1. Anni i niyawa ni Jehova ta kada matalo nga aripanna?

MEDDU nga niyawatan ni Jehova i kada matalo nga aripanna tu papel ta kongregasion. Maski nu nadduruma i papel tam, nabalor ittam ngamin anna kawagattam i kataggi-tadday. Ipalippawa nittam ni apostol Pablo yaw nga importante nga leksion. Kunnasi?

2. Segun ta Efeso 4:16, ngatta mawag tu tagibalorattam i kataggi-tadday anna makka-uffu-uffun ittam?

² Nipasigo ni Pablo ta tema nga teksto taw nga artikulo nga awan vuluvuga ta nittam i makapakkagi ta kapangngurugna tu “ariat-taka nga mawag!” (1 Cor. 12:21) Tapenu memammo i kongregasion, mawag tu tagibalorattam i kataggi-tadday anna makka-uffu-uffun ittam. (Bibbigan i Efeso 4:16.) Nu mattaradday ittam nga mattrabahu, mapasikan i kongregasion anna matageno na ngamin nga egga i mangiddu nira.

3. Anni i gigiammuattam taw nga artikulo?

³ Kunnasi tam nga merespeto i wawwaragi tam? Taw nga artikulo, ikonsidera tam nu kunnasi nga merespeto na elder ira i kasi-elderda. Tapus gigiammuattam nu kunnasi tam nga tagibaloran i wawwaragi nga awan tu attawada. Gigiammuattam gapa nu kunnasi tam nga appresian danuri ariadda kuruga ammu i lengguahe tam.

4. Anni nga tabarang ni Pablo ta Roma 12:10 i mawag nga tuttulan na elder ira?

⁴ Sinunno na masanto nga espiritu ni Jehova i ngamin nga elder ta kongregasion. Ngem nadduruma i abilidadda. (1 Cor. 12:17, 18) Bagu laman nga nabbalin tu elder i karuan nira anna baddi paga i ekspiriensada. Limitadu gapa i makua na karuan megafu ta edad anna gawa-gawayyan. Ngem awan nakuan tu elder nga gittana makkagi ta kasi-elderna tu “ariat-taka nga mawag!” Tuttulan nakuan na kada elder i tabarang ni Pablo ta Roma 12:10.​—Bibbigan.

5. Kunnasi nga merespeto na elder ira i kasi-elderda, anna ngatta importante nga kuadda yatun?

⁵ Merespeto na elder ira i kasi-elderda gukaban na pagginna tu mapia tannira. Mas ngana nga kawagan yatun nu mammiriting ira tapenu paguruvovugan i serioso ira nga gannug. Ngatta? Yaw i kagian na Passifusifutan nga Oktubre 1, 1988: “Rekunnisian na elder ira nga gukaban na masanto nga espiritu, megiya ni Cristo i nono na maski sinni nga elder tapenu makeyawa tu prinsipio na Biblia nga kawagan tapenu marubang i maski anni nga situasion onu makangngua tu maski anni nga importante nga desision. (King. 15:6-15) Awan tu tattadday nga elder i egga laman nisa i espiritu.”

6. Anni i makoffun ta elder ira tapenu egga i pattaraddeda, anna anni i benefisio natun ta kongregasion?

⁶ Merespeto na elder i kasi-elderna nu ari tu kanayun nga yayya i magollu nga mabbida ta mitingda. Ari tu yayya i maka-aru ta paguruvovugda anna arianna ifuersa nga kanayun nga fustu i opinionna. Lallagu, mapakalinno nga ikagina i pagimammana. Ginnanna tu mapia i komento ira na tanakuan. Sigga-paran gapa yayya nga ibillay i prinsipio ira ta Katurakan anna tuttulan i direksion na “mekatalo anna nannono nga doroban.” (Mat. 24:45-47) Nu ayatan anna irespeto na elder i kasi-elderna nu mammiriting ira, egga nira i masanto nga espiritu na Dios anna igiya ira natun tapenu makangngua tu desision ira nga mamatuyag ta kongregasion.​—Sant. 3:17, 18.

