1. Anni ira i netuddu nikaw meyannung ta Namaratu nittam?

NU NAPADAKAL ka bilang tadday nga Saksi ni Jehova, siguradu nga nakannammuammu ngana si Jehova ta kabbimmu pagalaman. Netuddu gapa nikaw nga yayya i Namaratu, egga i makakkasta nga personalidad na, anna pabbalinan na noka tu paraiso i davvun.​—Gen. 1:1; King. 17:24-27.

2. Anni ira i kakkagian na karuan nga totolay turi ira ta mangurug ta Namaratu?

² Aru nga totolay i ari nga mangurug nga egga i Dios. Magga ari ngana gapa ira mangurug nga yayya i Namaratu. Kurugadda lallagu nga gavva laman limittuag i inango anna megafu ta ebolusion, sisinu nga nabbalin i simple ira nga gannug nga egga i inango na tu mas paga nga komplikadu nga gannug nga egga i inango na. Atannang i ginigiammu na karuan ta nira. Kakkagiadda nga pinakurug na siensia nga mali i Biblia anna danuri laman awan tu ginigiammu da, ari tu ma-uto, onu mabi nga melogo i mangurug nga egga i Namaratu.

3. Ngatta importante nga pasikannattam i mismu nga pangurug tam?

³ Madduda kari ittam nga si Jehova i minaggiddu nga Namaratu nittam megafu laman ta ideya na totolay nga atannang i ginigiammu da? Nakadepende yatun ta rason nu ngatta kurugattam nga si Jehova i Namaratu. Mangurug ittam kari megafu ta yatun i netuddu nittam onu ginigiammu tam mismu i ebidensia ira? (1 Cor. 3:12-15) Maski nabayag ittam ngana nga Saksi ni Jehova, kawagattam ngamin nga pasikannan i pangurug tam. Nu kunnatun, ari ittam nga melogo na “pilosopia anna awan tu kwenta na nga ideya” nga ituttuddu na totolay nga kumokkontra ta Uvovug na Dios. (Col. 2:8, NW; Heb. 11:6) Tapenu makua tam yatun, gigiammuattam taw nga artikulo nu (1) ngatta aru i  ari nga mangurug ta Namaratu, (2) kunnasim pasikannan i pangurug mu kani Jehova nga Namaratu ta nikaw, anna (3) kunnasim mapattalupaddian nga masikan i pangurug mu.

4. Anni i kagian na Biblia nga kebalinan na pangurug?

⁴ Nonopan na karuan nga totolay nga nu egga i pangurug mu, mammakatalo ka ngana ta gannug maski nu awan tu ebidensia na. Ngem segun ta Biblia, ari tu kunnatun i fustu nga pangurug. (Bibbigan i Hebreo 11:1) Nebase ta ebidensia i pangurug ta gannug ira nga ari masingan kagitta ni Jehova, ni Jesus, anna i Pappatulan ta langi. (Heb. 11:3) Kunnaw i kagian na tadday nga biochemist nga nabbalin tu Saksi: “Egga i basehan na Saksi ira ni Jehova ta kuru-kurugadda. Ariadda gapa ifuera i ganna-gannug nga napakurug ngana na siensia.”

5. Ngatta aru i ari nga mangurug ta Namaratu?

⁵ Baka manono tam: ‘Nu napakaru i ebidensia nga Dios i Namaratu ta ngamin nga ganna-gannug, ngatta gafu ta aru lagapa i ari nga mangurug tatun?’ Awayya na nga ariadda laman gare nga ginigiammu mismu i ebidensia ira. Kunnaw i kagian ni Robert nga Saksi ni Jehova ngana sangawe: “Ari vuluvuga nga netuddu ta eskuela i meyannung ta pamaratu. Yari tu nanono ku nga ari tu kurug yatun. Ngem turi ta maturu tu 20 anios ngà ngana, nakibbidà i Saksi ira ni Jehova tapus nakannammuakku i rasonable anna makakumbinsi ira nga tuddu na Biblia meyannung ta pamaratu.” *—Innan i kahon nga “ Mekiddaw ta Magana Ira.”

