1. Maski nu si Jehova i Katannangan, anni i imbitasionna ta tanakuan?

SI JEHOVA i Katannangan, i Namaratu ta ngamin nga gannug, anna awan tu adde na sirib anna pakapangnguana. Nalippawa ni Job yatun. Kabalin nga niyavu ni Jehova kani Job i meyannung ta ngamin nga pinaratuna, simibbag si Job: “Ammù tu makuam i ngamin nga gannug anna awan tu agga-nonomu nga imposible para nikaw.” (Job 42:2) Makua ni Jehova i anni laman nga ginakkagna maski awan tu uffun na tanakuan, ngem nipasinganna i ayana gukaban na pangimbitana ta tanakuan nga makkipattrabahu sa.

2. Anni i importante nga nipatrabahu ni Jehova kani Jesus?

² Pinaratu na Dios i tattaday nga Anàna, si Jesus nige na ngamin nga gannug. Nipamavulun ni Jehova nga makipattrabahu sa i Anàna ta pamaratu ta ngamin paga nga tanakuan nga gannug. (Juan 1:1-3, 18) Nitura ni Pablo meyannung kani Jesus: “Gafu sa, naparo ngamin i ganna-gannug nga egga ta langi tuange ta utun na davvun; ngamin nga masingan anna ari masingan, tuange ta makapangngua ira nga espiritu, ngamin nga pakiyafuan,  mammaguray ira, anna ngamin nga pakawayya. Gafu sa anna megafu sa gabbalaman, naparo i interu mundo.” (Col. 1:15-17) Zinayaw gafu ni Jehova i Anàna gukaban na pangivuluna sa ta pamaratu anna pangilammuyagna meyannung ta importante nga papel na Anàna.

3. Anni i nipatrabahu ni Jehova kani Adan anna ngatta?

³ Kayà gapa ni Jehova nga makipattrabahu sa i totolay. Angngariganna, nibilinna kani Adan nga ngaganan i aya-ayam. (Gen. 2:19, 20) Siguradu nga nagayaya si Adan nga inobserba anna ginigiammu i itsura, kabalinna ninonona nu anni i mepangngo tu ngagan na kada tadday nga ayam! Awayyana nakuan nga si Jehova mismu i mangiyawa tu ngagadda megafu ta yaya i namaratu nira. Ngem, nagayaya yaya nga nipatrabahu yatun kani Adan. Niyawana gapa kani Adan i oportunidad nga pabbalinan tu Paraiso i interu davvun. (Gen. 1:​27, 28) Makaparaddam ta pinili ni Adan nga ari makipattrabahu ta Dios nga narresulta tu pazziga-riga sa anna ta ngamin nga gakana.​—Gen. 3:17-19, 23.

4. Kunnasi nga nakipattrabahu kani Jehova i tanakuan nga totolay tapenu metuppal i gakkagna?

⁴ Nakipattrabahu si Jehova ta tanakuan paga nga totolay tapenu ituppal i gakkagna. Namadday si Noe tu arka nga namaliag sa tuange ta familiana ta Delubio. Nilawan ni Moises i nasion na Israel ta Ehipto. Nirollu ni Josue i Israelita ira mappange ta Nepromesa nga Davvun. Namataddag tu templo si Solomon ta Jerusalem. Nabbalin tu yena si Maria kani Jesus. Nakipattrabahu kani Jehova ngamin yaw ira anna i aru paga nga matalo nga aripan tapenu metuppal i urena.

5. Anni nga trabahu i awayya tam nga kuan, anna mawag kari ni Jehova i uffuttam? (Innan i letratu ta gafu na artikulo.)

⁵ Ta kaggawattam, kayà ni Jehova nga makipattrabahu tam sa gukaban na passuporta ta Mesianiko nga Pappatulan. Aru i awayya tam nga kuan nga passerbi. I karuan tatun ay ari tu posible ta ngamin nga Cristiano, ngem awayya tam ngamin nga ilayyagayya i mapia nga dumug na Pappatulan. Kakuruganna, ari nga mawag ni Jehova i uffuttam taw nga trabahu. Awayyana nakuan tu direkta nga makiyuvovug ta totolay. Kinagi ni Jesus nga awayya paga nga doban ni Jehova i batu nga mangilayyagayya ta Patul na Pappatulanna. (Luc. 19:37-40) Ngem pinamavulunan ittam ni Jehova nga makipattrabahu sa. (1 Cor. 3:9) Nitura ni Pablo: “Kunna makkaravvulu gafu nga makipattrabahu ta Dios, ipakimemallo ku nikamu tu arian nu nga kuan tu awan tu kebalinan na inalawa nu nga allo na Dios.” (2 Cor. 6:1) Mamagayaya anna makedayaw nittam i pakipattrabahu ta Dios. Gigiammuattam nu ngatta.

