1. Anni ira nga espiritual nga goal i awayya tam nga gawatan?

 BILANG kurug ira nga Cristiano, kuruga iddeddu tam si Jehova yayya nga kayà tam nga iyawa ta nisa i kapianattam. Ngem tapenu meyawa tam i kapianan para kani Jehova, mawag tu mannono ittam tu espiritual ira nga goal, gitta na pakkultiba ta Cristiano ira nga kualidad, paggigiammu tu makoffun ira nga skill, anna pannono tu makua tam tapenu mapasserbian i tanakuan. b

2. Ngatta mannono ittam nakuan tu espiritual ira nga goal anna ikagumattam nga gawatan danatun?

² Ngatta mannono ittam nakuan tu espiritual ira nga goal anna ikagumattam nga gawatan danatun? I primeru nga rason ay kayà tam nga mapagayayya i minaggiddu nga Yama tam ta langi. Magayayya si Jehova nu masingan na nga usattam tu mapia i abilidad tam tapenu passerbian yayya. Kayà tam gapa nga maggawa tu espiritual ira nga goal tapenu mas moffunattam i wawwaragi. (1 Tes. 4:9, 10) Maski nu kunnasi kabayag tam ngana nga massesserbi, awayya tam lagapa nga mapprogreso ta espiritual. Innattam nu kunnasi tam nga makua yatun.

3. Segun ta 1 Timoteo 4:12-16, anni i kayà ni apostol Pablo nga kuan ni Timoteo?

³ Piga ragun ngana nga elder i mabbing nga si Timoteo turi ta ollu nga sinurakkan yayya ni apostol Pablo. Ngem pinagaram lagapa yayya ni Pablo nga tulu-tuloy nga mapprogreso ta espiritual. (Bibbigan i 1 Timoteo 4:12-16.) Durante nga bibbigammu i kinagi ni Pablo, mapansin mu nga egga i dua nga espiritual nga goal nga kayà ni Pablo nga gawatan ni Timoteo.  Ollu, kultiban na nakuan i Cristiano ira nga kualidad gitta na aya, pangurug, anna kinarenu ta moral. Mekadua, pakastan na nakuan i abilidad na ta publiko nga pabbibbig, ta panabarang, anna ta panuddu. Gigiammuattam i ehemplo ni Timoteo tapenu masingattam nu kunnasi makoffun i pannono tu realistiko ira nga goal tapenu mapprogreso ittam ta espiritual. Ikonsidera tam gapa i karuan nga makua tam tapenu mapalawa i ministerio tam.

4. Segun ta Filipos 2:19-22, ngatta aru i pinangusan ni Jehova kani Timoteo?

⁴ Ngatta aru i pinangusan ni Jehova kani Timoteo? Megafu ta masingi-singan na tanakuan i Cristiano ira nga kualidad na. (Bibbigan i Filipos 2:19-22.) Base ta kinagi ni Pablo meyannung kani Timoteo, masingattam nga minappakalinno yayya, matalo, malappo, anna mapattalakkan. Minaggiddu gapa yayya anna ikavurungan na i wawwaragi. Megafu tatun ira nga kualidad na, iniddu ni Pablo si Timoteo anna ari yayya nga nagalangan nga italo ta nisa i mariga ira nga annungan. (1 Cor. 4:17) Iddukan ittam gapa ni Jehova anna mas meyusa ittam ta kongregasion nu kultibattam i kualidad ira nga kakayà na.​—Sal. 25:9; 138:6.

5. (a) Kunnasim makannammuan nu anni nga kualidad i pakastammu? (b) Ta picture, anni i kukukuan na sister tapenu mabbalin yayya tu mas minakki-empatia ta tanakuan?

⁵ Mannono tu espesipiko nga goal. Makimallo ka tapenu manono mu nu anni nga kualidad i mawag nga pakastammu. Mappili ka tu tadday nga espesipiko nga kualidad nga kayà mu nga pakastan. Angngarigan na, kayà mu kari nga mabbalin tu mas minakki-empatia? Onu karagatammu kari nga mas uffunan i kapangngurug mu ira? Mawag kari nga mabbalikka tu mas minangngirattal tu imammo anna minammakoma? Makoffun nikaw nu iyavu mu ta madukko nga kofummu nu anni paga i mawag mu nga pakastan ta kualidad mu ira.​—Prov. 27:6.

