1. Anni ira nga situasion i ara-arubangan na aru nga matalo nga aripan ni Jehova?

TA INTERU mundo, aru nga aripan ni Jehova i makaekspiriensa tu situasion ira nga kuruga mamavvurung onu mamarraddam nira. Napansimmu kari yatun ta kongregasiommu? Attattamman na karuan nga Cristiano i grabe nga taki onu patay na iddeddukadda. Kuruga marraddam i karuan megafu ta egga i miembro na familiada onu madukko nga kofudda nga nagimmang ta passerbi kani Jehova. Egga gapa i karuan nga marigi-rigatan megafu ta efekto na natural ira nga kalamidad. Ngamin danatun nga wawwaragi ay makawag tu banna-bannay. Kunnasi tam ira moffunan?

2. Ngatta nu mittan kawagan gapa ni apostol Pablo i banna-bannay?

² Namikkaru nga nappeligro i inango ni apostol Pablo. (2 Cor. 11:23-28) Inattammanna gapa i tadday nga “sì ta pattag,” nga posible nga problema ta gawa-gawayyan. (2 Cor. 12:7, NW ) Nilabananna gapa i pakkafi tu nono turi ta pinanawan yayya na dati nga kavuluna ta passerbi nga si Dimas megafu ta “nepallo garay i pangaya na toye ta neravvunan nga pattolay.” (2 Tim. 4:10) Si Pablo ay tadday nga magutu nga nazelugan nga Cristiano anna minangnguffun ta tanakuan, ngem nu mittan ay nagawag gapa yayya tu uffun.​—Roma 9:1, 2.

3. Kunnasi nga niyawa ni Jehova i pamanna-bannay anna suporta kani Pablo?

³ Nalawa ni Pablo i banna-bannay anna suporta nga kawaganna. Kunnasi? Siguradu nga inusa ni Jehova i masanto  nga espirituna tapenu pasikannan si Pablo. (2 Cor. 4:7) Binanna-bannayan gapa yayya ni Jehova gukaban na kasi-Cristianona ira. Dineskriba ni Pablo i karuan nga kavuluna ta passerbi nga “kuruga dakal i meyuffud-da” [“paggafuan na dakal nga banna-bannay,” NW ]. (Col. 4:11) I karuan ta tinukoyna ay da Aristarco, Tikico, anni Marcos. Pinasikadda si Pablo yari tu nakapagattam yayya. Anni ira nga kualidad i nakoffun taw ta tallu nga Cristiano nga namabbalin nira tu kuruga makapabannay? Kunnasi tam maparigan i makasta nga ehemploda durante nga banna-bannayan anna pasikannattam i kataggi-tadday?

4. Kunnasi napakurug ni Aristarco nga matalo yayya nga kofun ni Pablo?

⁴ Napakurug ni Aristarco, Cristiano nga taga-Tesalonica, ta Macedonia nga matalo yayya nga kofun kani Pablo. Ollu tam nga nabibbig i meyannung kani Aristarco turi ta binisita ni Pablo i Efeso ta mekatallu nga pabbiahena bilang misionero. Durante nga kavulu ni Aristarco si Pablo, ginafu yayya na totolay. (King. 19:29) Turi ta napalawan ngana si Aristarco, puede nakuan yayya manaw, ngem matalona lagapa nga vinulu si Pablo. Piga vulan i nappasa, kavulu lagapa ni Pablo si Aristarco ta Grecia maski paga kayà na kalaban ira nga patayan si Pablo. (King. 20:2-4) Turi ta ma-58 C.E. neyangay si Pablo ta Roma tapenu mefuku, ngem vinulu yayya ni Aristarco tatun nga apaddu nga biahe, anna makkavulu nga inattammadda i kadaral na barku nga nattakayadda. (King. 27:1, 2, 41) Ta pakaddeda ta Roma, posible nga makkavulu gapa ira ni Pablo ta affukutan ta piga nga tiempo. (Col. 4:10) Ari ngana gafu kakkadda-kaddag nga napagaram anna nabanna-bannayan si Pablo natun nga matalo nga kofun!

