1. Anni i kinagi ni Jehova nga mesimmu ta kaggawattam?

NIPROFESIYA ni Jehova meyannung ta tiempo tam: “Mafulu nga lallaki nga naggafu ta ngamin nga lengguahe na nasa-nasion i maggafù, wan, gafutadda tu mapia i sinnun na tadday nga Judio anna kagiadda: ‘Kayàmi i mevulu nikamu, ta naginnami nga i Dios ay egga nikamu nga totolay.’” (Zac. 8:23) Irepresenta natun nga “tadday nga Judio” danuri zinelugan na Dios tu masanto nga espiritu. Nagalan gapa ira nga “i Israel na Dios.” (Gal. 6:16, NW ) Irepresenta na “mafulu nga lallaki” danuri egga i iddanamada nga mattolay tu mannanayun ta davvun. Ammuda nga si Jehova i nappili taw nga grupo na nazelugan ira anna imammatadda nga pribilehio i makipaddayaw kavuluda.

2. Kunnasi nga “mevulu” i “mafulu nga lallaki” ta nazelugan?

² Maski nu ari tu posible nga mammuan i ngagan na kada miembro na nazelugan ta davvun ta maddaggun, * danuri egga i iddanamada nga mattolay ta davvun ay puede nga “mevulu” ta nazelugan ira. Kunnasi? Kagian na Biblia nga i “mafulu nga lallaki” ay “gafutadda tu mapia i sinnun na tadday nga Judio, anna kagiadda: ‘Kayàmi i mevulu nikamu, ta naginnami nga i Dios ay egga nikamu nga totolay.’” Tatun nga teksto ta Biblia, natukoy i tadday nga Judio. Ngem i “nikamu” anna “nikamu nga totolay” ay tumukoy ari laman ta tadday nga tolay. Kayà  kagian natun nga yaw nga Judio ay ari laman nga tadday nga tolay, nu ari, irepresentana i interu nga grupo na nazelugan ira. Danuri ari nga nazelugan ay masserbi kani Jehova kavulu danuri nazelugan ira. Ngem ariadda imammatan i nazelugan ira bilang liderda megafu ta ammuda nga si Jesus i Liderda.​—Mat. 23:10, NW.

3. Anni ira nga pakkiavu i tabbagattam taw nga artikulo?

³ Megafu ta egga paga ira i nazelugan nga Cristiano ta totolay na Dios ta maddaggun, baka iyavu na tanakuan: (1) Kunnasi nakuan imammatan na nazelugan ira i baggida? (2) Kunnasi nakuan i pattratu turi ira ta makiparte ta emblema ira ta Memorial? (3) Ikavurungattam kari nu umara-aru i bilang na makiparte? Tabbagan naw nga artikulo danatun nga pakkiavu.

4. Anni nga tabarang ta 1 Corinto 11:27-29 i mawag nga serioso nga nonopan na nazelugan ira, anna ngatta?

⁴ Serioso nakuan nga nonopan na nazelugan ira i tabarang nga mabibbig ta 1 Corinto 11:27-29. (Bibbigan.) Kunnasi nga i tadday nga nazelugan ay ‘awan tu kepangngattanna’ nga makiparte ta Memorial? Mesimmu yatun nu kanan anna inumanna i emblema ira ngem  arianna mabba nga mattolay segun ta matunung ira nga estandarte ni Jehova. (Heb. 6:4-6; 10:26-29) Ammu na nazelugan ira nga mawag tu mattalupaddian ira nga matalo nu kayàda nga malawa ‘i premio, nga yaw i bagu nga attolay nga pagagalan na Dios gafu kani Cristo Jesus.’​—Fil. 3:13-16.

5. Kunnasi nakuan imammatan na nazelugan ira nga Cristiano i baggida?

⁵ Uuffunan na masanto nga espiritu ni Jehova danuri aripanna nga mabbalin tu mapakalinno, ari tu maparayag. (Efe. 4:1-3; Col. 3:10, 12) Yari tu ari nga matageno na nazelugan ira nga mas mapia ira anne ta tanakuan. Ammuda nga ari niddan ni Jehova i nazelugan ira tu mas aru nga masanto nga espiritu anne ta tanakuan nga aripanna. Ariadda nonopan nga mas monag i pakalippawada ta kinakurug ira ta Biblia anne ta tanakuan. Anna ariadda vuluvuga nga ikagi ta tanakuan nga nazelugan gapa ira yari tu mawagda gapa i makiparte ta Memorial. Lallagu, sigga-pakalinnoda nga alawatan nga si Jehova laman i magiggimbita ta totolay nga umay ta langi.

