1-3. Anni ira i problema nga awayya na tu mamatangi nittam?

KANNI ka nga last nga siminangi? Nu mittan, tumangi ittam megafu ta sobra i ayayya tam. Ngem maruddu nga tumangi ittam nu maraddam ittam. Angngarigan na, tumangi ittam nu natayan ittam. Kunnaw i nitura ni Sister Lorilei nga taga-United States: “Egga ira i tiempo nga gitta na madudduddug i futù ta grabe i taki na matayan tu ana nga babay. Awan tu makawayya nga mamanna-bannay nio. Kada matageno ku yatun, abbo ku nu ari ku ngana maattamman i taki natun.” *

² Egga paga i karuan nga rason nu ngatta tumangi ittam. Kunnaw i inamin na payunir nga si Sister Hiromi nga taga-Japan: “Nu karuan, makkafi i nono ku ta awan tu ka-inte-interes danuri na malayyagayyakku. Itatangi ku paga lagu kani Jehova nga uffunan nà nakuan nga makaleg tu tolay nga magala-aleg tu kinakurug.”

³ Natageno mu ngana kari danatun? Awayya na tu aru ta nittam i naka-ekspiriensa ngana tatun ira. (1 Ped. 5:9) Kayà tam nga “sigga-pagayaya nga daya-rayawan” si Jehova, ngem awayya na nga tumangi ittam megafu ta natayan ittam, nakkafi i nono tam, onu egga i kavvuru-vurung nga problema tam nga mamurueba ta kinamatalo tam ta Dios. (Sal. 6:6; 100:2) Anni i kuattam nu matageno tam i kunnatun?

4. Anni i gigiammuattam taw nga artikulo?

⁴ Makagigiammu ittam ta ehemplo ni Jesus. Egga gapa ira i tiempo nga siminangi yayya megafu ta madaddammo i matageno na. (Juan 11:35; Luc. 19:41; 22:44; Heb. 5:7) Ammuattam nu anni ira i magigiammu tam tatun ira nga situasion. Ammuattam gapa nu anni ira i praktikal nga makua tam nu mesimmu i situasion ira nga mamatangi ta nittam.

5. Anni i magigiammu tam meyannung kani Jesus ta Juan 11:32-36?

⁵ Turi ta 32 C.E., nattaki i madukko nga kofun ni Jesus nga si Lazaro tapus natay. (Juan 11:3, 14) Egga i dua nga manang ni Lazaro, da Maria anna Marta, anna iddeddu ni Jesus danatun nga mawwaragi. Ta patay ni Lazaro, grabe i pinaddaddam na dua nga manang na. Kabalin natun, inangngayan ira ni Jesus ta ili na Betania. Ta pakaginna ni Marta nga egga ngana si Jesus, nallawan yayya nga ziminafung ta nisa. Nonopan i nepallo nga daddam ni Marta turi ta kinagi na yaw: “Afu, nu egga ka nakuan taw, ari maffugag nga natay i wagì.” (Juan 11:21) Ta pakasingan ni Jesus ta pattangi-tangi ni Maria anna na karuan paga, “siminangi” yayya.​—Bibbigan i Juan 11:32-36.

6. Ngatta siminangi si Jesus?

⁶ Ngatta siminangi si Jesus? Kagian na Kaunawaan sa Kasulatan: “Megafu ta patay na kofun na nga si Lazaro anna ta paddaraddam na manang ira ni Lazaro, si Jesus ay ‘nepallo i daddam na anna siminangi.’” * Awayya na tu nononopan ni Jesus i inattamman na kofun na nga si Lazaro gafu ta taki na anna inimajin na nu anni i natageno ni Lazaro turi ta magimmamatay ngana yayya. Siguradu gapa nga makatangi si Jesus ta pakasingan na kani Maria anna Marta nga nepallo i daddam da ta patay na wagi da. Nu natayakka tu madukko nga kofun onu kafamilia, magga natageno mu ngana gapa i kunnatun. Ammuattam ngana i tallu nga magigiammu tam tatun nga pinattangi ni Jesus.

