1, 2. (a) Anni i kasali ta “regalu nga ari kapaga-pagan”? (b) Anni ira nga pakkiavu i mekonsidera taw nga artikulo?

TURI ta zinog ni Jehova i tattadday nga anàna ta davvun, neyawana i mabbalin tu kadakallan paga laman nga regalu na aya! (Juan 3:16; 1 Juan 4:9, 10) Yaw i “regalu na [Dios] nga ari kapaga-pagan” segun kani Pablo. (2 Cor. 9:15) Ngatta kunnatun i kinagina?

² Ammu ni Pablo nga megafu ta sakrifisio ni Cristo, siguradu nga matuppal i ngamin nga makapabbaw nga promesa na Dios. (Bibbigan i 2 Corinto 1:20.) Kasali tatun nga “regalu nga ari kapaga-pagan” i ngamin nga pia anna matalo nga aya ni Jehova gukaban ni Jesus. Kuruga makapabbaw yatun nga regalu nga ari vuluvuga mepakanawag na tolay. Kunnasi tam nakuan nga mafektan tatun nga espesial nga regalu? Anni i meyuffunna  yaw nittam ta papprepara tam ta Memorial na patay ni Cristo sonu Mierkules, Marso 23, 2016?

3, 4. (a) Anni i matagenomu nu egga mangiyawa nikaw tu regalu? (b) Kunnasi nga ulian na tadday nga espesial nga regalu i pattolem?

³ Nu makalawa ka tu regalu, natural laman nga magayaya ka. Kuruga espesial i karuan nga regalu ta daka-dakal i efektona ta pattoletam. Angngariganna, nonopammu nga masentensiakka nga matay megafu ta nadamay ka ta krimen. Ngem egga gavva nabboluntario nga yaya ngana laman i masentensian. Determinado yaya nga matay para nikaw! Anni i efektona nikaw yatun nga regalu?

⁴ I pakalawamu tatun nga espesial nga regalu i mangobliga nikaw nga nonopan tu mapia i kukukuammu anna ulian i pattolem. Mamaguyu paga yatun nikaw nga mabbalin tu mas minangngiyawa, mas meddu ta tanakuan, anna minammakoma ta nakaliwa nikaw. Durante nga sigga-matolay ka, matagenomu nga nakagatu ka tatun nga tolay nga nassakrifisio para nikaw.

5. Ngatta mas nabala-balor i tavvu nga regalu ni Jehova anne ta maski anni nga regalu?

⁵ Mas nabala-balor i tavvu nga regalu ni Jehova nittam anne ta regalu tatun nga angngarigan. (1 Ped. 3:18) Ngatta? Megafu ta narensia tam nga liwa, nasentensiattam ngamin nga matay. (Roma 5:12) Mapia ta neyunnug ni Jehova nga umay ta davvun si Jesus tapenu “pammakapianan ngamin na totolay i patay na.” (Heb. 2:9) Ari laman nga pinaliag ittam ni Jehova ta maddaggun, neyunnugna gapa i pundasion nga mannanayun nga maffunà ta kegafuan na patay. (Isa. 25:7, 8; 1 Cor. 15:22, 26) Malawa danuri mangurug kani Jesus i memammo anna makapagayaya nga mannanayun nga inango ta davvun bilang sakup na Pappatulan na Dios. Para gapa ta nazelugan onu natullo ira, makavulu ira ni Jesus nga mammaguray tatun nga Pappatulan. (Roma 6:23; Nep. 5:9, 10) Anni paga nga bendision ira i kasali tatun nga regalu ni Jehova?

6. (a) Anni nga bendision ni Jehova i ini-innaggammu (b) Mangiyawa tu tallu nga gannug nga makua tam megafu ta aya na Dios.

⁶ Kasali ta regalu ni Jehova i panguru ta ngamin nga taki, pamabbalin ta davvun tu paraiso, anna pamaginnolay ta natay ira. (Isa. 33:24; 35:5, 6; Juan 5:28, 29) Siguradu nga iddukattam si Jehova anna si Jesus ta pinangiyawada ta “regalu nga ari kapaga-pagan.” Ngem megafu ta aya na Dios, mapaguyu tam nga kuan i anni? Ikonsidera tam nu kunnasi ittam nga mapaguyu na aya na Dios tapenu (1) tuttulan tu mapia i dakkua ni Jesus, (2) ayatan i wawwaragi tam, anna (3) napafutuan nga pakoman i tanakuan.

