Tadday laman yaw ta napakaru nga isyu nga kukkuestionan na kumokkontra ira kani Jesus anna ta disipulosna. Egga ira i bilin ta Mosaiko nga Dob meyannung ta seremonial nga kinarenu kagitta na mallawang ira nga daping na baggi, ketong, anna baggi na natay nga tolay anna ayam. Nangiyawa paga yatun tu instruksion ira nu kunnasi malsa i kinaritta. Makua yatun gukaban na pangitavvung, pabbaggaw, onu pawwarsi.​—Lev., kap. 11-15; Num., kap. 19.

Nipakanawag na Judio ira nga rabbi i kada detalyena yaw nga dorob. Nakagi ta tadday nga referensia nga kada makagafu ta kinadaping ay mawag tu “meyavu i situasion nu kunnasi yaw nadapingan, kunnasi yaw nga makafekto ta tanakuan, i rimienta anna ganna-gannug nga posible nga madapingan onu ari, anna ta pangultimuanna, i ritual ira nga kawagan tu makua tapenu mapakarenuan.”

Niyavu na kumokkontra kani Jesus: “Ngatta ta ari nga tumuttul i disipulom ira ta nituddu na ginafuat-tam? Kuman ira nga ariad-da binaggawan i lima da!” (Mar. 7:5) Ari nga kinarenu i tukuyan na kumokkontra ira nga lider na relihion. Bilang ritual, ikikkiddaw na rabbi ira nga mevuru ta limada i danum nige nga kuman. Kinagi paga na referensia: “Nappoporfiadda paga nu anni ira nga pagipayyan i mawag nga meyusa ta pangivuvvu, nu anni i mepangngo nga klase na danum, nu sinni i mangivuvvu, anna nu anni nga parte na lima i mabaggawan.”

Simple laman i reaksion ni Jesus taw nga dorob na totolay. Kinagina ta Judio ira nga lider na relihion turi ollu-siglo: “Hustu gabba i kinagi gari ni profeta Isaias nga meyannung nikamu! Minaggappa-appe kamu ta kunna nitura na: ‘Danaw nga totolay, kun-na Dios, ay ikakua dà ta simu da laman ngem ararayyu i giffutuad-da niakan. Awan tu serbi na paddaya-rayaw da niakan, ta kagiad-da tu dorob ku i reglamento nga pinadday da laggapa!’ Arian nu nga kuru-kurugan i dob na Dios, ngem i tuttulan nu lallagu ay i reglamento nga pinadday na tolay laggapa.”​—Mar. 7:6-8.