1, 2. Ngatta mavurung i karuan nga magana nu igafu ngana na ánada i dakkua para ta dedikasion anna bawtismo?

RINIVU nga estudiante na Biblia i maddedika kani Jehova anna mappabawtiso. Aru nira i kabataan nga ziminakal ta kinakurug anna pinilida i kakastan nga klase na pattolay. (Sal. 1:1-3) Nu Cristiano ka nga magana, siguradu nga iinnaggammu i aggaw nga mappabawtiso i ana mu.​—Ikumpara i 3 Juan 4.

² Ngem baka mavurukka lagapa. Awayyana nga egga i ammum nga karuan nga kabataan nga nabawtisowan tapus ta pappasa na tiempo kukkuestionadda nu talaga kapianan i pattolay segun ta estandarte ira na Dios. Nilikuran paga lagu na karuan i kinakurug. Yatutta mavurukka gapa nga igafu na ana mu i nacristianuan nga dalan tapus pallikuradda yatun anna mawawadda i dati nga pangayada ta kinakurug. Baka megitta ira ta ollu-siglo ira nga Cristiano ta Efeso nga kinagianan ni Jesus: “I pangaya nu niakan sangoye ay ari ngana tu kagitta na gari ta gafu na.” (Nep. 2:4) Kunnasim mebita nga mesimmu yatun anna moffunan  i ana mu nga ‘dumakal ta kapaliag’? (1 Ped. 2:2) Tapenu matabbag yatun, ikonsidera tam i ehemplo ni Timoteo.

3. (a) Kunnasi nabbalin tu Cristiano si Timoteo, anna kunnasina niyaplika i nagigiammuna ira? (b) Anni i tallu nga aspeto na paggigiammu i nitabarang ni Pablo kani Timoteo?

³ Ma-47 C.E. turi ta ollu nga binisita ni Pablo i Listra nga nammuan ni Timoteo i meyannung ta tuttuddu ni Jesus. Maski nu mattinedyer paga laman tatun si Timoteo, niyaplikana lagapa i nagigiammuna. Kabalin na dua ragun, mevulu-vulu ngana yaya ta pabbiahe ni Pablo. Ma-16 dagun kabalin natun, nattura si Pablo kani Timoteo: “Mannanayun ka paray ta ginigiammum ira anna kinurug mu ta napafutu. Ammum gammabba nu sinni ira i nattuddu nikaw anna ammum paga tu namegafu paga gari ta kabbing mu, nannammuam-mu ngana i Masanto ira nga Tura [i Hebreo nga Katurakan] nga mangiyawa ta ka-uto nga mattuppal ta kapaliag gafu ta angngurug kani Cristo Jesus.” (2 Tim. 3:14, 15) Takkilalammu nga kinagi ni Pablo (1) ammuan i masanto ira nga tura, (2) kurugan tu napafutu i gannug ira nga nagigiammu, anna (3) mapeggan tu ka-uto nga mattuppal ta kapaliag gafu ta angngurug kani Cristo Jesus.

4. Anni ira nga rimienta i nasifutammu nga efektibo ta panuddu ta abbarabbing? (Innan i letratu ta gafu na artikulo.)

⁴ Bilang Cristiano nga magana, kaya mu nga ammuan na ana mu i masanto ira nga tura, nga ta maddaggun​—i Hebreo nga Katurakan anna i Cristiano nga Griego nga Katurakan. Depende ta abilidadda, makagigiammu lagapa maski danuri abbarabbing meyannung ta totolay anna ta istoria ira ta Biblia. Nangiyawa i organisasion ni Jehova tu rimienta ira nga meyusa na mappagana tapenu moffunan i ánada. Egga ira i ammum nga mala ta lengguahenu? Daddamman nga i pakannammu ta Katurakan i fundasion tapenu makabuu tu maladda nga relasion kani Jehova.

5. (a) Anni i kebalinan na ‘nangurug ta napafutu’? (b) Kunnasi tam nammuan nga napafutu nga nangurug si Timoteo ta mapia nga dumug meyannung kani Jesus?

