1. Ngatta importante nga dakkua i bawtismo? (Innan i letratu ta gafu na artikulo.)

KADA dagun, rinivu nga estudiante na Biblia i mabawtisowan. Aru nira i kabataan​—tinedyer onu mas abbing paga. Awayyana nga napadakal ira ta kinakurug. Tadday ka kari nira? Nu kunnatun, makomendakka. Kiddaw para ta Cristiano ira i bawtismo, anna importante yatun nga dakkua para ta kapaliag.​—Mat. 28:19, 20; 1 Ped. 3:21.

2. Ngatta ari nakuan nga ikassing onu ibita i dedikasion?

² Maski mangivuka ta aru nga bendision i bawtismo, egga gapa i responsibilidad nga nelagum taw. Anni? Ta aggaw na bawtismom, simibbag ka tu wan ta pakkiavu nga, “Mekunnay ta sakrifisio ni Jesu-Cristo, nabbabawyammu kari ngana i liwi-liwa mu anna nededikam kari ngana i baggim kani Jehova tapenu kuammu i uray na?” Isimbolo na bawtismom i dedikasiommu. Napafutuan yaw nga promesam kani Jehova nga ayatan yaya anna pagolluammu i urena ta ngamin nga gannug. Serioso nga tabba yatun. Mepangngo kari nga pabbabawyammu yatun? Siguradu nga ari! Ari vuluvuga  nga mali i pangitalo mu ta baggim ta lima ni Jehova. Nonopammu lallagu yaw: I tadday nga tolay nga arayyu kani Jehova ay kontroladu ni Satanas. Awan tu pagimporta na Diablo ta kapaliag mu. Ta kakuruganna, magayaya yaya nu mawawammu i mannanayun nga inango tapenu masuportammu laman yaya ta pallaban ta soberania ni Jehova.

3. Anni ira i bendision nu idedikam i baggim kani Jehova?

³ Imbes nga suportan si Satanas, ikonsidera tam lallagu i bendision ira nga nalawa tam turi ta naddedika anna nabawtisowan ittam nga Cristiano. Sangawe ta nidedikam ngana kani Jehova i inango mu, mas sigga-komfiansa ka nga makkagi: “Ari ngà maganassing, ta i YAFU i kavulu ku; anni i makua na tolay niakan gafu?” (Sal. 118:6) Awan ngana tu mas dakal nga pribilehiom ta pattolay anne ta melagum ta pammaguray na Dios anna ta pakannammum nga faborannaka.

4, 5. (a) Kunnasi nga personal nga responsibilidad i dedikasion? (b) Anni ira nga kapurueba i meparubang ta Cristiano ira maski anni i edadda?

⁴ Bilang bawtisadu nga Cristiano, i relasiommu kani Jehova ay ari nga kagitta na ‘family plan’ na tadday nga kompania na cellphone nga magana mu laman i mappaga. Sikaw lagapa i makarresponsibilidad ta kapaliag mu maski nu egga ka paga laman ta puder na magana mu. Ngatta importante nga daddamman yatun? Megafu ta maruddu nga ariammu antimano nga mammuan nu anni ira i kapurueba nga meparubang nikaw ta mappange. Angngariganna, nu abbikka nga nabawtisowan, siguradu nga egga ira i mataga-tageno anna problemam nga bagu nikaw durante nga magadulto ka. Kunnaw i kinagi na 18 anios nga tinedyer: “Maruddu nga ari pabbabawyan na abbing i pabbalin tu tadday nga Saksi ni Jehova megafu ta ari laman meddan tu birthday cake ta eskuela. Ngem ta pappasa na piga dagun sonu masikan ngana i pakkaraga nga maki-sex, mawag nga talaga kumbinsidu yaya nga kanayun nga kapianan i panuttul ta dorob ni Jehova.”

⁵ Siempre, ari laman nga abbarabbing i meparubang ta bagu ira nga kapurueba. Meparubang lagapa ta ari inekspekta nga kapurueba maski danuri adulto ngana turi nabawtisowan. Awayyana nga megafu ta pagatawa, taka-taki, onu trabahu. Wan, ngamin, maski anni i edadna ay meparubang ta situasion ira nga kawagan i kinamatalo kani Jehova.​—Sant. 1:12-14.

6. (a) Anni i kebalinan na dedikasiommu kani Jehova nga awan tu kondisionna? (b) Anni i magigiammum ta Filipos 4:11-12 anna ta 2 Corinto 4:7?

