1, 2. Anni i napansin na totolay ta Saksi ira ni Jehova?

NAKKOMENTO i naka-obserba ira ta makasta ira nga ugali nga nasingadda ta Saksi ira ni Jehova. Angngariganna, meyannung ta wawwaragi tam ta Nazi Germany, nitura na autor nga si Anton Gill: “Talaga nikalussaw na Nazi ira i Saksi ira ni Jehova. . . . Turi 1939, ma-6,000 nira i nefuku ta [concentration camp ira].” Kunna paga nga maski nu nepallo i kaziga-riga na Saksi ira, madumu-rumug i pabbalidda nga mapattalakkan, kalmadu maski nu tensionadu, matalo ira ta Diosda, anna nattaradday ira.

² Nikanni laman, kunnatun gapa i nakagi na taga-South Africa nira meyannung ta ugali na totolay na Dios. Egga tiempo nga ari makapaggarammammung i Saksi ira tatun nga nasion megafu ta nadduruma i kulor na tabbida. Ngem, turi ta Liggu na Disiembre 18, 2011, kakkasta innan i maturu 78,000 ta wawwaragi tam nga nadduruma nga lahi ta South Africa anna ta karruba ira nga nasion nga nattaradday ta pinakadakal nga istadium ta siudad na Johannesburg tapenu makapagayaya ta tadday nga espiritual nga programa. Kinagi na tadday ta manedyer natun nga istadium: “Yaw i pinakamemammo nga grupo nga nasingakku taw nga istadium. Disente i assissinnunnu. Pinakarenuannu paga tu mapia yaw nga istadium. Mas paga ta ngamin, nadduruma i lahinu.”

3. Kunnasi neruma i pawwaragi tam?

 ³ Ipasingan na kunnatun ira nga komento na ari ira nga Saksi nga talaga nerumu-ruma i internasional nga “wawwagi” tam. (1 Ped. 5:9) Kunnasi gafu nga dakal i nerumattam ta karuan nga organisasion? Megafu ta uffun na Uvovug na Dios anna na masanto nga espirituna, mappursigi ittam nga ‘arian i dana nga kata-katoletam.’ Tapus, ‘ibaruasi tam i bagu nga kata-katolay.’​—Col. 3:9, 10.

4. Anni i ikonsidera tam taw nga artikulo, anna ngatta?

⁴ Ari laman nga ariattam i dana nga kata-katolay onu personalidad tam, nu ari, iwallittam paga yatun. Taw nga artikulo, ikonsidera tam nu kunnasi laffutan i dana nga kata-katoletam, nu ngatta ariattam italattan nga kuan yatun, anna nu ngatta posible nga manguli maski nu grabe ngana i ka-adikto na tadday nga tolay ta marake nga annangngua. Usitakkattam gapa nu anni i makua danuri nabayag ngana ta kinakurug tapenu arian i dana nga kata-katolay. Ngatta mawag yatun ira nga tabarang? Kaddaraddam, egga i karuan nga dati nga nasserbi kani Jehova nga ari nagimmugug anna nanoli ira ta dati nga kukukuadda. Yatutta, kawagan nga ipafutu tam yaw nga pamappalan: “Yatun tu magimmugug i sinni laman nga magabbo tu siguradu ngana i taddag na, ta marakay nu matomba.”​—1 Cor. 10:12.

5. (a) Iyilustra nu ngatta kawagan nga insigida alsan i dana nga personalidad. (Innan i letratu ta gafu na artikulo.) (b) Segun ta Colosas 3:5-9, anni nga pangnga-pangngua i nelagum ta dana nga personalidad?

⁵ Anni i kuammu nu nadapingan i sinnummu onu mavuyu ngana? Alsammu insigida yatun. Kunnatun gapa, tuttulattam nakuan insigida i dob nga arian i kukukuattam nga mekontra ta personalidad na Dios. Kayà tam nga ginnan i manawag nga instruksion ni Pablo ta Cristiano ira ta kaggawanna: “Arian nu ngana ta nono nu ngamin danaw.” Ikonsidera tam i dua ta marake nga annangngua nga nitura ni Pablo​—i seksual nga imoralidad anna kinaritta.​—Bibbigan i Colosas 3:5-9, NW.

