1-3. Ngatta espesial nga aggaw i Pentecostes, anna kunnasina yatun nituppal i neprofesiya? (Innan i letratu ta gafu na artikulo.)

MAGAYA-AYAYA i totolay ta Jerusalem, alas nuebe ta umma na Liggu. Espesial yatun nga Liggu megafu ta egga fiesta; aggaw gapa yatun na pagibannag. Siguradu nga netavvung ngana i gagangay nga sakrifisio ta templo, neerulay ta pangitavvung na atannang nga pari ta sakrifisio nga meweweg nga dua tu nalebaduran nga pan. (Lev. 23:15-20) Yaw nga pangitavvung i pamegafuanan na paggapas tu trigu. Aggaw yatun na Pentecostes 33 C.E.

² Durante nga mesissimmu yatun ta templo, egga mas importante nga aranni ngana mesimmu, ari tu ta templo, ngem ta kuarto ta utun na siudad. Naggarammammung i 120 nga Cristiano nga “kanayun nga mattaradday taw nga maddasal.” (King. 1:13-15) Mappapange nga mesimmu nira i egga koneksionna ta kukukuan na atannang nga pari kada Pentecostes, anna  ketuppalan gapa yatun na profesiya ni profeta Joel 800 dagun ngana i nappasa. (Joel 2:28-32; King. 2:16-21) Anni i mesimmu nga kuruga importante?

³ Bibbigan i Kingngua 2:2-4. Niyaluvu onu nivuvvu na Dios i masanto nga espirituna ta 120 nga Cristiano ta kuarto ta utun. (King. 1:8) Namegafu ira nga mapprofesiya, onu mamakurug meyannung ta makapabbaw nga ganna-gannug nga nasingan anna naginnada. Kabalinna, nipakanawag ni Pedro i importansiana yatun nga nesimmu ta magaru nga naggarammammung. Kunna nira: “Ay mawag tu mabbabawi i kataggi-tadday nikamu anna mappabawtiso ta ngagan ni Jesus-Cristo tapenu mapakoma kamu. Ay malawa nu i Espiritu Santo [“masanto nga espiritu,” NW] nga regalu na Dios.” Mattallu-rivu i nangurug anna nappabawtiso, anna nangalawa ta nepromesa nga masanto nga espiritu.​—King. 2:37, 38, 41.

4. (a) Ngatta interesadu tam ta nesimmu ta Pentecostes? (b) Anni paga i tanakuan nga importante nga nesimmu ta parehu nga aggaw gari? (Innan i endnote.)

⁴ Ngatta kuruga importante i Pentecostes 33 C.E. nittam? Ari nga megafu ta nesimmu ta templo ta Jerusalem. Ngem megafu ta sinuppal ni Jesu-Cristo bilang dakal nga Atannang nga Pari i pamarigan nga profesiya. ^[1] Nangitavvung i atannang nga pari tu dua nga simboliko nga pan tatun nga aggaw. Irepresenta na nalebaduran nga pan nga metavvung ta templo i nazelugan onu nadenuan nga disipulos nga inampun na Dios bilang ána. Yatun i nangivuka ta “kapianan” onu ollu nga vungu-vunga ta totolay nga makangay ta langi anna makavulu ta Pappatulan, nga mangirattal tu abundansia nga bendision ta matalo nga totolay. (Sant. 1:18; 1 Ped. 2:9) Kuruga importante nittam i nesimmu tatun nga aggaw ta langi man onu ta davvun i iddanama tam!

5. Kunnasi tam nammuan nga ari tu para-parehu i nipangalawa tu masanto nga espiritu na ngamin nga nazelugan?

⁵ Nu tadday ka tatun nga disipulos nga egga kagitta na afi ta uluda, siguradu nga ariammu makattamman yatun. Ari ka vuluvuga madduda nga sinullo naka na masanto nga espiritu, nerulay nu milagro nga maka-uvovug ka tu tanakuan nga lengguahe. (King. 2:6-12) Ngem para-parehu kari nga kappabbaw i panullo ta ngamin nga nazelugan kagitta na napollu nga grupo na 120 disipulos? Ari. I karuan nga presente ta Jerusalem tatun nga aggaw ay natullo ta tiempo na bautismoda. (King. 2:38) Awan tu kagitta na afi nga nappotun ta gi-uluadda. Ngem ari tu ngamin nga nazelugan ay natullo ta nikebawtisoda. Sinullo na masanto nga espiritu i Samaritano ira kabalin na bawtismoda. (King. 8:14-17) Ta makapabbaw gapa nga paddia-paddian, sinullo gapa na masanto nga espiritu si Cornelio anna i familiana nige paga na nikebawtisoda.​—King. 10:44-48.

