NU MAVURU-VURUKKA, gitta na egga i madammo nga kattum. (Prov. 12:25) Narigatakka ngana kari megafu ta avvuru-vurummu? Natageno mu ngana kari nga gitta na ari mu ngana makaya? Ari laman tu sikaw i kunnatun. Nadduruma i rason nu ngatta aru ta nittam i gitta na nofu ngana i sikadda, mavuru-vurung, anna nadepres. Angngarigan na, tattangngawan na karuan i mataki nga kafamilia da. Natayan i karuan. Marigi-rigatan gapa i karuan megafu ta afektadu ira na kalamidad. Anni gafu i makoffun ta nittam nu mavuru-vurung ittam? a

Aru i magigiammu tam kani Patul David nu anni ira i puede nga kuattam nu mavuru-vurung ittam. Aru i nappasan na nga problema anna egga ira i tiempo nga maggi natay yayya. (1 Sam. 17:34, 35; 18:10, 11) Anni i nakoffun kani David turi ta navuru-vurung yayya? Kunnasi tam yayya maparigan?

Naggiriddang i problema ira ni David. Nonopammu i situasion na turi ta tattammangngan na si Patul Saul nga maya nga mamatay ta nisa. Turi ta nanoli ngana si David anna i totolena ta Ziklag, nakaddagan ira ta nadanganadda nga ina na kalaban i pakkukua da ira, sinuggi da i gibbalayadda, anna ina da maski i giffamiliadda. Anni i reaksion ni David? “Siminangi tu masikan si David anna i totolena adde ta awan ngana tu sikadda nga tumangi.” Anni paga i tadday nga problema ni David? “Pabbiridan na totolena nga baraggadda yayya.” (1 Sam. 30:1-6) Tallu gafu i naggiriddang nga madammo nga problema ni David: Delikadu i familia na, kayà yayya nga patayan na totolena, anna ala-alegan yayya ni Patul Saul tapenu patayan yayya. Siguradu nga grabe i vuru-vurung ni David!

Anni i tumunug nga kingngua ni David? Insigida na nga ‘pinasikan i nono na ta uffun ni Jehova nga Dios na.’ Kunnasi? Ammu tam nga neyugalian ni David i makimallo kani Jehova para ta uffun anna nononopan na nu kunnasi yayya nga inuffunan ni Jehova ta nappasa. (1 Sam. 17:37; Sal. 18:2, 6) Ammu ni David nga mawag na i direksion ni Jehova yari tu niyavu na kani Jehova nu anni i mawag nga kuan na. Turi ta nalawa ni David i direksion ni Jehova, insigida na nga sinuttul yatun. Megafu tatun, binendisionan ni Jehova si David anna i totolena tapus nabawi da gapa i familia da anna i pakkukua da ira. (1 Sam. 30:7-9, 18, 19) Nasifutammu kari i tallu nga kingngua ni David? Nakimallo yayya kani Jehova para ta uffun, ninono na nu kunnasi yayya inuffunan ni Jehova ta nappasa, anna sinuttul na i direksion ni Jehova. Kunnasi tam nga maparigan i kingngua ira ni David?

1. Makimallo. Kada mavurung ittam, makimallo ittam kani Jehova para ta uffun anna sirib. Malappawan ittam nu ivuvvu tam ta nisa i ngamin nga mamavvurung ta nittam. Ngem nu ari nga ipamavulun na situasiottam, awayya tam i makimallo tu ababba anna silensio. Kada mappoffun ittam kani Jehova, maparigattam i pakkomfiansa ni David nga kunnaw i kinagi na: “I YAFU i minangngiyegu niakan, yaya i pader ku nga masikan, yaya i mamaliag niakan. I Dios ku i minangngiyegu niakan, megafu sa ay awan tu mesimmu niakan.” (Sal. 18:2) Talaga kari nga makoffun i pakimallo? Kunnaw i kagian na payunir nga si Sister Kahlia: “Memammo i nono ku kada mabalin ngà makimallo. Nakoffun niakan i pakimallo tapenu maparigakku i appana-panono ni Jehova  anna mas mattalo ngà ta nisa.” Talaga dakal i meyuffun na probision ni Jehova nga pakimallo nu mavuru-vurung ittam.

2. Mannono. Nu daddammammu i nesimmu ira nikaw ta nappasa, egga kari i manono mu nga problema ira nga naattammammu megafu laman ta uffun ni Jehova? Nu pannonopattam nu kunnasi ittam nga inuffunan ni Jehova anna i aripan na ira ta nappasa, mas massikan i nono tam anna mas mattalo ittam ta nisa. (Sal. 18:17-19) “Egga i listà na pakimallo ku ira nga natabbag ngana,” kagian na elder nga si Joshua. “Nakoffun yatun niakan tapenu meraddammakku i tiempo ira nga egga i espesipiko nga kiniddò kani Jehova tapus niyawa na mismu yatun.” Nu pannonopattam nu kunnasi ittam nga inuffunan ni Jehova ta nappasa, mas massikan i nono tam tapenu malabanattam i avvuru-vurung tam.

3. Mattuttul. Nige tam nga maddesision nu anni i kuattam ta tadday nga situasion, makasta nu magaleg ittam ta Uvovug na Dios para ta pinakamapattalakkan nga giya. (Sal. 19:7, 11) Aru i makkakkagi nga nu mar-research ira meyannung ta tadday nga teksto, mas malippawa da nu kunnasi magaplika yatun ta pattoleda. Kunnaw i kagian na elder nga si Jarrod: “Nu mar-research ngà, mas aru i mammuakku meyannung ta tadday nga teksto. Tapus mantindiakku nu anni i kakkagian ni Jehova niakan. Makoffun yatun tapenu kurugakku nu anni i nabibbig ku tapus tuttulakku i giya na.” Nu alegattam i direksion ni Jehova ta Biblia tapus tuttulattam yatun, memammo anna magayayya ittam maski paga nu mavuru-vurung ittam.

Ammu ni David nga kawagan na i uffun ni Jehova turi ta navuru-vurung yayya. Talaga inappresia na i panguffun nisa ni Jehova yari tu kinagi na: “Iddam-mà tu sikan nga maggavva ta kontrà ira, anna pakawayya nga mamatulu ta sikad-da. Yaya i Dios nga mamasikan niakan.” (Sal. 18:29, 32) Awayya na nga matageno tam nga i problema tam ira ay megitta ta kontra ira nga ari tam nga mammaffu. Ngem ta uffun ni Jehova, mapeggan ittam tu pakawayya nga mapatulu danatun! Wan, nu makimallo ittam kani Jehova para ta uffun, pannonopattam i ngamin nga kingngua na para nittam, anna tuttulattam i direksion na, siguradu nga iyawa na i sikan anna sirib nga kawagattam nu mavuru-vurung ittam!