7, 8. Megafu ta aya ni Cristo, mapaguyu tam nakuan nga kuan i anni?

⁷ Ollu, obligadu ittam nga mattolay para kani Jesus. Kinagi ni Pablo: “I aya ni Cristo i mammaguray nittam.” (Bibbigan i 2 Corinto 5:14, 15.) Nalippawa ni Pablo nga ari tam malawa i espesial nga aya ni Cristo nu ari tam nga mapaguyu nga mattolay para sa. Nu mantindiattam tu mapia i kingngua ni Jehova para nittam anna mapaguyu na ayana i futu tam, karagatattam i mattolay tu interu-kararua para kani Cristo. Kunnasi tam mepasingan yatun nga pakkaraga?

⁸ Obligadu danuri mangaya kani Jehova nga parigan i ehemplo ni Jesus, anna tuttulan tu mapia i dakkuana. (1 Ped. 2:21;  1 Juan 2:6) Gukaban na pattuppal, mapakurug tam nga ayatattam i Dios anna i Cristo. Kinagi ni Jesus: “I sinni laman nga mangalawa anna mamarulo ta bili-bilik-ku, ay yaya i mangaya niakan. Ayatan na Yamà i sinni laman nga mangaya niakan, ay ayatak-ku gapa yaya anna mappasingan nà sa.”​—Juan 14:21; 1 Juan 5:3.

9. Anni ira nga influwensia i mepa-arubang nittam?

⁹ Ta tiempo na Memorial, tiansa tam nga usitakkan tu mapia i baggi tam. Iyavumu: ‘Anni nga parte na pattolè nga matuttuttul ku i dakkua ni Jesus? Anni gapa i mawag nga pakastakku paga?’ Importante yaw nga pangusito ta baggi megafu ta masikan i influwensia nga parigattam i annangngua na mundo. (Roma 12:2) Nu ari tam magimmugug, mabbalittam nga disipulos na masirib ira ta mundo, artista onu sikat ira ta isports. (Col. 2:8; 1 Juan 2:15-17) Kunnasi tam nga malabanan yatun ira nga influwensia?

10. Anni ira i ipakkiavu tam ta baggi tam ta tiempo na Memorial, anna paguyuan ittam na tabbag ira nga kuan i anni? (Innan i letratu ta gafu na artikulo.)

¹⁰ Makasta nga oportunidad i tiempo na Memorial tapenu innattam i sinnuttam, koleksion na pelikula anna musika, tuange ta naddian ira na computer, cellphone, anna tablet tam. Nu innammu i sinnummu, iyavumu ta baggim: ‘Nu umay ngà ta lugar nga presente si Jesus, ari ngà kari mappasiran ta neyusà?’ (Bibbigan i 1 Timoteo 2:9, 10.) ‘Nu yatun i sinnukku, ipasinganna kari nga taga-tuttul ngà ni Jesu-Cristo?’ Nu mappili tu pelikula onu musika, iyavu ta baggim: ‘Magayaya pano si Jesus nu girawanna yaw nga pelikula onu ginnanna yaw nga musika? Nu ikkawanna i cellphone onu tablet ku, mepasiranannà kari ta masinganna tatun?’ Iyavu tam gapa yaw nu mappili tu video game: ‘Marigatannà kari nga iyesplika kani Jesus nu ngatta kakayàku yatun nga gayam?’ Paguyuan nakuan ittam na aya kani Jehova nga itabbo i anni laman nga ari mepangngo para ta disipulos ni Cristo, maski anni paga kanginana yatun. (King. 19:19, 20) Turi ta naddedika tam, nepromesa tam nga mattolay ngana para kani Cristo, ari nga para ta baggi tam. Ari tam nakuan kengan i maski anni nga makefugag nittam ta panuttul ta dakkua ni Cristo.​—Mat. 5:29, 30; Fil. 4:8.