7. Anni i pagimamma ni Jesus turi ta awan tu attawada?

⁷ Ta kongregasion, egga danuri magatawa anna egga gapa ira i familia. Ngem egga gapa danuri awan tu atawada. Kunnasi tam nga imammatan danaw nga single onu awan tu atawada? Mawag nga parigattam i pagimamma ni Jesus tannira. Durante ta ministeriona ta davvun, ari nga nangatawa si Jesus. Nattalupaddian yayya nga awan tu atawa anna nifokusna i tiempo anna atensionna ta annunganna. Ari vuluvuga nituddu ni Jesus nga mawag tu maki-atawa i tadday nga Cristiano, ni tu nitudduna nga mawag tu mattalupaddian nga awan tu atawana. Ngem kinagina nga pinili na karuan nga Cristiano i ari maki-atawa. (Mat. 19:11, 12, NW; innan i study note na Mateo 19:12, NW ) Irespeto ni Jesus danuri awan tu atawana. Arianna ira minammatan nga alalinno onu egga i kurang tannira.

8. Segun ta 1 Corinto 7:7-9, anni i nipagaram ni Pablo nga pannonopan na Cristiano ira?

⁸ Kagitta ni Jesus, awan tu atawa ni Pablo durante ta ministeriona. Ari vuluvuga nituddu ni Pablo nga mali nga maki-atawa i Cristiano ira. Ammuna nga personal nga desision yatun. Ngem pinagaram ni apostol Pablo i Cristiano ira nga pannonopadda nu makapattalupaddian ira nga awan tu atawana durante nga masserbi ira kani Jehova. (Bibbigan i 1 Corinto 7:7-9.) Ari tu alalinno i pinaningan ni Pablo ta awan tu attawada. Kakuruganna, pinilina si Timoteo nga awan tu atawana tapenu tangngallan i madammo ira nga annungan. * (Fil. 2:19-22) Ari gafu mepangngo nga nonopan nga mas kualipikadu onu ari i tadday nga brother megafu laman ta natawan yayya onu ari.​—1 Cor. 7:32-35, 38.

9. Anni i makagi tam ta paki-atawa anna kawan tu atawa?

⁹ Ari nituddu ni Jesus onu ni Pablo nga mawag nga maki-atawa i Cristiano ira, ni tu nitudduda nga mawag tu mattalupaddian nga awan tu atawa. Anni gafu i makagi tam ta paki-atawa anna kawan tu atawa? Makakkasta i tabbag na Passifusifutan Oktubre 1, 2012 tatun nga pakkiavu: “Kurug, parehu yatun [i paki-atawa anna i kawan tu atawa] nga regalu naggafu ta Dios. . . . Ari minammatan ni Jehova [i kawan tu atawa] nga kepasiranan onu pakadismayan.” Yatutta irespeto tam i papel na wawwaragi tam ta kongregasion nga awan tu atawada.

10. Kunnasi tam nga merespeto i single nga wawwaragi tam?

 ¹⁰ Kunnasi tam merespeto i panageno anna i situasion na single nga wawwaragi tam? Daddammattam nga personal nga desisiodda yatun. Egga gapa karuan nga single nga kayàda i makitawa ngem ariadda paga gare nga nalegan i mepangngo para nira. Karuan gapa nira ay natayan tu atawada. Ngem maski anni paga tatun, mepangngo kari nga iyavu tam ta wawwaragi tam nga single nu ngatta ariadda paga makitawa? Uffunattam kari ira nga magaleg tu paki-atawan onu ireto tam nira? Siempre, egga i karuan nga single nga mappoffun, ngem nu ariadda mabba nga ikiddaw yatun nittam, anni tamma i matagenoda nu kuattam yatun? (1 Tes. 4:11; 1 Tim. 5:13) Ikonsidera tam i karuan nga komento na matalo ira nga single.

11-12. Kunnasi nga posible nga mapakafi tam i nono na single ira?

¹¹ Tadday nga manangngal ta sirkito nga efektibo ta asaymentna i nakkagi nga aru i benefisio na pabbalin tu single. Ngem egga ira i tiempo nga maski nu makasta gapa i motibo na wawwaragi, makapakafi ta nono nu iyavuda nisa: “Ngatta ari ka paga nga makitawa?” Kunnaw i kinagi na single nga brother nga Bethelite: “Nu mittan, mepatageno niakan na wawwaragi nga kakkabbi gapa danuri i single. Gittana mamakadammo lallagu i pabbalin tu single, imbes nga bendision.”

