Pinagaram ni Jehova i Israelita ira nga mappakasanto. Tapenu moffunan ira nga makua yatun, kinagi na ta nira: “Ariammu mallelevu ta ilim tapenu mangiwara tu pamara-parake ta tanakuan. Ariammu tumaddag kontra ta inango na kasittolem. Sakan si Jehova.”​—Lev. 19:2, 16.

I uvovug ira nga “tumaddag kontra ta” ay mapia nga translation na orihinal nga Hebreo nga idiom nga neyusa tatun nga teksto. Ngem anni i kebalinan natun? Kunnaw i kagian na tadday nga libru na Judio meyannung ta Levitico: “Yaw nga parte na versikulo ay . . . mariga nga ipakanawag megafu ta mariga nga siertowan nu anni i kebalinan na Hebreo nga idiom [nga mabibbig tatun], nga literal nga kayà na kagian ay ‘ari tumaddag tapenu innan, ari tumaddag ta biko, ari tumaddag ta aranni.’”

Ikonekta na karuan nga iskolar yatun ira nga uvovug ta versikulo nige natun nga kabibbigan tu kunnaw: “Mawag tu patas i pangukum nu. Ariammu mangipasingan tu pangireruma ta pobre onu mangipasingan tu paffabor ta mariku. Gukaban na hustisia ay ukumammu nakuan i kasittolem.” (Lev. 19:15) Nu yatun i pabbaseyattam, i kebalinan gafu na dob ta versikulo 16 nga ariammu “tumaddag kontra ta” kasittolem ay patas nakuan i pattratu na Israelita ta kasittoleda ta kaso ira ta korte, ta pannegosio, anna ta familia. Ari nakuan ira nga malladdug para ta pammakapianadda. Mawag tu tuttulattam danatun, ngem egga i mas lohikal nga pangalippawa ta versikulo 16.

Ta ollu nga parte natun nga versikulo, zinog na Dios i totolena nga ariadda nga mallelevu tapenu mangiwara tu pamara-parake. Ari laman tu basta chismis i pamara-parake. Makadaral i chismis, ngem mas grabe i efekto na pamara-parake. (Prov. 10:19; Ecl. 10:12-14; 1 Tim. 5:11-15; Sant. 3:6) Sadyaan na tadday nga mamara-parake nga makkagi tu gannug ira nga makadaral ta reputasion na tanakuan. Awayya na tu mattestigu yayya tu falsu maski paga mappeligro i inango na para-paraketan na. Kunnatun i nesimmu kani Nabot. Nabara-barag yayya maski awan mabba tu liwa na megafu ta lallaki nga nattestigu tu falsu kontra ta nisa. (1 Pat. 21:8-13) Wan, awayya na gafu nga tumaddag i mamara-parake kontra ta inango na kasittolena gitta na nakagi ta Levitico 19:16.

Awayya na gapa nga para-paraketan na tadday nga tolay i tanakuan megafu ta pangikalussaw na tatun. Nakagi ta 1 Juan 3:15: “I sinni laman nga mangikabatù ta wagi na ay minammapatay, ay ammu nu tu i minammapatay ay awan sa i inango nga adde ta ngangangay.” Kabalin gapa nga kagian na Dios i uvovug ira nga mabibbig ta versikulo 16, kinagi na paga: “Ariammu nga ikalussaw i wagim ta futum.”​—Lev. 19:17.

Maski gafu nu gitta na ari nga negagangay i dob ta Levitico 19:16, serioso nga tabarang yatun. Ibita tam i marake nga appana-panono anna ariattam vuluvuga paraketan i tanakuan. Nu para-paraketattam i tanakuan megafu ta manaki tam ira onu mappassil ittam ta nira, makagi nga ‘tumaddag ittam kontra ta’ nira. Awayya na tu ipasingan gapa natun nga ikalussaw tam ira. Ibita gafu nakuan na Cristiano ira nga ikalussaw i tanakuan.​—Mat. 12:36, 37.