⁵ Importante i pakannammu ta masanto ira nga tura. Ngem ari makalanno ta espiritual nga edukasion na abbarabbing i basta laman pangituddu ta nira meyannung ta totolay anna istoria ira ta Biblia. Daddamman nga ‘nangurug ta napafutu’ si Timoteo. Ta orihinal nga lengguahe, kebalinan natun nga “mepasiguradu” onu “makumbinsi anna siguradu ta kinakurug na tadday nga gannug.” Ammu ni Timoteo i Hebreo nga Katurakan namegafu ta kabbinna. Ngem zimittal i tiempo nga nakumbinsi yaya na masikan nga ebidensia nga si Jesus i Mesias. Kayàna kagian, mas nakumbinsi yaya ta pakannammuna. Ta kakuruganna, talaga kumbinsidu yaya ta mapia nga dumug yatutta nappabawtiso anna nevulu kani Pablo ta pammisionerona.

6. Kunnasim moffunan i ána mu nga mangurug ta napafutu ta nagigiammuda ta Uvovug na Dios?

⁶ Kunnasim moffunan i ana mu tapenu mapeggan tu pangurug kagitta ni Timoteo, nga ‘nangurug ta napafutu’? Ollu, mappasensia. Kawagan i tiempo tapenu mapeggan tu pangurug. Ari gapa nga mepamana yatun ta ána mu megafu ta sikaw ay nangurug ta napafutu. Mawag tu ‘innan ta mapia [na kada ana] nu kurug ngamin danaw’ tapenu makumbinsi yaya meyannung ta kinakurug ta Biblia. (Bibbigan i 1 Tesalonica 5:21) Importante i papel mu bilang magana tatun nga proseso, netallugaring nu makkakkiavu i ana mu. Ikonsidera i tadday nga angngarigan.

7, 8. (a) Kunnasi nepasingan na tadday nga Cristiano nga yama i pasensiana ta panuddu ta anana? (b) Anni ira i situasion nga kawagammu i pappasensia ta ana mu?

 ⁷ Kinagi ni Thomas nga yama na 11 anios nga babay: “Nu mittan iyavu na ana ku, ‘Ebolusion kari i niyusa ni Jehova tapenu paddayan i inango ta davvun?’ onu, ‘Ngatta ariattam makisali ta aktibidad na komunidad​—angngariganna, ta eleksion—​tapenu mapakasta i ganna-gannug?’ Nu mittan, gaggaddakku i zilà tapenu ari makeyawa tu dogmatiko nga tabbag. Makumbinsi mabba gapa i tolay akkan tu megafu ta tattadday nga dakal nga kinakurug. Megafu yatun ta napakaru nga napattaradday nga baraddi nga ebidensia.”

⁸ Ammu ni Thomas nga kawagan i pasensia ta pattuddu. Kakuruganna, importante i pasensia ta ngamin nga Cristiano. (Col. 3:12) Nalippawana nga mawag i aru nga tiempo anna pakiyuvovug. Kawaganna nga marrason segun ta Katurakan tapenu mangurug tu napafutu i anana ta magigiammuna ira. “Mas ngana ta importante ira nga gannug,” kunni Thomas, “kayàmi na atawà nga ammuan nu talaga kurugan na anami nga babay i nagigiammuna anna nu talaga nalippawana yatun. Nu egga i pakkiavuna ira, makasta yatun. Ta kakuruganna, mas mavurung ngà nu basta alawatanna i tadday nga gannug nga arianna makkiavu.”

9. Kunnasim mepatalatto i Uvovug na Dios ta ána mu?

⁹ Gukaban na pasensioso nga panuddu na mappagana, sesenu lagapa nga malippawa na ána “i kadakal, kapaddu, katannang, anna karalam” na pangurug. (Efe. 3:18) Awayya tam ibagay nu anni i mepangngo ta edad anna abilidadda. Durante nga makumbinsi ira ta nagigiammuda, mas ngana nga medefensada i pangurugda ta tanakuan, maski ta ka-eskuelada ira. (1 Ped. 3:15) Angngariganna, meyesplika kari na ána mu ta Biblia nu anni i mesimmu ta patay? Malippawada kari i eksplanasion na Biblia? * Wan, kawagan i pasensia tapenu ipatalatto ta ana mu i Uvovug na Dios, ngem sulit yatun.​—Deut. 6:6, 7.

