1-2. (a) Kanni tam nga mas manono i meddu nga minatay tam? (b) Anni i pinegafuanan ni Jesus ta gabi nige na nga natay?

MERADDAMMATTAM lagapa i meddu nga minatay tam ira maski nu nabayag ngana ira nga natay. Mas ngana nga manono tam ira ta anibersario na pateda.

² Kada ragun, tadday ittam ta minillion nga totolay ta interu mundo nga maggarammammung para ta anibersario na patay na tadday nga meddu ta nittam—si Jesu-Cristo. (1 Ped. 1:8) Kayà tam gare nga daddamman i pinangiyawa na tu inango na bilang tavvu tapenu mapaliag ittam ta liwa anna patay. (Mat. 20:28) Kayà ni Jesus nga daddamman na disipulos na ira i patena. Ta gabi nige na nga natay, pinegafuanan na i espesial nga pamugag anna nidob na: “Kuan nu yaw tu panaddamman nu niakan.”​—Luc. 22:19.

3. Anni i gigiammuattam taw nga artikulo?

³ Baddi laman ta magatende ta Memorial na patay ni Cristo i nelangitan i iddanama da. Ngem minillion lagapa ta magatende danuri ta davvun i iddanama da. Taw nga artikulo, gigiammuattam nu ngatta parefu nga kakayà da nga magatende ta Memorial kada ragun. Innattam gapa nu kunnasi ittam mammakapia ta pagatende tatun. Gigiammuattam ngana i karuan nga rason nu ngatta magatende i nelangitan ira i iddanama da onu i nazelugan ira.

4. Ngatta kuman tu pan anna minum tu binarayang ta Memorial i nazelugan ira?

⁴ Kada ragun, kuman tu pan anna minum tu binarayang i nazelugan  ira nga magatende ta Memorial. Ngatta mepangngo laman nga kuadda yatun? Tapenu matabbag yatun, ikonsidera tam i nesimmu ta ultimu nga gabi ni Jesus taw ta davvun. Kabalin na pamugag ta Paskua, pinegafuanan ni Jesus i Pamugag na Yafu. Nipasa na ta 11 nga matalo nga apostoles na i pan anna kinagi na tu kanadda yatun kunne na gapa i binarayang anna kinagi na ta nira nga inumadda yatun. Nipakibbida ni Jesus ta nira i dua nga pakkasinabban onu kontrata—i bagu nga pakkasinabban anna i pakkasinabban na Pappatulan. * (Luc. 22:19, 20, 28-30) Megafu taw nga pakkasinabban, posible nga mabbalin tu patul anna papari ta langi i apostoles anna i baddi nga bilang na karuan nga totolay. (Nep. 5:10; 14:1) Danuri laman i nabattang paga ira nga nazelugan, * nga kasali taw nga dua nga pakkasinabban, i awayya na nga kuman tu pan anna minum tu binarayang ta Memorial.

5. Anni i ammu na nazelugan ira meyannung ta iddanama da?

⁵ Yaw paga i tadday tu rason nu ngatta kakayà na nazelugan ira nga magatende ta Memorial: Chansa da gare yatun tapenu pannonopan i iddanama da. Niddan ira ni Jehova tu kappabbaw nga iddanama. Ari ira vuluvuga nga matay anna ari vuluvuga madaral i baggi da ta langi. Masserbi paga ira kavulu si Jesus anna i tanakuan paga ira nga 144,000. I pinakakappabbaw paga tatun, masingadda mismu i Dios nga Jehova! (1 Cor. 15:51-53; 1 Juan 3:2) Ammu na nazelugan ira nga malawa da danatun ira nga pribilehio ta langi. Ngem tapenu makapattolay ira ta langi, mawag tu mattalupaddian ira nga matalo adde ta pateda. (2 Tim. 4:7, 8) Kuruga magayayya i nazelugan ira kada pannonopadda i nelangitan nga iddanama da. (Tito 2:13) Ngem kunnasi gapa i “tanakuan nga karneru”? (Juan 10:16, NW ) Ngatta magatende ira ta Memorial?

6. Ngatta magatende kada ragun ta Memorial i tanakuan nga karneru?

⁶ Nu magatende ta Memorial i tanakuan nga karneru, ari ira kuman tu pan anna ari gapa ira minum tu binarayang. Ngem magayayya ira nga presente ira tari. Turi ta 1938, first time nga espesipiko nga nembitan nga magatende ta Memorial danuri ta davvun i iddanama da. Kunnaw i kinagi na The Watchtower nga Marso 1, 1938: “Mepangngo laman para ta [tanakuan nga karneru] nga presente ira tatun nga paggarammammung anna masingadda nu anni i mesissimmu. . . . Mepangngo nga magayayya gapa ira tatun nga tiempo.” Magayayya i tanakuan nga karneru nga presente ira ta Memorial. Megitta gare ira ta nembitan ira nga bisita nga magayayya nga makasingan ta seremonia na kasal.