6, 7. (a) Kunnasi ipasingan na kinagi ni Pablo nga kawagan i dakal nga appursigi tapenu labanan i dana nga personalidad? (b) Anni i dati nga pattolay ni Sakura, anna anni i nakoffun sa tapenu panawan yatun?

⁶ Seksual nga imoralidad. Nelagum ta kebalinan na orihinal nga termino na Biblia nga netransleyt tu “seksual nga imoralidad” i seksual nga relasion na dua nga tolay nga ari magatawa anna homoseksualidad. Kinagi ni Pablo ta kasi-Cristianona ira: “Patayannu gafu i parte ira na bagginu.” Kayà na kagian, alsan i maski anni nga pakkaraga “meyannung ta seksual nga imoralidad.” Manawag ta kinagi ni Pablo nga kawagan i dakal nga appursigi tapenu arian i kunnatun ira nga pakkaraga. Ngem, posible i mangaffu ta pakillaban kontra tatun.

⁷ Innattam nu anni i nesimmu kani Sakura * nga taga-Japan. Durante nga dumakal yaya, kanayunna nga matageno i pagitetadday anna marraddam yaya. Ta edad nga 15, nakirelasion yaya ta nadduruma nga lallaki tapenu mapawan i pagitetaddena. “Bilang resulta,” mappasiran nga inaminna, “Namittallu ngà nappalsa tu vussi.” Kunna paga: “Ta gafu, mas egga komfiansà ta baggì megafu ta imoral nga pakirelasion, nga gittana kawagaddà anna iddukaddà. Ngem durante nga tulu-tuloy nga kuakku yatun, nalinno i paningakku ta baggì.” Nattolay tu kunnatun si Sakura adde turi ta 23 anios yaya. Tapus, naggigiammu yaya tu Biblia ta Saksi ira. Kakayà ni Sakura i nagigiammuna,  anna gukaban na uffun ni Jehova, nalabananna i sobra nga pakkakonsensia anna pasiran anna nibitana ngana i seksual nga imoralidad. Massesserbi ngana si Sakura bilang payunir anna ari ngana yaya nga magitetadday. Kagianna paga lagu, “Talaga magayaya ngà nga tagenappan i aya ni Jehova kada aggaw.”

8. Anni ira nga gannug i mamadaping nittam ta paningan na Dios?

⁸ Kinaritta. Alawa i sakup na orihinal nga termino ta Biblia nga netransleyt tu “kinaritta.” Nelagum tatun ari laman i seksual nga imoralidad, nu ari, i makadaral ira nga annangngua, gittana passigariliu onu bastus ira nga pallafug. (2 Cor. 7:1; Efe. 5:3, 4) Meyaplika gapa yatun ta maritta ira nga kukukuan na indibidual ta pribadu, gittana pabbibbig tu libru ira nga manikkag ta seksual nga pakkaraga onu paggiraw tu pornograpia, nga mattuppal ta madaping nga bisiu na masturbasion.​—Col. 3:5. *

9. Anni i resulta na “ari makontrol nga seksual nga pamagustu”?

⁹ Sesenu nga mapeggan tu “ari makontrol nga seksual nga pamagustu” danuri kanayun nga maggiraw tu pornograpia, nga marresulta ta pakka-adiktoda ta sex. Segun ta research, danuri nakkagi nga ariadda makontrol i paggiraw tu pornograpia ay mangipasingan tu parehu nga seniales turi ira ta adikto ta binarayang anna droga. Yatutta, makadaral i efekto na kanayun nga paggiraw tu pornograpia​—gittana pappasiran, ari nga makatrabahu tu mapia, ari makapagayaya nga familia, diborsio, anna pappakamatay. Tanga-ragun kabalin nga nalsa na tadday nga lalaki i pakka-adiktona ta pornograpia, kunna: “Netoli i dati nga personal nga integridad ku nga nawawan.”

