MAGIGIAMMU NGA ARTIKULO 34
Egga i Papel Mu ta Kongregasion ni Jehova!
“Si Cristo ay neyarig ta tattadday laman nga baggi ngem aru i parte na. Maski nu tattadday yaw nga baggi, madduma-ruma i parte na.”—1 COR. 12:12.
KANSION 101 Mattaradday nga Masserbi
SUMARIO *
1. Anni nga pribilehio i egga nittam?
DAKA-DAKAL nga pribilehio i mabbalin nga parte na kongregasion ni Jehova! Egga ittam ta espiritual nga paraiso nga napannu tu memammo anna magayayya nga totolay. Anni i papel mu ta kongregasion?
2. Anni nga ilustrasion i inusa ni apostol Pablo ta turana ira?
2 Makagigiammu ittam ta papel tam ta kongregasion ta ilustrasion nga inusa ni apostol Pablo ta turana ira. Tatun, nikumpara ni Pablo i kongregasion ta baggi na tolay. Tapus nikumparana gapa i miembro ira na kongregasion ta parte ira na baggi.—Roma 12:4-8; 1 Cor. 12:12-27; Efe. 4:16.
3. Anni i tallu nga magigiammu tam taw nga artikulo?
3 Taw nga artikulo, ammuattam i tallu nga importante nga magigiammu tam ta ilustrasion ni Pablo. Ollu, egga i papel * na kada tadday nittam ta kongregasion ni Jehova. Mekadua, nu anni i makua tam nu matageno tam nga awan tu papel tam ta kongregasion. Anna mekatallu, nu ngatta kawagan nga kanayun nga okupadu ittam nga kuan i papel tam ta kongregasion na Dios.
EGGA I PAPEL NA KADA TADDAY NITTAM TA KONGREGASION NI JEHOVA
4. Anni i ituddu na Roma 12:4, 5 nittam?
4 Magigiammu tam ta ilustrasion ni Pablo nga egga i importante nga papel na kada tadday nittam ta familia ni Jehova. Kunnaw i kinagi ni Pablo: “I baggi ay aru i parte na, anna madduma-ruma i keyusan na kada tadday nga parte; ay kunnatun ittam gapa. Maski nu aru ittam, tattadday ittam nga baggi megafu ta niketadday tam kani Cristo. Ay nattaradday ittam nga kagitta na madduma-ruma nga parte na tadday nga baggi.” (Roma 12:4, 5) Anni i punto ni Pablo? Madduruma i papel na kada tadday ta kongregasion, ngem nabalor i kada tadday.
Nadduruma i papel tam ta kongregasion, ngem nabalor i kada tadday nittam (Innan i parapo 5-12) *
5. Sinni ira nga “regalu” i niyawa ni Jehova ta kongregasion?
5 Sinni danuri egga i papelna ta kongregasion? Baka insigida nga manono mu danuri mangiyorollu. (1 Tes. 5:12; Heb. 13:17) Kurug gapa nga gukaban ni Cristo, niyawa ni Jehova ta kongregasionna i ‘regalu ta totolay ira.’ (Efe. 4:8) Nelavu ta ‘regalu ta totolay ira’ i miembro ira na Manangngal nga Baggi, natunno ira nga kaduffun na Manangngal nga Baggi, miembro na Branch Committee, manangngal ira ta sirkito, field instructor, elder ira, anna ministerial ira nga aripan. Sinunno na masanto nga espiritu danaw nga brother tapenu tangngallan i nabala-balor ira nga karneru ni Jehova anna pagaramman i kongregasion.—1 Ped. 5:2, 3.
6. Segun ta 1 Tesalonica 2:6-8, anni i pappuppursigian na brother ira nga sinunno na masanto nga espiritu?
6 Sinunno na masanto nga espiritu i brother ira tapenu ituppal i nadduruma nga responsibilidad. Nu kunnasi nga maffunsina i nadduruma nga parte na baggi, kagitta na lima anna takki tapenu mabenefisiowan i interu nga baggi, kunnatun gapa i malallappo nga pattrabahu na brother ira nga sinunno na masanto nga espiritu tapenu mabenefisiowan i interu kongregasion. Ariadda karagatan i medayaw. Imbes tu kunna, mappuppursigi ira nga patuyaggan i kapangngurugda ira. (Bibbigan i 1 Tesalonica 2:6-8.) Mabbala-balo ittam kani Jehova taw ira nga kualipikadu nga brother nga ipoppolluda i pakawagan na tanakuan nige na baggida!
