1. Anni i efektona ta tadday nga kabataan nga lalaki na naginnana nga palappa ta tadday nga kombension turi 1935?

EGGA tadday nga kabataan nga lalaki nga 18 anios turi ta nabawtisowan yayya ta 1926. Estudiante na Biblia i maganana. Yatun i pagagal ta Saksi ira ni Jehova tatun nga tiempo. Egga paga i dua nga wagina nga lallaki anna dua gapa nga babbay. Ngamin ira ay pinadakal na maganada tapenu masserbi kani Jehova nga Dios anna parigan si Jesu-Cristo. Tatun nga tiempo, zinagun nga makiparte i ngamin nga Estudiante na Biblia ta pakkakan tu pan anna paginum tu binarayang kada Pamugag na Yafu. Kunnatun gapa i kukukuan naw nga matalo nga kabataan. Ngem nanguli i iddanamanna ta mappange megafu ta ari makattaman nga palappa nga nateman tu “I Dakal nga Ammung.” Nipalappa yatun ni J. F. Rutherford ta tadday nga kombension ta Washington, D.C., U.S.A. turi ta 1935. Anni i nagigiammuda tatun nga kombension?

2. Ta palappa ni Brother Rutherford, anni nga kinakurug i nipakanawagna?

² Ta palappa ni Brother Rutherford, kinagina nu sinni ira i mebilang ta “dakal nga ammung” (King James Version) onu “magaru nga totolay” nga nakagi ta Nepakannammu 7:9. Nige natun nga tiempo, pagabbo na Estudiante ira na Biblia nga i dakal nga ammung ay grupo nga umay ta langi nga ari kuruga matalo kumpara ta nazelugan ira. Niyusa ni Brother Rutherford i Katurakan tapenu ipakanawag nga i dakal nga ammung ay ari nga napili nga mattolay ta langi. Ngem  ira yaw i tanakuan nga karneru * ni Cristo nga mepaliag ta “nepallo nga kadara-darum” onu dakal nga ziga tapenu mattolay nga mannanayun taw ta davvun. (Nep. 7:14) Nipromesa ni Jesus: “Egga paga i karnerù ira nga awan taw nga kural. Mawag tu itallung ku gapa ira. Ginnad-da i ngaral ku, ay mabbalin ngana ira noka tu tattadday nga kural nga tangngawan na tattadday nga mappastor.” (Juan 10:16) Matalo nga Saksi ni Jehova ira yaw nga alle-karneru nga magiddanama nga mattolay tu mannanayun ta paraiso nga davvun. (Mat. 25:31-33, 46) Innattam nu kunnasi nga noli i pattolay na magaru ta totolay ni Jehova kasali ngana i 18-anios nga brother megafu ta bagu nga pakalippawa nga naggafu ta Biblia.​—Sal. 97:11; Prov. 4:18.

3-4. Ta kombension ta 1935, anni i nalippawa na rinivu nga wawwaragi meyannung ta iddanamada, anna ngatta?

³ Kappabbaw i nesimmu tatun nga kombension turi ta kinagi na ispiker ta maggigginna ira: “Awayya kari tumaddag na ngamin nga magiddanama nga mattolay tu mannanayun ta davvun?” Segun ta tadday nga brother nga nagatende tatun nga kombension, maturu tu gaddua na 20,000 nga nagatende i nanaddag. Tapus kinagi ni Brother Rutherford: “Innannu! I dakal nga ammung!” Kabalin natun, nagaya-ayayya i ngamin nga maggigginna. Nalippawa danuri nanaddag nga ari ira nga napili tapenu mattolay ta langi. Ammuda nga ari ira nga zinelugan na espiritu na Dios. Ta tumunug nga aggaw natun nga kombension, 840 nga bagu nga Saksi i nabawtisowan anna magaru tatun i parte na tanakuan nga karneru.

⁴ Kabalin natun nga palappa, rinivu nga wawwaragi kasali ngana i kabataan nga nakagi ta ollu i nagimmang nga makiparte ta pakkakan tu pan anna paginum tu binarayang ta Pamugag na Yafu. Natageno gapa na karuan i natageno na tadday nga mapakalinno nga brother nga kunna: “Kabalin na Memorial ta 1935, ari ngà ngana vuluvuga nga nakiparte ta pakkakan tu emblema. Nalippawa ku nga ari nga niyusa ni Jehova i masanto nga espirituna tapenu iddannà tu iddanama nga mattolay ta langi. Egga i iddanamà nga mattolay ta davvun anna manguffun nga pabbalinan tu paraiso i davvun.” (Roma 8:16, 17; 2 Cor. 1:21, 22) Namegafu tatun nga tiempo, umara-aru i bilang na dakal nga ammung anna nakipattrabahu ira ta nabattang paga ira nga nazelugan. *

