1-2. Anni i gigiammuattam taw nga artikulo?

KUNNASI nu iinnaggammu i padala nga talaga kawagammu ngem ari nga zimittal yatun ta tiempo nga ekspektammu? Madismaya ka kari? Baka matageno mu i kagian na Proverbio 13:12: “I gannug nga iddanaman nu ari nga mesimmu ay mamattaki ta futu.” Ngem kunnasi gapa nu nakannammuammu nga egga gabba i makasta nga rason nu ngatta ari nga zimittal i padala ta tiempo nga ekspektammu? Magga pasa-pasensiammu lagapa i maginnag.

² Gigiammuattam taw nga artikulo i karuan nga prinsipio na Biblia nga makoffun nittam tapenu ‘mapasensia ittam nga maginnag.’ (Mik. 7:7) Ammuattam gapa i dua nga situasion nga kawagattam nga pasensian nga innaggan si Jehova. Tapus pabbiridattam i bendision ira nga iyawa na para turi ira ta mapasensiadda i maginnag nisa.

3. Anni i magigiammu tam ta Proverbio 13:11?

³ Mabibbig tam ta Proverbio 13:11 i tadday nga rason nu ngatta mawag tu mappasensia ittam. Kagian na: “I kinariku nga mabi laman nga nala ay mofu, ngem i kinariku nga sisinu nga nonnug ay umaru.” Anni i magigiammu tam tatun? Makasta i resulta na nu sisinu anna mapasensia i pagangngua tam ta ganna-gannug.

4. Anni i magigiammu tam ta Proverbio 4:18?

⁴ Kagian nittam na Proverbio 4:18 nga “i dalan na matunung ay kagitta na nawag ta umma, mannawag nga mannawag adde ta mattangnga-naggaw ngana.” Magaplika yatun ta sisinu nga pangipakannammu ni Jehova ta gakkag na ta totolena. Ngem puede gapa nga magaplika yatun nga teksto ta papprogreso na tadday nga Cristiano ta espiritual. Sisinu yatun anna kawagan  i tiempo. Mawag gafu nga mallallappo ittam ta paggigiammu anna pangiyaplika ta tabarang ira na Uvovug na Dios anna na organisasion na tapenu sisinu tam nga maparigan i kualidad ira ni Cristo anna dumakal i pakannammu tam meyannung ta Dios. Innattam nu kunnasi nga niyilustra ni Jesus yatun.

5. Kunnasi nga niyilustra ni Jesus i sisinu nga papprogreso ta espiritual na tadday nga tolay?

⁵ Nigitta ni Jesus i mensahe na Pappatulan ta baddi nga vukal onu vullung nga sisinu nga dumakal turi ira ta mapia i giffutuadda. Kinagi na: “Mattalovu anna makadaka-dakal laggapa i mula na [minakkoman], ngem arian na nga ammu nu kunnasi. Ta i davvun laggapa i mamattalovu ta vullung anna mamavvunga ta mula. Ollu bi nga mattaringi, tumunug ngana nga maddawa ay ta kabalin na, mammayan ngana.” (Mar. 4:27, 28) Anni i kayà kagian ni Jesus? Gitta na tadday nga mula nga sisinu nga dumakal, sisinu gapa nga mapprogreso ta espiritual i tolay nga nangalawa ta mensahe na Pappatulan. Angngarigan na, durante nga mas maddukko kani Jehova i Bible study tam ira, aru gapa nga panguloli i kukukuadda. (Efe. 4:22-24) Ngem mawag tu daddammattam nga si Jehova i mamadakal tatun nga baddi nga vullung.​—1 Cor. 3:7.

6-7. Anni i magigiammu tam ta pamaratu ni Jehova ta davvun?

⁶ Mapasensia si Jehova ta ngamin nga kukukuan na anna ari yayya mappabibibi nga balinan i trabahu na. Kukukuan na yatun para ta kedayawan na ngagan na anna para ta pammakapianan na tanakuan. Masingan yatun ta sisinu nga pinangiprepara na ta davvun para ta totolay.