5. Segun ta Proverbio 17:17, kunnasi ittam mabbalin tu matalo nga kofun?

⁵ Kagitta ni Aristarco, mabbalin ittam gapa nga matalo nga kofun nu vulunattam i wawwaragi tam ari laman ta makasta ira nga tiempo nu ari maski ta “tiempo na ziga.” (Bibbigan i Proverbio 17:17.) Maski paga nu nappasa ngana i kapurueba, kawagan lagapa na wawwaragi tam i banna-bannay. Kunni  Frances * nga natay i parehu nga maganana gafu ta cancer ta unag laman na tallu vulan: “Talaga apaddu nga tiempo nga pazziga-rigatan ittam na madammo ira nga kapurueba. Anna appresiakku i matalo ira nga kofukku nga ammuda tu matakitan ngà paga, maski nu mediu nabayag ngana i nappasa turi ta natay i magana ku.”

6. Nu matalo ittam, anni i kuattam?

⁶ Massassakrifisio i matalo ira nga kofun tapenu suportan i wawwaragida. Angngariganna, kinagi na doktor kani Peter nga egga takina tu alistu laman nga maggrabe anna kappatay yatun. Kunna atawana nga si Kathryn: “Egga i magatawa nga kakongregasiommi nga nangitulug nikami ta doktor turi ta nammuammi i meyannung ta taki ni Peter. Insigida ira nga naddesision nga duffunadda kami nga magattam taw nga mariga nga situasion anna kanayudda kami nga uffunan kada kawagammi.” Kuruga makapabannay i kapeggan tu kurug nga kokkofun nga manguffun nittam nga attamman i kapurueba tam ira!

7-8. Segun ta Colosas 4:7-9, ngatta mapattalakkan si Tikico?

⁷ Si Tikico nga Cristiano nga taga-Roma ta distrito na Asia, ay talaga matalo nga kofun ni Pablo. (King. 20:4) Turi ta ma-55 C.E., inorganisa ni Pablo i pakkolekta tu fundu tapenu uffunan i taga-Judea ira nga Cristiano, anna posible nga nipamavulunna nga manguffun si Tikico taw nga importante nga annungan. (2 Cor. 8:18-20) Turi ta ollollu nga nefuku si Pablo ta Roma, nasserbi si Tikico bilang personal nga mensaheruna. Nitulugna ta kongregasion ira ta Asia i tura anna mensahe ira ni Pablo nga pamagaram.​—Col. 4:7-9.

⁸ Nattalupaddian nga mapattalakkan nga kofun ni Pablo si Tikico. (Tito 3:12) Ari tu ngamin nga Cristiano tagga ay kagitta ni Tikico nga mapattalakkan. Ma-65 C.E., durante ta mekadua nga kefuku ni Pablo, niturana nga nilikuran yayya na aru nga Cristiano nga lallaki ta probinsia na Asia, posible megafu ta maganassing ira ta mangokkontra. (2 Tim. 1:15) Ngem, makapattalo si Pablo kani Tikico anna niddanna yayya uli tu annungan. (2 Tim. 4:12)  Siguradu nga inappresia ni Pablo i kapeggan tu mapia nga kofun gitta ni Tikico.

9. Kunnasi tam maparigan si Tikico?

⁹ Maparigattam si Tikico nu tadday ittam nga mapattalakkan nga kofun. Angngariganna, ariattam laman nga mangipromesa tu uffun ta wawwaragi nga magawag, nu ari, mangngua ittam gapa tu praktikal ira nga gannug tapenu moffunan ira. (Mat. 5:37; Luc. 16:10) Nu ammu danuri magawag nga mapattalakkan ittam, kurug nga mabanna-bannayan ira. Niyesplika na tadday nga sister nu ngatta. Kunna, “Kalmadu ka megafu ta ammum nga yari i tolay nga nangiyofer nga manguffun ay egga tari ta oras nga kawagammu yayya nga tuppalanna i nipromesana.”

10. Kagitta na mabibbig ta Proverbio 18:24, sitaw makaleg tu banna-bannay danuri magattattam ta kapurueba onu pakkadismaya?

¹⁰ Danuri magattattam ta kapurueba onu pakkadismaya ira ay maruddu nga mabanna-bannayan nu ikagida i mataga-tagenoda ta mapattalakkadda nga kofun. (Bibbigan i Proverbio 18:24.) Kuruga dismayadu si Bijay turi ta nadisfellow i anana nga lalaki anna kunna, “Mawag ku kagian i mataga-tageno ku ta tadday nga mapattalakkakku.” Nawawan gapa ni Carlos i tagibaloranna nga pribilehio ta kongregasion megafu ta nakaliwa yayya. Kunna, “Mawag ku i totolay nga mevuvvu ku i mataga-tageno ku anna ariaddà nga husgan.” Napakurug ni Carlos nga danatun nga totolay ay i elder ira, nga nanguffun nisa tapenu malampasan i problemana. Nabanna-bannayan gapa yayya ta pakannammuna nga ari kagian na elder ira ta tanakuan i konfidensial nga kinagina.