11. (a) Kunnasi ittam mapaguyu na aya tam kani Jehova anna kani Jesus ta pallayyagayya? (b) Kunnasi ittam mapaguyu na aya tam nga uffunan i kakongregasiottam?

¹¹ Paguyuan ittam gapa na aya tam kani Jesus nga interu-kararua nga mallayyagayya anna magangngua tu disipulo. (Mat. 28:19, 20; Luc. 4:43) Ta tiempo na Memorial, tiansa tam nga ma-auxiliary payunir nga mangiyusa tu 30 onu 50 nga oras ta pallayyagayya. Meyunnugmu kari i iskediulmu tapenu makuam yatun? Nakagi na 84-anyos nga balu nga arianna ngana mawayya i ma-auxiliary payunir megafu ta lakay anna makafi ngana yaya. Ngem inuffunan yaya na papayunir ta kongregasiodda. Itakayda yaya nu umay mallayyagayya anna nappili ira tu teritorio nga layyagayyanna tapenu malàna i 30 oras. Moffunammu kari i tadday ta kakongregasiommu tapenu maekspiriensana gapa i pagayaya na ma-auxiliary payunir ta tiempo na Memorial? Siempre, ari tam maka-auxiliary payunir ngamin. Maski nu kunnatun, awayya tam usan i oras anna sikattam tapenu dumakal paga i sakrifisio tam kani Jehova. Nu kuattam yatun, kagitta ni Pablo, ipasingattam nga napaguyu tam na aya ni Cristo. Paguyuan ittam na aya na Dios nga kuan paga i anni?

12. Mapaguyu ittam na aya na Dios na kuan i anni?

¹² Mekadua, i aya na Dios i mamaguyu nittam nga ayatan gapa i wawwaragi tam. Ammu ni Juan yatun. Neturana: “Ideddukak-ku nga kakkofun, megafu ta kunnaw i pangaya na Dios nittam, mawag tu makka-aya-aya ittam gapa.” (1 Juan 4:7-11) Wan, nu inalawa tam i aya na Dios, obligadu tam nga ayatan i wawwaragi tam. (1 Juan 3:16) Kunnasi tam mepasingan i aya tam nira?

13. Anni nga ehemplo na pangaya ta tanakuan i nepasingan ni Jesus?

¹³ Ikonsidera tam i ehemplo ni Jesus. Ta minisiteriona, nangipasingan yaya tu nerumu-ruma nga konsiderasion ta pobre ira. Yaya mismu i minaranni ta egga ira diferensiana​—pilay, vulag, bangngag, anna umal. (Mat. 11:4, 5) Magayaya yaya nga nattuddu ta mabisi-bisin ta espiritual, danuri nebilang na relihioso ira nga lider na Judio nga “agga-dian nira i batù na Dios.” (Juan 7:49) Ideddukanna yaw ira nga totolay anna nappursigi yaya nga tudduan ira.​—Mat. 20:28.

14. Anni i makuam tapenu mepasingammu i ayamu ta wawwaragi?

¹⁴ Mangiyawa tu oportunidad i tiempo na Memorial tapenu maparigattam si Jesus gukaban na panguffun ta wawwaragi ta mismu nga kongregasiottam. Nu kuammu yatun, siguradu nga mabenefisiowan i karuan megafu ta ayamu. Awayyana nga egga lallakay anna babbako nga makawag tu uffun. Awayyam ira bisitan. Iyangayan ira tu makan, uffunan ta trabahu ta balay, itakay nu umay ta study, onu vulunan ta ministerio. (Bibbigan i Lucas 14:12-14.) Ipamavuluttam nakuan nga i aya na Dios i mamaguyu nittam nga uffunan anna ipasingan i aya tam ta wawwaragi.

15. Anni i mawag nga akseptattam?

¹⁵ Mekatallu, i aya ni Jehova nakuan i mamaguyu nittam nga pakoman i wawwaragi tam. Bilang ána ni Adan, narensia tam ngamin i liwa, yari tu nasentensiattam nga matay. Yatutta awan tu makekagi nga, “Ariakku kawagan i tavvu.” Maski i pinaka-matalo nga aripan na Dios ay kawaganna i tavvu. Mawag tu akseptan na kada-tadday nittam nga napakoma ittam ta  daka-dakal nga gatu. Ngatta importante yatun? Malegan i tabbag ta ilustrasion ni Jesus.