6. Ngatta ari nga mangurug i karuan ta Namaratu?

⁶ Ari nga mangurug i karuan ta Namaratu  megafu ta kakkagiadda nga kurugadda laman nu anni i masingadda. Ngem kakurugan na, mangurug mabba ira ta gannug ira nga ariadda masingan, kagitta na gravity, megafu ta egga i ebidensia nga kurug yatun. Kunnatun i pangurug nga nekagi ta Biblia. Nebase gapa yatun ta ebidensia na “gannug ira nga ariat-tam nga masingan.” (Heb. 11:1) Kawagan i tiempo anna i pangikagumattam nga gigiammuan mismu i ebidensia ira. Ngem aru ta totolay i awan tu ganas da nga kuan yatun. Megafu tatun, makkonklusion ira nga awan tu Dios.

7. Ngamin kari nga edukadu nga totolay ay ari mangurug nga pinaratu na Dios i uniberso? Ipakanawag.

⁷ Nakumbinsi i karuan nga sientista nga pinaratu na Dios i interu uniberso megafu ta ginigiammu da mismu i ebidensia ira. * Gitta ni Robert ta nappasa nga parapo, nonopan na karuan  nga awan tu Namaratu megafu ta ari vuluvuga netuddu ta unibersidad i pamaratu. Ngem aru nga sientista i nakannammu anna nangiddu kani Jehova. Gitta natun ira nga sientista, kawagattam ngamin nga pasikannan i pangurug tam ta Dios maski anni i nibalittam. Awan tu tanakuan nga magangngua tatun para ta nittam.

8-9. (a) Anni i tabbagattam nga pakkiavu? (b) Kunnasi naka moffunan na paggigiammu ta pinaratu ira?

⁸ Kunnasim pasikannan i pangurug mu ta Namaratu? Innattam i appa nga makuam.

⁹ Gigiammuan i pinaratu. Mapasikammu i pangurug mu ta Namaratu nu obserbammu i aya-ayam, mulu-mula, anna biti-bitun. (Sal. 19:1; Isa. 40:26) Nu gigiammuammu tu mapia yatun ira nga gannug, mas nga mangurug ka nga si Jehova i Namaratu. Mabibbig ta publikasiottam i artikulo ira nga mangipakanawag ta detalye ira na pinaratu. Bibbigammu nakuan yatun ira nga artikulo maski marigatakka nga malippawa danatun. Apammu laman i pinakapunto. Girawammu gapa uli ta jw.org i makakkasta ira nga video meyannung ta pinaratu nga nepagiraw ta nappasa ira nga rehional nga kombensiottam.

10. Mangiyawa tu angngarigan nga mamakurug tu egga i Namaratu. (Roma 1:20)

¹⁰ Nu gigiammuammu i meyannung ta pinaratu, ammuammu gapa nu anni i ituddu natun meyannung ta Namaratu. (Bibbigan i Roma 1:20.) Angngarigan na, ammu tam tu mangiyawa i bilag tu patu anna nawag nga kawagattam tapenu mattolay. Ngem egga i ultraviolet rays nga maggafu ta bilag nga marake para nittam. Ammum kari nu anni i mapprotekta nittam kontra tatun ira nga rays? I ozone gas nga egga ta ozone layer. Nu mas massikan i ultraviolet rays nga naggafu ta bilag, umaru gapa i ozone gas ta ozone layer. Ari kari nga ipasingan laman natun nga proseso nga egga i minaggiddu anna masirib nga Namaratu?

11. Pakalegammu tu informasion ira meyannung ta pinaratu nga mamasikan ta pangurug mu? (Innan i kahon nga “ Publikasion Anna Video ira nga Mamasikan ta Pangurug Mu.”)

¹¹ Nu innammu i Watch Tower Publications Index anna nu mar-research ka ta jw.org, aru nga informasion meyannung ta pinaratu i mamasikan ta pangurug mu. Awayyam pegafuanan ta artikulo anna video ira ta serye nga “Egga Kari i Naddisenio Taw?” Ababba yaw ira nga artikulo ngem mangipasingan yaw tu kappabbaw ira nga informasion meyannung ta aya-ayam anna mulu-mula. Mabibbig mu gapa tatun nu kunnasi pinarigan na sientista ira i disenio nga nasingadda ta pinaratu.