6. Anni i kinagi na kaka nga Ana na Dios ta pakipattrabahu ta Yamana?

⁶ Nagayaya i aripan ira ni Jehova gari ta pakipattrabahu sa. Kinagi na kaka nga espiritu nga Anàna: “Kingnguanà ni Jehova bilang pamegafuanan na dalanna . . . Egga ngà ta bikona bilang malalaki nga trabahador. Sakan i paggafuan na pagayayana kada aggaw; Magaya-ayaya ngà ta arubanna ta ngamin nga tiempo.” (Prov. 8:22, 30) Magayaya nga nattrabahu si Jesus kavulu i Yamana, megafu ta kikkingnguana anna ta pakannammu nga kakayà yaya ni Jehova. Kunnasi gafu gapa nittam?

7. Ngatta mamagayaya nittam i pallayyagayya?

⁷ Kinagi ni Jesus nga mas dakal i pagayaya ta pangiyawa anne ta pangalawa. (King. 20:35) Nagayaya tam ta nalawa tam i kinakurug, anna magayaya tam nga ipakannammu  yatun ta tanakuan. Durante nga ipakannammu tam gapa yatun nga kinakurug ta tanakuan, masingattam i ayaya danuri mamegafu nga makalippawa anna mangappresia ta Dios anna ta nabalor nga kinakurug nga egga ta Biblia. Matukkal i futu tam nga masingan ira nga ulu-ulian, ari laman i appana-panonoda, ngem maski paga i pattoleda. Malippawa tam nga kuruga importante i pangilammuyag ta mapia nga dumug. Nangivuka yatun tu oportunidad nga mattolay adde noka danuri makipammapia ta Dios. (2 Cor. 5:20) Egga kari paga i mas makapagayaya anna mas makakontento nga trabahu anne ta panguffun ta totolay nga mapeggan tu oportunidad nga mattolay adde noka?

8. Anni i kinagi na karuan meyannung ta pakipattrabahu kani Jehova?

⁸ Ari tam laman nga magayaya megafu ta noffunattam i tanakuan nga mammuan si Jehova, nu ari, megafu ta appresian anna magayaya yaya ta appursigi tam nga masserbi sa. (Bibbigan 1 Corinto 15:58.) Naobserba ni Marco nga taga-Italya: “Kuruga magayaya ngà ta ammù nga iyayawa ku i kapianan kani Jehova anna arianna vuluvuga kattamman yatun.” Kunni Franco gapa: “Gukaban na Uvovugna anna espiritual ira nga probisionna, inaggaw nga iperaddam nittam ni Jehova nga ayatanna ittam anna importante para sa i ngamin nga kukukuattam, maski nu gittana balabaddi laman yatun. Yatutta makapagayaya niakan i pakipattrabahu ta Dios anna egga gakkag na pattolè.”

9. Anni klasena nga pavvulu i egga kani Jesus anna kani Jehova, anna ngatta?

⁹ Durante nga makipattrabahu tam ta ideddukattam, maddukko tam nira. Mammuattam i personalidad anna i ugu-ugalida. Ari tam laman mammuan nu anni i kayàda nga kuan ngem maski paga nu kunnasida nga kuan yatun. Binillion nga dagun nga nakipattrabahu si Jesus kani Jehova yari tu kuruga maladda i aya anna pavvuluda. Kinagi ni Jesus meyannung ta madukko nga relasiodda: “Sakan anna i Yama ay tattadday.” (Juan 10:30) Nagayaya anna egga kooperasiodda ta pakipattrabahu ta kattagi-tadday.