6. Anni i malawa na ngamin nga nazelugan nga Cristiano, anna kunnasi nga afektanna ira yatun?

⁶ Ari gafu tu para-parehu i panullo na masanto nga espiritu. Insigida nga nammuan na karuan nga nagalan ira, ngem sesenu gapa nga natageno yatun na karuan. Ngem maski nadduruma i panullo na masanto nga espiritu, matageno na kataggi-tadday nira i kinagi ni apostol Pablo: “Gafu ta angngurug nu kani Cristo, niyawa na Dios nikamu i Espiritu Santo [“masanto nga espiritu,” NW] nga nitabba na anna yaw i marka na pakakkua na nikamu. Yaw nga espiritu i mamakurug tu alawatat-tam i nitabba na Dios.” (Efe. 1:13, 14) Kagitta na  nappollu nga paga, onu garantiya na mesimmu ta mappange yaw nga nerumu-ruma nga pangalawa tu masanto nga espiritu. Masiguradu na nazelugan nga Cristiano ta unagna nga napili yaya megafu ta senial nga nalawana.​—Bibbigan i 2 Corinto 1:21, 22; 5:5.

7. Anni i mawag nga kuan na kada nazelugan nga Cristiano tapenu malawana i nelangitan nga bala-balona?

⁷ Nu nalawa na tadday nga Cristiano yaw nga senial, garantiya ngana kari yatun nga umay yaya ta langì? Ari. Siguradu laman i nike-agalna yatun nga tolay. Ngem malawana laman talaga i bala-balona ta langi nu mattalupaddian yaya nga matalo. Nipakanawag ni Pedro: “Wawwagi ira, mattalikarag kamu gafu nga mamakurug tu napili anna nagalak-kamu. Nu kunnaw i kuan nu, ari kamu vuluvuga nga meyawawan ta angngurug nu. Ta kunnuri, meddak-kamu ta ngamin nga pakawayya nga tullung ta mannanayun nga Pammagurayan na Yafu anna Manavvu nittam nga Jesu-Cristo.” (2 Ped. 1:10, 11) Mawag gafu tu mappursigi nga mabbalin tu matalo i kada nazelugan nga Cristiano. Ta nu ari, mawawanna i nelangitan nga pagagal sa.​—Heb. 3:1; Nep. 2:10.

8, 9. (a) Ngatta mariga nga alippawatan na magaru nu kunnasi nga matullo i tadday? (b) Kunnasi nga mammuan na tadday nga nagalan yaya ta langi?

⁸ Magaru ta aripan ni Jehova i marigatan nga mangalippawa nu kunnasi nga matullo i tadday. Kurug yatun ta ariadda paga vuluvuga naekspiriensa yatun. Orihinal nga gakkag ni Jehova nga mattolay tu mannanayun i totolay ta davvun. (Gen. 1:28; Sal. 37:29) Ari nga negagangay i pappili ta tanakuan nga umay ta langi tapenu mammaguray bilang patul anna pari. Nerumu-ruma nga unnug yatun. Daka-dakal nga panguli ta panono, pagimamma, anna iddanama yaw nga pagagal para ta nazelugan.​—Bibbigan i Efeso 1:⁠18.

⁹ Ngem kunnasi nga mammuan na tadday nu nagalan yaya ta langi, nga talaga nakalawa tu espesial nga senial? Manawag i tabbag ta kinagi ni Pablo ta nazelugan nga wawwaragi ta Roma nga “pinili na [Dios] nga nabbalin ngana tu totolay na.” Ay kunna: “Pinabbalin nakamu lallagu na Espiritu tu ána na Dios. Ay megafu ta pakapangngua na Espiritu, agalat-tam i Dios tu, ‘Ama! Ama!’ Mattadday i Espiritu na Dios anna espiritu tam nga mamakurug tu ána ittam na Dios.” (Roma 1:7; 8:15, 16) Gukaban na masanto nga espiritu na Dios, manawag nga yatun nga tolay ay nagalan nga mangirensia ta unnug na Pappatulan.​—1 Tes. 2:12.