12. Anni i nonopattam nu gigiammuattam i Biblia?

¹² Gigiammuan i Biblia. Dati bi, ari nga mangurug ta Namaratu i biochemist nga nakagi ta gafu. Ngem ta pappasa na tiempo, nangurug ngana yayya. Kinagi na: “Ari laman nga nebase i pangurug ku ta nagigiammù ta siensia. Nebase gapa yaw ta paggigiammù tu mapia ta Biblia.” Awayya na tu aru ngana nga kinakurug i nakannammuammu ta Biblia ngem kawagammu lagapa nga itulu-tuloy i paggigiammu tatun tapenu massikan i pangurug mu ta Namaratu. (Jos. 1:8; Sal. 119:97) Angngarigan na, nonopammu nu kunnasi kadetalyadu i pangistoria na Biblia meyannung ta nesimmu ira ta nappasa. Nonopammu gapa i natuppal ira nga profesiya na Biblia anna nu kunnasi nga ari makkorontra i mensahe natun. Nu kuammu yatun, massikan i pangurug mu nga egga i Namaratu. Mapakurug mu gapa nga minaggiddu anna masirib yayya anna i Biblia i mensahe na para nittam. *—2 Tim. 3:14; 2 Ped. 1:21.

13. Anni i tadday nga angngarigan na makoffun nga tabarang ta Biblia?

 ¹³ Nu gigiammuattam i Biblia, innattam nakuan nu kunnasi makaduffun i tabarang na ira. Angngarigan na, nabayag ngana nga niyabiso na Biblia nga marake para nittam i pangaya ta kuartu megafu ta “nepallo nga daddam” i resulta natun. (1 Tim. 6:9, 10; Prov. 28:20; Mat. 6:24) Magaplika kari paga yatun ta kaggawattam? Kinagi na libru nga The Narcissism Epidemic: “Maruddu nga ari kuruga magayayya anna mas depres i totolay nga materialistiko. Maski i totolay nga kayà da mabba laman nga umaru i kuartu da ay ari lagapa nga magayayya anna mas aru i taki da.” Kuruga makaduffun gafu i tabarang na Biblia kontra ta pangaya ta kuartu! Anni paga nga tabarang na Biblia i nakaduffun ngana nikaw? Nu pannonopattam i ngamin nga makasta nga tabarang na Biblia, mapakurug tam nga ammu na Namaratu i kapianan para nittam. Megafu tatun, mas mammakatalo ittam ta tabarang na ira. (Sant. 1:5) Mas magayayya gapa ittam megafu tatun.​—Isa. 48:17, 18.

14. Anni i makannammuammu kani Jehova nu gigiammuammu i Biblia?

¹⁴ Fustu nakuan i motibom ta paggigiammu—mas makannammuan si Jehova. (Juan 17:3) Nu gigiammuammu i pinaratu ira, makannammuammu i personalidad anna kualidad ni Jehova. Kunnatun gabbalaman i makannammuammu nu gigiammuammu i Biblia. Megafu tatun, mapakurug mu nga kurug nga Persona si Jehova. (Ex. 34:6, 7; Sal. 145:8, 9) Durante nga mas makannammuammu si Jehova, mas massikan i pangurug mu, mas dumakal i pangaya mu, anna mas malladda i pakikkofummu ta nisa.

15. Kunnasi ka mammakapia nu ikagim ta tanakuan i pangurug mu ta Dios?

¹⁵ Ikagim ta tanakuan i pangurug mu ta Dios. Nu kuammu yatun, mas massikan i pangurug mu. Ngem kunnasi nu madduda i layyagayyammu nga egga i Dios anna ari ka nga siguradu nu anni i kagiammu? Magaleg ka tu teksto ira ta Biblia nga nepakanawag ta publikasiottam ira tapus ipakibbidam yatun ta nisa. (1 Ped. 3:15) Awayyam gapa mappaduffun ta ekspiriensadu ira nga wagi. Maski akseptan na layyagayyammu i kagian na Biblia onu ari, mammakapia ka lagapa megafu ta naresearch mu. Megafu tatun, mas massikan i pangurug mu anna ari ka nga melogo ta kakkagian na masirib anna mauto ira taw nga mundo nga awan kanu tu Namaratu.

