1. Anni i kuruga mamagayayya ta nittam?

 KAYÀ ni Jehova nga magayayya ittam. Ammu tam yatun ta tadday nga aspeto na vunga na masanto nga espiritu na i pagayayya. (Gal. 5:22) Mas dakal i pagayayya ta pangiyawa anne ta pangalawa. Yari tu kuruga magayayya ittam nu kuattam i adde na mawayya tam ta pallayyagayya anna panguffun ta wawwaragi tam.​—King. 20:35.

2-3. (a) Segun ta Galacia 6:4, anni i dua nga makoffun tapenu magayayya ittam lagapa ta passerbi kani Jehova? (b) Anni i gigiammuattam taw nga artikulo?

² Nakagi ni apostol Pablo ta Galacia 6:4 i dua nga makoffun tapenu mattalupaddian ittam nga magayayya. (Bibbigan.) Ollu, mawag nga iyawa tam i kapianattam kani Jehova. Nu iyayawa tam gafu i kapianattam ta nisa, mawag gapa nga magayayya ittam tatun. (Mat. 22:36-38) Mekadua, ari tam nakuan nga ikumpara i baggi tam ta tanakuan. Nu egga ira i makua tam megafu ta makasta i gawa-gawayyattam, egga i nalawa tam nga passanay, onu megafu ta abilidad tam, ipappabalo tam nakuan danatun kani Jehova ta yayya mabba i nangiyawa ta ngamin nga egga ta nittam. Ngem kunnasi nu mas malalaki i tanakuan anne ta nittam ta kukukuadda ta passerbi kani Jehova? Mawag lagapa nga magayayya ittam ta usu-usadda i abilidad da tapenu idayaw si Jehova, ari nga tapenu iyatannang i baggi da onu para ta pammakapianadda. Makagigiammu ittam nakuan gafu ta nira, imbes tu makikompetensia.

³ Gigiammuattam taw nga artikulo nu anni i kuattam nu matageno tam nga balabaddi ngana laman i makua tam ta passerbi. Ammuattam gapa nu kunnasi tam nga meyusa ta kapianan i talento anna abilidad tam anna nu anni i magigiammu tam ta tanakuan.

4. Anni i mamakkafi ta nono tam? Mangistoria tu angngarigan.

⁴ Makkafi i nono na karuan megafu ta ari da ngana nga makua i ngamin nga kayà da nga kuan ta passerbi da kani Jehova. Mabbako onu mallakay ngana gare ira. Mataki gapa i karuan ta nira. Kunnatun i natageno ni Carol. Dati bi yayya nga massesserbi nu sitaw mas dakal i pakawagan. Tatun nga tiempo, 35 i Bible study na anna napakaru i noffunan na tapenu maddedika anna mappabawtiso. Talaga aru i netuppal ni Carol ta ministerio na! Ngem nattaki yayya yari tu maruddu nga maddian ngana laman yayya ta balena. Kinagi na: “Megafu ta taki ku, ari ku ngana makua i kagitta na makua na tanakuan. Yari tu matageno ku nga matalo ira ngem sakan, ari. Makkafi talaga i nono ku ta maski anni aya ku nga mas paga nga masserbi kani Jehova, kunnaw mabba i situasiokku.” Kayà ni Carol nga kuan i adde na mawayya na para kani Jehova. Talaga makomendan yayya! Makasiguradu ittam nga magayayya i minangngikallo nga Dios tam megafu ta kukukuan ni Carol i adde na mawayya na.

5. (a) Anni nakuan i daddammattam nu makkafi i nono tam megafu ta situasiottam? (b) Base ta picture, kunnasi nga netulu-tuloy na brother nga iyawa i kapianan na ta passerbi kani Jehova?

⁵ Nu egga i tiempo nga makkafi i nono mu megafu ta situasiommu, iyavu mu ta baggim, ‘Anni kari i ikikkiddaw ni Jehova niakan?’ I kapianan nga meyawa mu segun ta situasiommu sangawe. Nonopammu yaw: Nakkafi i nono na 80-anios nga sister megafu ta ari na ngana makua i kagitta na nakua na ta ministerio na turi ta 40 i dagun na. Abbo na nga ari nga magayayya si Jehova maski nu iyayawa na i kapianan ta passerbi. Kurug kari yatun? Nonopammu yaw. Nu niyawa na sister i kapianan na turi ta 40 i dagun na tapus iyayawa na lagapa adde sangawe i kapianan nga passerbi na maski nu 80 ngana i dagun na, kayà na gafu kagian, ari yayya nagimmang nga iyawa i kapianan nga passerbi na. Nu matageno tam nga kurang i meyayawa tam nga passerbi tapenu mapagayayya si Jehova, mawag nga daddammattam nga si Jehova laman i makekagi nu anni i makapagayayya ta nisa. Nu kuattam gafu i kapianattam, gitta na kakkagian ni Jehova ta nittam: “Mapia i kingnguam!”—Ikumpara i Mateo 25:20-23.

