1-2. Segun ta Salmo 34:8, kunnasi tam mapakurug nga mapia si Jehova?

IMAJINAMMU nga egga nakkagi nikaw nga kanammu i tadday nga makan nga ari mu paga vuluvuga nasissiman. Awayya na nga inninnammu yatun, aga-agubammu, ammuammu nu kunnasi da nga nilutu, onu iyavu mu ta tanakuan nu anni i tattam natun. Ngem mammuammu laman nu kayà mu yatun nga makan nu sissimammu mismu yatun.

² Mammuattam nga mapia si Jehova nu bibbigattam i Biblia anna i publikasiottam ira kunne na gapa nu iyistoria na tanakuan i bendision ira nga nalawa da kani Jehova. Ngem mas mabbalin tu kuru-kurug nittam i pia ni Jehova nu ‘makakkapattam’ onu masissimattam mismu yatun. (Bibbigan i Salmo 34:8.) Yaw i tadday nga angngarigan nu kunnasi tam nga makua yatun. Kunnasi nu goal tam nga masserbi ta ngamin tiempo ngem mawag tu mappasimple ittam tapenu madde tam yatun? Awayya na nga mamippiga tam ngana nga nabibbig i promesa ni Jesus nga iyawa ni Jehova i mawag tam nu pagolluattam i Pappatulan. Ngem baka ariattam paga mismu naekspiriensa onu nakakkapan yatun. (Mat. 6:33) Ngem megafu ta mattalo ittam ta promesa ni Jesus, nattipid ittam, inadjust tam i iskediul tam ta sekular nga trabahu, anna naffokus ittam ta ministerio tam. Durante nga kuattam yatun, napakurug tam mismu nga iyawa ni Jehova i pakawagattam ira. Tatun tam ngana mismu nga ‘makakkapan’ i pia ni Jehova.

3. Segun ta Salmo 16:1, 2, sinni i makalawa ta pia ni Jehova?

³ Si Jehova ay ‘mapia ta maski sinni,’ maski turi ira ta ari nga makannammu nisa. (Sal. 145:9; Mat. 5:45) Ngem mas i pamendision na turi ira ta mangiddu nisa anna kukukuadda i ngamin  tapenu passerbian yayya. (Bibbigan i Salmo 16:1, 2.) Ammuattam i karuan ta mapia nga gannug nga kukukuan ni Jehova para nittam.

4. Kunnasi nga ipasingan ni Jehova i pia na turi ira ta namegafu ngana nga mangaya nisa?

⁴ Kada iyaplika tam i magigiammu tam kani Jehova, masingattam i makasta nga efekto natun nittam. Turi ta ginigiammu tam i meyannung nisa anna namegafu tam ngana nga ayatan yayya, inuffunan na ittam tapenu meyemmattam i appana-panono anna annangngua nga ikalussaw na. (Col. 1:21) Tapus turi ta nidedika tam i baggi tam kani Jehova anna nappabawtiso ittam, mas naekspiriensa tam i pia na megafu ta niddan na ittam tu marenu nga konsensia anna nakiddukko yayya nittam.​—1 Ped. 3:21.

5. Anni ira nga pia ni Jehova i naekspiriensa tam ta ministerio?

⁵ Adde sangawe, maekspiriensa tam i pia ni Jehova nu mamministerio ittam. Minappasirakka kari? Aru ta totolay ni Jehova i kunnatun. Baka nigem nga nabbalin tu Saksi, ariammu vuluvuga nanono nga umay ka ta balay na ariammu nga kilala tapus ikagim nisa i mensahe na Biblia. Ngem kanayummu ngana nga kukukuan yatun sangawe. Inuffunan naka paga lagu ni Jehova tapenu ma-enjoy mu i pallayyagayya! Mamippigam ngana nga natageno i panguffun ni Jehova nikaw. Angngarigan na, inuffunan naka nga mattalupaddian nga kalmadu turi ta egga i kumokkontra ta ilayyagayyam. Inuffunan naka gapa tapenu manono mu i eksakto nga teksto nga nebibbig mu ta interesadu nga makabbalay. Tapus pasa-pasikannan naka gapa tapenu metuloy mu i pallayyagayya maski nu ari nga maggigginna i totolay.​—Jer. 20:7-9.