7. Anni i magigiammu tam meyannung kani Jehova ta pinattangi ni Jesus para ta kokkofun na?

⁷Mantindian ni Jehova i mataga-tageno mu. Si Jesus i “kurug nga kasissinnan” na Yama na. (Heb. 1:3) Yayya nga turi ta siminangi si Jesus, nipasingan na nu anni i mataga-tageno na Yama na. (Juan 14:9) Nu mataka-takitakka gafu ta patay na iddeddukammu, makasiguradu ka nga ari laman nga masingi-singan ni Jehova i paddaddam mu, nu ari, ikakkallo  naka gapa. Kayà na nga pammapian i nabigaran nga futum.​—Sal. 34:18; 147:3.

8. Ngatta siguradu ittam nga paginnolayan noka ni Jesus i iddeddukattam ira?

⁸Kayà ni Jesus nga paginnolayan i iddeddukammu ira. Nige nga siminangi si Jesus, nipasiguradu na kani Marta: “Maginnolay i wagim.” Nangurug si Marta kani Jesus. (Juan 11:23-27) Megafu ta maddayaw si Marta kani Jehova, magga ammu na nga namaginnolay da profeta Elias anna Eliseo ta nappasa. (1 Pat. 17:17-24; 2 Pat. 4:32-37) Siguradu gapa nga nadumug na i pinamaginnolay ira ni Jesus. (Luc. 7:11-15; 8:41, 42, 49-56) Makasiguradu ka gapa nga masingammu uli noka danuri natay nga iddeddukammu. Anni gafu i magigiammu tam ta pinattangi ni Jesus turi ta binanna-bannayan na i maddaddam ira nga kofun na? Ipasingan natun nga kakayà na nga paginnolayan danuri natay!

9. Kunnasim maparigan si Jesus ta panguffun turi ira ta maddaddam? Mangistoria tu angngarigan.

⁹Moffunammu danuri maddaddam. Ari laman tu nakipattangi si Jesus kada Marta anna Maria, nu ari, nagginna gapa yayya anna pinasikan na i nono da. Makua tam gapa yatun turi ira ta maddaddam. Kunnaw i kagian ni Dan, tadday nga elder nga taga-Australia: “Turi ta natay i atawà, mawag ku i uffun. Aru nga magatawa i sigga-paran nga nagginna nio. Pinagurayaddà laman nga ikagi i dammò na mataga-tageno ku anna okay laman ta nira maski nu tumatangi ngà ta arubadda. Nabboluntariu gapa ira nga manguffun ta praktikal nu ariakku ngana nga matangngaw i kuakku ira, kagitta na pappakarenu ta takè, pag-grocery, anna pallutu. Kanayun gapa nga kavvulutaddà nga makimallo. Nipasingadda nga kurug ira nga kokkofun anna wawwaragi nga meyana ta ‘tiempo na ziga.’”—Prov. 17:17.

10. Istorian i nesimmu ta Lucas 19:36-40.

¹⁰ Zimittal si Jesus ta Jerusalem turi ta Nisan 9, 33 C.E. Ta pakaranni na ta siudad, naggarammammung i totolay anna nivullag da i sinnudda ira ta dalan tapenu ipasingan nga alawatadda yayya bilang Patul da. Siguradu nga kappagayayya yatun nga tiempo. (Bibbigan i Lucas 19:36-40.) Yayya nga magga nakaddag i disipulos ni Jesus ta tumunug nga nesimmu. “Ta pakaranni ngana ni Jesus ta Jerusalem, nasingan na i siudad, ay sinangitan na yaw.” Makatangi nga niprofesiya ni Jesus i aranni ngana nga marake nga mesimmu ta totolay ta Jerusalem.​—Luc. 19:41-44.

11. Ngatta sinangitan ni Jesus i totolay ta Jerusalem?

¹¹ Narraddam si Jesus megafu ta ammu na nga maski nu makasta i nipangalawa ta nisa na kalugaran na ira, magaru ta nira i nanakitadda ngana nga magginna ta mensahe na Pappatulan. Megafu tatun, kinagi ni Jesus nga madaral i Jerusalem, tapus maaripan i maski sinni nga Judio nga mapaliag ta kadaral natun nga siudad. (Luc. 21:20-24) Kaddaraddam ta nesimmu yatun nga kinagi ni Jesus. Nanakitan yayya na magaru nga totolay. Kunnasi gapa i pangalawa na totolay ta dian nu ta mensahe na Pappatulan? Nu baddi laman i maginteres ta appursigim nga ituddu nira i kinakurug, anni i magigiammum ta pinattangi ni Jesus? Egga i tallu.