6. Anni i magigiammu tam ta istoria ni Maria?

⁶ Mas mabi para nittam i mabbalin tu magayayya nu maffokus ittam ta makua tam, imbes tu ta ari tam nga makua. Angngarigan na, egga i taki ni Sister Maria yatutta limitadu laman i makua na ta ministerio. Ta gafu na, naraddam yayya anna natageno na nga awan tu sesserbi na. Ngem nanono na i tadday nga sister ta kongregasiodda nga bedridden. Ninono na nu anni i makua na tapenu moffunan yatun nga sister. Kinagi ni Maria: “Nivulu ku yayya ta pat-telephone witnessing anna pal-letter writing ku. Sonu lubbe ngà ngana kabalin na pallayyagayya mi dua, magayayya ngà ta egga i nakuà tapenu uffunan i kapangngurug ku.” Mabbalin ittam gapa tu mas magayayya nu maffokus ittam ta makua tam, imbes tu ta ari tam nga makua. Ngem kunnasi nu egga paga i makua tam onu malalaki ittam ta kukukuattam nga passerbi kani Jehova?

7. Anni i nitabarang ni apostol Pedro ta Cristiano ira?

⁷ Ta ollu nga tura ni apostol Pedro, pinagaram na i wawwaragi nga usan i maski anni nga abilidad anna talento da tapenu pagaramman i kapangngurug da. Nitura na: “I kataggi-tadday nikamu ay niddan na Dios ta awayya na nga makua. Kunna mapia nga manangngal, iserbi nu ta pammakapian na kataggi-tadday danaw.” (1 Ped. 4:10) Ari ittam nakuan  gafu magalangan nga usan tu mapia i abilidad tam megafu laman ta kavurungattam nga baka mappassil onu makkafi i nono na tanakuan. Nu magalangan ittam, ari tam nga meyawa kani Jehova i kapianattam.

8. Segun ta 1 Corinto 4:6, 7, ngatta ari tam nakuan iparayag i abilidad tam ira?

⁸ Mawag tu usattam tu mapia i abilidad tam ira. Ngem ari tam nakuan nga iparayag danatun. (Bibbigan i 1 Corinto 4:6, 7.) Angngarigan na, baka malalaki ka ta pangigafu tu Bible study. Ari ka magalangan nga usan yatun nga abilidad mu! Ngem ari mu gapa iparayag yatun. Ikonsidera yaw. Kunnasi nu insigida ka nga nakepegafu tu Bible study ta pallayyagayyam? Makakkasta nga ekspiriensa yatun anna baka excited ka nga iyistoria yatun ta field service group mu. Ngem turi ta nassirimmu kamu ngana uli na kagrupom, maddaggun nga istorian na tadday nga sister nga nakepalima yayya tu magazina. Nakepalima yayya tu magazina ngem sikaw, nakepegafu tu Bible study. Anni gafu i kuammu? Ammum nga mapagaram i kagrupom nu istoriammu i ekspiriensam ta nira. Ngem baka mas makasta nu sonu otru ulim ngana laman nga istorian yatun tapenu ari gapa nga makkafi i nono na kapangngurug mu megafu ta matageno na nga mas malalaki ka anne ta nisa. Pangipasingan yatun tu konsiderasion. Ngem ari ka nakuan lagapa magimmang ta pangiyofer mu tu Bible study. Usammu i abilidad mu!

9. Kunnasi tam nakuan nga usan i abilidad tam ira?

⁹ Daddammattam nga regalu na Dios i maski anni nga abilidad tam. Usattam nakuan danatun tapenu mapagaram i kongregasion, ari nga tapenu iyatannang i baggi tam. (Fil. 2:3) Nu usattam i sikan anna abilidad tam ira tapenu kuan i uray na Dios, mabbalin ittam tu magayayya. Ngatta? Usu-usattam gare danatun tapenu medayaw si Jehova, ari nga tapenu makikompetensia ta tanakuan onu pakurugan ta nira nga mas malalaki ittam.

10. Ngatta ari mepangngo nga ikumpara tam i baggi tam ta tanakuan?

¹⁰ Nu ari nga magimmugug i tadday nga tolay, baka ikumpara na i kalalakian na ta pakkafian na tanakuan. Angngarigan na, baka malalaki nga mappalappa i tadday nga brother. Megafu tatun, nononopan na nga mas malalaki yayya anne ta tadday paga nga brother nga marigatan nga mappalappa. Ngem maski nu pakkafian natun nga brother i mappalappa, posible nga malalaki labbi gapa yayya ta pamadulo, passanay ta ána na, onu ta pallayyagayya. Mappappabalo ittam ta aru i maabilidad  nga wawwaragi tam anna usu-usadda yatun ira nga abilidad da tapenu passerbian si Jehova anna uffunan i tanakuan!

