1. Nu pannonopattam i ngamin nga pinaratu ni Jehova, anni i awayya na nga makagi tam?

NU PANNONOPATTAM i daka-dakal nga uniberso nga pinaratu ni Jehova, makagi tam gapa yaw nga nipakimallo ni salmista David: “Nu tangagak-ku i langi nga kingngua na limam ira, tuange ta biti-bitun anna vulan nga nipem ta natullo nga paddianad-da, sinni kari laggapa i tolay tapenu em-mu yaya daddaddamman, tolay laman nga kuruga em-mu tattangngawan.” (Sal. 8:3, 4) Gitta ni David, baka mappabbaw ittam megafu ta daddaddamman ittam ni Jehova maski nu balabaddi ittam laman kumpara ta biti-bitun nga pinaratu na. Ngem mapabbiridattam ta tumunug ira nga parapo nga ari laman tu ikavurungan ni Jehova i ollu nga totolay nga da Adan anni Eva. Pinabbalin na paga ira tu miembro na familia na.

2. Anni i kayà ni Jehova nga kuan da Adan anni Eva?

² Da Adan anni Eva i ollu nga ána ni Jehova ta davvun anna yayya i minaggiddu nga nelangitan nga Yama tam. Bilang miembro na familia na, ekspektan na tu mallallappo yaw nga magatawa. Kinagi na Dios ta nira: “Maggaka kamu anna umaru kamu, pannuan nu i davvun anna immagurayan nu yatun.” (Gen. 1:28) Kayà na nga maggaka ira anna tangngawadda i davvun. Nu sinuttul nakuan da Adan anni Eva i kayà ni Jehova nga kuadda, mannanayun nakuan ira nga miembro na familia na Dios anna i gaka-gaka da.

3. Kunnasi nipasingan ni Jehova ta pamaratu na kada Adan anni Eva nga importante i papel da ta familia na?

³ Importante i papel da Adan anni Eva ta familia ni Jehova. Mabibbig ta Salmo 8:5 anna footnote (NW ) i kinagi ni David meyannung ta pamaratu ni Jehova ta totolay: “Pinaratum yayya  nga mas alinno tu baddi anne ta anghel ira, anna niddammu yayya tu korona na dayaw anna kekakua.” Kurug tu ari nga neddan i totolay tu pakapangngua, sirib, anna abilidad nga gitta na ta anghel ira. (Sal. 103:20) Ngem ‘mas alinno laman ira tu baddi’ kumpara ta makapangngua ira nga anghel. Fugurammu yatun! Niddan ni Jehova tu makakkasta nga pattolay i ollu nga magana tam.

4. Anni i nesimmu kada Adan anni Eva ta ariadda sinuttul si Jehova, anna anni i gigiammuattam taw nga artikulo?

 ⁴ Kaddaraddam ta ari ngana nga miembro na familia ni Jehova da Adan anni Eva megafu ta ariadda yayya sinuttul. Marake i efekto natun ta gaka-gaka da, gitta na magigiammu tam taw nga artikulo. Ngem ari nga nanguli i kayà ni Jehova para nittam. Kayà na nga mabbalin tu mannanayun nga ána na i minattuppal ira nga totolay. Ammuattam labbi nu kunnasi nipasingan ni Jehova nga nabalor ittam ta nisa. Tapus gigiammuattam nu kunnasi tam mepasingan nga kayà tam nga mabbalin tu parte na familia na Dios. Ikonsidera tam gapa i mannanayun nga bendision nga malawa noka na ána ni Jehova ta davvun.

5. Kunnasi tam medayaw i Dios ta pamaratu na nittam segun ta imahe na?

⁵ Pinaratu ittam ni Jehova segun ta imahe na. (Gen. 1:26, 27) Megafu ta naparatu ittam segun ta imahe na Dios, awayya tam nga makultiba anna mepasingan i aru ta makasta nga kualidad na gitta na aya, pangikabbi, kinamatalo, anna kinatunung. (Sal. 86:15; 145:17) Nu ipasingattam i kunnatun ira nga kualidad, medayaw tam si Jehova anna mepasingattam nga mappappabalo ittam nisa. (1 Ped. 1:14-16) Nu makapagayayya ta nelangitan nga Yama tam i kondukta tam, mabbalin ittam tu magayayya. Megafu ta maparigattam i kualidad ira ni Jehova, awayya tam nga mabbalin tu klase na totolay nga alawatan na ta familia na.