10. Kunnasi nalabanan ni Ribeiro i adiksionna ta pornograpia?

¹⁰ Para ta aru, tulu-tuloy nga pakillaban i pabbalin tu marenu ta pornograpia. Ngem, kagitta na nesimmu kani Ribeiro nga taga-Brazil, posible nga mangaffu taw nga laban. Nanaw yaya ta baleda turi tinedyer anna nattrabahu ta planta na ma-recycle tu papel, nu sitaw napakaru i masinganna nga pornograpiko nga material. Kunna: “Sesenu nga na-adikto ngà. Naggrabe yatun ta ariakku makennag nga manaw i kalive-in ku nga babay tapenu makagiraw ngà tu pornograpiko ira nga video.” Tapus, tadday aggaw ta trabahu, nakkureg yaya ta vuttul na libru nga ma-recycle, anna nasinganna i libru nga Ang Lihim ng Kaligayahan sa Pamilya. Zinammona yatun tapus binibbigna. Napaguyu yaya na nabibbigna nga maggigiammu tu Biblia ta Saksi ira ni Jehova, ngem mabayag paga nigena nga nalsa i pakka-adiktona. Anni gabbalaman i nakoffun sa? Niyesplikana: “Gukaban na pakimallo, paggigiammu tu Biblia, anna monag nga pannono ta nagigiammù, mas ziminakal i pangappresià ta kualidad ira na Dios adde ta mas masikan ngana i aya ku kani Jehova anne ta pakkaraga ku ta pornograpia.” Megafu ta uffun na pakapangngua na Uvovug na Dios anna na masanto nga espirituna, nari ni Ribeiro i dana nga kata-katolena, nabawtisowan, anna elder ngana ta kongregasion.

11. Anni i mawag nga kuan na tadday tapenu ari ngana vuluvuga nga makkaraga ta pornograpia?

¹¹ Pansinammu nga ari laman tu basta paggigiammu tu Biblia i nakoffun kani Ribeiro. Ninonona tu mapia nu anni i nabibbigna ta Biblia anna nipamavulunna nga magadde yatun ta futuna. Gukaban na pakimallo anna pannono tu mapia, natavvunan na ayana ta Dios i pakkaragana ta pornograpia.  I masikan nga aya kani Jehova anna pangikalussaw ta marake i pinakamapia tapenu ari ngana vuluvuga nga makkaraga ta pornograpia.​—Bibbigan i Salmo 97:10.

12. Anni i nakoffun kani Stephen tapenu alsan i poray anna makapataki nga paguvovug?

¹² Maruddu nga makapataki i paguvovug danuri minappata-patu. Manawag nga ari makoffun yatun para ta makapagayaya nga familia. Kunni Stephen, nga yama nga taga-Australia: “Kanayunnà maggageg dati anna mappata-patu maski ta simple laman ira nga gannug. Namittallu kami ngana nga naggungay na atawà anna aranni kami ngana nga maddiborsio.” Tapus, naggigiammu ira nga magatawa tu Biblia ta Saksi ira. Anni i resulta turi niyaplika ngana ni Stephen i tabarang na Biblia? Kunna: “Daka-dakal i nangulian na familiami. Gukaban na uffun ni Jehova, kanayun nga memammo anna kalmadu ngà, ari tu kagitta na dati nga alle-bomba ngà nga gavva sumabug nu maasar tu baddi.” Ta maddaggun, ministerial nga aripan ngana si Stephen, anna piga dagun ngana nga regular payunir i atawana. Kunna elder ira ta kongregasion ni Stephen: “Ari kuruga mattattannug si Stephen, malappo nga brother, anna mapakalinno.” Ariadda paga yaya nasingan nga napporay. Ari nga sinagikua ni Stephen i dayaw. Kunna: “Awan tu maski anni taw ta makakkasta nga bendision i naekspiriensà nu arì nga inalawa i uffun ni Jehova nga ulian i interu nga personalidad ku.”

13. Ngatta delikadu i papporay, anna anni i tabarang na Biblia?

¹³ Fustu laman nga tabarangngan ittam na Biblia kontra ta papporay, makapataki nga paguvovug, anna pakkukkulle. (Efe. 4:31) Kaddaraddam, marresulta tu kinavayolente i kunnatun ira nga kondukta. Normal laman ta mundo i papporay, ngem ari makedayaw yatun ta Namaratu nittam. Kawagan na aru nga arian danaw nga marake nga ugali nigeda nga mebaruasi i bagu nga kata-katolay.​—Bibbigan i Salmo 37:8-11.