10. Anni i kaya kagian na 1 Juan 2:27 ta pakkagina nga ari mawag nga tudduan na tanakuan danuri nazelugan nga Cristiano?

¹⁰ Ari tu mawag danuri nakalawa taw nga pagagal ta Dios i tanakuan paga nga pamakurug. Ariadda kawagan nga pakurugan paga na tanakuan nga nazelugan ira. Awan vuluvuga tu nibattang ni Jehova nga padduda ta ginnonopan anna giffutuadda. Kunna kinagi ni apostol Juan taw ira nga nazelugan: “Inaluvuan nakamu ni Cristo ta Espiritu Santo [“masanto nga espiritu,” NW]; yatun tu sikamu ngamin ay ammu nu ngana i kurug.” Ay kunna paga: “Ngem sikamu ay inaluvuan ni Cristo ta Espiritu na. Mannanayun ngana yaya nga makitappaddian nikamu; yatun tu ari nga mawag tu egga i tanakuan nga manuddu nikamu, gafu ta i Espiritu i manuddu nikamu meyannung ta ngamin nga ganna-gannug. Ay kurug i ituddu na, ari tu siri. Parulattan na gafu i ituddu na Espiritu anna mannanayun kamu nga makitappaddian kani Cristo.” (1 Juan 2:20, 27) Kawagadda gapa yaw i espiritual nga instruksion kagitta na karuan.  Ngem ari da mawag nga pakurugan na tanakuan nu natullo ira. I pinaka-makapangngua nga fuersa ta interu mundo i namakurug nira.

11, 12. Anni i awayyana nga paddudan na nazelugan nga Cristiano, ngem anni i arianna vuluvuga pinaddudan?

¹¹ Nu napakurug ngana na masanto nga espiritu nga nazelugan i tadday nga Cristiano, kuruga dakal i manguli sa. Tinukoy ni Jesus yatun nga ari masingan nga proseso nga ‘keyana uli.’ ^[2] (Juan 3:3, 5) Nipakanawagna paga: “Ari ka gafu nga mappabbaw ta pakkagì nikaw tu mawag tu meyana ka uli. Ta i paddag ay maski sitaw i ikaya na nga angayan. Maginna i guni na ngem ariam-mu nga ammu i paggafuan onu pappangetan na. Kunnatun gapa i tolay nga meyana ta Espiritu.” (Juan 3:7, 8) Manawag nga mariga mantindian na ari nagalan i eksakto nga mesimmu ta nazelugan.

¹² Awayyana nga mappabbaw danuri nagalan: ‘Ngatta ta napili ngà? Ngatta sakan, ari nga tanakuan?’ Awayyana nga madduda nu mepangngo yaya ta pagagal. Ngem ari vuluvuga nga duda nga nagalan yaya. Napappannu tu ayaya anna appresasion i giffutuadda. Maekspiriensada i natageno ni Pedro turi ta kinagina: “Maraya-rayaw i Dios nga Yama na Yafu tam nga Jesu-Cristo! Ta megafu ta dakal nga inaggallallo na, neyana ittam uli gafu ta pinaginnolay na si Jesu-Cristo. Ay yaw i nangiyawa nittam ta mannanayun nga pagiddanama. Iddanamat-tam gafu tu alawatat-tam i aru nga bendision nga pappannan na Dios para ta totolay na. Danaw nga bendision ay ari nga madaral, ari nga manguli, onu mawawan gafu ta agga-pappan ira na Dios ta langi.” (1 Ped. 1:3, 4) Nu mabibbig danuri nazelugan yaw ira nga uvovug, ari da nga madduda nga ira mismu i kauvovug na nelangitan nga Yamada.

13. Kunnasi nga manguli i appana-panono na tadday nga nazelugan, anna ngatta nanguli ira?

¹³ Nige nga nalawa na natullo ira nga Cristiano i pamakurug na masanto nga espiritu, iddanamadda nga mattolay ta paraiso. Ini-innaggadda i tiempo sonu pakarenuan ni Jehova i davvun anna kayada gapa malawa i bendision ira ta mappange. Karkaragatadda nga dafunan i napaginnolay ira nga ideddukadda. Maddiadda noka ta babalay nga ira mismu i nappataddag anna kanan i mismu nga nimulada. (Isa. 65:​21-23) Ngatta pano ta nanguli i pana-panonoda? Ari nga megafu ta manakida ngana tatun nga iddanama, nadepres onu nazziga-riga ira. Ari nga megafu ta nolang ira ta davvun, nga natagenoda nga kabbannag i mattolay taw; onu kayàda laman ammuan nu kunnasi tamma i mattolay ta langi. I Dios lallagu mismu i nappili para nira. Turi ta inagalanna ira, niyusana i masanto nga espirituna nga manguli ta appana-panono anna ta karkaragatadda.

