TOPIKO NA VUNGUN | MAPAMMAKATALAKKAN KA KARI?
Ari Mapammakatalakkan—Anni i Efektona Nikaw?
“Kanayun nga egga ira mariga nga situasion nga awayyana masolba nu malladdug ka.”—Samantha, South Africa.
Umanugu ka kari tatun? Kagitta ni Samantha, mepa-arubang tam ngamin ta nadduruma nga mariga nga situasion. Masingan ta reaksiottam ta situasion ira nga manenta nittam nga mabbalin tu ari mapammakatalakkan, nu anni ira nga prinsipio i tagibalorattam. Angngariganna, nu ariattam kayà nga mepasiranan, awayyana nga nonopattam nga kawagan i palladdug onu paddarogas. Ngem nu mammuan na tanakuan ira i kurug, ari tu makasta i resultana yatun. Nonopan i tumunug ira.
ARI MAPAMMAKATALAKKAN—MAKADARAL TA PATTALO
Pattalo i pundasion na maski anni nga relasion. Nu mattalo i dua nga tolay ta kataggi-tadday, matagenoda i imammo anna proteksion. Ngem ari tu insigida nga makapattalo ta tadday nga tolay. Makapattalo laman i totolay nu kanayun ira nga makkavulu, awan tu ilimagda anna ari tu baggida laman i nonopadda. Ngem makadaral ta pattalo i maski mittan laman nga palladdug. Nu nadaral ngana yatun, mariga ngana nga metoli.
Nelloko ka kari ngana na tadday nga abbomu tu mapia nga kofun? Nu wan, anni i natagenomu? Baka natakitakka, anna natagenomu nga natraidor ka paga lagu. Normal laman yatun. Kurug tu madaral i pundasion na madukko nga relasion nu ari mapammakatalakkan i tadday.
ARI MAPAMMAKATALAKKAN—MAKESIGI
Ta tadday nga paggigiammu ni Robert Innes, propesor na economics ta University of California, nadiskubrena nga “talaga makesigi onu make-afung i pabbalin tu ari mapammakatalakkan.” Yari tu, megitta yatun ta virus—nu kanayukka makikavulu ta tolay nga darogas onu laddug, mas dakal i posibilidad nga “mesigi” ka sa.
Kunnasim malillitan i pabbalin tu ari mapammakatalakkan? Makoffun nikaw i Biblia. Ikonsideram i karuan nga prinsipio na Biblia.
