MANGULTIMO ngana i Nobiembre 1932 ta Mexico City. Tanga-ligguan nige natun, ollollu nga masingan tatun i de-kuryente nga traffic light ira ta okupadu nga siudad na maturu nga tanga-million nga totolay. Ngem yatun ira nga traffic signal ay ari ngana tu bagu nga balita. Niyali ngana na reporter ira i atensiodda ta mesimmu taw nga ligguan. Nakaprepara i kamerada ira, nakapuestu ira ta istasion na tren, nga maginnennag ta pallabbe na espesial nga bisita​—si Joseph F. Rutherford, presidente na Watch Tower Society tatun nga tiempo. Egga gapa Saksi ira tatun nga napafutuan i pinangalawada kani Brother Rutherford, nga minay nagatende ta tallu-aggaw nga nasional kombension.

“Awan tu duda,” kinagi na The Golden Age, “yaw nga kombension ay mabbalin tu kuruga importante nga parte na historia ta pagabante na Kinakurug ta republika na Mexico.” Ngem ngatta yaw nga kombension ay kuruga importante maski nu maggi 150 laman i nagatende?

Nige nga nesimmu yatun, baddi laman i vunga na Pappatulan ta Mexico. Namegafu turi 1919, egga i nakua nga baraddi nga asembli, ngem ta kakuruganna napakarianan i bilang na kongregasion ta tumunug ira nga dagun. Positibo i pamegafu na panga nga ofisina ta Mexico City turi 1929. Ngem egga ira i problema. Nattaki i nono na tadday nga colporteur turi neddan ira tu instruksion nga ariadda ngana kivuan tu negosio i pallayyagayya, yatutta nagimmang ngana yaya nga colporteur tapus nabbuu tu sarilina nga grupo ta paggigiammu tu Biblia. Kunne na gapa, mawag nga talianan i branch overseer megafu ta nakangngua yaya tu gannug nga mekontra ta tuddu na Biblia. Mawag na matalo ira nga Saksi ta Mexico i pamasikan ta espiritual.

Ta pabbisita ni Brother Rutherford, pinagaramna yaw nga matalo ira, gukaban na dua nga makatukkal ta futu nga palappa ta kombension anna lima nga mafuersa nga lektiur ta radio. Yaw pagalaman i ollollu nga maginna i mapia nga dumug ta istasion ira na radio ta interu nga Mexico. Kabalin na kombension, i bagu nga natunno nga branch overseer i nangorganisa ta trabahu, anna nabbala-balayun i matalikarag ira nga Saksi nga mas masikan ngana i espiritualidadda anna bebbendisionan ira ni Jehova.

Ta tumunug nga dagun, ari laman tu tadday nu ari dua nga kombension i nakua tatun nga nasion, tadday ta pantalang ta Veracruz anna tadday ta Mexico City. Namegafu ngana i makakkasta nga resulta na pattalikarag ta ministerio. Turi 1931 egga laman i 82 nga publisher. Ta pappasa na mafulu dagun, minaru ira tu mamimmafulu! Ma-1,000 i minay ta Mexico City para ta 1941 Theocratic Assembly.

Turi 1943 nangiyusa tu massiddammang nga karatula i Saksi ira tapenu iyanunsioda i “Free Nation’s” nga Theocratic Assembly nga nakua ta 12 nga siudad na Mexico. * Agga-besing ta abagada  i dua nga plakard, tadday ta arubang anna tadday ta likug, i metodo na panganunsio nga niyusa na Saksi ira namegafu turi 1936.

Kunnaw i komento na magazina nga La Nación meyannung ta makasta nga nattuppalan na parada na massiddammang nga karatula ta Mexico City: “Ta ollu nga aggaw [na asembli], nekiddaw [ta Saksi ira] nga mangimbita tu mas aru nga totolay. Ta tumunug nga aggaw, ari ngana ira makkasia ta lokasion na kombension.” Napporay i Iglesia Katoliko taw nga parada, nga narresulta tu kampania kontra ta Saksi ira. Maski egga i pangokkontra, magutu lagapa i wawwaragi nga nallayyagayya. Niyammung paga na La Nación: “Nasingan ira na interu nga siudad . . . lallaki​—anna babbay—​nga nangiyellung tu massiddammang nga karatula.” Nepasingan taw nga artikulo i letratu ira na wawwaragi ta dala-dalan na Mexico City. Kunnaw i kapsion na letratu: “Sinakupda i dalan.”

Tatun nga daga-ragun, aru ta Saksi i mawag nga mangngua tu darakal nga sakrifisio tapenu makangay ta piga laman nga kombension ta Mexico. Aru ta delegadu i naggafu ta ararayyu nga babario, nga ari madde na tren onu awan tu dalan. Nitura na tadday nga kongregasion, “I linia laman nga makadde aranni taw nga lugar ay i linia na telegrapo.” Yatutta, mawag na delegadu ira i makkabayu onu lumakag tu piga nga aggaw tapenu makadde laman ta pattakayan nga tren nga mangitulug nira ta siudad na kombension.

Aru ta Saksi i mariga, apenas nga mapagadda i pamasahe nga mappange ta kombension. Ta paddattalda, aru i makipaddian ta lokal ira nga Saksi, nga meddu nga namadulo ta wawwaragi ta gibbalayadda. Nakkatrug gapa i karuan ta Kingdom Hall ira. Mittan, ma-90 nga delegadu i naddian ta panga nga ofisina, anna karton na libru ira i nagiddadda. Nikomento na Yearbook nga nappabalo yaw ira nga bisita megafu ta i katrida ay “mas malapo anna mas mapatu anne ta suelo na sementu.”

Para ta minangngappresia nga Saksi ira, sulit i ngamin nga sakrifisioda taw nga makapagayaya nga Cristiano nga asembli. Ta maddaggun, maski nu umara-aru i bilang na publisher ira ta Mexico nga magadde ngana ta tadday nga million, masingan lagapa nira i minappabalo nga espiritu. * Kunnaw i report na panga nga ofisina ta Mexico meyannung ta wawwaragi turi 1949: “Ari nga namakkafi ta Teokratiko nga espirituda i nappasadda nga ziga megafu ta kanayun nga paggiristoriadda i nabalin nga asembli anna kanayun nga iyavu na wawwaragi, Sonu anni uli i asembli tam?” Nu kunnasi nga kurug yatun nga report turi, kunnatun gapa ta maddaggun.​—Naggafu ta archives tam ta Central America.