1, 2. Ngatta kawagan nga sanayattam i tanakuan ta pangalawa tu teokratiko nga annungan?

I PANGILAMMUYAG ta mapia nga dumug i primero nga annungan ni Jesus. Ngem nassanay gapa yaya tu tanakuan nga mabbalin tu papastor anna memestru. (Mat. 10:5-7) Okupadu si Felipe bilang evanghelisador, ngem siguradu nga sinanayna i appa nga ánana nga babbay nga mabbalin tu efektibo ta pangikagi ta tanakuan tu kinakurug ta Katurakan. (King. 21:8, 9) Ta kaggawattam, ngatta importante i kunnatun nga passanay?

² Ta interu mundo, umara-aru i mangalawà ta mapia nga dumug. I babbaragu nga ari paga nabawtisowan, mawag nga malippawada i importansia na personal nga paggigiammu tu Biblia. Matudduan nakuan gapa ira nu kunnasi ilayyagayya i mapia nga dumug ta tanakuan anna ituddu nira i kinakurug. Ta kongregasiottam, mawag nga mapagaram i lallaki nga mappursigi tapenu makualipika nga mabbalin tu ministerial onu elder. Gukaban na “mapia nga instruksion,” matudduan na manakam ira nga Cristiano i babbaragu tapenu mapprogreso ta espiritual.​—Prov. 4:2.

3, 4. (a) Segun kani Pablo, anni i koneksion na malappo nga paggigiammu ta Katurakan ta produktibo nga ministerio? (b) Nige tam pagaramman i estudiante tam nga gigiammuan i Biblia, anni labbi nakuan i kuattam?

³ Ngatta importante i personal nga paggigiammu ta Katurakan? Masingattam i tabbag ta kinagi ni Pablo ta kapangngurugna ira ta Colosas. Niturana: “Yatun tu kanayun kami nga mangipakimemallo nikamu, namegafu turi ta pakadumug mi ta ngamin nga meyannung nikamu. Ipakimemallo mi ta Dios tu pannuan nakamu ta naespirituan nga ka-uto anna pakalippawa tapenu kannammuan nu i uray na, ay tu awayya nu i mattolay nga kanayun nga mekunnay anna makapagayaya ta Yafu. Ay mavvunga i pattolay nu ta mapia nga pangnga-pangngua anna mas dumakal paga i pakannammu nu ta Dios.” (Col. 1:9, 10) Megafu ta fustu nga pakannammu, awayya na Cristiano ira nga taga-Colosas “i mattolay nga kanayun nga mekunnay anna makapagayaya ta Yafu.” Makoffun yatun nira tapenu ‘mavvunga i pattoleda ta mapia nga pangnga-pangngua,’ netallugaring ta pangilayyagayya ta mapia nga dumug. Tapenu efektibo nga masserbi, mawag nga tuttulan na maddayaw kani Jehova i espiritual nga rutinana. Uffunattam nakuan i estudiante tam ta Biblia nga malippawa yatun.

⁴ Nige tam nga uffunan i tanakuan tapenu mabenefisiowan ta personal nga paggigiammu ta Biblia, mawag nga kumbinsidu tam mismu ta importansiana yatun. Mawag nga egga makasta nga paggigiammu tam mismu ta Biblia. Yatutta iyavumu: ‘Nu egga ikagi na layyagayyakku ira nga mekontra ta tuttuddu na Biblia onu egga mariga nga iyavuda, makeyawa ngà kari tu nebase-Biblia nga tabbag? Nu mabbibbig ngà nu kunnasi nga nattulu-tuloy ta ministerio da Jesus, Pablo, anna tanakuan paga, nononopakku kari nu kunnasì nga mapakasta paga i passerbì kani Jehova?’ Mawag tam ngamin i pakannammu anna tabarang ta Uvovug na Dios. Nu ikagi tam ta tanakuan nu kunnasi ittam nabenefisiowan ta personal nga paggigiammu tam ta Biblia, mapagaram tam ira tapenu malawada gapa i kunnatun nga benefisio gukaban na pabbalin tu malappo nga estudiante na Biblia.