7. Anni ira i bendision danuri massesserbi ta ngamin-tiempo?
7 Egga i karuan ta kongregasion nga natunno bilang misionero, espesial payunir, onu regular payunir. Egga gapa danuri brother anna sister tam ira ta interu mundo nga naddisidi nga masserbi ta ngamin-tiempo nga pallayyagayya anna pangngua tu disipulo. Ta pangnguada tatun, aru i noffunadda tapenu mabbalin tu disipulo ni Jesu-Cristo. Maski nu baddi laman i material nga pakkukuada, napakaru i bendision nira ni Jehova. (Mar. 10:29, 30) Tagibalorattam danaw nga brother anna sister, anna mabbala-balo ittam nga parte ira na kongregasion!
8. Ngatta nabala-balor kani Jehova i kada publisher?
8 Danuri laman kari natunno nga brother anna massesserbi ta ngamin-tiempo i egga i papelda ta kongregasion? Ari vuluvuga! Importante kani Jehova anna ta kongregasion i kada publisher. (Roma 10:15; 1 Cor. 3:6-9) Kakuruganna, tadday ta pinaka-importante nga gakkag na kongregasion ay i pangngua tu disipulo na Yafu tam nga si Jesu-Cristo. (Mat. 28:19, 20; 1 Tim. 2:4) Yatun i prayoridad na ngamin nga egga ta kongregasion—bawtisadu man onu danuri unbaptized publisher.—Mat. 24:14.
9. Ngatta tagibalorattam i babbay ta kongregasion?
9 Niddan ni Jehova tu maraya-rayaw nga papel ta kongregasion i babbay. Tagibaloranna danaw nga atawa nga babay, yena, balu, anna awan tu atawana ira nga sister nga matalo nga massesserbi nisa. Mabibbig ta Biblia i karuan nga malalaki nga babbay nga namagayayya ta Dios. Makomendan ira ta makasta nga ehemploda ta kinasirib, pangurug, talikarag, gutu, kinavuka-palag, anna mapia nga annangngua. (Luc. 8:2, 3; King. 16:14, 15; Roma 16:3, 6; Fil. 4:3; Heb. 11:11, 31, 35) Kuruga ipappabalo tam kani Jehova yaw nga babbay ta kongregasion megafu ta makasta ira nga kualidadda!
10. Ngatta tagibalorattam i babbako anna lallakay?
10 Bendision gapa ta kongregasion i babbako anna lallakay. Ta karuan nga kongregasion, egga ira i babbako anna lallakay nga nabayag ngana nga matalo nga massesserbi kani Jehova. Egga gapa i karuan nga bagu laman nga nammuadda i kinakurug. Ngem para-parehu nga awayyana tu egga i problema ta gawa-gawayyadda megafu ta pallakay anna pabbako. Baka limitadu ngana i makuada ta kongregasion anna ta pallayyagayya megafu tatun ira nga problema. Ngem kukukuadda lagapa i adde na mawayyada ta ministerio anna usu-usadda i ngamin nga sikadda tapenu pagaramman anna sanayan i tanakuan. Mabenefisiowattam paga lagu ta ekspiriensada. Talaga nabala-balor ira kani Jehova anna ta nittam!—Prov. 16:31.
11-12. Kunnasi naka napagaram na abbing ira ta kongregasionnu?
11 Nonopan gapa i abbing ira ta kongregasion. Aru i problemada durante nga dumakal ira ta mundo nga kontroladu ni Satanas nga Diablo anna influwensiadu na marake ira nga ideyana. (1 Juan 5:19) Ngem mapagaram ittam nu masingattam danaw nga abbing nga makkomento ta study, makiparte ta ministerio, anna magutu nga mangidefensa ta pangurugda. Wan, sikamu nga abbarabbing, egga i importante nga papelnu ta kongregasion ni Jehova!—Sal. 8:2.
12 Ngem marigatan lagapa i karuan nga wawwaragi tam nga kurugan nga egga i nabalor nga papelda ta kongregasion. Anni i makoffun ta kada tadday nittam tapenu matageno tam nga egga i papel tam ta kongregasion? Ammuattam yatun.
EGGA I PAPEL MU TA KONGREGASION
13-14. Ngatta matageno na karuan nga awan tu meyuyyuffudda ta kongregasion?