11. Ngatta ikagumattam nakuan nga tuttulan i ehemplo ni Jesus?

¹¹ Kurug gapa nga ari tam nakuan ikumpara i baggi tam ta tanakuan nga massesserbi kani Jehova. Ngem makagigiammu ittam ta nira. Si Jesus i kakastan nga ehemplo para ta nittam. Siempre, ari tam ikumpara i baggi tam kani Jesus ta perfekto yayya. Ngem aru i magigiammu tam ta makasta ira nga kualidad na anna ta kikkingngua na. (1 Ped. 2:21) Nu kuattam gafu i adde na mawayya tam tapenu tuttulan tu mapia i ehemplo na, mapprogreso ittam ta passerbi kani Jehova anna ta ministerio tam.

12-13. Anni i magigiammu tam kani Patul David?

¹² Aru nga ehemplo na matalo nga lallaki anna babbay ta Biblia i makasta nga parigattam maski paga nu imperfekto ira. (Heb. 6:12) Tadday tatun si Patul David. Inagalan yayya ni Jehova bilang “tolay nga meddu ta futù” onu ta tanakuan nga bersion na Biblia, “i klase na tolay nga talaga kakayà ku.” (King. 13:22) Ngem imperfekto si David. Nakakua paga lagu yayya tu madammo ira nga liwa. Maski kunnatun, makasta lagapa yayya nga ehemplo para ta nittam. Ngatta? Turi gare ta netunung yayya, ari na nirasonan i baggi na. Inalawa na lallagu i madammo nga tabarang ta nisa tapus napafutuan yayya nga nabbabawi ta nakua na ira. Megafu tatun, pinakoma yayya ni Jehova.​—Sal. 51:3, 4, 10-12.

¹³ Makagigiammu ittam kani David nu iyavu tam danaw ta baggi tam: ‘Maggigginna ngà kari ta tabarang? Insigidà kari nga aminan i liwa ku onu irasonakku i baggì? Minammaliwa ngà kari? Ikagumakku kari nga ari ngana ulian i nakaliwatakku ira?’ Puedem gapa nga mannono tu karuan paga nga pakkiavu nu mabibbig mu i tanakuan paga nga matalo nga lallaki anna babbay ta Biblia. Kaparehum kari ira tu pappasa-pasan? Anni ira i makasta nga kualidad nga nipasingadda? Ta kada karakter na Biblia nga mabibbig mu, iyavu mu: ‘Kunnasì tamma maparigan yaw nga matalo nga aripan ni Jehova?’

14. Anni i meyuffun na nu obserbattam i kapangngurug tam ira?

¹⁴ Makagigiammu ittam gapa nu obserbattam i kapangngurug tam ira nga mabbing anna manakam. Angngarigan na, egga kari i kakongregasiommu nga matalo nga attattamman na i kapurueba? Awayya na nga feffersan yayya na marake nga kakavulu, kokkontran yayya  na familia na, onu egga i taki na. Egga kari i makasta ira nga kualidad na nga awayyam parigan? Nu pannonopammu i makasta nga ehemplo natun nga kapangngurug mu, magigiammum nu kunnasi gapa nga attamman i mismu nga kapuruebam ira. Pia ngana laman ta kavulu tam i wawwaragi nga makasta nga apparigan i pangurug da!—Heb. 13:7; Sant. 1:2, 3.

15. Anni nga tabarang ni apostol Pablo i makoffun tapenu kanayun ittam nga magayayya ta passerbi kani Jehova?

¹⁵ Mawag nga kuan na kada tadday ta nittam i kapianan na tapenu memammo anna mattaradday i kongregasion. Kunnatun i kingngua na Cristiano ira ta ollu nga siglo. Nadduruma i abilidad anna annungadda. (1 Cor. 12:4, 7-11) Ngem ari nga yatun i nabbalin tu rason tapenu makkinna-kompetensia ira anna massirina. Pinagaram ni Pablo i kada tadday ta nira nga usan i maski anni nga abilidad da “ta passerbi kani Cristo tapenu mapasikan i iglesia nga baggi na” onu i kongregasion. Kunnaw i nitura ni Pablo ta taga-Efeso ira: “Nu mattrabahu ngamin danaw nga parte nga kunna mepangngo, dumakal anna mapasikan i interu nga baggi gafu ta aya.” (Efe. 4:1-3, 11, 12, 16) Turi ta kingngua da yatun nga kinagi ni Pablo, nakoffun ira tapenu memammo anna mattaradday i kongregasion. Kunnatun gapa i kongregasiottam ira sangawe.

16. Anni nakuan i determinadu nga kuattam? (Hebreo 6:10)

¹⁶ Determinadu ka nakuan nga ari ikumpara i baggim ta tanakuan. Ikagumammu lallagu nga parigan i kualidad ira ni Jesus. Makagigiammu ka gapa ta pangurug na karakter ira ta Biblia anna na wawwaragi ta tiempo tam. Nu kukukuammu i kapianan ta passerbim, mangurug ka nakuan nga si Jehova ay ‘matunung anna arian na nga kattaman i kingnguam.’ (Bibbigan i Hebreo 6:10.) Kanayukka nakuan nga magayayya ta passerbim kani Jehova megafu ta ammum nga appresian na i pangiyawa mu ta kapianammu tapenu mapagayayya yayya.