5. Mangiyawa tu suhestion nu kunnasi uffunan i babbaragu nga mapeggan tu rutina ta personal nga paggigiammu ta Biblia.

⁵ Baka meyavumu, ‘Kunnasì sanayan i estudiantè ira nga regular nga gigiammuan i Biblia?’ Pegafuanan yatun gukaban na pangipasingan sa nu kunnasi mapprepara ta leksion nga gigiammuannu. Awayyam gapa ipabibbig sa i parte na apendise na libru nga Anni Talaga i Ituttuddu na Biblia? anna bibbiganna ira i teksto ta parapo. Uffunan yaya nga mapprepara para ta study ira tapenu makapakkomento. Pagaramman yaya nga bibbigan  i kada isyu na Passifusifutan anna Gumising! Nu egga i Watchtower Library onu Watchtower ONLINE LIBRARY ta lengguahena, awayyam ipasingan nu kunnasi usan yatun tapenu tabbagan i pakkiavu ira ta Biblia. Ari mabbayag, siguradu nga magustuan gapa na estudiantem ta Biblia i personal nga paggigiammu ta Biblia.

6. (a) Kunnasim moffunan i estudiantem tapenu napafutuan nga tagibaloranna i Biblia? (b) Anni i siguradu nga kuanna nu napafutuan nga tagibaloranna i Biblia?

⁶ Siempre ariattam pilitan i maski sinni nga bibbigan anna gigiammuan i Biblia. Ngem, usattam i rimienta ira nga niyawa na organisasion ni Jehova tapenu uffunan i estudiante tam nga mas tagibaloranna i Biblia. Sonu kua, matageno na napafutuan nga estudiante i natageno na salmista nga nangikansion: “Kuruga makapabbaw tu i Dios ay aranniak-ku, tu i kapaliag ay alerak-ku ta Makapangngua nga YAFU.” (Sal. 73:28) Uffunan na masanto nga espiritu ni Jehova i malappo anna minangngappresia nga estudiante na Biblia.

7. Kunnasi sinanay ni Jesus i apostolesna? (Innan i letratu ta gafu na artikulo.)

⁷ Ta kapitulo 10 na Mateo, masingattam i niyawa ni Jesus nga instruksion ira ta apostolesna. Imbes nga aru i sakup na kagianna, nangikagi laman yaya tu espesipiko ira nga gannug. ^[1] Maggigginna i apostol ira durante nga tuttudduan ira ni Jesus nu kunnasi nga efektibo nga makapallayyagayya. Tapus minay ngana ira nallayyagayya. Megafu ta na-obserbada i metodo ni Jesus, nabbalin ira tu malalaki nga memestru na Katurakan. (Mat. 11:1) Masanay tam i estudiante tam ira ta Biblia tapenu mabbalin tu efektibo nga mangilayyagayya ta mapia nga dumug. Ikonsidera tam i dua nga kuattam tapenu moffunan ira.

8, 9. (a) Kunnasi nakiyuvovug si Jesus ta totolay ta ministeriona? (b) Kunnasi tam uffunan i babbaragu ta pakiyuvovugda ta totolay kagitta na kingngua ni Jesus?

⁸ Makiyuvovug ta totolay. Kanayun makiyuvovug si Jesus ta totolay meyannung ta Pappatulan. Angngariganna, aktibo anna produktibo i pinakiyuvovugna ta tadday nga babay ta poso ni Jacob aranni ta siudad na Sicar. (Juan 4:5-30) Nakiyuvovug yaya kani Mateo Levi nga gumattuki tu vugi. Baddi laman i nerekord tatun nga paguvovug, ngem inalawà ni Mateo i imbitasion ni Jesus nga mabbalin tu disipulona. Naginna ni Mateo pati na tanakuan i apaddu nga palappa ni Jesus durante nga egga i okasion ta balay ni Mateo.​—Mat. 9:9; Luc. 5:27-39.

⁹ Ta tadday paga nga situasion, masippo nga nakiyuvovug si Jesus kani Nataniel, nga negatibo i pagimammana ta taga-Nazaret. Ngem inuli ni Nataniel i pagimammana. Kayàna paga ammuan i ituttuddu ni Jesus nga taga-Nazaret. (Juan 1:46-51) Yari tu egga makasta nga rasottam nga sanayan i babbaragu ira nga mabbalin tu minakkikofun anna malumamo nga makiyuvovug ta totolay. ^[2] Magayaya danuri sinanay tam nu magguyu i totolay nga mapia i giffutuadda megafu ta pangipasingan tu personal nga interes anna masippo ira nga uvovug.

