Nabibbig mu kari tu mapia i isyu ira na Passifusifutan taw nga dagun? Innammu nu matabbag mu yaw ira nga pakkiavu:

Anni i ipasiguradu na Santiago 5:11 ta pakkagi na nga “minaggiddeddu” anna “minaggallallo” si Jehova?

Pakoman ni Jehova i liwi-liwa tam megafu ta allo na. Ipasiguradu ta nittam na Santiago 5:11 nga iddeddu na ittam yari tu kakayà na ittam nga uffunan. Parigattam nakuan yayya.​—w21.01, p. 21.

Ngatta niyunnug ni Jehova i pakka-ulu?

Megafu ta ayatan na ittam. Memammo anna organisadu i matalo nga familia na megafu tatun nga unnug. Nu tuttuttulan yatun na miembro ira na familia, ammu da nu sinni i magangngua ta ultimu nga desision anna nu sinni i mangirollu ta pangipatuppal tatun ira nga desision.​—w21.02, p. 3.

Ngatta magimmugug nakuan i Cristiano ira nu mangusa tu electronic messaging application ira?

Nu mangusa i tadday tu kunnatun, mawag nga pilian na tu mapia i pakikkofunan na. Mas mariga nga kuan yatun nu darakal onu aru i miembro na messaging group. (1 Tim. 5:13) Mabi laman nga mepaka-pakoli tatun i report ira nga ari mabba nga napakurug anna baka usan yatun na karuan tapenu pannegosiowan i wawwaragi.​—w21.03, p. 31.

Ngatta nipamavulun na Dios nga maziga-riga si Jesus anna matay?

Ollu, nu mebesing gare si Jesus ta estaka, posible nga mapalubbangan i Judio ira ta kebariaw da. (Gal. 3:10, 13) Mekadua, sinanay ni Jehova si Jesus ta annungan na bilang Atannang nga Pari. Mekatallu, pinakurug na patay ni Jesus nga makapattalupaddian nga matalo i tadday ta mariga ira nga situasion onu kapurueba. (Job 1:9-11)—w21.04, p. 16-17.

Anni ira i kuammu nu mariga nga malegan i totolay ta pallayyagayyam?

Layyagayyan i totolay ta oras nga egga ira ta babaleda. Puede gapa nga ta nadduruma nga lugar onu tanakuan nga metodo i pallayyagayyam gitta na pamadday tu tura.​—w21.05, p. 15-16.

Anni i kayà kagian ni apostol Pablo ta pakkagi na: “Nu meyannung ta Dob, neyarig ngà tu natay ngana anna i Dob mismu i namapatay niakan”? (Gal. 2:19)

Nipasingan na Mosaiko nga Dob tu imperfekto i totolay anna nipalippawa natun ta Israel nu sinni i Cristo. (Gal. 3:19, 24) Yatutta inaksepta ni Pablo si Cristo. Turi ta kingngua na yatun, ‘neyarig tu natay ngana si Pablo nu meyannung ta Dob’; ari na ngana nga tuttulan yatun.​—w21.06, p. 31.

Kunnasi nipasingan ni Jehova i ehemplo na pagattattam?

Attattamman ni Jehova i pamara-parake ta ngagan na, i pangokkontra ta pammagurena, i parrebelde na karuan ta ána na, i kinaladdug ira ni Satanas, i pazziga-riga na aripan na ira, i ari na nga pakasingan ta kokkofun na ira nga natay, i kaperwisiu na totolay, anna i panara-daral na totolay ta pinaratu.​—w21.07, p. 9-12.

Kunnasi nga nipasingan ni Jose i makasta nga ehemplo na pappasa-pasensia?

Inattamman na i ari tu patas nga pinattratu na manung na ira ta nisa. Megafu ta kingngua da, neyangay yayya ta Ehipto tapus naakusan yayya tari anna nefuku tu piga nga dagun.​—w21.08, p. 12.

Anni i payyayyag nga neprofesiya ta Hageo 2:6-9, 20-22?

Nammanaki i nasa-nasion ta pangilayyagayya ta Pappatulan ngem aru lagapa i neyaranni ta kinakurug. Aranni ngana i kadaral na nasa-nasion sonu mesimmu i ultimu nga payyayyag.​—w21.09, p. 15-19.

Ngatta ari ittam nakuan magimmang nga mallayyagayya?

Masingi-singan ni Jehova i pallallappo tam anna mamagayayya yatun ta nisa. Nu ari ittam nga molang onu ari nga makkafi i nono tam, gatabattam noka i mannanayun nga inango.​—w21.10, p. 25-26.

Kunnasi ittam moffunan na Levitico kapitulo 19 tapenu meyaplika yaw nga tabarang: “Mappakasanto kamu paray ta ngamin nga kuan nu”? (1 Ped. 1:15)

Nebase yatun nga teksto ta Levitico 19:2. Aru nga prinsipio ta kapitulo 19 i makoffun tapenu meyaplika tam i 1 Pedro 1:15.​—w21.12, p. 3-4.