Nabibbig mu kari tu mapia i nappasa ira nga isyu na Passifusifutan? Innammu nu matabbag mu yaw ira nga pakkiavu:

Ta panguffun ta ánada ta espiritual, ngatta ikonsidera nakuan na dayu ira nga magana i meyannung ta lengguahe?

Siguradu nga matudduan i ána mu tu lokal nga lengguahe ta eskuela anna ta pallevu. Makoffun nira nu ari laman tu tadday nga lengguahe i ammuda. Ikonsidera na magana ira nu sitaw nga kapianan nga magigiammu na ánada i kinakurug anna mapprogreso ta espiritual, nu ta kongregasion nga mangiyusa tu lokal nga lengguahe onu ta kongregasion nga mangiyusa ta lengguahe na magana. Pagolluan na Cristiano ira nga magana i espiritualidad na ánada imbes nga i personal ira nga kayàda.​—w17.05, p. 9-11.

Turi ta niyavu ni Jesus kani Pedro: “Mas dakal kari i pangaya mu niakan anne nira?” anni i tukuyan na “nira”? (Juan 21:15)

Awayya nga tukuyan ni Jesus i manango nga egga ta bikoda anna/onu ta pannegosio tu manango. Kabalin na patay ni Jesus, nanoli si Pedro ta dati nga pagaleranna​—i pagimmanango. Balanseyan nakuan na Cristiano ira i lugar na sekular nga trabahu ta giffutuadda.​—w17.05, p. 22-23.

Ngatta nikiddaw ni Abraham ta atawana nga kagian nga wagina yaya? (Gen. 12:10-13)

Kurug tu wagi ni Abraham ta yama si Sara. Nu kinagi ni Sara nga atawana yaya, awayyana nga patayadda si Abraham, tapus ari yaya nga paggafuan na gaka nga nipromesa na Dios sa.​—wp17.3, p. 14-15.

Anni nga teknik i inusa ni Elias Hutter tapenu uffunan danuri maya nga maggigiammu tu Hebreo?

Kayàna nga matukoy na estudiante ira i nadduman na root word na Hebreo ira ta Biblia anna i neyusa nga prefix onu suffix-na ira. Tapenu makua yaw, niyimprentana ta makannag ira nga letra i root word, tapus meppi gapa nga letra para ta prefix onu suffix-na ira. Kunnaw gapa nga teknik i inusa na New World Translation of the Holy Scriptures—With References ta footnote-na ira.—wp17.4, p. 11-12.

Anni ira i ikonsidera na tadday nga Cristiano meyannung ta kapeggan tu armas para ta proteksion kontra ta tanakuan?

Karuan ay: Ta mata na Dios, sagradu i inango. Ari nga nikiddaw ni Jesus ta disipulosna nga mangivulu ira tu espada para ta proteksion. (Luc. 22:36, 38) Paddayattam tu aradu i espada tam ira. Mas mabalor i inango anne ta material ira nga gannug. Irespeto tam i konsensia na tanakuan, anna kayà tam nga mabbalin tu makasta nga ehemplo. (2 Cor. 4:2)​—w17.07, p. 31-32.

Ngatta madduma i rekord ni Mateo anna ni Lucas meyannung ta kabbing ni Jesus?

Nakafokus si Mateo kani Jose, gittana reaksion ni Jose turi ta navussi si Maria anna ta mensahe na anghel nga umay ira ta Ehipto anna manoli ta Israel. Mas nakafokus si Lucas kani Maria; angngariganna, i pabbisitana kani Elizabet anna i reaksionna turi ta nattalupaddian ta templo i abbing nga si Jesus.​—w17.08, p. 32.

Anni ira nga gannug i ari nakefugag ta pattalupaddian na Biblia?

Nanguloli i termino onu grupo na uvovug ta Biblia ta pappasa na tiempo. Ininfluwensian na panguloli ta pulitika i lengguahe na magaru. Egga ira i pangokkontra ta ketransleyt na Biblia ta lengguahe na ordinario nga totolay.​—w17.09, p. 19-21.

Egga kari i anghel de la guardiam?

Awan. Tinukoy ni Jesus i meyannung ta anghel ira na disipulosna nga kanayun ta arubang na Yamana. (Mat. 18:10) Kayà na laman kagian nga interesadu i anghel ira ta disipulosna, ari tu milagro nga protektan na anghel ira i kada tadday nira.—wp17.5, p. 5.