ININSPIRAN ni Jehova si apostol Pablo nga itura i siam nga kualidad nga resulta na pagguyu na masanto nga espiritu. (Gal. 5:22, 23) Danaw nga makakkasta nga kualidad i mabbuu ta “vunga na Espiritu.” * Yaw nga vunga ay parte gapa na “bagu nga kata-katolay.” (Col. 3:10) Kagitta na kayu nga mavvunga nu mabayatan tu mapia, mapeggan tu kunnaw nga makakkasta nga kualidad i tadday nga tolay nu awan tu makefugag ta pattallung na masanto nga espiritu ta pattolena.​—Sal. 1:1-3.

I ollu nga aspeto na vunga na espiritu nga nitura ni Pablo ay i nabalor nga kualidad na aya. Kunnasi kabalor yatun? Kinagi ni Pablo nga nu awan tu ayana, ‘awan tu kwentana.’ (1 Cor. 13:2) Ngem anni i aya, anna kunnasi tam mapeggan tu kunnatun anna mepasingan yatun ta kadaggaw?

Maski nu ari tu uvovug i makapakkagi nu anni i aya, tinukoy yatun na Biblia gukaban na kepasingan natun. Angngariganna, mabibbig tam nga i aya ay “pappasensia anna pagallo.” Yatun paga ay “pagayaya megafu ta kurug,” anna “pagattam ta anni laman; yaya i pammakatalo, pagiddanama, anna pappasensia nga awan tu panuppalan na.” Kasali paga ta aya i napafutuan nga pangiddu ta tanakuan anna meddu nga pangikavurung nira. Masingan gapa i kawan tu aya nu egga i passil, pappakatannang, bastus nga pagguyu, makasarili, anna i pangipappan tu taki na nono, onu i ugali nga ari pamakoma. Ari tu kagitta natun ira nga marake anna awattu kwentana nga kualidad, i klase na aya nga kayà tam ay “ari tu pakkaraga ta pammakapian laggapa na baggi.”​—1 Cor. 13:4-8.

“I Dios ay aya.” Kakuruganna, si Jehova i personipikasion na aya. (1 Juan 4:8) Pakurugan na ngamin nga kikkingngua anna annangnguana yatun nga ayana. I kadakallan nga aya nga nipasinganna ta totolay ay i pangidobna kani Jesus tapenu mazziga anna matay para nittam. Kagian ni apostol Juan: “Nipasingan na Dios i pangaya na nittam ta pamaddob na ta tattadday nga Ana na toye ta utun na davvun tapenu mattolay ittam megafu sa. Ay yaw i aya: ari tu megafu ta inaya tam i Dios, nu ari yaya i nangaya nittam ta zinog na i Ana na nga metavvung tu ikapamakoma na katagaruliat-tam.” (1 Juan 4:9, 10) Megafu ta aya na Dios, mapakoma ittam, anna napeggan tu iddanama anna inango.

Pinakurug ni Jesus i ayana ta totolay gukaban na sigga-paran nga pattuppal ta uray na Dios. Nitura ni Pablo: “Kinagi [ni Jesus], ‘Azzaw ngà, O Dios, i urem ay ek-ku nga parulattan.’ . . . Ay megafu tatun nga uray na Dios, napakarennuan ittam ngamin gafu ta ketavvung na baggi ni Jesu-Cristo nga nakua mittan laman adde noka.” (Heb. 10:9, 10) Awan ngana tu tanakuan nga tolay nga makepasingan tu mas dakal nga aya anne tatun. Kunni Jesus: “I kadakallan nga pangaya nga mepasingan na tadday nga tolay ay i pangiyawa na ta inango na megafu ta kakkofun na.” (Juan 15:13) Maparigattam kari gapa nga imperfekto nga tolay i aya nga nipasingan ni Jehova anni Jesus nittam? Wan! Innattam nu kunnasi tam makua yatun.