10-12. (a) Kunnasi inuffunan ni Jesus nga mas maginteres i tanakuan ta mapia nga dumug? (b) Kunnasi tam uffunan i babbaragu tapenu mapprogreso i abilidadda nga manuddu tu kinakurug ta Biblia?

¹⁰ Uffunammu nga mas maginteres. Ababba laman i tiempo ni Jesus ta pangibalin ta ministeriona. Ngem inuffunanna nga mas maginteres i totolay ta mapia nga dumug. Angngariganna, inusana nga plataporma i barangay turi ta sinudduanna i totolay. Tatun nga tiempo, milagro nga nakakafu onu nakakanna tu aru nga manango si Pedro anna kinagina: “Mamegafu sangoye, totolay ngana—ari tu manango—i apam-mu.” Anni i resulta na uvovug anna kingngua ni Jesus? Si Pedro anna kakavvuluna “ay nigod-da i  barangay da ira, pinanawad-da ngamin i adde na anna siminuttul ira kani Jesus.”​—Luc. 5:1-11.

¹¹ Naginteres ta tuddu ni Jesus si Nicodemo, nga miembro na Sanedrin. Kayàna nga mas paga makagigiammu ngem maganassing ta kagian na tanakuan nu makiyuvovug kani Jesus ta publiko. Minakkibagay si Jesus anna ari tu itu ta orasna; gabi yaya minay kani Nicodemo—ta kawan na totolay. (Juan 3:1, 2) Anni i magigiammu tam taw ira nga rekord? Nangiyawa tu oras i Ana na Dios tapenu padakallan i pangurug na totolay. Ari kari nga mallallappo ittam gapa nakuan ta panoli uli anna pangikondukta tu paggigiammu ta Biblia ta interesadu ira?

¹² Siguradu nga mapprogreso i abilidad na babbaragu nga manuddu tu kinakurug ta Biblia nu vulungattam ira ta ministerio. Moffunattam ira nga daddamman maski danuri baddi laman i interesda. Awayya tam gapa ira ivulu ta par-return visit onu ta pab-bible study. Megafu tatun nga passanay anna pamagaram, siguradu nga kayàda uffunan nga mas maginteres i tanakuan anna mangikondukta ira tu paggigiammu tu Biblia. Magigiammuda gapa nga ari insigida magimmang, ngem mappasa-pasensia anna mattulu-tuloy lagapa ira ta ministerio.—Gal. 5:22; innan i kahon nga “ Importante i Pappasa-pasensia.”

13, 14. (a) Anni makagim ta ehemplo ira ta Biblia nga nassakrifisio tu dakal para ta tanakuan? (b) Anni ira i praktikal nga passanay i meyuffummu ta babbaragu anna mabbing ira tapenu mangipasingan tu aya ta wawwaragi?

¹³ Nerekord ta Biblia i pribilehio tam nga ipasingan i “pangaya” anna passerbi ta wawwaragi. (Bibbigan i 1 Pedro 1:22; Lucas 22:24-27.) Niyawa na Ana na Dios i ngamin, pati i inangona, ta passerbi ta tanakuan. (Mat. 20:28) “Kanayun nga mangngua tu mapia anna minaggallallo ta mariga-riga ira” si Dorcas. (King. 9:36, 39) “Nabbanna-bannag” gapa nga masserbi ta kongregasion si Maria nga taga-Roma. (Roma 16:6) Kunnasi tam moffunan i babbaragu tapenu malippawada i importansia na panguffun ta wawwaragi?

¹⁴ Puede nga imbitan na manakam ira nga Saksi i babbaragu tapenu bisitan i mataki anna lallakay anna babbako. Nu mepangngo, awayyana gapa ivulu na magana i ánada. Awayyana nga makipattrabahu i elder ira ta tanakuan tapenu masiguraduda nga egga i makan na lallakay anna babbako anna mamentena i baleda. Ta kunnatun, magigiammu na mabbing ira anna babbaragu i mangipasingan tu kinasippo ta tanakuan. Durante nga mallayyagayya ta babbario, awayyana gapa nga pasiaran tu manganannuan na tadday nga elder i Saksi ira tatun nga lugar tapenu innan nu kunnasi ngana ira. Megafu tatun, magigiammu na mabbing nga brother nga kanayun nga mevulu sa, nga matageno nakuan na ngamin ta kongregasion nga meddu ira.​—Roma 12:10.