6. Anni ira nga passanay ni Jehova nittam i mangipasingan ta pia na?

⁶ Ipasa-pasingan gapa ni Jehova i pia na ta passanay na nittam para ta ministerio. (Juan 6:45) Magiraw tam ta study ira ta midweek i sampol ira nga pakiyuvovug nga neprepara tu mapia anna mepagaram nittam nga usattam yatun ta ministerio. Baka ta ollu, magalangan ittam nga usan yatun. Ngem nu kakkapan onu puruebattam yatun, masingattam nga efektibo yatun ta teritoria tam. Mepagaram gapa nittam ta study anna kombension ira nga makiparte ittam ta nadduruma nga klase na pallayyagayya nga ariattam paga vuluvuga napurueban. Awayya na nga ari ittam sanay nga kuan danatun ngem magga bendisionan ittam ni Jehova nu iyawa tam i kapianattam maski nu anni paga i situasiottam. Ammuattam i karuan tatun ira nga bendision anna nu kunnasi tam paga mapalawa i ministerio tam.

7. Anni i bendisiottam nu ikagumattam nga palawan i ministerio tam?

⁷ Mas maddukko ittam kani Jehova. Kunnatun i nesimmu ta elder nga si Samuel * nga massesserbi ta Colombia kavulu i atawa na. Magayayya ira nga mappayunir ta kongregasiodda ngem goal da nga palawan paga i ministerio da gukaban na panguffun ta kongregasion nga mas dakal i pakawagan na. Ngem tapenu makuada yatun, mawag da i massakrifisio. Kinagi ni Samuel: “Niyaplika mi i Mateo 6:33 anna ari kami ngana gumatang tu ariammi mabba kawagan. Ngem kuruga narigatakkami nga panawan i apartment mi. Napadday yatun segun ta plano mi anna awan ngana tu pagammi tatun.” Turi ta nagali ngana ira ta bagu nga asayment da, nakannammuadda nga mas baddi i mawag da nga gastuan kumpara ta dati. Kinagi paga ni Samuel: “Nasingammi nga igigiya nakami ni Jehova  anna tattabbagan na i pakimallo mi ira. Sangawe mi nga mas napakurug nga faboran anna iddukan nakami ni Jehova.” Egga kari i makuam tapenu mapalawam gapa i ministeriom? Siguradu nga mas maddukko ka kani Jehova anna iyawa na i pakawagammu.​—Sal. 18:25.

8. Anni i magigiammu tam ta ekspiriensa da Ivan anna Viktoria?

⁸ Magayayya ittam ta passerbi tam. Payunir ta Kyrgyzstan i magatawa nga si Ivan anna Viktoria. Kingngua da tu simple i pattoleda tapenu makapabboluntariu ira ta maski anni nga asayment, nelagum ngana i konstruksion. Kinagi ni Ivan: “Kingngua mi i ngamin nga mawayya mi ta kada asayment. Maski paga nu nababbannag kami kadaggaw, memammo anna magayayya kami. Ammu mi gare nga inusa mi i sikammi para ta Pappatulan. Magayayya kami gapa ta aru i nabbalin tu kofummi anna napakaru i makasta nga ekspiriensa mi.”​—Mar. 10:29, 30.