6. Kunnasim nga ikaguman nga gawatan i goal mu nga kultiban i tadday nga kualidad?

⁶ Ikagumammu nga gawatan i goal mu. Kunnasim nga makua yatun? Gigiammuammu tu mapia i kualidad nga kayà mu nga kultiban. Angngarigan na, baka kayà mu i mabbalin tu mas minammakoma. Awayyam labbi nga bibbigan anna monag nga pannonopan danuri ehemplo ta Biblia nga namakoma anna danuri ari nga namakoma. Ikonsidera i ehemplo ni Jesus. Sigga-paran nga pinakoma na i tanakuan. (Luc. 7:47, 48) Ari gapa yayya naffokus  ta pakkamaliadda. Nasingan na lallagu i potensial da. Ari tu kunnatun i Fariseo ira ta kaggawan ni Jesus megafu ta “uyu-uyawad-da i ikattolay da.” (Luc. 18:9) Kabalimmu nga mapannonopan danatun nga ehemplo, iyavu mu ta baggim: ‘Anni kari i masingi-singakku ta tanakuan? Anni ira nga kualidad da i agga-sinnakku?’ Nu marigatakka nga pakoman i tadday nga tolay, puruebammu nga itura i ngamin nga manono mu nga makasta nga kualidad na. Tapus iyavu mu ta baggim: ‘Anni tamma i masingi-singan ni Jesus ta nisa? Pakoman kari yayya ni Jesus?’ Makoffun yatun tapenu moli tam i appana-panono tam. Ta ollu, baka marigatan ittam nga pakoman i nakataki ta nittam. Ngem nu ari ittam magimmang nga ikaguman yatun, mabbalin ittam lapa saw tu mas minammakoma.

7. Kunnasi ipasingan na Proverbio 22:29 nga usu-usan ni Jehova i skilled ira nga trabahador sangawe?

⁷ I paggigiammu tu makoffun ira nga skill i tadday paga nga goal nga awayyam gawatan. Aru nga trabahador i mawag ta pamataddag tu fasilidad ira na Bethel, Assembly Hall, anna Kingdom Hall. Nagigiammu na aru taw nga trabahador i skill da ira gukaban na pakipattrabahu da ta ekspiriensadu ira nga wawwaragi. Gitta na masingan ta picture, parehu nga gigiammuan na brother anna na sister i skill ira nga kawagan ta pammentena ta Assembly Hall anna Kingdom Hall ira. Aru i metuttuppal ni Jehova nga “Patul adde noka” anna ni Cristo Jesus nga “Patul na ngamin nga patul” tu kappabbaw ira nga gannug gukaban na skilled ira nga trabahador. (1 Tim. 1:17; 6:15; bibbigan i Proverbio 22:29.) Kayà tam nga mallallappo anna usan i skill tam ira tapenu medayaw si Jehova, ari tu i baggi tam.​—Juan 8:54.

8. Kunnasim nga makannammuan nu anni nga abilidad i gigiammuammu?

⁸ Mannono tu espesipiko nga goal. Anni nga abilidad i kayà mu nga gigiammuan? Awayyam nga makkiavu ta elder ira ta kongregasion nu anna puede gapa ta manangngal ta sirkito nu anni nga abilidad i masingadda nga awayyam gigiammuan. Angngarigan na, nu kinagi da tu pakastammu i abilidad mu nga maguvovug anna manuddu, mappoffukka ta nira tapenu makannammuammu nu anni i espesipiko nga gannug nga awayyam pakastan. Tapus ikagumammu nga mapprogreso tatun. Kunnasim nga makua yatun?

9. Kunnasim nga ikaguman nga gawatan i goal mu nga gigiammuan i tadday nga abilidad?

⁹ Ikagumammu nga gawatan i goal mu. Angngarigan na, baka kayà mu nga pakastan i panuddum. Gigiammuammu tu mapia i brosiur nga Mabbalin tu Efektibo ta Pabbibbig Anna Pattuddu. Nu egga i neyawa nga asayment mu ta study, ikiddom ta kualipikadu nga wagi nga ginnan na i partem nige mu nga itaddag yatun tapus makkiddaw ka tu suhestion. Ariammu nga itala-talattan nga iprepara i asayment mu tapenu masingan na tanakuan nga malappo ka anna mapattalakkan.​—Prov. 21:5; 2 Cor. 8:22.