11. Kunnasi ittam mabbalin tu mapattalakkan nga kofun?

¹¹ Tapenu mabbalin tu mapattalakkan nga kofun, mawag tu kultibattam i pasensia. Turi ta pinanawan si Zhanna na atawana, nakkasta i panagenona turi ta nivuvvuna i mataga-tagenona ta madukko nga kokkofunna. “Pinasensiaddà nga gininna,” kunna, “maski paga itotolì i kakkagiakku nira.” Mapakurug mu gapa nga mapia ka nga kofun nu mapasensia ka nga magginna.

12. Sinni si Marcos, anna kunnasi yayya nangipasingan tu sigga-paran nga espiritu?

¹² Si Marcos ay tadday nga Judio nga Cristiano nga taga-Jerusalem. Prominente gapa nga misionero i kapittana nga si Bernabe. (Col. 4:10) Makagi nga mariku i familia ni Marcos, ngem maski kunna, arianna pinagollu i material ira nga gannug ta pattolena. Ta interu pattolay ni Marcos, nipasinganna i sigga-paran nga espiritu. Magayayya yayya nga passerbian i tanakuan. Angngariganna, ta nadduruma nga tiempo, nasserbi yayya kavulu si apostol Pablo anna si apostol Pedro durante nga tuttuppaladda i responsibilidadda, anna si Marcos i massussuporta ta material ira nga pakawagadda. (King. 13:2-5; 1 Ped. 5:13) Dineskriba ni Pablo si Marcos bilang tadday nga ‘makipattrabahu nisa ta Pammagurayan na Dios’ anna ‘kuruga dakal i meyuffunna’ nisa.​—Col. 4:10, 11.

13. Kunnasi ipasingan na 2 Timoteo 4:11 nga inappresia ni Pablo i matalo nga serbisiu ni Marcos?

¹³ Nabbalin si Marcos tu tadday ta madukko nga kofun ni Pablo. Angngariganna, tagga ta ultimu nga nikefuku ni Pablo ta Roma, ma-65 C.E., niturana i mekadua nga turana kani Timoteo. Tatun nga tura, nikiddaw ni Pablo kani Timoteo nga umay ta Roma anna ivuluna si Marcos. (2 Tim. 4:11) Manawag nga inappresia ni Pablo i nappasa nga matalo nga serbisiu ni Marcos, yari tu nikiddona i presensia ni Marcos tatun nga kuruga mariga nga tiempo. Inuffunan ni Marcos si Pablo  ta praktikal, gitta na pangisuplay nisa tu makan onu materiales ta patturana. Siguradu nga nakoffun ta pagattam ni Pablo i suporta anna pamagaram nga nalawana tatun ira nga ultimu nga aggaw nige na kapatena.

14-15. Anni i ituddu nittam na Mateo 7:12 meyannung ta panguffun ta tanakuan ta praktikal ira nga gannug?

¹⁴ Bibbigan i Mateo 7:12. Nu egga i attattammattam nga problema, dakal i appabalo tam turi ira ta manguffun nittam ta praktikal! “Kakkaru nga gannug i mawag nga makua kadaggaw nga gittana imposible nga makua nu maddaggun i paddaddam,” kunni Ryan, nga gavva natayan tu yama gafu ta aksidente. “I praktikal ira nga uffun, maski nu baraddi laman, ay daka-dakal i meyuffunna.”

¹⁵ Nu atentibo anna minangngobserba ittam, magga makaleg ittam tu praktikal nga meyuffuttam ta tanakuan. Angngariganna, naddesision i tadday nga sister nga duffunan si Peter anni Kathryn, nga nakagi ta gafu, tapenu makangay ira ta ngamin nga appointmentda ta doktor. Ari ngana makapammaneho si Peter anni Kathryn, yari tu nagangngua tu iskediul i sister tapenu matturubba i mabboluntariu ira nga wawwaragi ta kongregasion ta pangimaneho nira. Nakoffun kari nira yaw nga unnug? Kunni Kathryn, “Natagenomi nga nalsa i madammo nga agga-kattumi.” Kammu vuluvuga tagibadditan i banna-bannay nga meyawa na simple laman ira nga kinasippo mu ngem praktikal.