6. Kunnasi nga nipasingan ni Jehova nga nabalor nisa i totolay tagga ta pinaratu na i davvun?

⁶ Pinaratu ni Jehova i espesial nga paddianattam. Nige nga pinaratu ni Jehova i ollu nga tolay, dati na ngana niprepara i davvun para ta totolay. (Job 38:4-6; Jer. 10:12) Megafu ta minangngikavurung anna vuka-palag si Jehova, niddan na ittam tu aru nga mapia nga gannug nga mamagayayya nittam. (Sal. 104:14, 15, 24) Pinannonopan na tu mapia i pinaratu na ira anna ‘nasingan na nga yatun ay mapia.’ (Gen. 1:10, 12, 31) Nipasingan na nga nabalor nisa i totolay turi ta ‘pinammagurena yayya ta ganna-gannug nga pinaro na’ ta davvun. (Sal. 8:6) Kayà na Dios nga mannanayun nga magayayya i perfekto nga totolay ta panangngaw da ta makakkasta ira nga pinaratu na. Kanayukka kari mappabalo kani Jehova megafu tatun nga makasta nga promesa na?

7. Kunnasi nipasingan na Josue 24:15 nga egga i lallaguray tam nga mappili?

⁷ Niregaluan ittam ni Jehova tu lallaguray nga mappili. Sittam lagapa i mappili nu anni i kuattam ta pattolay tam. (Bibbigan i Josue 24:15.) Magayayya i minaggiddu nga Dios tam nu piliattam nga passerbian yayya. (Sal. 84:11; Prov. 27:11) Awayya tam paga iyusa i lallaguray tam nga mappili tapenu magangngua tu mapia ira nga desision. Gigiammuattam nu kunnasi niyusa ni Jesus i lallaguray na nga mappili.

8. Mangiyawa tu angngarigan nu kunnasi nga niyusa ni Jesus i lallaguray na nga mappili.

⁸ Maparigattam si Jesus nu piliattam nga pagolluan i pammakapianan na tanakuan anne ta pammakapianattam. Egga i tiempo nga nababbannag si Jesus pati i apostoles na yari tu minay ira ta memammo nga lugar ta kayà da i magibannag. Ngem ari tu kunnatun i nesimmu. Zinaddanan ira na aru nga totolay megafu  ta kakayà da nga matudduan ni Jesus. Awayya nakuan nga mairita si Jesus tatun ngem nikabbi na lallagu i totolay. Anni gafu i kiningngua na? “Pinegafuanan na ira nga sinudduan tu aru nga ganna-gannug.” (Mar. 6:30-34) Nu usattam i tiempo anna sikattam ta panguffun ta tanakuan gitta ni Jesus, medayaw tam i nelangitan nga Yama tam. (Mat. 5:14-16) Mepasingattam gapa nga kayà tam nga mabbalin tu parte na familia ni Jehova.

9. Anni nakuan i daddamman na magana ira?

⁹ Niddan ni Jehova i totolay tu pribilehio nga makka-ana anna responsibilidad nga tudduan i ána da nga iddukan anna passerbian si Jehova. Nu tadday ka nga magana, appresiammu kari yaw nga espesial nga regalu? Maski nu aru i makasta nga abilidad na anghel ira, ari ira niddan ni Jehova tu pribilehio nga makka-ana. Tagibaloran nakuan gafu na magana ira i pribilehio nga mamadakal tu ána. Netalo ta nira i importante nga responsibilidad nga padakallan i ána da segun ta “tuddu anna tabarang nga meyannung ta Yafu” nga Jehova. (Efe. 6:4; Deut. 6:5-7; Sal. 127:3) Tapenu maduffunan i magana ira, nangiyawa i organisasion na Dios tu aru nga rimienta nga nebase ta Biblia gitta na publikasion, video, kansion, anna artikulo ira ta website tam. Kuruga iddukan na nelangitan nga Yama tam anna na Ana na i abbarabbing. (Luc. 18:15-17) Magayayya si Jehova nu mattalo i magana ira ta nisa anna nu kuadda ngamin i mawayya da tapenu tangngawan i meddu nga ána da. Moffunadda gapa i ána da nga mapeggan tu chansa nga mabbalin tu mannanayun nga miembro na familia ni Jehova!

10-11. Anni i iddanaman na totolay megafu ta tavvu nga niyawa ni Jehova?