10. Mangistoria tu angngarigan nu kunnasi mapprogreso ta abilidad nga kayà tam gigiammuan.

¹⁰ Kunnasi nu talaga marigatakka ta abilidad nga kayà mu nga gigiammuan? Ari ka nakuan magimmang! Tadday nga angngarigan si Brother Garry. Marigi-rigatan yayya nga mabbibbig. Manono na paga lagu nga fermi i pasiran na turi ta pinurueban na nga mabbibbig ta study da. Ngem nikaguman ni Brother Garry nga pakastan i abilidad na. Kinagi na nga megafu ta nalawa na nga passanay, makapappalappa ngana yayya sangawe ta Kingdom Hall, ta asembli sirkito, anna ta kombension ira!

11. Kagitta ni Timoteo, anni i makoffun tapenu masanay ittam para ta kammungan ira nga responsibilidad?

 ¹¹ Nabbalin kari tu sobra i kalalaki ni Timoteo ta pappalappa onu panuddu? Awan tu kagian na Biblia. Ngem siguradu nga nabbalin yayya tu malalaki ta pangituppal ta annungan na megafu ta sinuttul na i tabarang ni Pablo. (2 Tim. 3:10) Nu maggigiammu ittam gafu gapa tu abilidad anna skill ira, mas masanay ittam para ta kammungan ira nga responsibilidad.

12. Kunnasi ka nga nammakapia ta panguffun na tanakuan?

¹² Mammakapia ittam ngamin ta panguffun na tanakuan. Angngarigan na, nu mahospital ittam, mappappabalo ittam ta mabbisita nittam i elder ira na Hospital Liaison Committee onu Patient Visitation Group. Nu egga gapa i madammo nga problema tam, pia ngana laman ta egga i minangngikavurung nga elder ira nga egga i tiempo da nga magginna anna mamanna-bannay ta nittam. Nu mawag tam gapa i uffun ta pab-Bible study tam, appresiattam nu mevulu nittam i ekspiriensadu nga payunir tapus mangiyawa yayya tu suhestion ta nittam. Magayayya ngamin danatun nga wawwaragi nga uffunan ittam. Magayayya ittam gapa kagitta da nu sigga-parattam nga passerbian i wawwaragi tam. Kinagi ni Jesus nga “mas dakal i pagayaya ta pangiyawa anne ta pangalawa.” (King. 20:35) Nu kayà mu gafu nga mas aru paga i makuam para kani Jehova, anni i makoffun tapenu magawa mu yatun ira nga goal mu?

13. Nu mannono ka tu goal, anni nakuan i daddammammu?

¹³ Daddammammu nga espesipiko nakuan i goal ira nga nonopammu. Angngarigan na, baka manono mu, ‘Kayà ku nga mas aru paga i makuà ta kongregasion.’ Ngem nu kunnatun i goal mu, marigatakka nga ammuan nu kunnasim nga magawa yatun. Baka ari mu paga lagu mammuan nu nadde mu ngana yatun. Yari tu mappili ka tu manawag anna espesipiko nga goal. Puedem nga itura yatun nga goal anna i planom nu kunnasim nga gawatan yatun.

14. Nu mannono ittam tu goal ira, ngatta mawag tu mabi ittam laman nga magadjust?

¹⁴ Nu mannono ittam tu goal ira, mawag gapa tu mabi ittam laman nga magadjust. Ngatta? Ari tam gare nga kontroladu i ngamin nga mesimmu nittam. Angngarigan na, nanguffun si apostol Pablo tapenu mabuu i  bagu nga kongregasion ta siudad na Tesalonica. Magga goal na nga ari nga manaw tari tapenu uffunan i bagu ira nga Cristiano. Ngem megafu ta kumokkontra kani Pablo, fersadu nga nanaw yayya tatun nga siudad. (King. 17:1-5, 10) Nu ari nga nanaw si Pablo tatun nga siudad, magga nappeligro i inango na wawwaragi. Ngem ari lagapa nga nagimmang si Pablo nga uffunan ira. Nagadjust yayya base ta nanguli nga situasion na. Yatutta turi kua, zinog na si Timoteo ta Tesalonica tapenu paladdan i pangurug na bagu ira nga Cristiano tari. (1 Tes. 3:1-3) Siguradu nga magayayya i taga-Tesalonica ira ta sigga-paran si Timoteo nga masserbi nu sitaw yayya kawagan!

