1. Ta anni nga siguradu si Marta meyannung ta wagina? (Innan i letratu ta gafu na artikulo.)

MADDADDAM i madukko nga kofun anna disipulo ni Jesus nga si Marta. Natay i wagina nga si Lazaro. Egga kari i makapabannay sa? Egga. Nipasiguradu ni Jesus sa: “Maginnolay i wagim.” Ari nalsa natun i ngamin nga daddamna; ngem, inalawa ni Marta i pamasiguradu ni Jesus. Kinagi ni Marta: “Ammù tu maginnolay yaya noka ta pangurianan nga aggaw.” (Juan 11:20-24) Siguradu yaya nga mesimmu yatun ta mappange. Tapus, nammilagro si Jesus. Pinaginnolena si Lazaro tatun mismu nga aggaw.

2. Ngatta kayà mu mapeggan tu kombiksion nga kagitta ni Marta?

² Awan tu basehattam nga ekspektan nga mammilagro gapa ta maddaggun si Jesus anna i Yamana tu kunnatun para nittam. Ngem, kagittam kari gapa kasiguradu si Marta nga egga i mappange nga paginnolay na iddeddukammu? Awayyana tu natay i atawam, yenam, yamam, onu i meddu nga kakay anna kako mu. Onu marraddam ka megafu ta patay na ana mu. Kakanappammu nga gakkappan, kibbidan, anna makiggalo tatun nga iddukammu. Kagitta ni Marta, egga i makasta nga rasommu nga  kagian, ‘Ammù tu maginnolay noka i iddeddukakku.’ Ngem, makoffun ta kada Cristiano nu pannonopanna nu ngatta siguradu yatun nga kombiksion.

3, 4. Kunnnasi napasikan i kombiksion ni Marta ta kababalin nga kingngua ni Jesus?

³ Imposible nga nemammatan ni Marta, nga maddian ta Jerusalem, i pamaginnolay ni Jesus ta ana na balu nga aranni ta Nain ta Galilea. Ngem, awayyana nga neyistoria yatun sa. Kunnatun gapa i pamaginnolay ni Jesus ta ana nga babay ni Jairo. Ammu danuri egga ta balay tu “natay ngana i abbing.” Ngem sinammi ni Jesus i limana anna kinagina: “Nene, manguk-ka!” Insigida nga limikka yaya. (Luc. 7:11-17; 8:41, 42, 49-55) Parehu nga ammu ni Marta anna na wagina nga si Maria nga makoru tu taki si Jesus. Yatun i rason, nga nanonoda nga nu egga si Jesus, ari nakuan natay si Lazaro. Ngem megafu ta natay ngana i meddu nga kofun ni Jesus, anni gafu i mesimmu ta mappange? Daddamman nga tinukoy ni Marta i paginnolay ni Lazaro ta mappange, “ta pangurianan nga aggaw.” Ngatta siguradu yaya tatun? Ngatta gapa makasiguradu ka nga egga noka i mappange nga paginnolay nga kavulu i iddeddukammu ira?

⁴ Aru i makasta nga rason tatun nga kombiksiommu. Durante nga repasuattam yatun ira, baka egga ira mabibbig mu ta Uvovug na Dios nga pagabbo mu tu ari konektadu ta iddanamam nga masingan uli i natay nga iddeddukammu.

5. Anni i nangammung ta komfiansa ni Marta nga mapaginnolay si Lazaro?

⁵ Daddamman nga ari kinagi ni Marta: ‘Iddanamakku tu maginnolay i wagì.’ Kunna lallagu: “Ammù tu maginnolay yaya.” Kumbinsidu si Marta megafu ta milagro ira nga nammuanna nige paga nigafu ni Jesus i ministeriona. Nammuanna yatun ira ta kabbinna ta baleda anna ta sinagoga. Egga i tallu nga manono tam nga nainspiran nga nerekord ta Katurakan.