10. Ngatta i pallayyagayya ay mamaddukko nittam kani Jehova anna ta tanakuan?

¹⁰ Nikiddaw ni Jesus kani Jehova nga tangngallanna i disipulosna. Ngatta? Nipakimallona: “Tapenu mapakatadday ira ta kunne nitta nga tattadday.” (Juan 17:11) Durante nga mallayyagayya anna mattoletam mekunnay ta estandarte na Dios, malippawa tam i makasta ira nga kualidadna. Mammuattam nu ngatta masirib i pattalo sa anna i panuttul ta direksionna. Durante nga umaranni tam ta Dios, umaranni gapa yaya nittam. (Bibbigan i Santiago 4:8.) Maddukko tam gapa ta kapangngurug tam ira megafu ta mepa-arubattam ta parehu nga problema, anna parehu i gakkag tam anna i  paggafuan na pagayaya tam. Wan, makkaravulu tam nga mattrabahu, makkaravulu tam gapa nga magayaya, anna makkaravulu tam nga magattam. Kinagi ni Octavia nga taga-Britania: “Nakoffun i pakipattrabahù kani Jehova tapenu mas maddukko ngà ta tanakuan megafu ta nebase i pakkorofummi ta parehu nga gakkag.” Ari kari tu maddukko ka gapa ta tanakuan nu masingammu i appursigida nga mapagayaya si Jehova?

11. Ngatta mas maddukko paga i totolay ta kataggi-tadday anna kani Jehova ta napabagu nga mundo?

¹¹ Awayyana nga maladda ngana i relasiottam kani Jehova anna ta kasittoletam, ngem mas malladda paga yatun ta matunung nga napabagu nga mundo. Nonopammu i trabahu ta mappange! Dafunattam danuri mapaginnolay anna tudduattam ira meyannung kani Jehova. Mapabbalin tu paraiso i davvun. Dakal nga trabahu yaw, ngem makapagayaya nga makka-uffu-uffun tatun, anna sesenu nga mabbalittam tu perfekto nga sakup na Mesianiko nga Pappatulan! Mas maddukko i ngamin nga totolay ta kataggi-tadday anna kani Jehova​—i mangiyawa ta ngamin nga makapagayaya nira.​—Sal. 145:16.

12. Kunnasi nga proteksion nittam i pallayyagayya?

¹² Mawag tu immugurattam i relasiottam kani Jehova. Megafu ta imperfekto anna mattoletam ta mundo nga pammagurayan ni Satanas nga Diablo, mabi tam laman nga mainfluwensian na appana-panono anna kukukuan na mundo. Kagitta yatun na pattanniaw onu pattafug nga kontran i agi na bannag. Tapenu ari ka nga meyanug, mawag tu kontrammu i agi gukaban na pattanniaw. Kunnatun gapa i mawag tam kuan tapenu ari tam mainfluwensian na mundo si Satanas. Nu mallayyagayya tam, nakafokus tam ta importante anna pakabenefisiowan nga espiritual nga ganna-gannug, ari tu ta appana-panono nga makadaral ta pangurug tam. (Fil. 4:8) Paladdan na pallayyagayya i pangurug tam, anna iperaddamna nittam i promesa ira na Dios anna meddu nga estandartena. Makoffun paga yatun tapenu kanayun nga agga-yosa tam i espiritual nga armas tam.​—Bibbigan i Efeso 6:14-17.

13. Anni i kinagi na wagi nga taga-Australia meyannung ta pallayyagayya?

¹³ Megafu ta okupadu tam ta pallayyagayya anna ta tanakuan paga nga espiritual nga aktibidad, awan ngana tu tiempo nga nonopan paga i problema tam, yari tu proteksion nittam yatun. Kinagi ni Joel nga taga-Australia: “Nakoffun niakan i pallayyagayya tapenu masingakku i realidad. Yatun i mangiperaddam niakan ta problema ira na totolay anna nu kunnasi ngà nabenefisiowan ta pangiyaplika ta prinsipio ira na Biblia. Noffunannà paga nga kanayun nga mappakalinno anna kanayun nga maddepende kani Jehova anna ta wawwaragi.”

