1, 2. (a) Anni i kinagi ni Jehova nga mesimmu ta kaggawattam? (b) Anni ira nga pakkiavu i mattabag taw nga artikulo? (Innan i letratu ta gafu na artikulo.)

KINAGI ni Jehova meyannung ta tiempo tam: “Tatun nga agga-aggaw, mafulu nga lallaki nga naggafu ta ngamin nga lengguahe na nasa-nasion i maggafù, wan gafutadda tu mapia i sinnun na tadday nga Judio anna kagiadda: ‘Kayàmi i mevulu nikamu, ta naginnami nga i Dios ay egga nikamu nga totolay.’ ” (Zac. 8:23) Kagitta na simboliko nga mafulu nga lallaki, ‘nakagafù tu mapia ta sinnun na tadday nga Judio’ danuri magiddanama nga mattolay ta davvun. Magayaya ira nga makikavulu ta nazelugan onu nadenuan nga “totolay na Dios.”​—Gal. 6:16.

² Kagitta na kingngua ni Zacarias, nipasingan ni Jesus i makapabannay nga pattaradday na totolay na Dios. Kinagina nga egga dua nga grupo na aripanna, “baddi nga ammung” anna “tanakuan nga karneru” ngem kinagina gapa nga mabbalin ira tu “tattadday nga ammung” nga tangngawan na “tattadday nga mappastor.” (Luc. 12:32, NW; Juan 10:16, NW) Ngem egga ira i pakkiavu meyannung ta relasionna yatun nga dua nga grupo: (1) Mawag kari nga mammuan na tanakuan ira nga karneru i ngaga-ngagan na ngamin nga nazelugan? (2) Kunnasi nakuan  i pagimamma na nazelugan ira ta baggida? (3) Kunnasi nakuan i pattratum ta kakongregasiommu nga namegafu makiparte ta emblema ta Memorial? (4) Pakavurungammu kari nu umara-aru i bilang na makiparte? Ammuattam i tabbag taw ira nga pakkiavu.

3. Ngatta imposible nga masiguradu tam nu sinni i mabbalin tu parte na 144,000?

³ Mawag kari tu mammuan na tanakuan ira nga karneru i ngaga-ngagan na nazelugan ira? Ari. Ngatta? Megafu ta maski nu nagalan ta langi i tadday, imbitasion paga laman yatun, ari nga pinal nga konfirmasion na bala-balona. Yatutta mamalattuag si Satanas tu “appe-profeta ira . . . tapenu ilogo da nu awayya na maski i totolay nga pinili na Dios.” (Mat. 24:24) Awan tu makannammu nu malawa gabbalaman na tadday nga nazelugan i nelangitan nga bala-balona adde ta ikagi ni Jehova nga mepangngo yaya ta kunnatun nga bala-balo. Si Jehova i mangiyawa sa tu pinal nga kaselio, awayyana nga nigena matay nga matalo onu nige nga mamegafu i “nepallo nga kadara-darum.” (Nep. 2:10; 7:3, 14) Yari ta awan tu kuentana nga siguraduan na maski sinni nga matolay ta davvun ta maddaggun nu sinni ta aripan ira na Dios i mabbalin tu parte noka na 144,000. ^[1]

4. Nu imposible nga mammuan i ngagan na ngamin nga nazelugan taw ta davvun, kunnasi tam gafu “mevulu” nira?

⁴ Nu imposible nga mammuan i ngagan na ngamin nga nazelugan taw ta davvun, kunnasi gafu nga “mevulu” nira i tanakuan nga karneru? Kinagi na profesiya ta Zacarias meyannung ta simboliko nga mafulu nga lallaki: “Gafutadda tu mapia i sinnun na tadday nga Judio, anna kagiadda: ‘Kayàmi i mevulu nikamu, ta naginnami nga i Dios ay egga nikamu nga totolay.’ ” Maski nu tadday nga Judio laman i nekagi taw, sifutattam nga parehu nga neyusa i termino nga “nikamu” anna “nikamu nga totolay,” nga tumukoy ta ari laman nga tattadday nga tolay​—nu ari, grupo. Kayana gafu kagian nga grupo na totolay i espiritual nga Judio. Yari tu ari ngana mawag nga mammuattam i ngagan na kada espiritual nga Judio tapenu mevulu sa. Mawag lallagu tu imammatattam ira bilang grupo tapus suportattam ira. Ari vuluvuga ipagaram na Biblia nga tuttulattam i tadday nga tolay. Si Jesus laman i lider tam.​—Mat. 23:10.