6. Segun ta 1 Corinto 4:7, 8, kunnasi nakuan i kondukta na nazelugan ira?

⁶ Maski paga matageno na nazelugan ira nga tadday nga pribilehio nga membitan nga umay ta langi, ariadda ekspektan nga espesial i pattratu nira na tanakuan. (Fil. 2:2, 3) Ammuda gapa nga turi ta pinili ira ni Jehova, ari mabba nga nipakannammu ni Jehova yatun ta ngamin. Ari ngana gafu makaddag i tadday nga nazelugan nu egga karuan nga ari insigida mangurug tu nazelugan ira. Ammuna nga kagian nittam na Biblia nga ariattam insigida nga kurugan i makkakkagi nga niddan yayya na Dios tu espesial nga responsibilidad. (Nep. 2:2) Manaki na tadday nga nazelugan nga Cristiano nga medayaw, yatutta arianna ikagi turi ira ta bagu nga makilalana nga nazelugan yayya. Anna arianna nga ipara-parayag yatun ta tanakuan.​—Bibbigan i 1 Corinto 4:7, 8.

7. Anni ira nga gannug i ibita nga kuan na nazelugan ira, anna ngatta?

⁷ Ari nonopan na nazelugan ira nga Cristiano nga mawag nga makikavulu laman ira ta kaparehuda nga nazelugan nga gittana miembro ira na espesial nga grupo. Ariadda alegan i kaparehuda ira nga nazelugan tapenu paggiristorian i pinabbalidda nga nazelugan onu mabbuu ira tu pribadu nga grupo tapenu gigiammuan i Biblia. (Gal. 1:15-17) Awan tu pattaradday ta kongregasion nu kunnatun i kuan na nazelugan ira. Makontrada i masanto nga espiritu, i manguffun tapenu memammo anna mattaradday i totolay na Dios.​—Roma 16:17, 18.

8. Ngatta magimmugug tam nakuan ta pattratu tam turi ira ta makiparte ta emblema ira ta Memorial? (Innan gapa i footnote.)

⁸ Kunnasi tam nakuan tratuan i nazelugan nga wawwaragi tam? Mali i pangidolo ta tadday nga tolay, maski paga nu nazelugan yayya nga wagi ni Cristo. (Mat. 23:8-12) Nu tukuyan na Biblia i elder ira, pagaramman ittam natun nga ‘parigan i angngurugda,’ ngem ari kayà kagian natun nga pabbalinattam tu lider tam i maski sinni nga tolay. (Heb. 13:7) Kurug nga kagian na Biblia nga i karuan ay “mepangngo ta doble nga pangikakua.” Ngem megafu yaw ta “mapia i panangngalda” anna ‘mappuppursigi ira ta paguvovug anna pattuddu,’ ari tu megafu ta nazelugan ira. (1 Tim. 5:17, NW ) Nu sossobra i pangidayaw anna pangiyawa tam tu atension ta nazelugan ira, baka ari ira komfortable tatun. * Onu mas marake paga, baka mapabbalittam ira tu mapakatannang. (Roma 12:3) Ari kayà na maski sinni nittam nga mangngua tu maski anni nga makegafu tapenu makaliwa tu madammo i tadday ta nazelugan nga wagi ni Cristo!​—Luc. 17:2.

9. Kunnasi tam mepasingan nga irespeto tam danuri nazelugan nga Cristiano?

⁹ Kunnasi tam mepasingan nga irespeto tam danuri nazelugan ni Jehova? Ariattam iyavu nira nu kunnasi ira nabbalin tu nazelugan. Personal nga gannug yaw anna awan tu kepangngattattam nga ammuan. (1 Tes. 4:11; 2 Tes. 3:11) Ariattam nakuan nonopan nga nazelugan gapa maski i atawada, maganada, onu karuan nga kafamiliada. Ari nga mamana na tadday nga tolay i nelangitan nga iddanamana ta kafamiliana. Naggafu yatun ta Dios. (1 Tes. 2:12) Ibita tam nakuan gapa i makkiavu tu makataki ta tanakuan. Angngariganna, ariattam iyavu ta sister nga atawa na nazelugan nga brother nu anni i matagenona ta pattolay tu mannanayun ta davvun nga arianna kavulu i atawana. Ta napabagu nga mundo mabba, magga makasiguradu ittam nga “ari nga makkurang i iyawa” ni Jehova.​—Sal. 145:16.

10. Kunnasi tam maprotektan i baggi tam nu ibita tam i pangidolo ta totolay?

¹⁰ Nu ariattam tratuan nga mas importante i nazelugan ira anne ta tanakuan, maprotektattam gapa i baggi tam. Kunnasi? Kagian na Biblia nittam nga posible nga egga i piga nga nazelugan nga ari makapattalupaddian nga matalo. (Mat. 25:10-12; 2 Ped. 2:20, 21) Ngem nu ibita tam i pangidolo ta totolay, ariattam vuluvuga nga mabbalin tu taga-tuttul na tanakuan, maski danuri nazelugan onu prominente ira onu danuri nabayag ngana nga massesserbi kani Jehova. (Jud. 16) Maski nu ariadda nakapattalupaddian nga matalo onu pinanawadda i kongregasion, ariattam lagapa mawawan i pangurug tam kani Jehova onu magimmang ta passerbi nisa.

11. Anni i nesimmu ta bilang danuri makiparte ta Memorial?

¹¹ Aru nga dagun nga bumabbaddi i bilang na makiparte ta emblema ta Memorial. Ngem nikanni laman ira nga dagun, umara-aru i bilang natun kada dagun. Ikavurungattam kari yatun? Ari. Gigiammuattam nu ngatta.