⁶ Tapenu makapattalupaddiakka nga matalo ta maski anni nga situasion, ariammu vuluvuga kattamman nga awan tu kondision na promesam kani Jehova. Kayà kagian natun nga kinagim ta Soberano ta uniberso nga mattulu-tuloy ka nga masserbi sa maski paga gammannaka na kokkofun anna magana mu nga kuan yatun. (Sal. 27:10) Ta ngamin nga situasion, awayyam makkiddaw tu sikan​—gukaban na uffun ni Jehova​—tapenu matuppal mu i dedikasiommu.​—Bibbigan i Filipos 4:11-12; 2 Corinto 4:7.

7. Anni i kayà kagian na talakkurugammu nga ibalin i kapaliag mu “ta kurug nga agganassing anna ammakakua ta Dios?”

⁷ Kayà ni Jehova nga mabbalikka tu kofunna. Ngem mawag i pappursigi tapenu mapattalupaddian i pakikofun sa anna metalakkurug nga ibalin i kapaliag. Ta kakuruganna, kagian na Filipos 2:12: “Talakkurugan nu nga ibalin i kapaliag nu—ta kurug nga agganassing anna ammakakua ta Dios.” Kayà kagian natun ira nga uvovug nga mawag mu nga ikonsidera nu kunnasim mapattalupaddian i pakikofummu kani Jehova anna kanayun nga mammakatalo sa maski ta anni nga problema. Ariammu kuruga makkomfiansa ta baggim, megafu ta minarayyu maski  i karuan nga nabayag ngana nga massesserbi ta Dios. Yatutta, anni ira i dakkua nga makuam tapenu metalakkurug mu nga ibalin i kapaliag mu?

8. Anni i nelagum ta personal nga paggigiammu, anna ngatta importante yaw?

⁸ Tapenu mabbalin tu kofun ni Jehova, mawag tam nga ginnan anna kiyuvovugan yaya. Personal nga paggigiammu tu Biblia i primeru nga makua tam tapenu ginnan si Jehova. Nelagum tatun i pangà tu pakannammu gukaban na pabbibbig anna pannono tu mapia ta Uvovug na Dios anna ta nebase-Biblia ira nga publikasion. Nu kuammu yatun, daddammammu nga ari tu gittana pagiskuela i paggigiammu tu Biblia. Ari tu gittana basta pakkabesa ta detalye ira tapenu mepasam i exam ta eskuela. I produktibo nga paggigiammu ay kagitta na pabbiahe nu sitaw mappasiar anna maddiskubre ka tu bagu ira nga aspeto na personalidad ni Jehova. Makoffun yaw tapenu maddukko ka ta Dios, anna maddukko gapa yaya nikaw.​—Sant. 4:8.

9. Anni ira nga rimienta i nakoffun nikaw ta personal nga paggigiammum?

⁹ Nangiyawa i organisasion ni Jehova tu aru nga rimienta tapenu mapeggan tu efektibo nga programa ta paggigiammu. Angngariganna, makoffun nikaw i “Activity Para sa Pag-aaral ng Bibliya” nga malegan ta seksion nga “Tin-edyer” ta jw.org/tl tapenu makagigiammu tu praktikal ira nga leksion ta istoria ira na Biblia. Ta jw.org/tl gapa, makoffun i gabay sa pag-aaral ta “Ano ba Talaga ang Itinuturo ng Bibliya?” tapenu mapasikammu i kombiksiommu ta kurugammu. Makoffun yatun ira nga giya ta paggigiammu nu kunnasim meyesplika i pangurug mu ta tanakuan. Egga paga i karuan ira nga ideya ta paggigiammu nga malegan ta “Ang mga Kabataan ay Nagtatanong . . . Paano Ko Gagawing Kawili-wili ang Pagbabasa ng Bibliya?” ta Abril 2009 nga isyu na Gumising! Importante i paggigiammu anna pannono tu mapia tapenu metalakkurug mu nga ibalin i kepaliag mu.​—Bibbigan i Salmo 119:105.

10. Ngatta importante i pakimallo ta bawtisadu nga Cristiano?

¹⁰ Maginna tam si Jehova gukaban na personal nga paggigiammu anna maka-uvovug tam gapa yaya gukaban na pakimallo. Ari nakuan imammatan na Cristiano i pakimallo nga ritual laman nga awan tu serbina onu ‘pampasuerte’ ta ganna-gannug. Lallagu, kurug nga pakiyuvovug ta Namaratu tam i  pakimallo. Kayà naka ginnan ni Jehova. (Bibbigan i Filipos 4:6.) Nu maka-ekspiriensa ka tu maski anni nga problema, nitabarang na Biblia nga “ipammakatalo mu ta YAFU i vuru-vurung mu ira.” (Sal. 55:22) Talaga kari nga mangurug ka tatun? Minillion nga wawwaragi i mangipasiguradu nikaw nga nakoffun yatun nira. Makoffun gapa yatun nikaw!