13 Egga paga i magigiammu tam ta ilustrasion ni Pablo. Aru sangawe i marigatan nga mangurug nga egga i meyuyyuffudda ta kongregasion. Nitura ni Pablo: “Nu kagian na takki, ‘Ari ngà nga parte na baggi ta ari tu sakan i lima,’ arian na ikaya nga kagian naw tu kurug nga ari tu parte na baggi i takki. Ay nu kagian gapa na talinga, ‘Ari ngà nga parte na baggi ta ari tu sakan i mata,’ arian na ikaya nga kagian tu kurug nga ari tu parte na baggi i talinga.” (1 Cor. 12:15, 16) Anni i ituttuddu ni Pablo nittam?
14 Nu ikumparam i baggim ta kakongregasiommu, baka manono mu nga ari ka nga nabalor. Egga i karuan ta kongregasion nga malalaki manuddu, mangorganisa, anna mamanna-bannay. Baka manono mu nga ari ka nga malalaki ta kunnatun ira nga gannug. Ipasingan natun nga mapakalinno ka. (Fil. 2:3) Ngem magimmugug ka. Nu kanayun nga ikumparam i baggim ta wawwaragi ira nga maabilidad, baka madismaya ka ta baggim. Baka matageno mu paga lagu i nakagi ni Pablo nga awan vuluvuga tu meyuffummu ta kongregasion. Anni i makoffun nikaw tapenu malabanammu i kunnatun nga panageno?
15. Segun ta 1 Corinto 12:4-11, kunnasi tam nakuan imammatan i maski anni nga abilidad tam?
15 Daddamman nga niddan ni Jehova tu milagro nga regalu na masanto nga espiritu i ollu-siglo ira nga Cristiano, ngem ari tu para-parehu i regalu nga nalawada. (Bibbigan i 1 Corinto 12:4-11.) Maski nu madduruma nga regalu anna abilidad i nitalo ni Jehova nira, nabala-balor i kada tadday nira. Ta maddaggun, awan ngana nittam i milagro nga regalu na masanto nga espiritu. Ngem maski nu nadduruma i talento tam, nabala-balor ittam ngamin kani Jehova.
16. Anni i nitabarang ni apostol Pablo nittam?
16 Imbes tu ikumpara tam i baggi tam ta kasi-Cristiano tam ira, nitabarang ni apostol Pablo: “Mawag tu innan na kataggi-tadday i ikalangan na laggapa. Nu mapia, awayya na i magayaya ta kingngua na, anna ari ngana nga mawag tu iparig na ta kingngua na tanakuan nga tolay.”—Gal. 6:4.
17. Kunnasi tam mabenefisiowan nu tuttulattam i tabarang ni Pablo?
17 Nu tuttulattam i tabarang ni Pablo anna usitakkattam i annangngua tam, mammuattam nga egga ira i abilidad tam nga awan ta tanakuan. Angngariganna, awayyana nga ari malalaki nga mappalappa i tadday nga elder ngem efektibo yayya ta pangngua tu disipulo. Onu baka mas organisadu i karuan nga elder ta kongregasion kumpara ta nisa, ngem kilala yayya bilang minaggiddu nga pastor anna mabi marannian na wawwaragi nga makitabarang. Onu baka kilala yayya nga minammadulo. (Heb. 13:2, 16) Nu ammu tam i abilidad tam ira, magayayya ittam gafu ta egga i meyuffuttam ta kongregasion. Malillitattam gapa nga passilan i wawwaragi tam nga egga i abilidadda nga awan ta nittam.
18. Kunnasi tam mapakasta i abilidad tam ira?
18 Maski anni paga i papel tam ta kongregasion, mawag nga karagatattam ngamin nga pakastan i passerbi tam anna i abilidad tam ira. Tapenu mapprogreso ittam, sanayan ittam ni Jehova gukaban na organisasionna. Angngariganna, ta study tam ta midweek, makalawa ittam tu instruksion tapenu mabbalin tu mas efektibo ta ministerio. Iyap-aplikam kari i passanay nga mamalawà mu tatun nga study?
19. Anni i kuammu tapenu makualipika ka ta School for Kingdom Evangelizers?
19 Makasta gapa nga programa na passanay i School for Kingdom Evangelizers. Puede nga magatende tatun i brother anna sister ira nga massesserbi ta ngamin-tiempo nga magedad tu 23 adde ta 65. Baka nonopammu nga ari ka nga kualipikadu tatun. Imbes tu kunna, nonopammu lallagu nu ngatta ta kayà mu i magatende. Tapus mapplano ka tapenu madde mu i kualipikasion ira. Ta uffun ni Jehova anna ta appursigim, mabbalin tu posible i abbo mu nga imposible.