5. Kunnasi nga imammatan ni Jehova danuri nagimmang ngana nga makiparte ta emblema ira ta Memorial?

⁵ Kunnasi imammatan ni Jehova danuri nagimmang ngana nga makiparte ta emblema ira ta Memorial kabalin na 1935? Kunnasi gapa nu makipapparte i tadday nga bawtisadu nga Saksi ta pakkakan tu pan anna paginum tu binarayang ta Pamugag na Yafu tapus nalippawana nga ari gabba yayya nga nazelugan? (1 Cor. 11:28) Egga ira i karuan nga nakiparte ta emblema ira megafu ta mali i pagabboda ta iddanamada. Ngem nu akseptadda nga nakkamali ira, magimmang ira nga makiparte tatun, tapus itulu-tuloyda i matalo nga passerbida, ibilang ira ni Jehova nga parte na tanakuan nga karneru. Maski nu ari ngana ira nga makiparte ta pakkakan tu pan anna paginum tu  binarayang, magatende lagapa ira ta Memorial megafu ta kuruga appresiadda i kingngua ni Jehova anna ni Jesus para ta nira.

6. Anni i nidog ni Jesus ta anghel ira?

⁶ Aranni ngana i dakal nga ziga, yayya nga makapagaram nu repasuattam i Nepakannammu kapitulo 7 nu anni paga i kagian natun meyannung ta nazelugan ira nga Cristiano kunne na gapa ta dakal nga ammung na tanakuan nga karneru. Zinog ni Jesus i anghel ira tapenu fugaddadda i appa nga paddag nga makadaral. Mawag tu agga-tangngalda laman danatun tapenu ari nga mappaddag ta utun na davvun adde sonu maselyowan i ngamin nga nazelugan nga Cristiano. Yatun ngana noka i tiempo sonu ikagi ni Jehova nga matalo ira. (Nep. 7:1-4) Mabala-balakkan noka i kinamatalo danaw nga nazelugan nga wawwaragi ni Cristo sonu mabbalin ira tu patul anna papari kavuluna ta langi. (Nep. 20:6) Magayayya noka si Jehova, si Jesus, anna i anghel ira nga makasingan nga malawa na 144,000 nga nazelugan i nelangitan nga bala-baloda.

7. Gitta na mabibbig ta Nepakannammu 7:9, 10, sinni i nasingan ni Juan ta sirmatana, anna anni i kukukuadda? (Innan i letratu ta vungun.)

⁷ Kabalin nga nasingan ni Juan i 144,000 nga patul anna papari, nasinganna i “magaru nga totolay” nga nepaliag ta Armagedon. Ari nga gitta na ollu nga grupo, mas aru i mekadua nga grupo anna awan tu makabilang ta karuda. (Bibbigan i Nepakannammu 7:9, 10.) “Nakasinnun ira ta furaw” nga mangipasingan nga ‘nelillida i baggida ta marakay nga pattolay toye ta mundo’ ni Satanas anna nakapattalupaddian ira nga matalo ta Dios anna kani Cristo. (Sant. 1:27) Ikukkulleda nga napaliag ira megafu ta kiningngua ni Jehova anna na Kordero na Dios nga si Jesus. Agga-tammi gapa ira tu don na palmera nga mangipasingan nga magayayya ira nga alawatan si Jesus nga sinunno ni Jehova bilang Patul.​—Ikumpara i Juan 12:12, 13, NW.

8. Segun ta Nepakannammu 7:11, 12, anni i reaksion na nelangitan nga familia ni Jehova?

⁸ Bibbigan i Nepakannammu 7:11, 12. Anni i reaksiodda ta langi? Nasingan ni Juan nga magayayya i ngamin nga egga ta langi, anna zinayoda i Dios turi ta nasingadda i dakal nga ammung. Magayayya noka i nelangitan nga familia ni Jehova nga makasingan ta ketuppal naw nga sirmata sonu mepaliag i dakal nga ammung ta dakal nga ziga.

9. Segun ta Nepakannammu 7:13-15, anni ngana sangawe i kukukuan na dakal nga ammung?

⁹ Bibbigan i Nepakannammu 7:13-15. Nitura ni Juan nga ‘nababbalan anna napafuraw i kapa na magaru nga totolay ta daga na Kordero.’ Kebalinan natun nga marenu i konsensiada anna matunung i sinaddagda ta arubang ni Jehova. (Isa. 1:18) Bawtisadu ira nga Cristiano nga masikan i pangurugda ta sakrifisio ni Jesus anna egga i relasiodda kani Jehova. (Juan 3:36; 1 Ped. 3:21) Kualipikadu gafu ira nga manaddag ta arubang na trono na Dios tapenu “aggaw-gabi nga masserbi” ta espiritual nga templona taw ta davvun. Ta maddaggun, matalikarag ira anna daka-dakal i parteda ta pallayyagayya anna pangngua tu disipulos megafu ta pagolluadda i Pappatulan na Dios imbes tu i baggida.​—Mat. 6:33; 24:14; 28:19, 20.