9. Anni i kingngua na tadday nga sister tapenu mas aru i makua na ta ministerio, anna anni i resulta natun?

⁹ Puede ittam lagapa nga mabbalin tu magayayya ta passerbi tam kani Jehova maski nu mariga i situasion. Kunnatun si Sister Mirreh nga taga-West Africa. Bako ngana yayya anna balu paga. Turi ta narretiro yayya bilang doktor, nappayunir yayya. Megafu ta grabe nga arthritis na, makapabbayag laman yayya tu tangoras ta pamala-balay. Ngem mas inammungan na i tiempo na ta public witnessing. Aru i return visit anna Bible study na tapus tawagan na i karuan tatun. Ngatta kayà ni Mirreh nga mas aru paga i makua na ta passerbi kani Jehova? Kinagi na: “Kuruga ayatakku si Jehova anna si Cristo Jesus. Kanayukku nga ipaka-pakimallo nga uffunan nà ni Jehova tapenu makuà i ngamin nga mawayyà ta passerbì nisa.”​—Mat. 22:36, 37.

10. Segun ta 1 Pedro 5:10, anni i malawa danuri maggawa tu tanakuan paga ira nga goal?

¹⁰ Makalawa ittam tu kammungan nga passanay kani Jehova. Napakurug yatun na payunir nga si Kenny nga massesserbi ta Mauritius. Turi ta nakannammuan na i kinakurug, nagimmang yayya ta pagiskuela ta unibersidad, nappabawtiso yayya, tapus nappayunir. Kinagi na: “Ikagumakku nga parigan si profeta Isaias nga nakkagi: ‘Egga ngà taw! Dobammà!’” (Isa. 6:8) Nabboluntariu si Kenny ta nadduruma nga construction project anna nanguffun gapa yayya ta pangitransleyt tu nebase-Biblia ira nga publikasion ta lengguahe na. Kinagi na: “Ta passanay ku, nagigiammù i skill ira nga kawagakku ta asayment ku.” Ngem ari laman tu puru meyannung ta trabahu i nagigiammu na. “Nammuakku gapa i limitasiokku ira anna i kualidad ira nga kawagakku tapenu mabbalin ngà tu mas mapia nga aripan ni Jehova,” kunna. (Bibbigan i 1 Pedro 5:10.) Ngatta ariammu pannonopan i situasiommu anna innammu nu puede ka nga makalawa tu kammungan nga passanay kani Jehova?

11. Anni i kingngua na sister ira ta South Korea tapenu makapallayyagayya, anna anni i resulta natun? (Innan i letratu ta vungun.)

¹¹ Kawagan gapa nga masanay maski danuri nabayag ngana nga Saksi, mas ngana nu puruebadda i bagu nga klase na pallayyagayya. Durante ta COVID-19 pandemic, kunnaw i niyistoria na elder ira ta tadday nga kongregasion ta South Korea: “Abbo na karuan nga ari ngana ira makoffun ta pallayyagayya megafu ta gawa-gawayyadda. Ngem sangawe, nakua da ngana yatun gukaban na videoconferencing. Ginigiammu na tallu nga sister nga maturu tu 80 ngana i dagudda nu kunnasi usan i computer ta pallayyagayya. Megafu tatun, maggi kadaggaw ngana ira nga makiparte tatun.” (Sal. 92:14, 15) Kayà mu kari nga mas paga nga makapasserbi  kani Jehova tapenu mas paga nga maekspiriensa i pia na? Ammuattam i karuan nga makuam tapenu madde mu yatun.

12. Anni i promesa ni Jehova para turi ira ta mattalo nisa?

¹² Mattalo ka kani Jehova. Nipromesa na nga bendisionan na ittam nu mattalo ittam nisa anna iyawa tam i kapianattam. (Mal. 3:10) Naekspiriensa mismu yatun ni Sister Fabiola nga taga-Colombia. Kakayà na nga mappayunir kabalin na bawtismo na. Ngem mawag tu mattrabahu yayya megafu ta nakadepende i atawa na anna i tallu nga ána na ta sueldu na. Turi ta puede ngana yayya nga marretiro, nipakimemallo na i uffun ni Jehova. Kinagi na: “Mabayag nige nga maproseso i pension. Ngem nappasa laman i tanga-vulan, nala ku ngana i pension ku. Gitta na milagro yatun!” Tapus kabalin na dua nga vulan, nappayunir ngana yayya. Maturu tu 70 ngana i dagun na sangawe anna 20 nga dagun ngana yayya nga mappappayunir. Walu nga totolay i noffunan na tapenu mappabawtiso. Kinagi na: “Maski nu egga ira i tiempo nga matageno ku nga makafi ngà, kagaggaw ngà nga uuffunan ni Jehova tapenu makapappayunir ngà lagapa.”

