I tabba ay “kuruga serioso anna formal nga pangikagi onu pangipromesa nga kuan i tadday nga gannug, nu sitaw maruddu nga melavu tatun i Dios . . . bilang testigu.” Puede yatun nga mevuya onu metura.

Awayya na nga nononopan na karuan nga mali i magassingan nu egga i itabba tam megafu taw nga kinagi ni Jesus: “Ari kamu vuluvuga nga magassingan nu egga i itabba nu . . . ‘Wan’ kun-nu nu wan; ‘Ari’ nu ari. Ta i anni laman nga iyammung nu paga, ay maggafu ngana ta Demonio.” (Mat. 5:33-37) Magga ammu ni Jesus nga base ta Mosaiko nga Dob, egga ira i tabba nga mekiddaw ta Israelita ira anna nagassingan gapa maski i matalo ira nga aripan na Dios gari. (Gen. 14:22, 23; Ex. 22:10, 11) Ammu na gapa nga maski si Jehova ay nagassingan turi ta egga i nitabba na. (Heb. 6:13-17) Ta kinagi gafu ni Jesus, ari na kayà kagian nga mawag tu ari ittam vuluvuga magassingan nu egga i itabba tam. Sinabarangngan na laman i totolay nga ari nakuan ira magassingan nu egga i itabba da meyannung ta gannug ira nga ari importante onu awan tu sesserbi na. Kanayuttam nakuan gafu nga kuan nu anni i nitabba tam megafu ta yatun i kayà ni Jehova nga kuattam.

Anni i kuammu nu ikiddoda ta nikaw nga magassingakka? Siguraduammu labbi nga makuam nu anni i itabbam. Nu ari ka siguradu, mas makasta nu ari ka ngana laman magassingan. Nitabarang na Uvovug na Dios: “Mas makasta nu ari ka mangitabba anne ta mangitabba ka tapus kammu nga makua.” (Ecl. 5:5) Ikonsideram gapa i prinsipio ira ta Biblia meyannung tatun nga tabba tapus maddesisiokka base ta nasanay-Biblia nga konsensiam. Anni i karuan tatun nga prinsipio na Biblia?

Mekunnay ta uray na Dios i karuan nga tabba. Angngarigan na, ta Saksi ira ni Jehova, makka-tabba i nobio anna nobia ta kasal da. Ta arubang na Dios anna na totolay, ipromesa na nobio anna nobia nga ayatan, tangngallan, anna irespeto da i kataggi-tadday anna kuadda yatun “durante nga sigga-matolay [ira].” (Awayya na nga ari tu yatun i eksakto nga kagian na karuan nga mannobio ta kasal da, ngem mangitabba lagapa ira ta arubang na Dios.) Kabalin natun, mabbalin ngana ira nga magatawa anna mawag nga mattalupaddian ira nga magatawa adde ta pateda. (Gen. 2:24; 1 Cor. 7:39) Yatun nga tabba ta kasal ay mepangngo nga unnug anna mekunnay ta uray na Dios.

Mekontra ta uray na Dios i karuan nga tabba. Ari nga magassingan i kurug nga Cristiano nga mangusa yayya tu armas tapenu idefensa i nasion na onu pallikuran i pangurug na ta Dios megafu ta mekontra yatun ta dob na Dios. ‘Ari nga kukua na mundo’ i Cristiano ira yatutta ari ittam nga makiparte ta isyu anna gerra ira na mundo.​—Juan 15:19; Isa. 2:4; Sant. 1:27.

 Nakadepende ta konsensia i karuan nga tabba. Nu karuan, mawag nga nonopattam tu mapia i tabarang ni Jesus nga ‘iyawa ta Emperador i kukua ira na Emperador anna iyawa ta Dios i kukua ira na Dios’ nige tam nga maddesision nu magassingan ittam ta tadday nga tabba.​—Luc. 20:25.

Angngarigan na, baka magaplay i tadday nga Cristiano para ta citizenship onu passport tapus nakannammuan na nga mawag na nga kuan i oath of allegiance. Nu i oath of allegiance tatun nga nasion ay pagassingan nga kuan i tadday nga gannug nga mekontra ta dob na Dios, ari nga ipamavulun na nasanay-Biblia nga konsensia na nga kuan yatun. Ngem awayya nga ikonsidera na gobiernu i konsensia na, yari tu ipamavuludda nga moli i karuan nga uvovug tatun nga oath of allegiance.

Nu noli ngana i oath of allegiance, awayya na nga mekunnay ngana i pagassingan ta prinsipio na Roma 13:1: “Mawag tu ngamin i totolay ay makimoray ta mammaguray ira nga egga ta gubiernu.” Tatun nga situasion, awayya gafu ngana nga desisionan na Cristiano nga magassingan yayya nga kuan i tadday nga gannug nga talaga mabba ipakua na Dios ta Cristiano ira.

Importante gapa nga tuttulammu i nasanay-Biblia nga konsensiam nu ikiddoda ta nikaw nga mangusa ka tu tadday nga gannug onu egga i kuammu nga espesipiko nga posision nu magassingakka. Pagassinganan na Romano anna Scita ira gari i espada da. Kayà kagian natun nga usadda i simbolo na tadday nga dios na gerra bilang garantiya nga mapammakatalakkan i tadday nga tolay. Iyoddu gapa na Griego ira i lima da ta langi nu magassingan ira. Rekunnisiadda gare nga egga i dios nga makannammu ta kinagi anna kiningngua da anna egga i tattabbagan na totolay tatun nga dios.

Siempre, ari nga pagassinganan na tadday nga massesserbi kani Jehova i maski anni nga simbolo na nasion nga konektadu ta falsu nga paddayaw. Ngem kunnasi nu ikiddaw na korte nga ipotummu i limam ta Biblia anna magassingakka nga ikagim i kurug? Ta kunnatun ira nga situasion, awayyam nga maddesision nga kuan yatun ta nakagi mabba ta Biblia i meyannung ta matalo ira nga aripan nga egga i posision nga kingngua da turi ta nagassingan ira. (Gen. 24:2, 3, 9; 47:29-31) Mawag nga daddammammu nga nu kuammu yatun, itattabbam ta arubang na Dios nga ikagim i kurug. Mawag gafu nga ikagim i kurug ta maski anni nga iyavu da ta nikaw.

Importante ta nittam i relasiottam kani Jehova, yatutta sigga-pakimallo tam nakuan nga nonopan nu ikiddoda nittam nga magassingan ittam. Siguraduattam nga ari nga mekontra yatun ta konsensia tam onu ta prinsipio ira na Biblia. Nu nadesisiottam gapa nga magassingan, mawag nga kuattam yatun.​—1 Ped. 2:12.