15. Anni i efekto na situasion ira nga ari tam kontroladu ta goal tam ira? Mangistoria tu angngarigan.

¹⁵ Makagigiammu ittam ta ekspiriensa ni Pablo ta Tesalonica. Baka egga i goal tam nga pribilehio ngem megafu ta ari tam nga kontroladu i situasiottam, ari tam ngana nga magawa yatun. (Ecl. 9:11) Nu kunnatun i situasiommu, mabi ka laman nakuan nga magadjust tapus mappili ka tu tanakuan nga goal nga posible nga magawa mu. Kunnatun i kingngua na magatawa nga da Ted anna Hiedi. Megafu ta taki, mawag tu panawadda i asayment da ta Bethel. Ngem megafu ta iddukadda si Jehova, nannono ira tu tanakuan nga makua da tapenu mapalawa i ministerio da. Yatutta nagaplay ira bilang regular pioneer. Ari nabbayag, nabbalin ira tu special pioneer. Na-train paga lagu si Ted bilang substitute circuit overseer. Ngem nanguli i age limit para ta manangngal ira ta sirkito. Megafu tatun, na-realize ni Ted anni Hiedi nga ari ngana ira nga kualipikadu para tatun nga pribilehio. Maski paga nu dismayadu ira, ammu da nga egga paga i tanakuan nga makua da tapenu mapasserbiadda si Jehova. Kinagi ni Ted, “Nagigiammu mi nga ari laman tu tadday nga klase na passerbi i makua tam para kani Jehova.”

16. Anni i magigiammu tam ta Galacia 6:4?

¹⁶ Ari tam nga makontrol i ngamin nga mesissimmu ta pattoletam. Ari tam gafu nga nonopan nga nabalor ittam laman kani Jehova megafu ta pribilehio tam ira anna ariattam gapa nakuan nga ikumpara i baggi tam turi ira ta egga i pribilehio da nga awan ta nittam. Kagian ni Hiedi, “Ari ka nga magayayya nu ikumparam i pattolem ta pattolay na tanakuan.” (Bibbigan i Galacia 6:4.) Mas makasta gafu nu nonopattam nu anni ira i awayya tam paga nga kuan tapenu mas aru i keyusattam. c

17. Kunnasi ka makualipika para ta pribilehio ira ta passerbi?

¹⁷ Mabbalikka tu available para ta pribilehio  ira ta passerbi nu simple i pattolem anna lillitammu i maggatu nu ari mabba nga kawagan. Mannono ka tu baraddi ira nga goal nga makoffun nikaw nga magawa i mas darakal ira nga goal. Angngarigan na, nu goal mu nga marregular pioneer, awayya na kari nga magaplay ka labbi bilang continuous auxiliary pioneer sangawe? Nu goal mu gapa i mabbalin tu ministerial nga aripan, awayya na kari nga ammungammu i tiempom ta pallayyagayya anna pabbisita ta mataki anna mannakam ta kongregasion nu? Makoffun i ekspiriensam ira sangawe tapenu mapeggakka tu kammungan ira nga pribilehio na passerbi ta mappange. Kuammu nakuan gafu i adde na mawayyam ta maski anni nga asayment nga neyawa ta nikaw.​—Roma 12:11.

18. Anni i magigiammu tam ta ehemplo ni Beverley? (Innan gapa i picture.)

¹⁸ Maski nu lakay onu bako ittam ngana, egga lagapa ira i espiritual nga goal nga awayya tam nga nonopan anna gawatan. Kunnatun i kingngua na 75-anios nga si Sister Beverley. Egga i grabe nga taki na yatutta marigatan ngana yayya nga lumakag. Ngem talaga kayà na nga mas aru paga i makua na ta kampania para ta Memorial. Yatutta nannono yayya tu espesipiko ira nga goal. Kuruga magayayya si Beverley turi ta nakua na i goal na ira para tatun nga kampania. Megafu ta ehemplo na, napaguyu i tanakuan nga mas mallallappo ta ministerio da. Appresian ni Jehova i kukukuan na lallakay anna babbako nga wawwaragi tam maski paga nu limitadu ngana laman i makua da megafu ta situasiodda.​—Sal. 71:17, 18.

19. Anni ira nga espiritual nga goal i awayya tam gawatan?

¹⁹ Mannono ka tu goal ira nga posible nga magawa mu. Kultibammu i kualidad ira nga mamagayayya kani Jehova. Maggigiammu ka tu abilidad anna skill ira tapenu mas aru i awayya nga pangusan nikaw na Dios anna na organisasion na. Mannono ka gapa tu awayyam nga kuan tapenu mas nga mapasserbian i wawwaragi. d Kagitta ni Timoteo, “masingan na ngamin nga totolay i papprogreso na trabahum” megafu ta pamendision ni Jehova.​—1 Tim. 4:15.