11. Ngatta nga kanayukka nakuan mappabalo kani Jehova?

¹¹ Iddannaka na pakimallo tu oportunidad nga ari laman mappoffun kani Jehova. Kagian na Biblia: “Mabbala-balo kamu gapa nga kanayun.” (Col. 3:15) Nu mittan talaga makkonsumision ittam ta problema tam ira tapus ariattam ngana masingan i bendisiottam ira. Kada aggaw, mannono tu tallu onu mas aru paga nga gannug nga ipappabalo mu. Tapus mappabalo ka tatun ira nga bendision kani Jehova ta pakimallo. Kinagi na 18 anios nga si Abigail nga nabawtisowan ta edad nga 12: “Matageno ku nga mepangngo si Jehova ta pappabalo tam anne ta maski sinni ta uniberso. Mappabalo ittam sa ta ngamin nga tiempo ta regalu ira nga niyawana nittam. Egga i makasta nga komento nga naginnà: Nu lukka tam sonu umma nga yuri laman i gannug nga pinappabalo tam kani Jehova taw nga aggaw i egga nittam, anni ira i mabattang nittam?” *

12, 13. Ngatta importante nga nonopan nu kunnasim nga naekspiriensa i kinapia ni Jehova?

¹² Inuffunan ni Jehova si Patul David tapenu maattamman i mariga ira nga situasion. Yatutta kunnaw i nekagi ni David meyannung ta personal nga ekspiriensana: “I pia na YAFU ay en-nu mismu nga kakkapan, ta mapalag i tolay nga yaya i en-na pakiyegutan!” (Sal. 34:8) Ipasingan natun nga bersikulo i importansia na personal ira nga ekspiriensa. Nu bibbigammu i Biblia anna i publikasiottam ira anna nu magatende ka ta study ira, ginnan i makapagaram ira nga ekspiriensa nu kunnasi inuffunan na Dios i karuan tapenu makapammakatalo. Ngem durante nga mapprogreso ka ta espiritual, kawagammu nga kakkapan onu maekspiriensa mismu i pakapangngua ni Jehova ta pattolem. Personal ngana kari nga naekspiriensam i kinapia ni Jehova?

¹³ Egga i tadday nga gannug nga nakakkapan na Cristiano ira i kinapia ni Jehova. Yaw ay i imbitasion nga maddukko ta Dios anna ta Anana. Kinagi ni Jesus: “Awan tu tolay nga makangay niakan nu ari nga ipamavulun na Yama nga naddog niakan.” (Juan 6:44) Matageno mu kari nga meyaplika danatun nga uvovug nikaw? Awayyana irason na kabataan, ‘Niyaranni ni Jehova i magana ku, anna siminuttul ngà laman.’ Ngem turi ta nidedikam i baggim kani Jehova anna nabawtisowan, nipasingammu nga egga ngana i espesial nga relasiommu sa. Talaga kilala naka ngana ni Jehova. Nipasiguradu nittam na Biblia: “Ngem i mangaya ta Dios, ay ammu yaya na Dios.” (1 Cor. 8:3) Kanayun nakuan nga tagibaloran anna appresiammu i lugar mu ta organisasion ni Jehova.

14, 15. Kunnasi mapatuyag na ministerio i pangurug mu?

¹⁴ Makakkapammu paga i kinapia ni Jehova gukaban na pakatageno mu mismu ta suportana durante nga ikagim i pangurug mu ta tanakuan. Makuam yatun ta ministerio kunne na gapa ta eskuela. Marigatan i karuan nga layyagayyan i kakavuluda ta eskuela. Talaga malippawa mu nu ngatta. Ariammu ammu nu anni i reaksiodda. Mas ngana nga mariga nu makiyuvovug ka ta dakal nga grupo anne ta tadday nga kaklasem. Anni i makoffun nikaw?