16. Anni i importante nga leksion ta pamanna-bannay i magigiammu tam ta ehemplo ni Marcos?

¹⁶ Siguradu nga okupadu nga Cristiano i ollu-siglo nga disipulo nga si Marcos. Madammo i teokratiko ira nga annunganna, nelagum tatun i pattura ta Evanghelio nga nengagan nisa. Ngem siniguradu lagapa ni Marcos nga egga tiempona tapenu banna-bannayan si Pablo, yayya nga komfortable si Pablo nga mappoffun nisa. Turi ta egga miembro na familia ni Angela nga pinateda, dakal i appabalona turi ira ta sigga-paran nga namanna-bannay nisa. “Nu talaga kayà na kokkofun i manguffun, mabbalin ira tu mabi nga marannian,” kunna. “Ari ira nga madduda onu magalangan.” Iyavu tam ta baggi tam, ‘Kilala ngà kari nga sigga-paran nga mamanna-bannay ta kapangngurug ku ira ta praktikal ira nga gannug?’

17. Kunnasi makoffun nittam i pannono ta 2 Corinto 1:3, 4 tapenu mapaguyu ittam nga mamanna-bannay?

¹⁷ Alistu laman nga makaleg tu wawwaragi nga magawag tu banna-bannay. Awayya tam paga nga usan i parehu nga makapagaram ira nga uvovug nga pinamagaram na tanakuan nittam. Kunni Nino, sister nga natayan tu lola: “Mawayya ni Jehova nga banna-bannayan i tanakuan gukabattam nu mappeyusa ittam nisa.” (Bibbigan i 2 Corinto 1:3, 4.) Kunni Frances nga nakagi ta gafu: “Kurug i kagian na 2 Corinto 1:4. Puede tam nga pamanna-bannay ta tanakuan i nalawa tam nga pamanna-bannay.”

18. (a) Ngatta maganassing i tanakuan nga mamanna-bannay? (b) Kunnasi ittam mabbalin tu efektibo ta pamanna-bannay ta tanakuan. Mangiyawa tu angngarigan.

¹⁸ Mawag tu magaleg ittam tu tiansa tapenu duffunan i tanakuan maski nu maganassing ittam. Angngariganna, baka maganassing ittam nga ariattam ammu nu anni i kagiattam onu kuattam turi ira ta magawag tu banna-bannay. Meraddamman na elder nga si Paul i kingngua na tanakuan tapenu mabanna-bannayan yayya turi ta natay i yamana. “Matageno ku nga marigatan ira nga umaranni niakan,” kunna. “Ariadda ammu nu anni i ikagida. Ngem appresiakku lapa i pakkaragada nga mamanna-bannay anna massuporta.” Kunnatun gapa i naekspiriensa na brother nga si Tajon kabalin na masikan nga lunig. Kunna: “Ariakku meraddamman i kada mensahe nga nipatulug nio na totolay ta aggaw ira kabalin na lunig, ngem meraddammakku nga talaga ikavurungaddà gafu ta kumu-kumustaddà.” Mabbalin ittam tu efektibo nga mamanna-bannay nu ipasingattam i pangikavuruttam.

19. Ngatta determinadu ka nga mabbalin tu paggafuan na ‘kuruga dakal nga uffun’?

¹⁹ Durante nga umara-aranni ittam ta panuppalan naw nga sistema na ganna-gannug, mas maggrabe i paddia-paddian na mundo anna mas marriga i pattolay. (2 Tim. 3:13) Anna kanayun nga kawagattam i banna-bannay megafu ta imperfekto ittam anna kanayun ittam nga makaliwa. I tadday nga rason nu ngatta matalo nga nakapagattam si apostol Pablo adde ta patena ay megafu ta pamanna-bannay nga nalawana ta kasi-Cristianona ira. Mabbalin ittam nakuan tu matalo gitta ni Aristarco, mapattalakkan gitta ni Tikico, anna sigga-paran nga masserbi gitta ni Marcos. Nu kuattam yatun, moffunattam i wawwaragi tam nga mattalupaddian nga matuyag ta pangurug.​—1 Tes. 3:2, 3.