Nitabarang nittam ni Pablo: “Megafu ta sikamu i meddu nga ána na Dios, parigan nu gafu yaya. I attolay nu ay mawag tu mepasingan ta pakka-aya-aya ta kunna nipangaya ni Cristo nittam. Niyawa na i inango na.” (Efe. 5:1, 2) ‘Mepasingattam i pakka-aya-aya ta attolay’ tam nu ipasingattam yaw nga kualidad ta kada aspeto na pattoletam. Ipasingattam yatun nga aya ta kukukuattam, ari laman nga ta kakkagiattam. Nitura ni Juan: “Ána ku ira, i pangaya tam ay ari nakuan tu egga ta uvovug onu simu laman; mawag tu i pangaya ay mapakurug anna mepasingan ta pangnga-pangngua.” (1 Juan 3:18) Angngariganna, nu ayatattam i Dios anna i kasittoletam, mapaguyu ittam nga ikagi i “Mapia nga Dumug na Pammaguray” nira. (Mat. 24:14; Luc. 10:27) Makepasingattam paga tu aya nu sittam ay mapasensia, masippo, anna minammakoma. Yatutta itabarang nittam na Biblia: “Mawag tu makkapaka-pakoma kamu ta kunna nipamakoma na Yafu nikamu.”​—Col. 3:13.

Ari gapa tu nebase laman ta emosion i kunnatun nga napafutuan nga aya. Angngariganna, tapenu pakalman i tumangi-tangi nga abbing, basta ngana laman iyawa na karuan nga mappagana i maski anni nga itangina. Ngem ari tu kunnatun i magana nga talaga ayatanna i anana​—arianna ulu-ulian i desisionna depende ta abbing. Kunnatun gapa, si Jehova ay aya, yatutta ‘disiplinan na i ayatan na ira.’ (Heb. 12:6) Nu egga aya tam, iyawa tam gapa i mepangngo nga disiplina nu kawagan. (Prov. 3:11, 12) Siempre, nu kuattam yatun, daddammattam gapa nga minattagaruli anna egga tendensia tam nga mangngua tu ari meddu nga gannug. Egga gafu i aspeto ira nga kawagattam ngamin i mapprogreso ta pangipasingan tu aya. Kunnasi tam makua yatun? Egga tallu nga ikonsidera tam.

Ollu, kiddawan i espiritu na Dios, nga mavvunga tu aya. Kinagi ni Jesus nga “iddan [ni Jehova] ta Espiritu Santo danuri i makkiddaw sa.” (Luc. 11:13) Nu ipakimallo tam i masanto nga espiritu anna mappursigi tam nga ‘mattolay ta pangirollu na Espiritu,’ mabbalittam tu mas minaggiddu. (Gal. 5:16) Angngariganna, nu elder ka ta kongregasion, awayyam kiddawan i masanto nga espiritu tapenu meddu nga matabarangngammu i tanakuan. Onu nu magana ka, awayyam kiddawan i espiritu na Dios tapenu madisiplinam i ána mu, ari tu napoporay, ngem gukaban na aya.

Mekadua, nonopan nu kunnasi nangipasingan si Jesus tu aya maski nu inuyu-uyaw da yaya. (1 Ped. 2:21, 23) Mas kawagan nga nonopattam i ehemplo ni Cristo nu napatakitattam onu nakaekspiriensa tu kawan na hustisia. Nu mesimmu yatun, makasta nu iyavu tam yaw ta baggi tam, ‘Anni i kuan ni Jesus?’ Nammuan na tadday nga sister nga si Leigh nga nakoffun sa yatun nga pakkiavu nigena nga nagguyu. Kunna: “Mittan, egga katrabahù nga na-email ta kasi-empleyadumi ira tu negatibo nga istoria meyannung niakan anna ta trabahù. Talaga natakitan ngà. Ngem niyavu ku ta baggì, ‘Kunnasì maparigan si Jesus ta pakilallang taw nga tolay?’ Kabalikku ninono nu anni i awayyana tu kingngua ni Jesus, naddesision ngà nga pagurayan ngana laman yatun anna ari padakallan i problema. Turi kua, nammuakku nga egga balo i grabe nga taki natun nga katrabahù yatutta fermi i stress-na. Kinagì ta baggì nga arianna siguru gapa intension i makataki ta email-na. Megafu ta ninono ku i ehemplo ni Jesus ta pangipasingan tu aya, noffunannà nga ayatan gapa i katrabahù.” Wan, nu parigattam si Jesus, kanayuttam nga makepasingan tu aya.