USAMMU I ABILIDAD MU IRA TAPENU PAGARAMMAN I KONGREGASION
20. Anni i magigiammu tam ta Roma 12:6-8?
20 Malegan ta Roma 12:6-8 (bibbigan) i mekatallu nga magigiammu tam ta ilustrasion ni Pablo. Nipasingan mangana taw ni Pablo nga nadduruma i abilidad danuri na egga ta kongregasion. Ngem nipasigona taw nga mawag nga usattam i maski anni nga abilidad tam tapenu pasikannan i kongregasion.
21-22. Anni i magigiammu tam kani Robert anni Felice?
21 Nonopan gapa i angngarigan na tadday nga brother nga ngaganattam tu Robert. Kabalinna nasserbi ta tanakuan nga nasion, neyasayn yayya nga manoli nga masserbi ta Bethel ta nasionna. Maski nu nipasiguraduda nisa nga i panguli na asaymentna ay ari tu megafu ta egga i nakkamalianna, kinagina: “Aru nga vulan nga ari ngà magayayya megafu ta nononopakku nga egga i nakkamaliakku ta asayment ku. Egga ira i tiempo nga gittana kayà ku ngana i mallawan ta Bethel.” Kunnasi nga netolina i pagayayyana? Niperaddam nisa na tadday nga kasi-elderna nga sinanay ittam ni Jehova ta dati nga asayment tam tapenu mas aru i meyuffuttam ta maddaggun nga asayment tam. Narekunnisi ni Robert nga kattamanna ngana i nappasa anna maffokus yayya ta makuana ta maddaggun.
22 Kunnatun i nesimmu kani Brother Felice Episcopo. Naggradua yayya anna i atawana ta Gilead turi 1956 anna na-circuit work ira ta Bolivia. Ta 1964, nakka-ana ira. Kagian ni Felice: “Narigatakkami nga panawan i tagibalorammi nga asayment. Tanga-ragun nga dismayadu ngà. Ngem gukaban na uffun ni Jehova, inulì i pagimamma ku anna naffokus ngà ta bagu nga responsibilidad ku bilang magana.” Matageno mu kari gapa i natageno da Robert anni Felice? Nadismaya ka kari megafu ta awan ngana i dati nga pribilehiom? Nu kunnatun, mabbalikka tu mas magayayya nu maffokus ka ta makuam ta maddaggun ta passerbi kani Jehova anna ta wawwaragim. Kanayukka nakuan nga okupadu. Usammu i abilidad mu ira ta panguffun ta tanakuan. Nu kuammu yatun, magayayya ka ta pamasikammu ta kongregasion.
23. Anni nakuan i nonopattam tu mapia, anna anni i ikonsidera tam ta tumunug nga artikulo?
23 Nabala-balor kani Jehova i kada tadday ta nittam. Kayàna nga matageno tam nga parte ittam na familiana. Nu nonopattam tu mapia nu kunnasi tam mapasikan i wawwaragi tam anna nu mappursigi ittam nga kuan yatun, ariattam matageno nga awan tu meyuffuttam ta kongregasion! Kunnasi gapa i pagimamma tam ta wawwaragi ta kongregasion? Kunnasi tam mepasingan nga appresiattam ira? Ikonsidera tam yatun ta tumunug nga artikulo.
KANSION 24 Halikayo sa Bundok ni Jehova!
^ par. 5 Kayà tam ngamin i mabbalin tu nabalor kani Jehova. Ngem, egga ira i tiempo nga awayyana nga nonopattam nu kunnasina ittam nga meyusa. Ipalippawa nittam naw nga artikulo nga egga i papel na kada tadday nittam ta kongregasion.
^ par. 3 KEBALINAN NA TERMINO: I papel tam ta kongregasion ni Jehova ay tumukoy ta parte tam nga mamagaram ta kongregasion. Ari tu nebase yaw ta lahi tam, karu na kuartu, kafamilia, kultura, anna katannang na nagigiammu tam.
^ par. 62 DESKRIPSION NA LETRATU: Ipasingan na tallu nga letratu nu anni i mesissimmu nige, durante, anna kabalin na study. Letratu 1: Meddu nga alawatan na elder i bisita, iprepara na kabataan nga brother i sound, anna kibbidan na sister i manakam. Letratu 2: Abbarabbing anna mannakam nga makkomento ta Paggigiammu tu Passifusifutan. Letratu 3: Magatawa nga manguffun ta pappakarenu ta Kingdom Hall. Yena nga uffunanna i anana nga mangipay tu donasion. Mabbing nga brother nga manangngaw ta literatura, anna brother nga mamagaram ta bako nga wagi.