¹⁵ Ollu, nonopan nu ngatta kumbinsidu ka  ta kurugammu. Malegan kari i giya ira ta paggigiammu ta jw.org ta lengguahem? Nu ari ka siguradu, iddan tu tiempo nga innan yatun. Nadisenio yatun ira tapenu pannonopammu i pangurug mu, nu ngatta kurugammu yatun, anna nu kunnasim iyesplika yatun ta tanakuan. Nu matuyag i kombiksiommu anna preparadu ka, mapagaram ka nga ilayyagayya i meyannung kani Jehova.​—Jer. 20:8, 9.

16. Anni i makoffun nikaw nu maganassikka nga ipakiyuvovug i meyannung ta kurugammu ira?

¹⁶ Ngem maski nu preparadu ka, awayyana nga maganassikka lagapa nga ipakiyuvovug i pangurug mu ira. Inamin na 18 anios nga sister nga nabawtisowan turi ta 13 dagunna, “Ammù nu anni i kurugakku, ngem nu mittan marigatannà iyesplika yatun.” Kunnasina inarubang yatun? “Pinuruebakku i gittana makikkistoria laman,” kunna. “Normal laman nga iyistoria na kaklasè ira i ganna-gannug nga kukukuadda. Kunnatun gapa nakuan i kuakku. Yatutta mangikagi ngà tu gannug ira nga gittana, ‘Egga i tudduakku ta Biblia ta nappasa nga aggaw, anna . . . ’ Tapus ituloy ku yatun nga istoriakku. Maski nu ari tu meyannung ta Biblia i ollu nga istoriakku, maruddu nga mattaka ira nu anni i kuakku nu manuddu ngà meyannung ta Biblia. Nu mittan makkiavu ira. Durante nga usu-usakku yaw nga istilo, mas komfortable ngà ngana. Tapus, kanayunnà nga masaya!”

17. Kunnasi makoffun i pagimamma mu ta pangurug mu tapenu makapallayyagayya ka ta tanakuan?

¹⁷ Durante nga irespetom i tanakuan anna mangipasingan tu interes nira, mas malogon gapa para nira nga irespetodaka anna i pangurug mu. “Magana-anassing ngà nga nu isingit ku i Biblia ta paggiristoria, nonopan na totolay nga fanatiko ngà.” Yatun i komento na 17 anios nga si Olivia, nga nabawtisowan ta kabbinna. Tapus nanguli i pagimammana. Imbes nga agga-nonona i paganassinganna, kinagina: “Awan tu ammu na aru nga kabataan meyannung ta Saksi ira ni Jehova. Sittam laman i kakilalada nga Saksi. Yatutta nakadepende i reaksiodda ta kondukta tam ira. Kunnasi nu mappasirang onu ariattam mattattannug onu marigatattam nga idefensa i pangurug tam, onu kunnasi nu mattukku-tukka tam nu mangiyesplika tam? Awayyada nga imammatan nga ipasirattam nu sinni ittam. Awayyana paga nga ari tu makasta i reaksiodda megafu ta kurang i komfiansa tam. Ngem, nu mapalegan tam nga iyesplika anna siguradu ittam ta kurugattam, nga normal ngana ta pakistoria tam, maruddu nga irespetoda ittam.”

18. Anni i nelagum ta pangitalakkurug nga ibalin i kapaliag mu?

¹⁸ Kagitta na nagigiammu tam, serioso nga responsibilidad i pangitalakkurug nga ibalin i kapaliag mu. Nelagum tatun i pabbibbig ta Uvovug na Dios anna pannono tatun tu mapia, pakimallo kani Jehova, anna pannono nu kunnasi naka nga binendisionan ni Jehova bilang indibidual. Nu iyaplikam yatun ira ta baggim, mapadakal mu i komfiansam ta pribilehio nga makikofun kani Jehova. Yatun gapa i mamaguyu nikaw nga idefensa i pangurug mu.—Bibbigan i Salmo 73:28.

19. Ngatta sulit i pangitalakkurug nga ibalin i kapaliag mu?

¹⁹ Kinagi ni Jesus: “I sinni laman nga maya nga mevulu niakan, mawag tu kattaman na i baggi na, iyabaga na i krus na, [pakazigarigatan nga estaka, NW] anna tumuttul niakan.” (Mat. 16:24) Manawag, i pabbalin tu disipulo​—nelagum ngana i dedikasion anna bawtismo​—ay obligasiommu bilang Cristiano. Ngem, mangivuka yatun ta napakaru nga bendision ta maddaggun anna mannanayun nga inango ta napabagu nga mundo na Dios. Yatutta, aru gafu i rasommu tapenu talakkurugan nga ibalin i kapaliag mu!