Mekatallu, ipasingattam i minassakrifisio nga aya, i panakkilalan na kurug nga Cristiano. (Juan 13:34, 35) Meyannung tatun, pagaramman ittam na Katurakan nga parigan i “appana-panono” ni Jesus. Ta pappanawna ta langi, “sinagapia na nga pinagurayan ngamin i egga sa” para nittam, “adde ta patay.” (Fil. 2:5-8) Durante nga paparigattam i minassakrifisio nga ayana, sesenu nga mabbalin tu alle-Cristo i appana-panono anna panageno tam, anna mapaguyu ittam nga pagolluan i tanakuan  anne ta baggi tam. Anni ira paga i bendision na pangipasingan tu aya?

Nu egga aya tam, aru i bendisionna yatun. Ikonsidera i dua nga angngarigan:

• INTERNASIONAL NGA PAWWARAGI: Megafu ta ayatattam i kataggi-tadday, ammu tam nga maski nu anni nga kongregasion i angngayattam ta interu mundo, meddu nga alawatan ittam na wawwaragi. Anni mabba nga bendision nga ayatan na ‘wawwagi ta angngurug ta interu mundo’! (1 Ped. 5:9) Sitaw paga i tanakuan nga pakalegan tu kunnatun nga aya nu ari ta nallatanan na totolay na Dios?

• IMAMMO: Megafu ta ‘ipasingattam i pakka-aya-aya ta pakkapasa-pasensia ta kataggi-tadday,’ egga i “imammo nga mamakatadday” nittam. (Efe. 4:2, 3) Maekspiriensa tam mismu yaw nga imammo ta study tam ira, ta asembli, anna ta kombension ira. Umanugu ka kari nga talaga nerumu-ruma i mapeggan tu kunnatun nga memammo nga espiritu ta mundo nga nassirinna? (Sal. 119:165; Isa. 54:13) Nu memammo i tratu tam ta tanakuan, mepasingattam i konag na aya tam nira, nga yatun ay mamagayaya ta nelangitan nga Yama tam.—Sal. 133:1-3; Mat. 5:9.

Kunni Pablo: “I aya ay mamakaladda ta pavvurulun.” (1 Cor. 8:1) Kunnasi nga kuan na aya yatun? Ta meka-13 nga kapitulo na ollu nga tura ni Pablo ta taga-Corinto ira​—yuri i nagalan tu “Salmo na Aya”—​niyesplika na apostol nu kunnasi nga mamakaladda ta pavvurulun i aya. Tadday nga rason ay megafu ta alegan natun i pammakapianan na ikattolay. (1 Cor. 10:24; 13:5) Fuera paga tatun, megafu ta i aya ay minangngikavurung, makonsiderasion, anna masippo, makabuu yatun tu nattaradday nga familia anna kongregasion.​—Col. 3:14.

I aya tam ta Dios i pinakanabalor anna i mamakaladda nga aya ta ngamin. Pattaraddayan na kunnatun nga aya i totolay nga nadduruma i naggafuadda, lahi, anna lengguahe tapenu magayaya nga “makiyabaga” ta passerbi kani Jehova. (Zef. 3:9) Determinadu tam nakuan nga ipasingan yaw nga nabalor nga aspeto na vunga na masanto nga espiritu na Dios kada aggaw.