13-14. Anni ira nga ehemplo i makoffun nittam tapenu mattalo kani Jehova anna palawan i ministerio tam?

¹³ Parigammu i ehemplo danuri nattalo kani Jehova. Aru i ehemplo ta Biblia danuri nallallappo ta passerbi da kani Jehova. Ngem binendisionan laman ira ni Jehova kabalidda nga nepasingan i pattalo da ta nisa. Angngarigan na, binendisionan laman ni Jehova si  Abraham kabalin na nga panawan i balena “maski nu arian na nga ammu i angayan na.” (Heb. 11:8) Nabendisionan laman gapa si Jacob kabalin na nga nakiggavvu ta tadday nga anghel. (Gen. 32:24-30) Turi ta mattallung ngana gapa i nasion na Israel ta Nepromesa nga Davvun, nakakantay onu nakadaki laman ira turi ta nagimmang i pagagi na Bannag Jordan kabalin nga nabbatay i papari ta danum.​—Jos. 3:14-16.

¹⁴ Makagigiammu ka gapa ta ehemplo na Saksi ira ta tiempo tam nga nattalo kani Jehova anna pinalawa da i ministerio da. Angngarigan na, kakayà na magatawa nga si Payton anna Diana nga mabbibbig tu ekspiriensa ira na wawwaragi nga pinalawa da i ministerio da, kagitta na mabibbig ta serye nga “Sigga-paran nga Nisakrifisioda i Baggida.” * Kinagi ni Payton: “Nu bibbibbigammi i ekspiriensa da ira, gitta na gigirawammi i tadday nga tolay nga kumu-kuman tu masingngo. Durante nga gigirawammi yatun, mas kayà mi nga ‘sissiman anna innan nga si Jehova ay mapia.’” Turi kua, nagali si Payton anna Diana ta lugar nu sitaw mas dakal i pakawagan. Nabibbig mu kari yatun nga serye? Nagirom kari gapa i video ira nga Pangangaral sa Malalayong Teritoryo​—Australia anna Pangangaral sa Malalayong Teritoryo​—Ireland ta jw.org? Makoffun danatun tapenu mammuammu nu kunnasim mapalawa i ministeriom.

15. Anni i meyuffun nittam na mapia nga kakavvulu?

¹⁵ Mappili ka tu mapia nga kakavvulu. Mas nga maganassan ittam nga sissiman i bagu nga putahe nu makikavulu ittam turi ira ta mahilig nga kuman tu kunnatun. Kunnatun gapa nu makikavulu ittam turi ira ta pagolluadda i passerbi kani Jehova. Mas nga maganassan ittam nga pannonopan nu kunnasi tam paga mapalawa i ministerio tam. Kunnatun i nesimmu ta magatawa nga da Kent anna Veronica. Niyistoria ni Kent: “Pinagaram kami na kokkofun anna kafamilia mi nga purueban i bagu ira nga forma na passerbi. Megafu ta nakikavulu kami turi ira ta pagolluadda i Pappatulan, mas nga nakkomfiansa kami nga purueban i bagu ira nga gannug.” Espesial payunir ngana sangawe ta Serbia da Kent anna Veronica.