¹² Kunnaw i kagian na tadday nga single nga sister nga Bethelite: “Pagabbo na karuan nga publisher nga magala-aleg tu atawa i ngamin nga single, onu kanayun ngana laman nga imammatadda i kada pakikavulu ta tanakuan nga totolay nga tiansa tapenu makaleg tu atawa. Mittan, nabbiahe ngà ta tanakuan nga lugar ta nasiommi para ta asayment ku anna nekanna tu studyda ta gabi na aggaw nga dattal ku. Kinagi nio na sister nga paddianakku nga egga i dua nga brother ta kongregasion nga kasiddagunakku. Nipasiguraduna nio nga ariannà mabba nga irereto. Ngem turi ta nakatallukkami ‘na ta Kingdom Hall, ginuggunnà tapenu ipakilala tari ta dua nga brother. Siempre, kappasiran yatun nikami tallu.”

13. Anni ira nga ehemplo i namagaram ta tadday nga single nga sister?

¹³ Kunnaw i kagian na tadday paga nga sister nga Bethelite: “Egga ira i ammù nga nabayag ngana nga single nga papayunir nga balanse, nakafokus, minassakrifisio, anna kontentu ta serbisioda. Dakal i meyuffudda ta kongregasion. Rasonable i pagimammada ta pabbalin tu single. Ariadda matageno nga egga i bentahada megafu ta nattalupaddian ira nga single, ni tu maraddam ira megafu ta awan tu atawa anna familiada.” Yatutta kakkasta i kongregasion nga mangirespeto anna mattagibalor ta kataggi-tadday. Ariammu matageno nga ikakkabbi daka onu passiladdaka. Ni tu pagurayaddaka onu meyata-atannakka. Basta ammum nga iddeddukaddaka.

14. Kunnasi tam nga merespeto i single ira?

¹⁴ Appresian na single nga wawwaragi tam nu tagibalorattam ira base ta makasta ira nga kualidadda anna ari tu base ta nu natawan ira onu ari. Imbes tu ikabbi tam ira, makasta nu appresiattam i kinamataloda. Nu kunnatun, ariadda vuluvuga matageno nga gittana kakkagiattam nira: ‘Ariaddakamu nga mawag!’ (1 Cor. 12:21) Imbes tu kunna, matagenoda nga irerrespeto tam ira anna tagibalorattam i papelda ta kongregasion.

15. Anni ira nga panguloli i kingngua na karuan tapenu mapalawada i ministerioda?

¹⁵ Ta nappasa nga daga-ragun, aru nga publisher i pinabbalidda tu addetan i  paggigiammu tu tanakuan nga lengguahe tapenu mapalawa i ministerioda. Tapenu makuada yatun, mawag tu egga ira i uliadda. Pinanawan danaw nga brother anna sister i kongregasion nga mangusa tu sarilida nga paguvovug tapenu makapasserbi ira ta kongregasion nga tanakuan i lengguahena anna nu sitaw mas dakal i pakawagan ta publisher ira. (King. 16:9) Personal nga desisiodda yaw tapenu mepoppolluda i intereses na Pappatulan. Maski nu daga-ragun i mappasa nige nga mabbalin ira tu malalaki ta bagu nga lengguahe, aru i meyuffudda ta kongregasion. Makapasikan ta wawwaragi i makasta ira nga kualidad anna i ekspiriensada. Tagibalorattam danaw nga minassakrifisio nga brother anna sister!

16. Sitaw nga ibase na elder ira nu kualipikadu i tadday nga brother nga masserbi bilang elder onu ministerial?

¹⁶ Ari nakuan nga madduda i elder ira ta pangirekomenda ta tadday nga brother nga masserbi bilang elder onu ministerial megafu laman ta arianna paga kuruga ammu i lengguahe na kongregasion. Usitakkan na elder ira i brother nga merekomenda tu elder onu ministerial base ta kualipikasion ira ta Biblia, ari tu base ta kalalakina nga maguvovug ta lengguahe na kongregasion.​—1 Tim. 3:1-10, 12, 13; Tito 1:5-9.