16. Anni i awayya na nga mesimmu nu ariattam nga itulu-tuloy nga pasikannan i pangurug tam?

¹⁶ Maski nabayag ngana ittam nga massesserbi kani Jehova, mawag nga itulu-tuloy tam lagapa nga pasikannan i pangurug tam ta nisa. Ngatta? Nu ariattam gare magimmugug, awayya na nga makkafi i pangurug tam. Daddammattam nga nebase i pangurug ta ebidensia na ganna-gannug nga ariattam nga masingan. Ngem awayya tam nga makattaman insigida i gannug ira nga ariattam nga masingan. Yari tu kinagi ni Pablo nga i pakkafi na pangurug ay “katagarulian nga meggo nga giminafu nittam.” (Heb. 12:1) Kunnasi tam gafu mapattalupaddian nga masikan i pangurug tam?​—2 Tes. 1:3.

17. Anni i makoffun ta nittam tapenu mapattalupaddiattam i masikan nga pangurug?

¹⁷ Ollu, kanayummu nga kiddawan i masanto nga espiritu ni Jehova. Ngatta? Megafu ta tadday nga aspeto na vunga na masanto nga espiritu i pangurug. (Gal. 5:22, 23) Ariattam nga mapattalupaddian i masikan nga pangurug ta Namaratu nu awan tu uffun na masanto nga espiritu na. Nu kanayuttam nga kiddawan kani Jehova i espiritu na, iyawa na yatun ta nittam.  (Luc. 11:13) Awayya tam paga nga ipakimallo yaw: “Pasikannam-mu i angngurug mi.”​—Luc. 17:5.

18. Segun ta Salmo 1:2, 3, anni nga pribilehio i egga nittam?

¹⁸ Mawag gapa i regular nga personal study. (Bibbigan i Salmo 1:2, 3.) Tagga ta netura yatun nga salmo, baddi laman ta Israelita ira i egga kumpleto nga kopia na ta netura nga Dob na Dios. Makala gapa tu kopia i patul anna papari. Kada pitu ragun, meyunnug nga magginna “i lallaki, i babbay, i ána, anna i dayu ira” ta Israel ta kebibbig na Dob na Dios. (Deut. 31:10-12) Ta kaggawan gapa ni Jesus, pilippiga laman nga totolay i egga kopia na ta Katurakan anna metagu ta sinagoga ira i magaru tatun nga kopia. Ngem ta tiempo tam sangawe, magaru ta totolay i awayya na ngana makabibbig ta karuan nga parte na Biblia onu i kumpleto nga kopia natun. Talaga pribilehio yatun. Ngem kunnasi tam mepasingan nga mappappabalo ittam nga egga i Biblia tam?

19. Kunnasi tam mapattalupaddian nga masikan i pangurug tam?

¹⁹ Mepasingattam nga ipappabalo tam i Biblia nu kanayuttam yatun nga bibbigan. Mawag tu egga i iskediul tam nga map-personal study, ari laman nu egga i bakante tu tiempo tam. Mapattalupaddiattam nga masikan i pangurug tam nu kanayuttam nga tuttulan yatun nga iskediul.

20. Anni nakuan i determinadu nga kuattam?

²⁰ Ari tu kagitta na “ma-uto ira anna egga i ginigiammu da” ta mundo, egga i masikan nga pangurug tam nga nebase ta Uvovug na Dios. (Mat. 11:25, 26) Megafu ta paggigiammu tam tatun, nakannammuattam nu ngatta mas marrake i paddia-paddian na mundo anna nu anni i kuan ni Jehova tatun. Determinadu nakuan ittam nga pasikannan paga i pangurug tam anna uffunan i mas aru paga nga totolay adde ta posible tapenu mangurug ira ta Namaratu. (1 Tim. 2:3, 4) Tulu-tuloy tam nakuan nga iddanaman i tiempo sonu maddayaw kani Jehova i ngamin nga pinaratu ta davvun anna kagiadda i mabibbig ta Nepakannammu 4:11: “Yafu anna Dios mi! Mekunnay nikaw i kekakua, . . . Ta pinaro mu ngamin i adde na.”