12. Ngatta ariattam nakuan ikavurungan i bilang na makiparte ta emblema ira ta Memorial?

¹² “Ammu na Dios nu sinni i totolay na ira.” (2 Tim. 2:19) Ari tu kagitta ni Jehova, danuri wawwaragi nga mabbilang ta makiparte ira ta Memorial ay ariadda ammu nu sinni talaga i  nazelugan ira. Yari tu kasali ta bilang danuri abboda nga nazelugan ira ngem ari balo. Angngariganna, egga dati ira nga makiparte ngem niyemmadda gabbalaman. Baka egga gapa taki ta uto onu emosional nga problema na tanakuan yari tu abboda nga makipammaguray ira ta langi kavulu si Cristo. Manawag gafu nga ariattam ammu i eksakto nga bilang na nazelugan ira nga nabattang paga taw ta davvun.

13. Ipasingan kari na Biblia nu piga i mabattang nga nazelugan ta davvun sonu mamegafu ngana i dakal nga ziga?

¹³ Egga paga noka i nazelugan ira ta aru nga parte na davvun sonu duttal si Jesus tapenu iyangena ira ta langi. (Mat. 24:31) Ipasingan na Biblia nga durante ta pangurianan ira nga aggaw, egga noka i baddi nga bilang na nazelugan ira nga nabattang taw ta davvun. (Nep. 12:17) Ngem arianna kinagi nu piga i mabattang sonu mamegafu ngana i dakal nga ziga.

14. Kagitta na mabibbig ta Roma 9:11, 16, anni i magigiammu tam meyannung ta pappili tu nazelugan ira?

¹⁴ Si Jehova i maddesision ta tiempo na pappilina ta nazelugan ira. (Roma 8:28-30) Namegafu nga nappili si Jehova tu nazelugan ira kabalin na paginnolay ni Jesus. Posible nga nazelugan i ngamin nga kurug nga Cristiano ta ollu siglo. Ta tumunug ira nga siglo, magaru turi ira ta makkagi nga Cristiano ira ay ariadda talaga nga tuttuttulan si Cristo. Ngem maski kunnatun, durante tatun nga daga-ragun, zinelugan ni Jehova i baddi laman nga kurug ira nga Cristiano. Kagittada i trigu nga kagian ni Jesus nga nattalovu nga kavulu i kaddo ira. (Mat. 13:24-30) Durante ta pangurianan ira nga aggaw, tulu-tuloy paga nga mappili si Jehova tu totolay nga mabbalin tu parte na  144,000. * Nu maddesision gafu i Dios nga pilian i karuan tatun nige laman na panuppalan, ariattam nakuan gafu nga kuestionan i siribna. (Bibbigan i Roma 9:11, 16, NW.) * Magimmugug ittam nakuan nga ariattam parigan danuri trabahador ta ilustrasion ni Jesus. Narreklamo ira ta pattratu na yafuda turi ira ta napporian nga nattrabahu.​—Mat. 20:8-15.

15. Ngamin kari nga nazelugan ay parte na “mekatalo anna nannono nga doroban” nga nakagi ta Mateo 24:45-47? Ipakanawag.

¹⁵ Ari tu ngamin nga egga i iddanamada nga mattolay ta langi ay parte na “mekatalo anna nannono nga doroban.” (Bibbigan i Mateo 24:45-47.) Kagittana turi ta ollu nga siglo, pilippiga laman nga brother i usan ni Jehova anna ni Jesus tapenu pakanan, onu tudduan i magaru. Piga laman nga nazelugan nga Cristiano ta ollu siglo i neyusa tapenu itura i Cristiano nga Griego nga Katurakan. Ta maddaggun, piga laman gapa nga nazelugan nga Cristiano i napeggan tu responsibilidad tapenu iyawa ta totolay na Dios i “kanad-da ta gagangay nga oras na akkakan.”

16. Anni i nagigiammum taw nga artikulo?

¹⁶ Anni i nituddu nittam naw nga artikulo? Naddesision si Jehova nga iddan tu mannanayun nga inango ta davvun i magaru ta totolena anna inango ta langi danuri pilippiga laman nga makipammaguray kavulu ni Jesus. Bala-balattan ni Jehova i ngamin nga aripanna ira​—i “tadday nga Judio” kunne na gapa i “mafulu nga lallaki”—​anna ikiddona nira nga tuttuladda i parehu nga dorob anna mattalupaddian ira nga matalo. Mawag tu mattalupaddian nga mapakalinno i ngamin. Mawag tu mattaradday ira ngamin ta passerbi nisa. Anna mawag tu mappursigi i ngamin tapenu mapattalupaddian i imammo ta kongregasion. Durante nga umara-aranni ittam ngana ta panuppalan, tulu-tuloy tam nakuan ngamin nga masserbi kani Jehova anna tuttulan si Cristo bilang “tattadday nga kural.”​—Juan 10:16.