5. Anni nga tabarang i mawag nga nonopan tu mapia na nazelugan ira, anna ngatta?

⁵ Mawag tu nonopan tu mapia danuri makiparte ta emblema ta Memorial i tabarang ta 1 Corinto 11:27-29. (Bibbigan.) Anni i punto nga palawanan ni Pablo? Ari nga mepangngo nga makiparte i nazelugan nu ari na pinattalupaddian nga makasta i relasionna kani Jehova. (Heb. 6:4-6; 10:26-29) Makoffun yatun nga tabarang ta nazelugan ira nga meparaddam nira nga ariadda paga nalawa i bala-baloda. Mawag gafu nga ‘kagumanad-da i makkarela adde ta pantay tapenu alawatad-da i premio, nga yaw i bagu nga attolay nga pagagalan na Dios gafu kani Cristo Jesus.’​—Fil. 3:13-16.

6. Kunnasi nakuan i pagimamma na nazelugan ira ta baggida?

⁶ Nainspiran si Pablo nga makkagi ta nazelugan ira nga “mattolay ta kunna mepangngo ta nagagalan na Dios [nira].” Kunnasi yatun? Kinagi ni Pablo: ‘Kana-kanayun ira nakuan nga mappakalinno, mappakasippo, anna mappasensia. Ipasingadda i  pakka-aya-aya ta pakkapasa-pasensia ta kataggi-tadday nira. Kuadda ngamin yatun adde na awayyada ngem mamannanayun ta pia na pattaraddeda.’ (Efe. 4:1-3) Ipagaram na espiritu ni Jehova i pappakalinno, ari tu pappakatannang. (Col. 3:12) Megafu ta mapakalinno ira, ari nga nonopan na nazelugan ira nga mas aru i masanto nga espirituda anne ta neravvunan i iddanamada. Ariadda nonopan nga mas aru i ammuda ta Biblia onu mas atannang ira ta tanakuan. Ari da vuluvuga makkagi nga nazelugan gapa i tanakuan anna imbitan nga makiparte, ngem sigga-pakalinno nakuan nga akseptadda nga si Jehova laman i magagal nu sinni i nazelugan.

7, 8. Anni i ari nga ekspektan na nazelugan ira, anna ngatta?

⁷ Kurug nga makapabbaw i pribilehio nga magalan ta langi, ngem ari ekspektan na nazelugan ira nga dayawan ira na tanakuan. (Efe. 1:18, 19; bibbigan i Filipos 2:2, 3.) I espiritu ni Jehova i personal nga namakurug nira. Ari nga mepakannammu ta interu mundo yatun. Yari tu ari da nga makaddag nu ari insigida nga mangurug i tanakuan, nga nazelugan ira na masanto nga espiritu. Kakuruganna, mantindiadda nga nitabarang na Biblia i ari babbasta nga pangurug ta makkakkagi nga egga espesial nga pagagal na Dios sa. (Nep. 2:2) Ariadda usan nga pangiyammammu tu baggida ta tanakuan i pabbalidda tu nazelugan. Ariadda ikagi ta tanakuan i personal nga naekspiriensada turi ta natullo ira tapenu malillitadda nga medayaw ira; onu iparayag i bala-baloda ta mappange.​—1 Cor. 1:28, 29; bibbigan i 1 Corinto 4:6-8.

⁸ Ari paga nga imammatan na nazelugan ira nga kasali ira ta espesial nga grupo. Ariadda ala-alegan i kagittada nga nazelugan tapenu mabbuu tu grupo tapus gigiammuan i Biblia. (Gal. 1:15-17) Mangigafu yatun tu passirina ta kongregasion anna mekontra yatun ta ipoppollu na masanto nga espiritu nga imammo anna pattaradday.​—Bibbigan i Roma 16:17, 18.

9. Ngatta magimmugug tam ta pattratu ta kuman tu tinapay anna minum tu binarayang ta Memorial? (Innan i kahon nga “ I Aya ay ‘Ari Tu Pamabbastus.’”)