6. Anni nga kappabbaw nga milagro i kingngua ni Elias, anna anni i koneksion natun kani Marta?

⁶ Nesimmu i ollu nga pamaginnolay turi ta niddan tu pakapangngua na Dios i profetana nga si Elias nga mammilagro. Ta Zarepta nga ili na Fenicia, pinadulo na pobre nga balu i profeta. Tapus nammilagro i Dios nga tulu-tuloy nga nilannappanna ira na anana nga lalaki tu arina anna manteka tapenu ariadda matay. (1 Pat. 17:8-16) Ngem turi kua, nattaki i anana anna natay. Inuffunan yaya ni Elias. Nakimallo si Elias nga agga-tammi i natay: “Dios ku, fabor bi, itolim sa i inango naw nga abbing.” Nesimmu yatun! Gininna na Dios si Elias, tapus naginnolay i abbing. Yatun i ollu nga rekord na pamaginnolay ta Biblia. (Bibbigan 1 Patul Ira 17:17-24.) Siguradu nga nakagigiammu si Marta tatun nga kappabbaw nga nesimmu.

7, 8. (a) Iyistoria i kingngua ni Eliseo tapenu banna-bannayan i marraddam nga yena. (b) Anni i pakurugan na milagro ni Eliseo meyannung kani Jehova?

⁷ I mekadua nga pamaginnolay nga mabibbig ta Biblia ay gukaban na katali ni Elias, si profeta Eliseo. Nangipasingan i tadday nga prominente nga babay nga Israelita ta Sunem tu nerumu-ruma nga pamadulo kani Eliseo. Gukaban na profeta, binendisionan na Dios yaw nga baug nga babay anna lakay nga atawana tu ana nga lalaki. Kabalin na piga ragun, natay i abbing. Nonopan i grabe nga parraddam na yenana. Gukaban na permiso na atawana, nabbiahe yaya tu ma-30 kilometro nga umay kani Eliseo ta Vukig na Carmel. Pinappollu na profeta i ka-uffunna nga si Gehazi nga manoli ta Sunem. Ari napaginnolay ni Gehazi  i abbing. Tapus, zimittal i maddaddam nga yena kavulu si Eliseo.​—2 Pat. 4:8-31.

⁸ Ta baleda ta Sunem ta biko na natay, nakimallo si Eliseo. Milagro nga natolay i abbing anna nakavuluna mangana i magayaya ngana nga yenana! (Bibbigan i 2 Patul Ira 4:32-37.) Puede nga nanonona i pakimallo na dati nga baug nga si Hana turi ta niyangena si Samuel ta tabernakulo tapenu masserbi: “Si Jehova ay . . . mangikazza yaya ta Tanam, anna mangalaw yaya.” (1 Sam. 2:6) Manawag nga literal nga pinaginnolay na Dios i abbing ta Sunem, nga pamakurug ta pakapangnguana nga mamaginnolay.

9. Iyesplika nu kunnasi nelagum si Eliseo ta mekatallu nga pamaginnolay ta Biblia.

⁹ Ngem ari tu yatun i ultimo na kappabbaw nga nesimmu kani Eliseo. Nasserbi yaya nga profeta ta maturu nga 50 dagun, tapus ‘nattaki yaya nga natayanna ta pangultimuanna.’ Turi ta tulu-tulang ngana laman i nabbalingan na baggi ni Eliseo, zimittal i tadday nga grupo na kalaban ta Israel. Egga ira i Israelita nga umay nga mangitanam tu tadday nga lalaki. Megafu ta mappabibibi ira tapenu makatammang ta kalabadda, nipattuda i natay nga lalaki ta nattanamman onu livun nga dian na tulu-tulang ni Eliseo. Mabibbig tam: “Turi ta nesiggeg i lalaki ta tulu-tulang ni Eliseo, naginnolay yaya anna limikka uli.” (2 Pat. 13:14, 20, 21) Nonopan nu anni i kebalinan kani Marta natun ira nga pamaginnolay! Maffu talaga na Dios i patay. Nonopan gapa i kebalinan natun para nikaw. Makumbinsi ka nakuan nga daka-dakal anna ari maguku-gukug i pakapangngua na Dios.

10. Anni i nesimmu kani Tabita anna anni i kingngua ni Pedro?

¹⁰ Ta Cristiano nga Griego nga Katurakan, mabibbig tam gapa nga egga i napaginnolay ira ta presensia na representante ira na Dios. Masingattam yatun ta pamaginnolay ira nga kingngua ni Jesus ta lawan na Nain anna turi ta egga yaya ta balay ni Jairo. Si apostol Pedro gapa i namaginnolay ta tadday nga Cristiano nga babay nga si Dorcas (Tabita). Minay yaya ta netaraggan na baggi ni Dorcas. Ta biko na natay, nakimallo si Pedro. Tapus, kinagina: “Tabita, lukka ka!” Insigida nga naginnolay yaya, tapus “nipasingan [ni Pedro] nira si Dorcas nga naginnolay.” Talaga makakumbinsi yatun nga nesimmu, ta “megafu taw, napakaru i nangurug ta Yafu.” Mapakurugda mismu ta publiko i meyannung ta pakapangngua na Yafu anna meyannung ta abilidad ni Jehova nga mamaginnolay tu natay.​—King. 9:36-42.

