Ta kunnatun nga situasion, nu nangatawa uli i tadday nga lalaki, imammatan na kongregasion nga awan ngana tu bisa na pagatawa da na dati nga atawa na anna mekonsidera nga egga i bisa na pagatawa da na bagu nga atawa na. Tapenu malippawa tam i rason ira, ikonsidera tam i kinagi ni Jesus meyannung ta diborsio anna pangatawa uli.

Kinagi ni Jesus ta Mateo 19:9 i nebase-Biblia laman nga rason nga mapawan i bisa na pagatawa. Kinagi na: “I lalaki nga mangigungay ta atawa na, fuera laman nu makigannug i babay, yatun nga lalaki ay makaliwa ta panallaw nu mangatawa uli tu tanakuan.” Tatun nga kinagi ni Jesus, mammuattam nga (1) i pakigannug onu seksual nga imoralidad laman i nebase-Biblia nga rason ta pakigungay onu diborsio anna (2) makaliwa tu panallaw i lalaki nu idiborsio na i atawa na nga awan yatun nga nebase-Biblia nga rason tapus mangatawa tu tanakuan. a

Kayà kari kagian ni Jesus nga nu nakaliwa tu seksual nga imoralidad i lalaki tapus nidiborsio na i atawa na, egga ngana i lallagurena nga mangatawa uli segun ta Biblia? Ari gapa. Nu namabay i lalaki, egga ngana lagapa ta inosente nga atawa nga babay nu pakoman na yayya onu ari. Nu ari na yayya pakoman tapus legal ira nga naddiborsio, parehas nga egga ngana lallagureda nga mangatawa uli oras tu nabalin ngana i proseso na diborsio.

Ngem awayya na nga kayà na inosente nga atawa nga pattalupaddianan i pagatawa da yatutta ikagi na ta atawa na nga sigga-paran yayya nga mamakoma. Ngem kunnasi nu ari alawatan na namabay nga lalaki i pamakoma na atawa na tapus naf-file lagapa yayya tu diborsio? Megafu ta kayà na atawa nga babay nga pakoman i atawa na anna pattalupaddianan i pagatawa da, awan tu lallaguray na lalaki nga mangatawa uli segun ta Biblia. Ngem nu itagga lagapa na lalaki nga mangatawa tu tanakuan, makaliwa uli yayya tu panallaw. Mawag nga mabbuu uli i elder ira tu judicial committee tapenu maasikasu yatun.​—1 Cor. 5:1, 2; 6:9, 10.

Nu mangatawa uli i lalaki maski awan mabba tu lallagurena segun ta Biblia, kunnasi nga imammatan na kongregasion i dati anna i bagu nga pagatawa na? Segun ta Biblia, egga kari paga i bisa na pagatawa da na dati nga atawa na? Posible paga kari para ta inosente nga atawa nga maddesision nu pakoman na onu ari i dati nga atawa na? Imammatan kari paga na kongregasion nga imoral i bagu nga pagatawa na?

Ta nappasa, imammatan na kongregasion nga imoral i bagu nga pagatawa nu sigga-matolay paga i inosente nga atawa, ari nga nakitawa uli, anna ari nga nakakua tu seksual nga imoralidad. Ngem ari kinagi ni Jesus i meyannung ta inosente nga atawa turi ta nipakanawag na i meyannung ta diborsio anna pangatawa uli. Kinagi na nga i  lalaki nga mangidiborsio ta atawa na nga awan tu nebase-Biblia nga rason tapus mangatawa tu tanakuan ay makaliwa tu panallaw. Nu kunnatun gafu, awan ngana tu bisa na pagatawa da na dati nga atawa na megafu ta diborsio anna pangatawa uli, nga segun kani Jesus ay panallaw.

Nu nawawan i bisa na pagatawa megafu ta diborsio anna pangatawa uli, ari ngana nga posible para ta inosente nga atawa nga pakoman onu ari i dati nga atawa na. Nalallagurayan ngana yayya tatun nga madammo nga desision. I pagimamma na kongregasion ta bagu nga pagatawa ay ari gapa nakadepende ta patay, pakitawa uli, onu pakaliwa tu seksual nga imoralidad na inosente nga atawa. b

Ta nakagi nga angngarigan, namabay i atawa nga lalaki nga nattuppal ta diborsio. Ngem kunnasi nu ari nga namabay i lalaki ngem nidiborsio na i atawa na tapus nangatawa uli? Kunnasi gapa nu ari nga nakakua tu seksual nga imoralidad i atawa nga lalaki nige na diborsio, anna nakua na laman yatun kabalin na diborsio tapus nangatawa yayya tu tanakuan maski nu sigga-paran nga pakoman yayya na atawa na? Tatun ira nga angngarigan, megafu ta diborsio anna pangatawa uli, nga mebilang nga panallaw, mawawan ngana i bisa na dati nga pagatawa. Mebilang nga legal i bagu nga pagatawa. Kunnaw i nakagi ta Nobiembre 15, 1979 nga English nga isyu na Passifusifutan, pahina 32: “Egga ngana i bagu nga atawa na lalaki yatutta ari na babbasta nga mapanawan i bagu nga atawa na tapus manoli ta dati nga atawa na; nawawan ngana i bisa na dati nga pagatawa megafu ta diborsio, panallaw anna pangatawa uli.”

Yaw nga bagu nga pakalippawa, ari na kayà kagian nga ari ngana nga sagradu i pagatawa onu ari nga madammo nga liwa i panallaw. Nu idiborsio na lalaki i atawa na nga awan mabba tu nebase-Biblia nga rason tapus mangatawa uli yayya tu tanakuan maski nu awan tu lallagurena nga kuan yatun segun ta Biblia, mabbuu i elder ira tu judicial committee megafu ta nakaliwa yayya tu panallaw. (Nu Saksi i bagu nga atawa, mawag nga umarubang gapa yayya ta judicial committee megafu ta pakidallaw.) Maski nu ari nga mebilang nga imoral i bagu nga pagatawa, ari nga kualipikadu i lalaki ta maski anni nga espesial nga pribilehio ta kongregasion ta aru nga dagun adde ta egga paga ira i mataki i nono da ta nisa onu ari paga nga netoli i respeto na totolay ta nisa megafu ta nakua na. Yari tu nige yayya nga meddan tu maski anni nga pribilehio, mawag nga ikonsidera na elder ira i paddia-paddian na dati nga atawa na nga posible nga inilloku na anna i menor-de-edad ira nga ána nga awayya na tu pinanawan na.​—Mal. 2:14-16.

Megafu ta marake ira nga resulta na diborsio anna pangatawa uli nga awan tu nebase-Biblia nga rason, makasta nu parigan na Cristiano ira si Jehova anna imammatadda nga sagradu i unnug na pagatawa.​—Ecl. 5:4, 5; Heb. 13:4.