14. Anni i matageno na nazelugan ira ta pattoleda ta davvun?

¹⁴ Nonopattam kari gafu nga kaya na nazelugan ira i matay? Nainspiran si Pablo nga tabbagan yaw: “Ta kegga tam pagalaman taw nga tolda, maddagi-raging ittam megafu ta ziga-riga. Ari tu megafu ta ikaya tam nga mapawan i neravvunan nga baggi tam, ngem ikaya tam tu matalianan ta nelangitan nga baggi. Ta kunnuri, i baggi tam nga matay ay matalianan ta inango nga adde noka.” (2 Cor. 5:4) Ari nga megafu ta awan ngana tu interesda nga mattolay yari tu kayàda ngana laman i matay. Ngem kakayàda usan i pattoleda nga masserbi ta kagaggaw kani Jehova kavulu i kafamilia anna kakkofudda. Ngem, awan tu makuada nu ari daddamman i makapabbaw nga iddanamada ta mappange.​—1 Cor. 15:53; 2 Ped. 1:4; 1 Juan 3:2, 3; Nep. 20:6.

15. Anni i mangipasingan nga ari nga sinullo na masanto nga espiritu i tadday?

¹⁵ Nononopammu kari nu taddeka ta nagalan ira? Nu wan, nonopammu tu mapia yaw ira nga pakkiavu: Nerumu-ruma kari i talikaragmu ta pallayyagayya? Malappo ka kari nga maggiammu tu Biblia anna ammuan i “kononoggan nga uray na Dios”? (1 Cor. 2:10) Talaga kari nga bebbendisionan ni Jehova i ministeriom? Umafa-afi kari i pakkaragamu nga kuan i uray na Dios? Talaga matagenomu kari i responsibilidad nga uffunan ta espiritual i tanakuan? Napakurugmu kari ngana nga personal nga igiggiya ni Jehova i pattolem? Nu manawag nga wan i tabbagmu taw ira nga pakkiavu, kaya na kari kagian nga egga nelangitan nga agalmu? Ari tu kunnatun. Megafu ta ari laman nga danuri egga nelangitan nga agalda i makatageno tu kunnatun. Kunnatun gabbalaman i awayya nga makua na masanto nga espiritu ta neravvunan ira i iddanamada. Kakuruganna, nu mappakanononoka nu nagalakka onu ari, yatun mismu i mangipasingan nga ari ka nga nagalan. Ari nga madduda danuri inagalan ni Jehova nu talaga nagalan ira onu ari! Ammuda yatun!

16. Ngatta ari tu ngamin nga inuffunan na masanto nga espiritu ay magalan ta langi?

¹⁶ Ta interu nga Biblia, pakurugan na aru nga ehemplo na matalo ira nga aripan na Dios nga nakalawa gapa ira tu masanto nga espiritu ngem ari tu nelangitan i iddanamada. Si Juan Bautista i tadday nira. Zinayaw yaya ni Jesus ngem ari yaya nga kavulu ta nelangitan nga Pappatulan. (Mat. 11:10, 11) Nigiya gapa na masanto nga espiritu si David. (1 Sam. 16:13) Monag i pakalippawana ta uvovug na Dios anna nainspiran paga nga itura i karuan nga parte na Biblia. (Mar. 12:36) Ngem ta Pentecostes, kinagi ni Pedro nga “ari tu si David i minay ta langi.” (King. 2:34) Inuffunan na masanto nga espiritu yaw nga totolay nga magangngua tu makapabbaw nga ganna-gannug, ngem ari ira nga nagalan ta langi. Arianna kaya kagian nga ari ira nga mepangngo onu egga i diferensiada. Kaya na laman kagian nga paginnolayan ira ni Jehova ta paraiso nga davvun.​—Juan 5:28, 29; King. 24:15.

17, 18. (a) Anni nga bala-balo i ini-iniggan na magaru nga aripan na Dios? (b) Anni ira nga pakkiavu i matabbag ta tumunug nga artikulo?

¹⁷ Mas aru ta aripan ira na Dios i ari nga nagalan ta langi. Kagitta da David, Juan Bautista, anna tanakuan paga nga matalo nga lallaki anna babbay gari i iddanamada. Kagitta ni Abraham, iddanamadda i mattolay bilang sakup na unnug na Pappatulan. (Heb. 11:10) Taw nga pangurianan nga aggaw, baddi ngana laman i nabattang ta davvun ta nagalan ira para ta langi. (Nep. 12:17) Yari tu aru ta 144,000 i natay ngana nga matalo anna egga ngana ta langi.

¹⁸ Ngem nu kagian na tadday nga para langi yaya, anni nakuan i reaksion danuri egga iddanamada nga mattolay ta davvun? Kunnasi i pattratum ta kakongregasiommu nga namegafu nga kiminan tu tinapay anna mininum tu binarayang ta Memorial? Mawag kari tu mavurukka nga minaru i bilang na magiddanama nga umay ta langi? Matabbag yaw ira nga pakkiavu ta tumunug nga artikulo.