11. Anni i kinagi na doktor nga si Lucas meyannung ta nesimmu ta abbing nga lalaki, anna anni i efekto natun ta tanakuan?

¹¹ Egga gapa danuri nakemamma mismu ta tadday paga nga pamaginnolay. Mittan, egga si apostol Pablo ta tadday nga paggarammammung ta utun nga kuarto ta Troas, i nallatanan na sigiran anna taggappan nga parte na Turkey ta maddaggun. Nappalappa si Pablo adde ta tangnga na gabi. Egga i tadday nga mabbing nga lalaki nga si Eutico nga maggigginna, nga naka-itubang ta bentana. Tapus nekatrugan yaya anna nataga ta mekatallu nga palapag adde ta gukag. Awayyana nga i doktor nga si Lucas i ollu nga nangurag kani Eutico anna naningan sa: Ari laman nga nabigaran anna awan tu palatagenona​—natay ngana yaya! Nakkazza si Pablo anna ginakkappanna i natay, anna kinagina: “Matolay yaya!” Talaga daka-dakal i efekto natun ta nakasingan ira! Megafu ta nasingadda mismu i pinamaginnolay ni Pablo ta natay, “nepallo i pagayaya da.”​—King. 20:7-12.

12, 13. Meyannung ta nagigiammu tam nga pamaginnolay ira, anni ira nga pakkiavu i ikonsidera tam?

¹² Egga nakuan i nagigiammum tatun ira nga rekord kagitta ni Marta. Yatun i pamasiguradu nga egga i pakapangngua na Dios tam anna Minangngiyawa-Inango nga itoli i inango na natay. Makapa-interes gafu ammuan nga danuri matalo nga aripan na Dios, gitta da Elias, Jesus, anni Pedro ay presente tatun ira nga situasion, ta tiempo nga mammilagro si Jehova. Ngem, anni gafu i makagi tam turi ta natay ira ta tanakuan nga tiempo ta historia? Nu ari mamaginnolay i Dios ta karuan ira nga periodo na tiempo, ekspektan kari na matalo ira nga lallaki anna babbay nga mamaginnolay i Dios ta mappange nga tiempo? Makagida kari gapa i kinagi ni Marta: “Ammù nga maginnolay [i wagì] ta pangurianan nga aggaw”? Ngatta mangurug yaya tatun, anna ngatta mangurug ka gapa?

¹³ Kakuruganna, aru i rekord ira ta nainspiran nga Uvovug na Dios nga mangipasingan nga ammu na matalo ira nga aripan ni Jehova i mappange nga tiempo na pamaginnolay. Ikonsidera tam i karuan.

14. Anni i magigiammu tam meyannung ta paginnolay ta nesimmu kani Abraham?

¹⁴ Nonopan i kinagi na Dios kani Abraham nga kuanna kani Isaac, i nabayag nga nennaggan nga mangirensia. Kinagi ni Jehova: “Apammu bi i ana mu, i tattadday nga ana mu nga kuruga iddeddukammu, si Isaac, anna umeka . . . isakrifisiom yaya . . . bilang matuggi nga tavvung.” (Gen. 22:2) Daddamman nu anni i palawanan natun nga emosion. Nipromesa ni Jehova nga gukaban na gaka ni Abraham, mabendisionan i ngamin nga nasa-nasion. (Gen. 13:14-16; 18:18; Roma 4:17, 18) Kinagi paga ni Jehova nga mallawan i gaka “gukaban ni Isaac.” (Gen. 21:12) Ngem kunnasi mesimmu yatun nu patayan ni Abraham si Isaac bilang tavvung? Nainspiran si Pablo nga iyesplika nga mangurug si Abraham nga mawayya na Dios nga paginnolayan si Isaac. (Bibbigan i Hebreo 11:17-19.) Ari kagian na Biblia nga nononopan ni Abraham nga nu mattuppal yaya, ta piga laman nga oras, aggaw, onu ligguan, ay mapaginnolay si Isaac. Ari ammu ni Abraham nu sonu anni metoli i inango na anana. Ngem nattalo yaya nga paginnolayan ni Jehova si Isaac.