10. Anni nakuan i importante nga parte na panuddum?

¹⁰ Siempre, importante gapa i ehemplom nu meyannung ta kapeggan tu pangurug. Kunni Stephanie nga yena na tallu nga babay: “Turi paga ta kabbinna ána ku, kanayukku iyavu ta baggì, ‘Ipakiyuvovug ku kari ta ána ku nu ngatta kumbinsidu ngà nga kurug si Jehova, i ayana, anna kinatunung na dala-dalanna? Masingan kari na ána ku nga talaga iddukakku si Jehova?’ Ariakku iddanaman nga mangurug i ána ku nu sakan mismu ay ari mangurug.”

11, 12. Anni i sirib, anna ngatta makagi tam nga ari magukug yatun ta edad na tolay?

¹¹ Kagitta na nagigiammu tam, si Timoteo ay (1) ammuna i Katurakan anna (2) kumbinsidu yaya ta kuruganna ira. Ngem anni i kayà kagian ni Pablo ta pakkagina nga mapeggan si Timoteo tu “ka-uto nga mattuppal ta kapaliag” megafu ta masanto ira nga tura?

¹² Niyesplika na Kaunawaan Mula sa Kasulatan, Tomo 2, nga ta Biblia, nelagum ta sirib i “abilidad nga usan ta kapianan i pakannammu anna pakalippawa tapenu masolba i problema ira, melilli onu melisi ta peligro ira, magawa i tadday nga addetan, onu matabarangngan i karuan ta tadday nga gannug. Katulia yaw na kina-ulapa.” Kagian na Biblia nga i “kina-ulapa ay negalu ta futu na  abbing.” (Prov. 22:15, ftn.) Megafu ta katulia na kinasirib i kina-ulapa, pakasingannan gafu tu kinamanakam i kinasirib. Ari magukug ta edad i kinamanakam ta espiritual, nu ari, gukaban na assing na tadday kani Jehova anna sigga-paran nga panuttulna ta bili-bilinna.​—Bibbigan i Salmo 111:10.

13. Kunnasi mepasingan na kabataan nga egga i siribna para ta kapaliag?

¹³ Ari nga “meyana-anug ta palung anna mepadda-paddag laman” na pakkaraga onu pamipilit na kakavulu danuri kabataan nga manakam ta espiritual. (Efe. 4:14) Mapprogreso lallagu ira megafu ta “napenam ngana nga maningan ta nadduman na mapia anna marakay.” (Heb. 5:14) Ipasingadda nga mammanakam ngana ira gukaban na masirib ira nga paddesision​—maski nu ari ira masingan na maganada onu karuan nga adulto. (Fil. 2:12) Kawagan yatun nga sirib tapenu mapaliag. (Bibbigan i Proverbio 24:14.) Kunnasim moffunan i ána mu nga mapeggan tu kunnatun? Siguraduan nga ammuda nu anni ira i nebase Biblia ira nga kurugammu. Gukaban na kakkagiammu anna ehemplom, masingadda nakuan nga mattolay kamu segun ta estandarte na Biblia.​—Roma 2:21-23.

14, 15. (a) Anni nakuan i nonopan tu mapia na abbing nga maya ngana nga mappabawtiso? (b) Kunnasim moffunan i ána mu nga pannonopan i bendision ira na pattuppal ta dorob na Dios?

¹⁴ Ngem, ari nga makalanno i basta pangikagi ta ánanu nu anni i mapia anna nu anni i marake. Kawagannu paga nga uffunan ira nga tabbagan i pakkiavu ira nga gittana: ‘Ngatta igamma na Biblia i gannug ira nga gittana makasta? Anni i nangumbinsi niakan nga kanayun nga pammakapianakku i estandarte ira na Biblia?’​—Isa. 48:17, 18.

¹⁵ I abbing nga nangikagi tu interesna nga mappabawtiso ay moffunan nakuan nga nonopan tu mapia i tadday paga nga gannug​—nu anni i matagenona ta responsibilidad ira nga iyabaga na Cristiano. Anni ira i bentaha? Anni ira i ziga nga meparubang? Ngatta mas dakal i bentaha anne ta ziga ira nga meparubang? (Mar. 10:29, 30) Maruddu nga yatun ira i arubangan na tadday kabalin  na bawtismo. Yatutta, serioso nakuan nga pannonopan yaw ira nga gannug nige kuan yatun nga serioso nga desision. Nu moffunan i ána nga monag nga pannonopan i bendision ira megafu ta pattuppal onu resulta ira na ari pattuppal, siguradu nga mapeggan ira tu personal nga pangurug. Anni nga pangurug? Kanayun nga pammakapianadda i estandarte ira na Biblia.​—Deut. 30:19, 20.

