kaggalo anna awan tu dake na. Ngem makapa-insulto balo yatun yari tu natakitakku ira. Ta pappasa na daga-ragun, daka-dakal i neyuffun nio na atawà. Nu sikami ngana laman dua, ikagi na ta nio nu egga i nakagì ta nisa onu ta tanakuan nga makapa-insulto.”

17. Kunnasi tam meyaplika i Efeso 4:29 tapenu mapagaram i tanakuan?

¹⁷ Makapagaram nakuan i paguvovug mu. Minakkomenda ka nakuan imbes tu minakkritika onu minarreklamo. (Bibbigan i Efeso 4:29.) Aru nakuan i ipappabalo na Israelita ira, ngem makarerreklamo lagapa ira. Nu minarreklamo ittam, baka mainfluwensiattam i tanakuan nga marreklamo gapa. Daddammattam nga megafu ta marake i nibalita na mafulu nga espiya, ‘narreklamo i ngamin nga Israelita kontra kani Moises.’ (Num. 13:31–14:4) Ngem nu komendattam i tanakuan, makoffun ittam tapenu magayayya i ngamin. Siguradu nga napagaram i ana nga babay ni Jefte ta komendasion na kokkofun na nga babbay tapenu ari nga panawan i annungan na. (Uk. 11:40) Kunnaw gapa i kagian ni Sara nga nakagi ta nappasa ira nga parapo, “Nu komendattam  i tanakuan, mepatageno tam ta nira nga iddeddu ira ni Jehova anna na wawwaragi ta kongregasion.” Yari tu magaleg ka nakuan tu chansa ira tapenu mangikagi tu napafutuan nga komendasion.

18. Segun ta Salmo 15:1, 2, ngatta makkagi ittam tu kurug, anna anni i nelavu tatun?

¹⁸ Makkagi tu kurug. Ari tam nga mapagayayya si Jehova nu ari ittam nga makkagi tu kurug. Ikalussaw na i ngamin nga klase na palladdug. (Prov. 6:16, 17) Maski nu normal ngana laman para ta aru nga totolay sangawe i palladdug, tuttulattam lagapa i pagimamma ni Jehova meyannung tatun. (Bibbigan i Salmo 15:1, 2.) Baka ari ittam mabba nga malladdug. Ngem ibita tam nakuan nga sadyaan nga ari nga ikagi i ngamin nga informasion megafu ta kayà tam nga mali i konklusion na tanakuan.

19. Anni paga i ibita tam?

¹⁹ Ibitam i mat-chismis. (Prov. 25:23; 2 Tes. 3:11) Niyesplika ni Juliet nga nakagi ta nappasa ira nga parapo nu anni i efekto na chismis ta nisa. Kinagi na: “Madismaya ngà nu makaginna ngà tu chismis anna mawawan i pattalo ku ta tolay nga mangistoria tatun. Gare, nu ichit-chismis na i tanakuan nga tolay, baka ichit-chismis nà gapa ta tanakuan.” Nu matageno mu nga umay ngana ta chismis i paggiristorian nu, uliammu i pabbiridan nu anna magistoria ka tu positibo.​—Col. 4:6.

20. Anni i determinadu nga kuammu meyannung ta paguvovug mu?

²⁰ Taw nga mundo, aru nga totolay i marake i paguvovug da. Siguraduattam gafu nga mamagayayya kani Jehova i paguvovug tam. Daddammattam nga regalu ni Jehova i abilidad nga maguvovug anna interesadu yayya ta pangusa tam tatun. Bendisionan na i pangikagumattam nga medayaw yayya nu maguvovug ittam ta pallayyagayya, ta study, anna ta pakibbida tam ta tanakuan. Sonu daralan ngana ni Jehova yaw nga marake nga mundo, mas mabi ngana para ta nittam nga dayawan yayya ta paguvovug tam. (Jud. 15) Durante nga ari paga nga nesimmu yatun, determinadu ka nakuan nga mapagayayya si Jehova ta “uvovug” ira nga mallawan ta simu mu.​—Sal. 19:14.