15. Anni i iddanaman na lalaki nga si Job?

¹⁵ Iddanaman gapa na lalaki nga si Job i mappange nga paginnolay. Nalippawana nga nu magappo i fun na kayu, awayyana nga mattaringi uli anna mabbalin tu kagitta na bagu nga mula. Ngem ari tu kunnatun ta tolay. (Job 14:7-12; 19:25-27) Nu matay  i tolay, arianna makalawan ta avvu anna matolay uli. (2 Sam. 12:23; Sal. 89:48) Siempre, ari kayà kagian natun nga awan tu pakawayya na Dios nga mamaginnolay tu tolay. Ta kakuruganna, mangurug si Job nga mangitunno si Jehova tu tiempo tapenu daddamman yaya. (Bibbigan i Job 14:13-15.) Ari ammu ni Job nu sonu anni mesimmu yatun. Ngem, nattalo yaya nga talaga mawayya na Namaratu ta inango na tolay nga daddamman anna paginnolayan yaya.

16. Anni i pamagaram na anghel kani profeta Daniel?

¹⁶ Si Daniel paga i tadday nga matalo nga lalaki nga nammuattam ta Hebreo nga Katurakan. Matalo yaya nga nasserbi ta Dios ta piga nga dekada, anna sinuportan yaya ni Jehova. Egga i tiempo nga pinagaram na tadday nga mensaheru nga anghel yatun nga “kuruga nabala-balor nga lalaki” nga si Daniel, tu ‘mapeggan tu imammo’ anna ‘pasikannanna i nonona.’​—Dan. 9:22, 23; 10:11, 18, 19.

17, 18. Anni i nepromesa kani Daniel ta mappange?

¹⁷ Ma-100 ngana i dagun ni Daniel anna aranni ngana nga matay. Awayya nga nononopanna nu anni i mesimmu sa ta mappange. Maginnolay kari noka si Daniel? Siguradu yatun! Ta ultimo na libru nga Daniel, mabibbig tam i pamasiguradu na Dios sa: “Ngem sikaw, umay ka adde ta panuppalan. Magibannag ka.” (Dan. 12:13) Ammu na lakay nga si Daniel nga magibannag i natay ira, nga awan tu “plano onu pakannammu onu sirib ta Tanam.” Yatun i pappangetan ni Daniel. (Ecl. 9:10) Ngem ari tu yatun i pangultimuanna. Nepromesa sa i mappange.

¹⁸ Netuloy paga i mensahe kani profeta Daniel: “Tumaddag ka noka para ta billem ta panuppalan na aggaggaw.” Awan tu neyawa nga petsa onu kapaddu na tiempo. Mangultimo ta patay si Daniel anna magibannag. Ngem, i pakkagi nga ‘tumaddag yaya ta billena’ ta mappange ay manawag nga promesa nga paginnolay ta mappange​—nabayag kabalin na patena. Mesimmu yatun “ta panuppalan na aggaggaw.” Nitransleyt na Jerusalem Bible i promesa kani Daniel: “Tumaddag ka noka para ta billem ta pangultimuan na tiempo.”

19, 20. (a) Anni i koneksion na nagigiammu tam ta tabbag ni Marta kani Jesus? (b) Anni paga i gigiammuattam?

¹⁹ Egga i rason ni Marta nga makkomfiansa nga i matalo nga wagina, si Lazaro, ay ‘maginnolay noka ta pangurianan nga aggaw.’ Mamasiguradu nakuan ta Cristiano ira ta maddaggun i promesa kani Daniel kunne na gapa i tabbag ni Marta kani Jesus. Egga noka i paginnolay.

²⁰ Nammuattam ta nesimmu ira gari nga posible i paginnolay​—nga metoli uli i inango na natay. Iddanaman danuri lallaki anna babbay nga nasserbi ta Dios nga mesimmu ta mappange i paginnolay. Ngem, egga kari i ebidensia nga egga i paginnolay maski nabayag ngana nga nepromesa yatun? Nu kunnatun, mangiyawa yatun tu rason tapenu innaggattam, kagitta ni Marta, i tiempo na paginnolay. Ngem, sonu anni mesimmu yatun? Gigiammuattam yaw ira nga aspeto ta tumunug nga artikulo.