¹⁰ Niyawa ni Jehova i meddeddu nga Ana na tapenu mabbalin ittam uli tu miembro na familia na. Gitta na nagigiammu tam ta  parapo 4, ari ngana nga parte na familia ni Jehova si Adan anna si Eva anna i gaka-gaka da. (Roma 5:12) Sinadya da gare nga ari tuttulan i Dios yari tu mepangngo ira nga malsa ta familia na. Ngem anni tamma i mesimmu ta gaka-gaka da? Iddeddu ni Jehova i totolay, yatutta namadday yayya tu unnug tapenu maampun na danuri minattuppal ta nisa gukaban na pangisakrifisio na ta itatana nga Ana na nga si Jesu-Cristo. (Juan 3:16; Roma 5:19) Megafu tatun, maampun ngana ni Jehova i 144,000 nga matalo nga totolay.​—Roma 8:15-17; Nep. 14:1.

¹¹ Minillion paga i matalo nga tumuttuttul ta uray na Dios. Iddanamadda nga mabbalin ira noka tu miembro na familia na. Mesimmu yatun sonu makapasa ira ta ultimu nga kapurueba kabalin na 1,000 nga dagun. (Sal. 25:14; Roma 8:20, 21) Megafu tatun nga iddanamadda, magaladda ngana si Jehova tu ‘Yama.’ (Mat. 6:9) Meddan gapa tu chansa yari ira mapaginnolay tapenu mammuadda i uray ni Jehova. Mabbalin gapa noka ira tu miembro na familia na nu piliadda nga tumuttul nisa.

12. Anni nga pakkiavu i tabbagattam sangawe?

¹² Gitta na nagigiammu tam, aru ngana i kiningngua ni Jehova tapenu mepasingan nga tagibaloran na i totolay. Inampun na ngana i nazelugan ira bilang ána na anna niddan na gapa tu chansa i “dakal nga ammung” tapenu mabbalin tu ána na sonu napabagu nga mundo. (Nep. 7:9, NW ) Anni i kuattam sangawe tapenu mepasingattam kani Jehova nga kayà tam nga mabbalin tu mannanayun nga miembro na familia na?

13. Anni i kuattam tapenu mabbalin ittam tu miembro na familia na Dios? (Marcos 12:30)

¹³ Ipasingammu nga ayatammu si Jehova gukaban na passerbim nisa ta interu futum. (Bibbigan i Marcos 12:30.) Ta ngamin nga  regalu na Dios nittam, i chansa nga passerbian yayya i tadday ta kakastan nga neyawa na. Mepasingattam nga iddukattam si Jehova nu ‘parulattattam i bili-bilin na.’ (1 Juan 5:3) Tadday tatun i nibilin ni Jesus nga mangngua ittam tu disipulos anna bawtisowattam ira. (Mat. 28:19) Nibilin na paga tu makka-aya-aya ittam. (Juan 13:35) Pabbalinan noka ni Jehova danuri i tumuttuttul ta nisa nga miembro na familia na ta interu mundo.​—Sal. 15:1, 2.

14. Kunnasi tam mepasingan nga ayatattam i tanakuan? (Mateo 9:36-38; Roma 12:10)

¹⁴ Ayatammu i tanakuan. Aya i pinaka-importante nga kualidad ni Jehova. (1 Juan 4:8) Nige tam paga nakilala si Jehova, nipasingan na ngana i pangaya na ta nittam. (1 Juan 4:9, 10) Maparigattam yayya nu ayatattam i tanakuan. (Efe. 5:1) Uffunattam ira nga makannammuan si Jehova adde ta egga paga i tiempo. Yatun i tadday ta pinakamakasta nga makua tam tapenu mepasingattam i aya ta tanakuan. (Bibbigan i Mateo 9:36-38.) Nu kuattam yatun, meddan ira tu chansa nga mabbalin tu miembro na familia na Dios. Maski nabalin nga mabawtisowan i tadday nga tolay, mawag tu ayatan anna irespeto tam lagapa yayya. (1 Juan 4:20, 21) Kunnasi tam makua yatun? Mattalo ittam ta nisa. Angngarigan na, nu ariattam nalippawa nu ngatta kingngua na i tadday nga gannug, ariattam nakuan nga paddudan i motibo na. Ikakua tam lallagu yatun nga wagi tam anna imammatattam yayya nga mas atannang anne ta nittam.​—Bibbigan i Roma 12:10; Fil. 2:3.