⁹ Kunnasi nakuan i pattratum ta tadday nga makiparte ta emblema ta Memorial? Kinagi ni Jesus ta disipulosna: “Mawwaragi kamu ngamin. . . . I sinni laman nga mappakatannang ay meyalinno, anna i mappakalinno ay yaya i meyatannang.” (Mat. 23:8-12) Yari tu ari nga makasta nga iyatannang i tadday maski nu nazelugan yaya nga wagi ni Cristo. Meyannung ta Cristiano ira nga elder, ipagaram nittam na Biblia nga parigan i pangurug da bilang mangirollu, ngem ari vuluvuga nidob nittam nga iyatannang i maski sinni nga tolay bilang lider tam. (Heb. 13:7) Fustu i kagian na Biblia nga i karuan ay “mepangngo tu madoble i taddad-da.” Ngem, doble i taddan onu dayoda megafu ta “mapia i panangngalda” anna “mabbanna-bannag ira nga mallayyagayya anna mattuddu,” ari nga megafu ta nazelugan ira. (1 Tim. 5:17) Yatutta, makepasiran ta nazelugan ira nu meddan ira tu ari mepangngo nga dayaw onu atension. I marake paga, marigatan ira nga mappakalinno nu espesial i pattratu nira. (Roma 12:3) Awan nittam tu mayà magangngua tu maski anni nga kesiddukallan na wawwaragi ni Cristo!​—Luc. 17:2.

10. Kunnasi tam mepasingan i respeto ta nazelugan ira?

¹⁰ Kunnasi tam mepasingan i mepangngo nga respeto ta zinelugan ni Jehova? Ari  tam makkiavu tu personal nu kunnasi ira nga nazelugan. Ibita tam gafu i maki-alam. (1 Tes. 4:11; 2 Tes. 3:11) Ariattam ekspektan nga nazelugan gapa i maganà, atawa, onu tanakuan paga ta familiada megafu ta nazelugan ira. Ari nga marensia yatun anna awan tu koneksionna ta pagatawada. (1 Tes. 2:12) Lillitattam i makkiavu ta attawa na nazelugan ira nu anni i matagenoda ta pattolay ta paraiso nga davvun nga ari da kavulu i atawada. Imbes nga makkiavu tam tu makataki nira, mattalo tam lallagu kani Jehova nga iyawana i ngamin nga makapagayaya nittam.​—Sal. 145:16.

11. Kunnasi tam maprotektan i baggi tam nu lillitattam i sobra nga paddayaw ta totolay?

¹¹ Danuri mepangngo i pattratuna ta nazelugan ira, ay maprotektadda i baggida ta makelogo nga peligro. Kagian na Biblia nittam nga awayyana nga makatallung ta kongregasion i appappe nga wawwaragi. (Gal. 2:4, 5; 1 Juan 2:19) Yatun ira nga impostor, iyammammuda paga i baggida nga nazelugan. Awayyana gapa nga ari mattalupaddian nga matalo i karuan nga nazelugan. (Mat. 25:10-12; 2 Ped. 2:20, 21) Nu lillitattam i sobra nga paddayaw ta totolay, ariattam meyarayyu ta kinakurug na kunnatun nga totolay; onu matay i pangurug tam nu egga prominente onu nabayag ngana nga Cristiano nga nalsa ta kongregasion.​—Jud. 16.

12, 13. Ngatta ariammu nakuan mavurung ta umara-aru nga bilang na kuman tu tinapay anna minum tu binarayang ta Memorial?

¹² Ta nappasa nga piga nga dagun, umara-aru i bilang na makiparte ta Memorial. Ari nga kagitta turi ta nappasa nga piga dekada nga nabbaddi i bilang na makipapparte. Ngem ari tam pakavurungan yatun. Ngatta?

¹³ “Ammu na Dios nu sinni i totolay na ira.” (2 Tim. 2:19) Ari nga ammu na wawwaragi nga mabbilang ta makiparte ira ta Memorial, nu sinni talaga i nazelugan. Kasali ta bilang danuri magabbo nga nazelugan ira. Nagimmang ngana gapa i karuan nga dati nga makiparte. I karuan gapa ay egga diferensiana ta nono onu problema ta emosion kagitta na depresion, yari tu mangurug ira nga makipammaguray ira kani Cristo ta langi. Yatutta, ariattam gafu ammu i eksakto nga bilang na nazelugan nga nabattang paga taw ta davvun.