⁷ Mabibbig tam ta Biblia nu kunnasi nga pinaratu ni Jehova i davvun. Nakagi tatun nga pinlano na i “gukug na ira,” nitanno na i “fundasion na ira,” anna nikokkog na i “patuno na ira.” (Job 38:5, 6) Kabalin na nga kuan yatun, iningan na tu mapia i pinaratu na ira. (Gen. 1:10, 12) Maimajimmu kari i reaksion na anghel ira kada masingadda i bagu nga pinaratu ni Jehova? Magga eksayted ira! Yari  tu ‘nakkukkulle ira ta paddayaw.’ (Job 38:7) Anni i magigiammu tam tatun? Rinivu-rivu nga dagun nige nga nabalin ni Jehova i pamaratu na ngem turi ta iningan na ngana i pinaratu na ira nga pinannonopan na tu mapia, nakagi na nga “makakkasta i ngamin nga kiningngua na.”​—Gen. 1:31.

8. Anni i gigiammuattam ta tumunug ira nga parapo?

⁸ Nasingattam ta nappasa ira nga parapo nga aru nga prinsipio ta Biblia i manuddu nittam nu ngatta kawagan i pappasensia. Ammuattam ngana i dua nga situasion nga kawagattam nga innaggan si Jehova.

9. Anni i tadday nga situasion nga mawag tu innaggattam si Jehova?

⁹ Innaggattam nga matabbag i pakimallo tam ira. Awayya na nga nakimallo ittam ngana para ta sikan tapenu maattamman i tadday nga kapurueba onu tapenu malabanan i pakkafiattam. Ngem baka matageno tam nga mabayag nga matabbag i pakimallo tam. Ngatta ta ari tu insigida nga tabbagan ni Jehova i ngamin nga pakimallo tam?

10. Ngatta mawag tu mappasensia ittam nu meyannung ta pakimallo tam ira?

¹⁰ Gigginnan tu mapia ni Jehova i pakimallo tam ira. (Sal. 65:2) Ammu na nga mangurug ittam nisa nu napafutuan i pakimallo tam ira. (Heb. 11:6) Ngem kayà gapa masingan ni Jehova nu kunnasi ittam kadeterminadu nga itrabahu i pakimallo tam ira anna kuan i urena. (1 Juan 3:22) Yari tu mawag nga mappasensia ittam anna kuattam nu anni i nipakimallo tam mas ngana nu egga i laba-labanattam nga neyugaliattam nga marake nga annangngua onu pakkafian. Nipalippawa ni Jesus nga ari tu insigida nga matabbag i karuan ta pakimallo tam ira. Kinagi na: “Makkiddaw kamu ay keddak-kamu. Magaleg kamu ay makaleg kamu. Mattotto kamu ta puerta ay mavukatan. Ta ngamin i makkiddaw ay keddan, i magaleg ay makaleg, anna mavukatan i puerta ta mattotto.” (Mat. 7:7, 8) Nu tuttulattam yatun nga tabarang anna ‘ari ittam nga magimmang ta paddasal tam,’ siguradu nga gigginnan ittam na nelangitan nga Yama tam anna tabbagan na i pakimallo tam ira.​—Col. 4:2.

11. Kunnasi makoffun nittam i Hebreo 4:16 nu gitta na ari paga nga matabbag i pakimallo tam?

¹¹ Maski nu gitta na ari paga nga matabbag i tadday nga pakimallo tam, nipromesa ni Jehova nga tabbagan na yatun “ta tiempo na pagawag tam.” (Bibbigan i Hebreo 4:16.) Yari tu ariattam nakuan nga paliwatan si Jehova nu ari insigida nga natabbag i pakimallo tam gitta na inekspekta tam. Angngarigan na, aru i nabayag ngana nga mangipaka-pakimallo nga pangultimuan ngana nakuan na Pappatulan na Dios yaw nga mundo. Kinagi paga ni Jesus nga mawag tu ipakimallo tam yatun. (Mat. 6:10) Ngem kunnasi nu ari nga zimittal i panuppalan ta tiempo nga inekspekta na totolay? Melogo ittam nu pakkafiattam i pangurug tam ta Dios megafu laman tatun! (Hab. 2:3; Mat. 24:44) Masirib ittam nu innaggattam si Jehova anna mangurug ittam nga tabbagan na i pakimallo tam ira. Duttal i panuppalan ta fustu nga tiempo megafu ta dati ngana nga sinunno ni Jehova i “aggaw onu oras” natun. Yatun noka nga tiempo i kapianan para ta ngamin.​—Mat. 24:36; 2 Ped. 3:15.

