KAGITTA gapa na magala-aleg ira tu vulawan i Bible study ira. Mawag nga mappursigi ira anna ariadda immangan i magaleg tu nabala-balor nga sirib ta Katurakan. Bilang estudiante na Biblia, anni i mammuattam nu gigiammuattam i tallu nga gannug ta pagaleg tu vulawan?

Panonotammu nga egga ka ta pipi na bannag tapus nakasingakka tu kumikkiltà megafu ta nawag na bilag. Naddukag ka tapus nagayaya ka ta egga nalegammu nga vulawan. Mas baddi yatun anne ta ulu na kasafuego anna tallutaggi anne ta mapia i kalidadna nga diamante. Siempre, nagaleg ka nu egga paga ta pallevumu.

Gittana kunnaw i natagenomu turi ta nattotto ta balenu i tadday ta Saksi ira ni Jehova tapenu meyadde nikaw i iddanama nga egga ta Biblia. Awayyana tu presko paga ta nonomu yatun nga tiempo nga nalegammu i ollu nga pirasu na espiritual nga vulawan—i pakasingammu ta ngagan ni Jehova nga Dios ta Biblia. (Sal. 83:18) Onu posible nga turi nammuammu nga awayyam gapa mabbalin tu kofun ni Jehova. (Sant. 2:23) Insigida nga nammuammu nga nakaleg ka tu gannug nga mas nabalor anne ta vulawan! Tapus magaya-ayaya ka nga makammu paga tu mas aru nga espiritual nga vulawan.

Nu karuan, monnug i baraddi nga pirasu onu gittana dagà nga vulawan ta weg anna bannag. Sinaggimittan, makaleg tatun tu piga nga kilo na vulawan i pursigidu nga magaleg, nga mabbalor tu rinivi-rivu nga dolyar.

Turi ta pinegafuanammu i nakipaggigiammu tu Biblia ta Saksi ira ni Jehova, awayyana tu natagenomu nga kagittam i magala-aleg tu vulawan anna manara tatun. Megafu ta monag nga pannononomu ta teksto ira ta Biblia, posible nga minaru i pakannammum, nga nappariku nikaw ta espiritual. Durante nga pana-panonotammu tu mapia yatun ira nga nabalor nga kinakurug, nagigiammum nu kunnasi nga mas makaranni kani Jehova anna makapattalupaddian ta ayana, nga magiddanama nga malawà i mannanayun nga inango.​—Sant. 4:8; Jud. 20, 21.

Kagitta na magaleg tu vulawan nga magala-aleg tu nonnug nga baraddi nga pirasu na vulawan, baka mallallappo ka gapa nga magala-aleg tu nabalor nga espiritual nga kinariku. Kabalimmu nga  nammuan i pamegafuanan ira nga kinakurug na Biblia, napaguyu ka nga magangngua tu dakkua nga nattuppal ta dedikasion anna bawtismo.​—Mat. 28:19, 20.

Makaleg tu baraddi nga pirasu na vulawan ta igneous nga batu. Egga i parte na batu nga awayya nga babbakkan tapenu maminan anna malà i vulawanna. Ta ollu, gittana ariammu masingan i vulawan ta batu. Ngatta? Megafu ta egga laman i 10 gramo na vulawan ta tanga tonelada na mapia nga kalidad nga batu! Ngem para ta mineru, sulit i appursigina nga alegan yatun.

Kawagan gapa i appursigi kabalin nga nalegan na tolay i “ollu ira nga magigiammu meyannung kani Cristo.” (Heb. 6:1, 2) Mawag nga mallallappo ka tapenu mapalawang i bagu ira nga punto anna praktikal nga leksion ta paggigiammum ta Biblia. Anni gafu i makuam tapenu mattalupaddian nga produktibo i personal nga paggigiammum ta Biblia maski piga ragummu ngana nga kukukuan yatun?

Kanayun nakuan nga kakayàmu i makagigiammu. Innammu tu mapia i detalye ira. Itulu-tuloymu nakuan i mappursigi tapenu makaleg ka tu nabalor ira nga vulawan na sirib anna giya na Dios ta Katurakan. (Roma 11:33) Tapenu umaru i pakannammum ta Katurakan, usan tu mapia i remienta ira nga egga ta lengguahem. Pasa-pasensian nga alegan i giya nga kawagammu anna tabbag ira ta pakkiavumu ta Biblia. Iyavu ta tanakuan nu anni ira nga teksto anna artikulo i talaga nakoffun anna namagaram nira. Kagiammu ta tanakuan i makasta ira nga punto nga nalegammu ta paggigiammum ta Uvovug na Dios.

Siempre ari laman nga tapenu umaru i pakannammum ta kinakurug i gakkagmu. Nitabarang ni apostol Pablo nga i pakannammu ay “mamapparayag ta tolay.” (1 Cor. 8:1) Yatutta, mappursigi ka tapenu mattalupaddian nga napakalinno anna matuyag i pangurugmu. Makoffun nikaw i regular nga paddayarayaw na familia anna personal nga paggigiammu ta Biblia tapenu makapattoleka mekunnay ta estandarte ira ni Jehova anna mapagaram ka nga uffunan i tanakuan. Pinaka-importante ta ngamin, makapagayaya ka megafu ta nakaleg ka tu gannug nga mas nabalor anne ta vulawan.—Prov. 3:13, 14.