12. Anni i magigiammu tam meyannung kani Jehova turi ta sinangitan ni Jesus i kasittolena ira?

¹²Ayatan ni Jehova i totolay. Iperaddam nittam na nipattangi ni Jesus nga kuruga ayatan ni Jehova i totolay. “Arian na nga ikaya tu egga i madaral, ngem ikaya na tu pallikuran na ngamin nga totolay i katagaruliad-da.” (2 Ped. 3:9) Mepasingattam gapa nga ayatattam  i kasittoletam ira nu ikagumattam nga uffunan ira nga magigiammu i meyannung ta mapia nga dumug na Pappatulan.​—Mat. 22:39.

13-14. Kunnasi nga nipasingan ni Jesus i pangikallo ta totolay anna kunnasi tam gapa nga maparigan yatun?

¹³Malallappo si Jesus ta pamministerio. Nipasingan ni Jesus nga ayatan na i totolay ta ari yayya nga nagimmang nga tudduan ira kada egga i chansa na. (Luc. 19:47, 48) Ngatta kingngua na yatun? Nikallo gare ira ni Jesus. Egga paga lagu i tiempo nga napakaru i maya nga magginna ta ikagi na, yari tu “ari nga natangngaw ni Jesus tuange ta disipulo na ira i kiminan.” (Mar. 3:20) Sigga-paran gapa yayya nga manuddu ta gabi, ta tiempo nga mas kombiniente ta maya nga magginna ta nisa. (Juan 3:1, 2) Ari nga nabbalin tu disipulo ni Jesus i magaru ta nagginna nisa ta ollu, ngem nalayyagayyan tu mapia i ngamin nga nakaginna ta nisa. Kayà tam gapa sangawe nga iddan i ngamin tu chansa nga maginna i mapia nga dumug. (King. 10:42) Makua tam yatun nu magadjust ittam ta pallayyagayya tam.

¹⁴Sigga-paran nga magadjust. Nu para-parehu laman nga oras i pallayyagayya tam, awayya na tu ari tam nga maka-uvovug danuri maya nakuan nga magginna ta mapia nga dumug. Kunnaw i kagian na payunir nga si Matilda: “Puruebammi na atawà nga layyagayyan i totolay ta nadduruma nga oras. Nu ummumma, mallayyagayya kami labbi ta lugar ira na pannegosiowan. Nu tangnga-naggaw ngana, nu sitaw aru ngana i totolay ta lawan, ma-cart kami labbi gapa. Tapus nu fugag ngana, masimmuammi i totolay ta gibbalayadda.” Imbes tu mallayyagayya ittam laman ta oras nga kombiniente para nittam, sigga-paran nakuan ittam nga i-adjust i iskediul tam tapenu matiempuattam i totolay. Nu kuattam yatun, magga magayayya nittam si Jehova.

15. Base ta Lucas 22:39-44, anni i nesimmu ta ultimu nga gabi na nipattolay ni Jesus?

¹⁵ Ta dis-oras na gabi na Nisan 14, 33 C.E., minay si Jesus ta hardin na Getsemani. Tatun na nga nivuvvu i mayan na futu na kani Jehova. (Bibbigan i Lucas 22:39-44.) Tatun ira nga kitazziga nga oras, ‘nakimemallo si  Jesus ta masikan nga ngaral anna aru nga lulua.’ (Heb. 5:7) Anni i nipakimallo ni Jesus tatun nga ultimu nga gabi nige na patena? Nikiddona i sikan tapenu mattalupaddian yayya nga matalo kani Jehova anna tapenu makua na i uray na Yama na. Gininna ni Jehova yatun nga pakimemallo na Ana na anna naddog yayya tu tadday nga anghel tapenu pasikannan si Jesus.

16. Ngatta mavuru-vurung si Jesus turi ta makimallo yayya ta hardin na Getsemani?

¹⁶ Siminangi si Jesus turi ta nakimallo yayya ta hardin na Getsemani. Mavuru-vurung gare yayya ta baka nonopan saw na totolay nga awan tu pangirespeto na ta ngagan na Dios. Ammu na gapa nga dakal i responsibilidad na nga pakasantowan i ngagan na Yama na. Nu meparubakka gapa ta kunnatun nga kavvuru-vurung nga situasion nga mamurueba ta kinamatalo mu kani Jehova, anni i magigiammum ta pinattangi ni Jesus? Ammuattam i tallu.