14. Posible kari para ta agresibo nga tolay nga mabbalin tu masippo?

¹⁴ Innattam i ekspiriensa ni Hans, nga elder ngana ta tadday nga kongregasion ta Austria. “Tadday yaya ta pinakamasippo nga brother nga puedem makilala,” kunna koordineytor na elder ira ta kongregasionna. Ngem ari tu dati nga masippo si Hans. Turi ta tinedyer yaya, minaggillellaw yaya anna nabbalin tu agresibo. Egga mittan nga nawwalà yaya megafu ta illona, tapus napatena i nobiana, yatutta nasentensian yaya nga mefuku tu 20 dagun. Ari insigida nga nanguli ta presu i agresibo nga personalidad ni Hans. Turi kua, niyunnug na yenana nga bisitan na elder si Hans ta affukutan, tapus namegafu yaya nga maggigiammu tu Biblia. Niyesplikana: “Mariga para niakan nga panawan i dana nga kata-katolè. I nakapagaram niakan nga teksto ira ta Biblia ay i Isaias 55:7: ‘Panawan nakuan na marake nga tolay i dalanna,’ anna i 1 Corinto 6:11, meyannung turi ta pinanawadda i marake nga annangnguada: ‘Kunnatun gapa i karuan nikamu gari.’ Aru nga dagun nga mapasensia nga inuffunannà ni Jehova nga ibaruasi i bagu nga kata-katolay.” Nabawtisowan si Hans ta affukutan, anna napalawan kabalin na 17-anna-gaddua ragun nga nikefukuna. Kunna: “Mappabalo ngà ta daka-dakal nga allo anna pamakoma ni Jehova niakan.”

15. Anni i normal ta totolay, ngem anni i kagian na Biblia?

¹⁵ Fuera paga ta makapataki nga uvovug, nelagum paga ta dana nga kata-katolay i palladdug. Angngariganna, normal ta totolay nga malladdug tapenu ari mappaga tu vugi onu tax onu ari mapanunnutan ta liwada. Ngem, si Jehova ay “i Dios na kinakurug.”  (Sal. 31:5, NW) Yatutta, ikiddona nga “sittam ngamin” nga maddayarayaw sa ay ‘makkagi tu kurug ta kataggi-tadday’ anna ‘ari nga malladda-laddug.’ (Efe. 4:25; Col. 3:9) Makkagi ittam nakuan tu kurug maski kappasirang onu mariga yatun.​—Prov. 6:16-19.

16. Kunnasi nga malaffu na tadday i dana nga kata-katolena?

¹⁶ Ari tu posible i pangari ta dana nga kata-katolay nu ta mismu nga sikattam laman. Talaga nappursigi da Sakura, Ribeiro, Stephen, anni Hans tapenu laffutan i marake nga annangnguada. Nangaffu ira megafu ta pinatalludda ta nono anna futuda i pakapangngua na Uvovug na Dios anna i masanto nga espirituna. (Luc. 11:13; Heb. 4:12) Tapenu mabenefisiowan tatun nga pakapangngua, mawag nga bibbigattam kada aggaw i Biblia, nonopan tu mapia yatun, anna kanayun nga makimallo para ta sirib anna sikan tapenu meyaplika i tabarang na Biblia. (Jos. 1:8; Sal. 119:97; 1 Tes. 5:17) Mabenefisiowan tam gapa ta Uvovug na Dios anna ta masanto nga espirituna nu mapprepara anna magatende ittam ta study ira. (Heb. 10:24, 25) Kayà tam paga nga usan tu mapia i madduruma nga probision tapenu makalawa tu espiritual nga makan i totolay na Dios ta interu mundo.​—Luc. 12:42.

17. Anni i gigiammuattam ta tumunug nga artikulo?

¹⁷ Nagigiammu tam i karuan ta marake ira nga pangnga-pangngua nga mawag nga arian anna iwallin na Cristiano ira. Ngem, yatun laman kari i mekiddaw tapenu malawà i fabor na Dios? Ari. Mawag gapa nga ibaruasi tam i bagu nga personalidad. Ta tumunug nga artikulo, ikonsidera tam i karuan nga aspeto na bagu nga personalidad nga kawagan nga permanente nga ibaruasi tam.