EGGA i tadday nga batu nga nafetchan tu 700-600 B.C.E ta Bible Lands Museum ta Jerusalem. Nalegan yatun nga batu ta tadday nga attanamman nga kueba aranni ta Hebron ta Israel. Kunnaw i neyukit tatun nga batu: “Ibariaw nakuan ni Yahweh Sabaot si Hagaf nga ana nga lalaki ni Hagav.” Kunnasi nga pakurugan natun nga neyukit ta batu i kakkagian na Biblia? Megafu ta masingan tatun nga batu i ngagan na Dios nga Jehova nga netura ta Hebreo nga letra nga YHWH, pakurugan natun nga familiar ta totolay ta tiempo na Biblia i ngagan nga Jehova anna usu-usadda yatun ta kagaggaw. Massimmu anna mattagu gapa i karuan nga totolay ta kueba nga attanamman tapus turakkadda i zizzing na kueba. Maruddu nga iturada i ngagan na Dios anna ituvvugda i ngagan na tolay ta nadduruma nga forma na ngagan na Dios.

Kunnaw i kinagi ni Dr. Rachel Nabulsi na University of Georgia meyannung tatun ira nga netura: “Aru i magigiammu tam ta mamippiga nga keyusa na ngagan nga YHWH. . . . Ipasingan danatun nga neyukit anna netura nga importante si YHWH ta pattolay na Israel anna Juda gari.” Suportan natun i Biblia nu sitaw rinivu nga beses nga mabibbig tam nga netura i ngagan na Dios ta Hebreo ira nga letra nga YHWH. Maruddu gapa nga metuvvug i ngagan na totolay ta ngagan na Dios.

I kebalinan na uvovug ira nga “Yahweh Sabaot” nga neyukit tatun nga batu ay “Jehova na armada ira.” Ipasingan natun nga ta tiempo na Biblia, ari laman nga meyusu-usa i ngagan na Dios, nu ari, pati i uvovug ira nga “Jehova na armada ira.” Suportan gapa natun i pangusa na Biblia ta termino nga “Jehova na armada ira” nga mabibbig tu 283 nga beses ta Hebreo nga Katurakan, mas ngana ta libru na Isaias, Jeremias, anna Zacarias.