10. Ta anni nga makasiguradu i dakal nga ammung, anna anni nga promesa i iinnaggadda nga matuppal?

¹⁰ Siguradu nga tangngallan na Dios i dakal nga ammung nga mepaliag ta dakal nga ziga ta “i nagitubang ta trono i mangiyegu nira, megafu ta pakitappaddian na nira.” Matuppal ngana i promesa nga nabayag ngana nga  innaggan na tanakuan nga karneru nga ‘funatan na Dios ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki.’—Nep. 21:3, 4.

11-12. (a) Segun ta Nepakannammu 7:16, 17, anni ira nga bendision i alawatan noka na dakal nga ammung? (b) Anni i kuan na tanakuan nga karneru ta Memorial, anna ngatta?

¹¹ Bibbigan i Nepakannammu 7:16, 17. Ta kaggawattam, egga danuri totolay ni Jehova nga mabisi-bisin megafu ta ari nga makalanno i kuartuda nga paggatang tu makan onu afektadu ira na gerra. Nefuku gapa i karuan megafu ta pangurugda. Ngem magayayya i dakal nga ammung megafu ta ammuda nga sonu mapaliag ira ta kadaral naw nga marake nga mundo, kanayun ngana noka nga abundansia i pisikal anna espiritual nga makan. Sonu madaral yaw nga mundo ni Satanas, melilli i dakal nga ammung ta ‘mapapatu’ nga poray ni Jehova kontra ta totolay naw nga mundo. Kabalin na dakal nga ziga, igiya noka ni Jesus danuri nepaliag mappange ta ‘latua nga mangiyawa tu mannanayun nga inango.’ Nonopammu ngana laman yaw nga kappabbaw nga iddanama na dakal nga ammung: Ta binillion nga nattolay taw ta davvun, ira danuri ari vuluvuga nga maka-ekspiriensa nga matay!—Juan 11:26.

¹² Egga i kappabbaw nga iddanama na tanakuan nga karneru nga ipappabaloda kani Jehova anna kani Jesus. Maski nu ari ira nga pinili ni Jehova nga mattolay ta langi, parehu lagapa i pangidduna nira nu kunnasi na pangidduna ta nazelugan ira. Parehu nga mawayya nga dayawan na nazelugan anna na tanakuan nga karneru i Dios anna si Cristo. Makuada yatun nu magatende ira ta Pamugag na Yafu.

13-14. Ngatta kawagan nga magatende ta Memorial i nabattang ira nga nazelugan anna i tanakuan nga karneru?

¹³ Ta nappasa nga daga-ragun, maggi 1 ta kada 1,000 nga magatende ta Memorial i makiparte ta emblema ira. Magaru ta kongregasion ira i awan tu makiparte. Neravvunan i iddanama danuri na magaru nga magatende ta Memorial. Ngatta gafu ta magatende ira ta Pamugag na Yafu? Megitta ira turi ta totolay nga umay ta kasal na kofudda. Magatende ira megafu ta kayàda nga ipasingan i aya anna i  suportada ta mannobio nga mappange nga makkasal. Magatende gafu gapa i tanakuan nga karneru ta Memorial megafu ta kayàda nga ipasingan nga ayatan anna suportadda si Cristo anna i nazelugan ira. Fuera paga tatun, kayàda nga ipasingan nga appresiadda i tavvu ni Jesus. Megafu tatun nga tavvu, posible nga mattolay ira tu mannanayun ta davvun.

¹⁴ Egga paga i tadday nga rason nu ngatta magatende i tanakuan nga karneru ta Memorial. Tuttuttuladda gare i bilin ni Jesus. Turi ta nigafu ni Jesus i ollu nga Pamugag na Yafu kavulu i matalo nga apostolesna ira, kinagina nira: “Kuan nu yaw tu panaddamman nu niakan.” (1 Cor. 11:23-26) Durante nga sigga-matolay paga ta davvun i karuan nga nazelugan, tulu-tuloy nga magatende ta Pamugag na Yafu i tanakuan nga karneru. Iimbitadda gapa i tanakuan nga magatende ta Memorial kavuluda.