17. Anni ira nga pakkiavu i meparubang ta familia ira nga nagali ta tanakuan nga nasion?

¹⁷ Egga karuan nga Cristiano nga familia nga nagali ta tanakuan nga nasion tapenu panawan i marake nga kondision ta mismu nga lugarda onu tapenu magaleg tu trabahu. Tatun ira nga situasion, awayyana nga maggigiammu ngana i ána ta eskuela nu sitaw meyusa i lengguahe natun nga nasion. Mawag gapa nga gigiammuan na mappagana yatun nga lengguahe tapenu makaleg ira tu trabahu. Kunnasi nu egga i kongregasion onu grupo nga mangusa ta lengguahe na familiada? Anni nakuan nga kongregasion i pagatendeyan na familia? Yuri kari i kongregasion nga mangusa ta lengguahe natun nga nasion onu i kongregasion nga mangusa ta sarili nga paguvovug na familia?

18. Segun ta Galacia 6:5, kunnasi tam nga merespeto i desision na ulu na familia?

¹⁸ I ulu na familia i maddesision nu anni nga kongregasion i atendeyan na familiana. Mawag tu para ta pammakapianan na familiana yatun nga desisionna. (Bibbigan i Galacia 6:5.) Megafu ta personal nga desision yatun, mawag tu irespeto tam i desision na ulu na familia. Maski anni paga i desisionna, suportattam yatun anna alawatan anna ayatattam yatun nga familia.​—Roma 15:7.

19. Anni i mawag tu pannonopan tu mapia anna ipakimallo na ulu ira na familia?

¹⁹ Ta karuan nga situasion, baka pinili na mappagana nga magatende ta kongregasion nga mangusa ta lengguaheda ngem baka ari kuruga nga malippawa yatun na ána. Nu i lengguahe na kongregasion ay tanakuan  ta primeru nga lengguahe na nasion nga diadda, baka marigatan i abbarabbing nga alippawatan i study ira anna ari ira mapprogreso ta espiritual. Ngatta? Megafu ta baka i lengguahe na nasion i meyusu-usa ta eskuela na ána, ari tu i lengguahe na mappagana. Nu kunnatun i mesimmu, mawag tu pannonopan yatun tu mapia na ulu ira na familia anna ipakimalloda i sirib. Nu kunnatun, makapaddesision ira nu anni i mawag nga kuadda tapenu moffunan i ánada nga mas maddukko kani Jehova anna ta totolena. Puede nga uffunadda i ánada nga mabbalin tu malalaki ta sarilida nga lengguahe onu ikonsiderada nga magali ta kongregasion nga mangusa tu lengguahe nga malippawa tu mapia na ánada. Maski anni paga i desision na ulu na familia, ipatageno nakuan na kongregasion nga pinilina nga passerbian nga merespeto anna tagibaloradda yayya anna i familiana.

20. Kunnasi tam nga merespeto i wawwaragi tam nga maggiggigiammu tu bagu nga lengguahe?

²⁰ Nammuattam ngana nga egga ira brother onu sister ta maski sitaw nga kongregasion nga marigatan nga gigiammuan i bagu nga lengguahe. Baka marigatan ira nga ikagi nu anni i nononopadda. Ngem nu ariattam maffokus ta kalalakida ta lengguahe, masingattam i ayada kani Jehova anna i pakkaragada nga passerbian yayya. Nu masingattam danaw nga makasta nga kualidad, talaga tagibaloran anna irespeto tam ira. Ariattam nga kagian nga ‘ariaddakamu nga kawagan’ megafu laman ta ariadda kuruga ammu i lengguahe tam.

21-22. Anni i kappabbaw nga pribilehio nga egga nittam?

²¹ Niddan ittam ni Jehova tu kappabbaw nga pribilehio nga mapeggan tu papel ta kongregasionna. Lallaki tam man onu babbay, single onu natawan, abbing onu manakam, onu malalaki ittam nga maguvovug ta tadday nga lengguahe onu ari, nabalor ittam kani Jehova anna ta kataggi-tadday.​—Roma 12:4, 5; Col. 3:10, 11.

²² Tulu-tuloy nakuan nga iyaplika tam i aru nga makasta nga leksion nga magigiammu tam ta ilustrasion ni Pablo ta baggi na tolay. Makoffun yaw nittam tapenu ammu tam i papel tam ta pamagaram ta wawwaragi tam. Makoffun gapa yaw nittam tapenu kanayun nga ayatattam ira anna irespeto tam i papel na tanakuan ta kongregasion ni Jehova.