16. Segun ta ilustrasion ni Jesus ta Lucas 12:16-21, ngatta sigga-paran ittam nakuan nga massakrifisio?

¹⁶ Massakrifisio ka para kani Jehova. Ariattam mawag nga ibattang i ngamin nga egga nittam tapenu mapagayayya tam si Jehova. (Ecl. 5:19, 20) Ngem nu manaki tam i massakrifisio megafu ta ariattam nga mapanawan i gannug ira nga kakayà tam, megitta ittam ta nakkamalian na lalaki ta ilustrasion ni Jesus nga komfortable i pattolena ngem kinattaman na i Dios. (Bibbigan i Lucas 12:16-21.) Kunnaw i kinagi na brother nga si Christian nga maddian ta France: “Ari ku nga iyayawa i kakaruan na tiempò anna sikakku para kani Jehova anna ta familià.” Megafu tatun, naddesision ira na atawa na nga mappayunir. Yari tu pinanawadda i trabahu da tapus mappakarenu ngana laman ira tu babalay onu ofisina ira tapenu masuportan i pakawagadda. Maski nu mas baddi ngana i kuartu da, kontentu lagapa ira. Sulit kari i nisakrifisio da? Kinagi ni Christian: “Mas ma-enjoy mi ngana sangawe i ministerio mi anna magayayya kami ta magigiammu na Bible study anna return visit mi ira i meyannung kani Jehova.”

17. Anni i awayya na nga mangifugag nittam nga purueban i bagu nga klase na pallayyagayya?

¹⁷ Sigga-parakka nakuan nga purueban i bagu ira nga klase na pallayyagayya. (King.  17:16, 17; 20:20, 21) Megafu ta COVID-19 pandemic, mawag tu i-adjust na payunir ta United States nga si Shirley i pallayyagayya na. Ta ollu na bi, magalangan yayya nga purueban i telephone witnessing. Ngem turi ta sinanay ira na manangngal ta sirkito ta pabbisita na nira, regular ngana yayya nga makipapparte tatun nga klase na pallayyagayya. Kinagi na: “Ta ollu na, mavurung ngà. Ngem sangawe, ma-enjoy ku ngana yatun. Mas aru paga lagu nga totolay i malayyagayyammi kumpara ta pamala-balay mi!”

18. Nu kayà tam nga palawan i ministerio tam, anni i makoffun nittam nu makkaproblema ittam?

¹⁸ Mapplano ka anna ituppal mu yatun. Nu makkaproblema ittam, magga makimallo ittam anna pannonopattam tu mapia nu anni i plano tam nga kuan tatun. (Prov. 3:21) Kunnaw i kinagi ni Sonia nga regular payunir ta tadday nga Romany-language group ta Europe: “Kakayà ku nga itura ta papel i planò ira tapus ipè yatun nu sitaw kanayukku nga masingan. Egga gapa i drowing ku na intersection na dalan ta lamesà tapenu sonu egga i desision nga kuakku, innakku yatun nga intersection tapus pannonopakku nu kunnasi makafekto yatun nga desision ta planò ira.” Ikaguman gapa ni Sonia nga mappositibo maski nu egga ira i problema na. Kinagi na: “Depende ta anningakku ta panguli na situasiokku, puede nga mabbalin yatun tu gitta na pader nga mangifugag niakan onu tetay nga mangiyadde niakan ta planò ira.”

19. Kunnasi tam mepasingan nga appresiattam i bendision ira ni Jehova?

¹⁹ Napakaru i bendision nittam ni Jehova. Mepasingattam nga kuruga appresiattam danatun nu kuattam i ngamin nga mawayya tam tapenu dayawan yayya. (Heb. 13:15) Nonopattam gafu nu kunnasi tam paga nga mas mapasserbian si Jehova tapenu mas paga nga bendisionan na ittam. Kanayuttam nakuan nga pannonopan nu kunnasi tam nga ‘makakkapan mismu i pia’ ni Jehova. Nu kunnatun i kuattam, maparigattam si Jesus nga nakkagi: “I pakkatolè ay i pamarulo ku ta uray na Dios nga naddog niakan anna i pangituppal ta ipakua na.”​—Juan 4:34.