17. Anni i magigiammu tam meyannung kani Jehova ta panabbag na ta napafutuan ira nga kiddaw ni Jesus?

¹⁷Gigginnan ni Jehova i pakimemallo mu ira. Gininna ni Jehova i napafutuan ira nga kiddaw ni Jesus. Ngatta? Megafu ta i pattalupaddian nga matalo ta Yama na anna i pamakasanto ta ngagan ni Jehova i pinakakavurungan ni Jesus. Nu i pattalupaddian gapa nga matalo kani Jehova anna i pamakasanto ta ngagan na i pinakakavurungattam, ginnan na i pakimallo tam ira anna uffunan na ittam.​—Sal. 145:18, 19.

18. Ngatta makagi tam nga kofuttam si Jesus anna mantindian na i mataga-tageno tam?

¹⁸Mantindian ni Jesus i mataga-tageno mu. Nu grabe i vurung tam, magayayya ittam nu banna-bannayan ittam na tadday nga kofun nga makantindi ta mataga-tageno tam, mas ngana nu nappasan na gapa i problema tam. Egga kari i kunnatun nga kofuttam? Wan, si Jesus. Nappasan na i makkafi anna magawag tu uffun. Ammu na i pakkafiattam ira, yayya nga siguraduan na nga makalawa ittam tu uffun “ta tiempo na pagawag tam.” (Heb. 4:15, 16) Inalawa ni Jesus i panguffun na tadday nga anghel ta hardin na Getsemani. Sigga-paran ittam nakuan gapa nga alawatan i panguffun ni Jehova gukaban na tadday nga  publikasion, video, palappa, pa-shepherding na elder ira, onu pamagaram na tadday nga manakam nga kofun.

19. Kunnasi ka nga massikan nu mapurueban i kinamatalo mu ta Dios? Mangistoria tu angngarigan.

¹⁹Iyawa ni Jehova nikaw i ‘imammo na Dios.’ Kunnasi ittam nga pasikannan ni Jehova? Nu makimallo ittam, malawa tam ‘i imammo na Dios nga ari malippawa na tolay.’ (Fil. 4:6, 7) Pakalman ittam na imammo nga iyawa ni Jehova anna uffunan ittam natun nga makapannono tu mapia. Nesimmu yatun kani Sister Luz. Kinagi na: “Kanayun ngà nga maraddam. Laba-labanakku yatun. Ngem nu mittan, ta sobra nga daddam ku, manono ku nga ari nà siguru ayatan ni Jehova. Nu mesimmu yatun, insigida nga kagiakku kani Jehova i mataga-tageno ku. Ta uffun na pakimallo, nakontrol ku i negatibo nga emosiokku.” Nipasingan na ekspiriensa na nga makoffun i pakimallo tapenu mabbalin ittam tu memammo.

20. Anni ira i nagigiammu tam ta pinattangi ni Jesus?

²⁰ Kurug tu makapabannay anna makoffun i nagigiammu tam ira ta pinattangi ni Jesus! Neperaddam nittam nga uffunattam nakuan danuri kokkofuttam nga maddaddam. Mattalo ittam nakuan gapa nga uffunan ittam ni Jehova anna ni Jesus nu matayan ittam tu iddeddukan. Kayà tam nga parigan i pangikallo ni Jehova nga Dios anna ni Jesu-Cristo, yayya nga ikallo tam danuri i layyagayyan anna tudduattam. Mabanna-bannayan ittam gapa ta ammu tam nga mantindian ni Jehova anna na meddu nga Ana na i mataga-tageno tam. Ammu da i pakkafiattam ira anna kayà da ittam nga uffunan nga magattattam. Kanayuttam nakuan nga iyaplika danatun nga nagigiammu tam adde ta duttal noka i tiempo nga tuppalan ngana ni Jehova i makakkasta nga nipromesa na nga ‘funatan na ngamin i lulua tam nga manuru’!—Nep. 21:4.