16. Anni nakuan i ikonsidera na magana ira nu makkafi i pangurug na bawtisadu nga anada?

¹⁶ Kunnasi gafu nu nangikagi i ana mu tu padduda kabalidda nappabawtiso? Angngariganna, baka matenta i ana mu ta gannug ira ta mundo onu igafuda nga kuestionan i kinasirib na pattolay segun ta prinsipio ira na Biblia. (Sal. 73:1-3, 12, 13) Bilang magana, malippawa mu nakuan nga i panabbag mu ta kunnatun ira nga pakkuestion na ana mu ay makafekto ta desisionna nga mas makumbinsi ta kurugammu onu mas umarayyu yaya tatun. Determinadu ka nakuan nga ari makiddama ta ana mu meyannung tatun nga gannug, maski nu abbing paga yaya onu bagitolay ngana. Igakkag mu nakuan nga ipatageno sa i aya anna suportam.

17, 18. Nu madduda i tadday nga kabataan, kunnasi makoffun i magana ira?

¹⁷ Siempre, napafutuan nga naddedika kani Jehova i tadday nga kabataan nga nappabawtiso. Promesa yatun nga dedikasion nga ayatan i Dios anna pagolluan i urena ta ngamin. (Bibbigan i Marcos 12:30.) Ari nga tagilappawan ni Jehova yatun nga promesa, anna ari gapa nakuan nga tagilappawan yatun na maski sinni nga nappromesa. (Ecl. 5:4, 5) Ta mepangngo nga tiempo, masippo nga iperaddam ta ana mu yatun ira nga kinakurug. Ngem nige mu kuan yatun, usan tu mapia i material ira nga niyawa na organisasion ni Jehova para ta magana ira. Nu kuammu yatun, mepatalatto mu i kinaserioso anna i bendision ira na paddedika kani Jehova anna pabbalin tu bawtisado nga Cristiano.

¹⁸ Angngariganna, malegan i makoffun nga tabarang ta “Tanong ng mga Magulang” ta apendise na libru nga Tanong ng mga Kabataan​—Mga Sagot na Lumulutas, Tomo 1. Mabibbig tatun: “Ariammu insigida nonopan nga i tinedyer nga ana mu ay nilikuranna ngana i pangurugnu. Ta aru nga situasion, egga i rason ta likug natun.” Awayyana tu pamipilit na kakavulu. Posible gapa nga pagitetadday onu pakatageno nga mas makasta i espiritualidad na tanakuan nga Cristiano nga kabataan. Kunna paga na apendise: “Yaw ira nga isyu ay awan gapa tu koneksionna ta tuddu ira na relihiommu. Mas paga nga egga i koneksion natun ta problema ira nga meparubang nira megafu ta pangurugnu​—ngem temporario laman.” Nangiyawa paga yatun nga apendise tu aru nga suhestion nu kunnasi uffunan na Cristiano nga magana i anana nga nakkafi i pangurugna.

19. Kunnasi moffunan na magana ira i ánada nga mapeggan tu “ka-uto nga mattuppal ta kapaliag”?

¹⁹ Bilang magana, egga i madammo nga responsibilidad mu​—anna pribilehio—​nga padakallan i ána mu “ta tuddu anna tabarang nga meyannung ta Yafu.” (Efe. 6:4) Kagitta na nagigiammu tam, mekiddaw tatun ari laman i panuddu nira nu anni i kagian na Biblia, nu ari, panguffun gapa nira nga mapeggan tu pangurug ta nagigiammuda. Wan, kawagadda i maladda nga pangurug nga mamaguyu nira nga maddedika kani Jehova anna interu-futu nga passerbian yaya. Paray nakuan tu i Uvovug ni Jehova, i espirituna, anna i appursigim bilang magana i makoffun ta ána mu nga mapeggan tu “ka-uto nga mattuppal ta kapaliag.”