14. Anni i kagian na Biblia meyannung ta bilang na nazelugan nga nabattang paga taw ta davvun sonu mamegafu i dakal nga ziga?

 ¹⁴ Egga ta nadduruma nga parte na mundo i nazelugan ira sonu duttal si Jesus tapenu apanna ira ta langi. Tatun nga tiempo, kagian na Biblia meyannung kani Jesus: “Magguni noka tu masikan i dakal nga trumpeta, ay doban na i anghel na ira ta appa nga dugu na davvun tapenu ammungad-da ngamin i totolay nga pinili na Dios ta ngamin nga parte na davvun.” (Mat. 24:31) Kagian na Biblia nga baddi ngana laman i mabattang ta davvun ta nazelugan ira ta pangurianan nga aggaw. (Nep. 12:17) Ngem ari nga espesiko nga kagian na Biblia i biladda sonu mamegafu i dakal nga ziga.

15, 16. Anni i mawag nga mantindiattam meyannung ta pappili ni Jehova nga mabbalin tu parte na 144,000?

¹⁵ Si Jehova i maddesision nu sonu anni yaya mappili tu nazelugan. (Roma 8:28-30) Namegafu i pappili ni Jehova tu nazelugan kabalin na paginnolay ni Jesus. Posible nga nazelugan i ngamin nga Cristiano ta ollu-siglo nga kongregasion. Mamegafu ta ollu-siglo adde ta pamegafu na pangurianan nga aggaw, magaru ta nakkagi nga taga-tuttul ira ni Cristo ay falso nga Cristiano; nigitta ira ni Jesus ta “kaddo.” Ngem tulu-tuloy lagapa nga nanullo si Jehova ta matalo ira tatun nga tiempo. Ira i “trigu” ta ilustrasion ni Jesus. (Mat. 13:24-30) Taw ta pangurianan nga aggaw, tulu-tuloy i pappili ni Jehova nu sinni i kasali ta 144,000. ^[2] Nu naddesision yaya nga mappili nige na panuppalan nu sinni i mepangngo tatun nga pribilehio, sinni ittam tapenu kuestionan i desisionna? (Isa. 45:9; Dan. 4:35; bibbigan i Roma 9:11, 16.) ^[3] Mawag tu ari tam parigan i minarreklamo nga trabahador nga aru i kakkagiadda ta makakkua ta koman meyannung ta pinanaddanna ta trabahador nga tangoras laman nattrabahu.​—Bibbigan i Mateo 20:8-15.

¹⁶ Ari tu ngamin nga nelangitan i iddanamada ay parte na “matalo anna memmugug nga aripan.” (Mat. 24:​45-47, NW) Kagittana ta ollu-siglo, pakanan ni Jehova anni Jesus i magaru gukaban na pilippiga laman. Piga laman ta nazelugan ira ta ollu-siglo i neyusa tapenu itura i Cristiano nga Griego nga Katurakan. Kunnatun gapa ta kaggawattam, pilippiga laman ta nazelugan ira i napili nga mangiyawa tu “makan ta mepangngo nga tiempo.”

17. Anni i nagigiammum taw nga artikulo?

¹⁷ Anni i nagigiammu tam taw nga artikulo? Ginakkag ni Jehova nga mangiyawa tu dua nga makkaduma nga bala-balo​—pattolay ta langi para ta espiritual ira nga Judio anna pattolay ta davvun para ta simboliko nga mafulu nga lallaki. Ngem parehu nga ikikkiddona nga mabbalin ira tu matalo anna tuttuladda i tadday laman nga estandarte​—nagalan man ira ta langi onu ta davvun i iddanamada. Parehu ira nga mawag tu mapakalinno. Mawag nga egga pattaraddeda. Mawag nga parehu nga ipoppolluda i imammo ta kongregasion. Durante nga umara-aranni i panuppalan, paray nakuan tu determinado tam ngamin nga masserbi bilang tadday nga ammung gukaban ni Cristo.