14. Ngatta ipasingan na appursigi tam ta pallayyagayya nga u-uffunan ittam na espiritu na Dios?

¹⁴ Pasikannan paga na pallayyagayya i pangurug tam nga u-uffunan ittam na espiritu na Dios. Angngariganna: Nonopammu nga i trabahum ay mangitaneg tu masustansia nga tinapay ta baranggay. Awan tu sueldum tatun. Tapus, nannammuammu nga aru i mammanaki tatun nga tinapay anna kalussaw naka na karuan megafu tatun. Mabbayag ka tamma tatun nga trabahu? Megafu ta nadismaya ka ta negatibo nga reaksion na totolay, awayyana nga iyemmammu ngana yatun nga trabahu. Kunnatun gapa ta pallayyagayya. Aru nittam i nappursigi ta pallayyagayya ta pappasa  na daga-ragun. Maski nu uyu-uyawan anna igala-galo na totolay i pallayyagayya tam, aru nga kuartu anna tiempo i nisakrifisio tam. Ari kari tu ebidensia yatun nga u-uffunan ittam na espiritu na Dios?

15. Anni i koneksion na pallayyagayya, ta gakkag ni Jehova ta totolay?

¹⁵ Nonopammu i koneksion na pallayyagayya tu mapia nga dumug ta meddu nga gakkag ni Jehova ta totolay. Ginakkagna nga maddian i totolay ta davvun, nga ariadda matay; maski nu nakaliwa si Adan, ari nga nanguli yatun nga gakkagna. (Isa. 55:11) Ngem, ne-unnugna lallagu nga mapaliag i totolay ta sentensia na liwa anna patay. Mekunnay tatun nga gakkagna, nakkazza si Jesus ta davvun anna nisakrifisio i baggina para ta matalo nga totolay. Ngem tapenu mabbalin ira tu matalo, mawag nga malippawada i ikiddaw ni Jehova nira. Yari tu sinudduan ni Jesus i totolay ta ikikkidaw na Dios nira anna nibilinna ta disipulosna nga kunnatun gapa kuadda. Gukaban na panguffun ta totolay nga makipammapia ta Dios, direkta tam nga makipattrabahu ta gakkagna nga ipaliag i totolay ta liwa anna patay.

16. Anni i koneksion na pallayyagayya tam ta pinaka-importante ta ngamin nga dorob?

¹⁶ Nu uffunattam i tanakuan nga mappange ta dalan na mannanayun nga inango, mepasingattam i aya tam ta kasittolay anna kani Jehova, “ta ikaya na tu mapaliag ngamin nga tolay anna kannammuad-da i kurug.” (1 Tim. 2:4) Turi ta niyavuda kani Jesus nu anni i pinaka-importante ta ngamin nga dorob, nitabbagna: “ ‘Ayatam-mu i Yafu nga Dios-mu ta interu futum, interu nga ikararuam anna ta interu nga nono mu. Yaw i ollu anna kuruga importante ta ngamin nga dorob. I mekadua ay kagitta gabbalaman na ollu: ‘Ayatam-mu i ikattolem ta kunna pangaya mu ta baggim.’ ” (Mat. 22:37-39) Gukaban na pallayyagayya, mepasingattam i pattuppal taw nga dorob.​—Bibbigan i Kingngua 10:42.

17. Anni i makagim ta pribilehio nga mangilayyagayya ta mapia nga dumug?

¹⁷ Talaga nga nabebbendisionattam! Iniddan ittam ni Jehova tu trabahu nga mamagayaya nittam, mamaddukko nittam sa anna ta tanakuan, anna masserbi nga espiritual nga proteksiottam. Mepasingattam paga i aya sa anna ta kasittoletam megafu tatun nga trabahu. Nadduruma i paddia-paddian na kada aripan na Dios ta interu davvun​—abbing onu manakam, riku onu pobre, makafi onu masikan​—minillion i magala-aleg tu oportunidad tapenu mekagida i pangurugda ta tanakuan. Posible nga umanugu ka kani Chantel nga taga-France. Kinagina: “I pinaka-makapangngua nga Persona ta interu uniberso, i Namaratu ta ngamin nga gannug, i magayaya nga Dios, kinagina niakan: ‘Umeka! Maguvovug ka! Maguvovug ka nga napafutuan para niakan. Iyawaku nikaw i sikakku, i Uvovugku nga Biblia, i nelangitan nga suporta, neravvunan nga kakavulu, progresibo nga passanay, anna espesipiko ira nga instruksion ta mepangngo nga tiempo.’ Daka-dakal nga pribilehio i pagangngua ta ipakua ni Jehova nittam anna makipattrabahu sa!”