15. Sinni i pangipasingannattam tu pangikallo anna kinasippo?

¹⁵ Ipasingan i pangikallo anna kinasippo ta ngamin. Nu kayà tam nga mabbalin tu parte na familia ni Jehova tu mannanayun, mawag tu iyaplika tam i Uvovug na Dios ta pattolay tam. Angngarigan na, nituddu ni Jesus nga mangipasingan ittam tu pangikallo anna kinasippo ta ngamin maski ta mangontra nittam. (Luc. 6:32-36) Baka egga tiempo nga marigatan ittam nga kuan yatun. Ngem mawag lagapa nga parigattam i appana-panono anna agguyu-guyu ni Jesus. Nu kuattam i ngamin nga mawayya tam tapenu tuttulan si Jehova anna parigan si Jesus, mepasingattam ta nelangitan nga Yama tam nga kayà tam nga mabbalin tu mannanayun nga miembro na familia na.

16. Kunnasi tam maprotektan i reputasion na familia ni Jehova?

¹⁶ Protektan i reputasion na familia ni Jehova. Ta literal nga familia, maruddu nga parigan na abbing i kukukuan na manung na. Nu iyaplika na manung i prinsipio ira na Biblia ta pattolena, mabbalin yayya tu makasta nga ehemplo para ta urian na. Ngem nu marake i kukukuan na, awayya na nga parigan yatun na urian na. Kunnatun gapa ta familia ni Jehova. Nu nagapostata i dati nga matalo nga Cristiano onu nabbalin yayya tu imoral onu marake i pattolena, awayya na nga parigan yayya na tanakuan. Daralan danuri magangngua tatun i reputasion na familia na maddayarayaw kani Jehova. (1 Tes. 4:3-8) Ari tam nakuan parigan i marake nga ehemplo na tanakuan anna ari tam ipamavulun i maski anni nga manaral ta relasiottam ta nelangitan nga Yama tam.

17. Anni nga appana-panono i lillitattam, anna ngatta?

¹⁷ Mattalo kani Jehova imbes tu ta material ira nga gannug. Nipromesa ni Jehova nga nu pagolluattam i Pappatulan na anna mattolay ittam segun ta matunung nga estandarte na, iddan na ittam tu makan, sinnun, anna paddianattam. (Sal. 55:22; Mat. 6:33) Nu mattalo ittam tatun nga promesa, ari tam nga nonopan nga maprotektan anna mapagayayya ittam na material ira nga gannug ta mundo. Ammu tam nga malawa tam laman i memammo nga appana-panono nu kuattam i uray ni Jehova. (Fil.  4:6, 7) Maski egga i paggatang tam tu aru nga gannug, mawag lagapa nga pannonopattam nu egga kari talaga i tiempo onu sikattam ta pangiyusa anna pammentena tatun ira. Prayoridad tam kari i pakkukua tam ira? Daddammattam nga ekspektan na Dios nga mallallappo ittam bilang miembro na familia na. Ari tam gafu pagurayan nga mawawan i fokus tam. Ari tam kayà nga mabbalin tu kagitta na tadday nga lalaki nga pinammanakitan na i chansa nga masserbi kani Jehova anna mabbalin tu naampun nga ana na megafu laman ta mas nga prayoridad na i pakkukua na!—Mar. 10:17-22.

18. Anni nga kakastan nga pribilehio anna bendision i mannanayun nga mamagayayya noka ta minattuppal nga totolay?

¹⁸ Magayayya noka i minattuppal nga totolay megafu ta ayatan anna dayawadda si Jehova tu mannanayun. Yatun i pinakamakasta nga pribilehio ta ngamin! Magayayya gapa noka danuri neravvunan i iddanama da megafu ta tangngawadda i perfekto nga planeta nga davvun nga pinaratu ni Jehova tapenu paddianadda. Aranni ngana nga itoli na Pappatulan na Dios i kasta na planeta nga davvun anna i ngamin nga egga tatun. Alsan noka ni Jesus i ngamin nga marake nga resulta na pinappanaw da Adan anni Eva ta familia ni Jehova. Paginnolayan ni Jehova i minillion nga natay anna iddan na ira tu chansa nga mattolay tu mannanayun ta Paraiso. (Luc. 23:42, 43) Durante nga sisinu nga mabbalin tu perfekto i familia ni Jehova ta davvun, mepasingan na kada tadday nira i “dayaw anna kekakua” nga nitura ni David.​—Sal. 8:5.

19. Anni nakuan i agga-nono mu?

¹⁹ Nu kavulu ka ta “dakal nga ammung,”egga i makakkasta nga iddanamam. Iddeddu naka na Dios anna kayà na nga mabbalikka tu miembro na familia na yatutta kuammu i ngamin nga mawayyam tapenu mapagayayya yayya. Kanayun nakuan nga agga-nono mu anna ipafutum i promesa ira na Dios. Tagibalorammu i pribilehio nga passerbian i minaggiddu nga nelangitan nga Yama tam anna dayawan yayya tu mannanayun!