15. Ngatta importante nga paginteresan na elder ira i papprogreso na lallaki ta kongregasion?

¹⁵ Megafu ta lallaki i usan ni Jehova nga manuddu ta kongregasion, importante para ta brother ira nga pakastan i abilidadda nga mappalappa. Nu elder ka, awayyam kari ginnan nu mappraktis tu palappa i tadday nga ministerial? Gukaban na uffummu, mapakastana paga i abilidadna nga manuddu tu Uvovug na Dios.​—Neh. 8:8. ^[3]

16, 17. (a) Kunnasi naginteres si Pablo ta papprogreso ni Timoteo? (b) Kunnasi efektibo nga masanay na elder ira i tumunug ira nga pastor na kongregasion?

¹⁶ Aru nga papastor i kawagan para ta kongregasion Cristiano, yari tu tulu-tuloy nakuan i passanay para ta tumunug ira nga mappastor. Nangiyawa si Pablo tu pamarigan nu kunnasi massanay turi kinagina kani Timoteo: “Meyannung nikaw, Timoteo nga ana ku, paray nakuan tu massikak-ka gafu ta allo nga egga nittam ta ketadday tam kani Cristo Jesus. I naginnam ira nga nituttuddù ta pagara-arubangan  na aru nga nagginna, ay ituddum ta totolay ira nga pammakatalakkan tapenu awayya da gapa nga ituddu ta karuan.” (2 Tim. 2:1, 2) Natudduan si Timoteo gukaban na passerbi kavulu i manakam nga apostol. Niyaplika ni Timoteo i metodo ni Pablo ta ministeriona anna karuan paga nga aspeto na sagrado nga passerbi.​—2 Tim. 3:10-12.

¹⁷ Siniguradu ni Pablo nga masanay si Timoteo. Inimbitanna i kabataan nga vulungan yaya. (King. 16:1-5) Awayya nga parigan na elder ira i ehemplo ni Pablo gukaban na pangivulu tu kualipikado nga ministerial nga aripan ta pas-shepherding nu mepangngo. Nu kunnatun, mapeggan tu oportunidad yatun ira nga brother tapenu ma-obserbada mismu i panuddu, pangurug, pappasa-pasensia, anna aya nga kawagan ta papastor. Makoffun yaw ta passanay ta tumunug ira nga pastor ta “karneru ira na Dios.”​—1 Ped. 5:2.

18. Ngatta kawagan nga sanayattam i tanakuan ta passerbi kani Jehova?

¹⁸ Importante i passanay ta tanakuan megafu ta umaru nga pakawagan anna oportunidad ta passerbi kani Jehova. Efektibo lagapa i ehemplo na passanay da Jesus anna Pablo. Kayà ni Jehova nga masanay tu mapia i aripanna ira para ta teokratiko ira nga annungan. Iniddan ittam na Dios tu pribilehio nga uffunan i babbaragu nga mapeggan tu abilidad tapenu metuppalda i trabahu ta kongregasion. Durante nga marrake i paddia-paddian ta mundo anna egga ira i bagu nga oportunidad tapenu mallayyagayya, importante anna ari metalattan i kunnatun nga passanay.

19. Ngatta kumbinsidu ittam nga makasta i pattuppalan na malappo nga pappursigi tam nga sanayan i tanakuan ta passerbi kani Jehova?

¹⁹ Siempre, magawag tu tiempo anna appursigi i passanay. Ngem suportan anna mangiyawa tu sirib si Jehova anna i meddu nga Anana tapenu makua yatun nga passanay. Magayaya tam nga makasingan ta sinanay tam ira nga ari magimmang nga ‘mattalikarag nga mattrabahu anna mabbanna-bannag nga masserbi.’ (1 Tim. 4:10) Itulu-tuloy tam nakuan gapa i mapprogreso ta espiritual ta sagrado nga passerbi kani Jehova.