12. Ta anni nga situasion nga baka mas marigatan ittam nga mappasensia?

¹² Mappasensia ittam anna innaggattam nga metunung i ari tu patas nga katratu tam. Ari tu patas i pattratu na totolay turi ira ta ari da nga kaparehu nga lalaki onu babay, rasa, kultura, onu lahi. Ari gapa nga patas i katratu na  tanakuan megafu ta egga i diferensia da ta pisikal onu mental. Maekspiriensa gapa yatun na aru nga totolay ni Jehova megafu ta pangurug da nga nebase ta Biblia. Nu mesimmu nittam yatun, nonopattam nakuan yaw nga kinagi ni Jesus: “I sinni laman nga makapagattam adde ta panuppalan ay mapaliag.” (Mat. 24:13) Ngem kunnasi nu nakannammuammu nga egga i madammo nga liwa na tadday nga wagi? Nu nekagi ngana ta elder ira i meyannung tatun, mattalo ka kari ta nira anna pasensiammu nga innaggan i pangasikasu da tatun segun ta unnug ni Jehova? Kunnasi da kari nga kuan yatun?

13. Segun ta unnug ni Jehova, kunnasi nga asikasuan na elder ira i madammo ira nga liwa?

¹³ Oras tu makannammuan na elder ira i madammo nga liwa na tadday nga wagi, ipakimallo da “i ka-uto nga maggafu ta langi” tapenu malippawa da i situasion segun ta pagimamma ni Jehova. (Sant. 3:17) Gakkag da nga uffunan i nakaliwa tapenu ‘pallikuran na i katagarulian na,’ nu posible. (Sant. 5:19, 20) Kukukuadda gapa i ngamin nga mawayya da tapenu maprotektadda i kongregasion anna tapenu mabanna-bannayadda danuri nafektan. (2 Cor. 1:3, 4) Nu asikasuan na elder ira i madammo ira nga liwa, mawag tu ammuadda labbi i ngamin nga detalye na nesimmu. Kawagan i tiempo tatun. Tapus makimallo ira, innadda tu mapia nu anni nga tabarang ta Biblia i iyawa da, anna itunung da i nakaliwa “ta mepangngo nga gukug.” (Jer. 30:11) Ari nga itala-talattan na elder ira i pangngua da tatun ngem ari gapa ira nga gavva-gavva nga maddesision. Nu tuttulan na elder ira i direksion maggafu kani Jehova, mammakapia i ngamin ta kongregasion. Ngem maski paga nu mepappangngo i pinangasikasu da ta problema, baka matakitan lagapa danuri inosente nga nafektan tatun. Nu mesimmu yatun nikaw, anni i kuammu tapenu ari ka kuruga matakitan?

14. Anni nga ehemplo ta Biblia i mamanna-bannay nittam nu grabe i nakaliwatan na tadday nga wagi nittam?

¹⁴ Egga kari i grabe nga nakaliwa nikaw? Kunnasi nu wagi paga lagu yatun? Magigiammu tam ta ehemplo ira ta Biblia nga mawag tu innaggattam i pangitunung ni Jehova ta ganna-gannug. Angngarigan na, maski nu ari tu patas i pinattratu na manung ira ni Jose ta nisa, ari nga nattaki i nono na ta nira. Naffokus  lallagu yayya ta passerbi na kani Jehova yari tu nabendisionan i pappasa-pasensia anna pagattattam na. (Gen. 39:21) Tapus ta pappasa na tiempo, pinakoma ni Jose danuri nakataki nisa anna naekspiriensa na i pamendision ni Jehova. (Gen. 45:5) Kagitta ni Jose, mabanna-bannayan ittam nu maddukko ittam kani Jehova anna innaggattam i pangitunung na ta ganna-gannug.​—Sal. 7:17; 73:28.