16, 17. (a) Anni i magigiammu tam ta ilustrasion ni Jesus meyannung ta patul anna ta aripanna ira? (b) Kabalimmu nga ninono tu mapia i ilustrasion ni Jesus, determinado ka nga kuan i anni?

¹⁶ Inistoria ni Jesus nu kunnasi nga pinakoma na tadday nga patul i aripanna nga nakagatu tu 10,000 talento, onu 60,000,000 denario. Ngem yatun nga aripan arianna pinakoma i kagittana nga aripan nga nakagatu laman sa tu 100 denario. Kuruga napporay i patul turi ta nammuanna i kawan tu allo na aripan nga pinakomana. “ ‘Keddake mu mabba nga doroban!’ kun-na nga kinagi: ‘Pinakomat-taka ta ngamin nga gatu mu megafu ta nakimemallo ka niakan. Nikallo mu nakuan gapa i kagittam nga doroban ta kunna nipangikallo ku nikaw.’ ” (Mat. 18:23-35.) Yatun nga allo na patul ta aripan i namaguyu nakuan sa nga pakoman i kagittana nga aripan. Mapaguyu ittam nakuan gapa na aya anna allo ni Jehova nga kuan i anni?

¹⁷ Mangiyawa i tiempo na Memorial tu tiansa nittam nga innan nu egga i itaga-tagu tam nga taki na nono ta wawwaragi. Nu kunnatun, makasta nga tiempo yaw tapenu maparigattam si Jehova nga “minammakoma.” (Nep. 9:17; Sal. 86:⁠5) Nu appresiattam i ari ngana nga pattuki ni Jehova ta daka-dakal nga gatu tam, mapaguyu tam nga napafutuan nga pakoman i tanakuan. Ari tam malawa i aya anna pamakoma na Dios nu ariattam pakoman anna ayatan i tanakuan. (Mat. 6:​14, 15) Kurug tu ari nga moli na pamakoma tam i nappasa, ngem mapakastana yatun i mappange.

18. Kunnasi nga nakoffun ta tadday nga sister i aya na Dios tapenu pasensianna i pakkafian na tanakuan nga sister?

¹⁸ Aru ta wawwaragi i marigatan nga “makkapasa-pasensia” ta kataggi-tadday. (Bibbigan i Colosas 3:13, 14; Efeso 4:32.) Angngariganna, nabboluntario i awan tu atawana nga si Lily nga uffunan si Carol ^[1] nga balu nga wagi. Itakena si Carol maski sitaw i angngayanna, pinamalengkena, anna aru paga i fabor nga kingnguana para sa. Maski nu kunnatun, makapoporay lagapa anna mariga nga pakibagayan si Carol. Ngem, kanayun nga agga-nono ni Lily i makasta nga ugu-ugalina. Piga-ragun nga inuffunan yaya ni Lily adde ta nattaki tu grabe tapus natay. Kinagi ni Lily, “Iddanamakku nga masingan si Carol sonu mapaginnolay. Kayà ku nga mammammu yaya sonu perfekto ngana yaya.” Wan, megafu ta aya na Dios, maobliga ittam nga pasensian i wawwaragi anna iddanaman i tiempo nga awan ngana vuluvuga tu kina-imperfekto.

19. Anni i obligadu nga kuammu megafu ta “regalu na Dios nga ari kapaga-pagan”?

¹⁹ Talaga nga nakalawa tam kani Jehova tu “regalu nga ari kapaga-pagan.” Ariattam nakuan gafu nga tagilappawan yaw nga nabalor nga regalu. Mas ngana ta tiempo na Memorial, sigga-appresia nakuan nga nonopattam tu mapia i ngamin nga kingngua ni Jehova anni Jesus nittam. Paray nakuan nga i ayada i mangobliga nittam nga tuttulan i dakkua ni Jesus, ayatan anna uffunan i wawwaragi, anna napafutuan nga pakoman i tanakuan.