15. Anni i kuammu tapenu medayaw mu i Dios anna si Cristo durante ta Memorial?

¹⁵ Durante ta Memorial, egga i oportunidad tam nga dayawan i Dios anna si Cristo nu makkaravulu ittam nga makkansion anna makimallo. I tema na palappa taw nga dagun ay “Appresiammu i Kingngua na Dios Anna ni Cristo Para Nikaw!” Ponaggan natun nga palappa i pappabalo mu kani Jehova anna kani Cristo. Nu mepasa ngana i emblema ira, meperaddam ta nittam ngamin nga nagatende nga isimbolo danatun i baggi anna i daga ni Jesus. Meraddammattam gapa nga nipamavulun ni Jehova nga matay i Anana para nittam tapenu mapeggan ittam tu inango. (Mat. 20:28) Karagatan gafu na ngamin nga mangaya ta nelangitan nga Yama tam anna ta Anana nga magatende ta Memorial.

16. Anni i napparehuan na nazelugan ira anna na tanakuan nga karneru?

¹⁶ Parehu laman i pangaya ni Jehova ta nazelugan ira anna ta tanakuan nga karneru. Ammu tam yatun megafu ta parehu laman i balor nga pinaggatanna ta nazelugan ira anna ta tanakuan nga karneru—i inango na meddu nga Anana. Madduma laman i iddanama naw nga dua nga grupo ngem kawagan nga parehu nga mattalupaddian ira nga matalo ta Dios anna kani Cristo. (Sal. 31:23) Daddammattam nga parehu laman nga maffunsina i espiritu na Dios ta nittam ngamin. Kayàna kagian, iyawa ni Jehova ta kada tolay i masanto nga espirituna segun ta pakawagadda.

17. Anni i iinnaggan na nabattang ira nga nazelugan?

¹⁷ Ari nga neyana i nazelugan ira nga Cristiano nga dati ngana nga nelangitan i iddanamada. Dios i nangiyawa nira tatun nga iddanama. Pannonopadda i meyannung ta iddanamada, ipakimalloda yatun, anna kakayàda nga malawa i bala-baloda ta langi.  Ariadda paga lagu ammu nu kunnasi noka i pabbalin tu espiritu ta langi. (Fil. 3:20, 21; 1 Juan 3:2) Maski paga kunnatun, kakayàda ngana nga masingan noka si Jehova, si Jesus, i anghel ira, anna i karuan ta nazelugan, anna makavulu ira ta Pappatulan ta langi.

18. Anni ira i iddanaman na tanakuan nga karneru?

¹⁸ Karagatan na tanakuan nga karneru nga mattolay tu mannanayun taw ta davvun. Kunnatun gapa i karagatan na ngamin nga totolay. (Ecl. 3:11) Iddanamadda i tiempo sonu makoffun ira tapenu pabbalinan i interu nga davvun tu paraiso. Innaggadda gapa i tiempo sonu mamataddag ira tu babalay, mammulu-mula ira, anna mamadakal ira tu ánada nga perfekto i gawa-gawayyanna. (Isa. 65:21-23) Kakayàda gapa nga mabbiahe noka ta nadduruma nga lugar tapenu makasingan tu bakulug, vuku-vukig, anna bebay. Iddanamadda nga gigiammuan noka i ngamin nga pinaratu ni Jehova. Ngem i iddanama nga mas paga nga maddukko ira noka kani Jehova i pinakamamagayayya nira.

19. Anni nga oportunidad i iyawa na Memorial ta kada tadday nittam, anna sonu anni nga meselebra yatun?

¹⁹ Niddan ni Jehova tu makakkasta nga iddanama ta mappange i kada dedikadu nga aripanna. (Jer. 29:11) Espesial nga tiempo para ta kada tadday nittam i Memorial na patay ni Cristo. Oportunidadda yaw nga dayawan i Dios anna si Cristo megafu ta niyawada nga iddanama nga magayayya nga pattolay tu mannanayun. I Memorial i pinaka-importante nga paggarammammung na kurug ira nga Cristiano kada dagun. Meselebra yaw kabalin na pallammag na bilag ta Sabadu, Marso 27, 2021. Taw nga dagun, aru i maddian ta lugar ira nga awan tu mangigamma ta pagatendeda. Ta karuan gapa nga lugar, magatende lagapa ira maski nu aru i mangokkontra. Iselebra gapa na karuan yaw maski nu egga ira ta affukutan. Durante nga iinnan ittam ni Jehova, ni Jesus, na anghel ira, anna na napaginnolay ira nga nazelugan, paray nakuan tu mavviktoria i pangiselebra tu Memorial na kada kongregasion, grupo, anna indibidual!