15. Anni i nakoffun ta tadday nga sister tapenu mapasensian na nga attamman i ari tu patas nga katratu na?

¹⁵ Siempre, ari gapa tu kanayun nga madammo i nakaliwatan na tadday nga tolay nittam kagitta na nesimmu kani Jose. Ngem awayya na nga mattaki lagapa i nono tam maski ta baraddi nga gannug. Nu egga i problema tam ta tadday nga tolay, kasali ngana tatun danuri ari nga maddayaw kani Jehova, mammakapia ittam nu iyaplika tam i prinsipio ira na Biblia. (Fil. 2:3, 4) Mapakurug tam yatun ta ekspiriensa na tadday nga sister. Egga i marake anna ari tu kurug nga kinagi na katrabahu na ta tanakuan meyannung ta nisa. Kuruga natakitan i sister turi ta nakannammuan na yatun. Ngem imbes tu mapporay yayya insigida, ninono na i ehemplo ni Jesus nga ari nga nangibalo turi ta ininsulto da yayya. (1 Ped. 2:21, 23) Megafu tatun, nanono na sister nga ari na ngana laman padakallan i nesimmu. Tapus ta pappasa na tiempo, nakannammuan na nga egga balo i grabe nga taki na katrabahu na tapus stress paga. Ninono ngana laman na sister nga baka ari mabba tu intension na katrabahu na nga paraketan yayya. Yari tu magayayya anna memammo i sister ta pinasa-pasensian na nga attamman i ari tu patas nga katratu na.

16. Anni i mamanna-bannay nikaw nu mataka-takitakka megafu ta ari tu patas nga katratu? (1 Pedro 3:12)

¹⁶ Nu mataka-takitakka megafu ta ari tu patas nga katratu onu karuan paga nga rason, daddammammu nga aranni si Jehova turi ira ta “makafi i nono da.” (Sal. 34:18) Iddukan naka megafu ta appasa-pasensiam anna ta pangitalo mu nisa ta vuru-vurummu ira. (Sal. 55:22) Yayya i Hues na interu davvun. Masingi-singan na i ngamin nga mesissimmu. (Bibbigan i 1 Pedro 3:12, NW.) Nu egga i problemam nga ariammu masolba, mennaggammu kari si Jehova?

17. Ta Isaias 30:18, anni i nipromesa ni Jehova nga kuan na?

¹⁷ Araranni ngana nga iyawa nittam na nelangitan nga Yama tam i napakaru nga bendision gukaban na Pappatulan na. Kagian na Isaias 30:18: “Mapasensia nga maginnag si Jehova tapenu faboran naka, anna magguyu yayya tapenu mangipasingan tu allo nikaw. Megafu ta si Jehova ay Dios na hustisia. Magayayya danuri tulu-tuloy nga maginnag sa.” Makalawa tu aru nga bendision sangawe anna ta mappange nga napabagu nga mundo danuri tulu-tuloy nga maginnag kani Jehova.

18. Anni ira nga bendision i maginnennag nittam?

¹⁸ Ta napabagu nga mundo, ari ngana vuluvuga magattam i totolay na Dios megafu ta problema anna kapurueba ira kagitta na maekspiriensa da ta maddaggun. Awan ngana noka i ari tu patas nga katratu anna awan ngana gapa tu magattattam ta taki. (Nep. 21:4) Ari tam ngana gapa kawagan nga maginnag anna mavurungan para ta pakawagattam ira megafu ta abundansia noka i makan anna memammo ngana i davvun. (Sal. 72:16; Isa. 54:13) Kakkasta yatun nga tiempo!

19. Sisinu ittam nga iprepara ni Jehova para ta anni?

¹⁹ Iprepara ittam ngana ni Jehova sangawe tapenu makapattoIay ittam ta napabagu nga mundo. Kunnasi na nga kuan yatun? Uuffunan na ittam tapenu malabanattam i neyugaliattam ira nga marake nga annangngua anna tapenu mapeggan ittam tu kualidad ira nga mamagayayya nisa. Ari nakuan makkafi i nono tam anna ari ittam nga magimmang nga masserbi kani Jehova. Nonopattam nakuan nga ararayyu nga mas makasta i mappange tam anne sangawe. Pasensiattam gafu nga innaggan i panuppal ni Jehova ta ngamin nga nipromesa na!