7. Ngatta kayà na tanakuan ira nga karneru nga ginnan i palappa ta Memorial?

⁷ I tanakuan nga karneru ay pannonopadda gapa i iddanama da. Kayà da nga maginna i palappa ta Memorial. Nakafokus gare yatun ta kuan noka ni Cristo anna na 144,000 nga kakavvulu na para ta matalo nga totolay ta unag ta Tanga-rivu Dagun nga Pammaguray. Ta pangigiya na Patul da nga si Jesu-Cristo, manguffun danuri mammaguray ta langi tapenu mabbalin tu paraiso i davvun anna  tapenu mabbalin tu perfekto i totolay. Siguradu nga kappagayayya para ta minillion nga tanakuan nga karneru i magatende ta Memorial. Maimajidda gare tatun i ketuppal na profesiya ira ta Biblia gitta na mabibbig tam ta Isaias 35:5, 6; 65:21-23; anna Nepakannammu 21:3, 4. Nu imajinadda nga egga noka ira tatun nga napabagu nga mundo kavulu i iddeddukadda ira, mas magiddanama ira para ta mappange anna mas determinadu ira nga ari vuluvuga nga magimmang ta passerbi kani Jehova.​—Mat. 24:13; Gal. 6:9.

8. Anni i tadday paga nga rason nu ngatta magatende i tanakuan nga karneru ta Memorial?

⁸ Yaw i tadday paga nga rason nu ngatta magatende i tanakuan nga karneru ta Memorial: Kayà da nga ipasingan i aya anna suporta da para ta nazelugan ira. Niprofesiya na Uvovug na Dios nga mabbalin tu madukko i relasion na nazelugan anna na tanakuan nga karneru. Innattam i karuan nga profesiya nga mangipasingan tatun.

9. Kunnasi ipasingan na profesiya ta Zacarias 8:23 i madukko nga relasion na tanakuan nga karneru ta nazelugan ira?

⁹ Bibbigan i Zacarias 8:23. Ipasingan natun nga profesiya i madukko nga relasion na tanakuan nga karneru ta nazelugan nga wawwaragi da. I uvovug ira nga “tadday nga Judio” anna “nikamu nga totolay” ay tumukoy ta tadday nga grupo—i nabattang paga ira nga nazelugan. (Roma 2:28, 29) I “mafulu nga lallaki nga naggafu ta ngamin nga lengguahe na nasa-nasion” ay tumukoy gapa ta tanakuan nga karneru. “Gafutadda tu mapia” i nazelugan ira. Kayà na kagian, makikavvulu ira ta nira ta marenu nga paddayaw. Yayya nga ta gabi na Memorial, ipasingan na tanakuan nga karneru i madukko nga relasiodda ta nazelugan gukaban na pakikavulu da ta nira tatun nga okasion.

10. Anni i kingngua ni Jehova tapenu matuppal i profesiya ta Ezekiel 37:15-19, 24, 25?

¹⁰ Bibbigan i Ezekiel 37:15-19, 24, 25. Tapenu matuppal yaw nga profesiya, pinattadday ni Jehova i nazelugan anna i tanakuan nga karneru. Nekagi ta profesiya i dua nga kayu. Danuri nelangitan i iddanama da ay kagitta na kayu “para ta Juda” (i tribu nga naggafuan na patul ira na Israel), anna danuri gapa ta davvun i iddanama da ay kagitta na kayu “na Efraim.” * Pattaddayan ni Jehova yatun nga dua nga grupo tapenu mabbalin ira tu “tadday nga kayu.” Kayà na kagian, passerbiadda i tattadday nga Patul da, si Jesu-Cristo. Kada ragun, magatende i nazelugan anna i tanakuan nga karneru ta Memorial ari tu bilang makkasina tu grupo, nu ari, bilang “tattadday nga kural” ta panangngaw na “tattadday nga mappastor.”​—Juan 10:16.

11. Kunnasi suportan na “karneru” nga nakagi ta Mateo 25:31-36, 40 i wagi ira ni Cristo?

¹¹ Bibbigan i Mateo 25:31-36, 40. Irepresenta na “karneru” taw nga angngarigan i matunung nga totolay ta pangurianan ira nga aggaw nga ta davvun i iddanama da. Tumukoy yatun ta tanakuan nga karneru. Matalo nga suportadda i nabattang paga ira nga nazelugan nga wagi ni Cristo gukaban na panguffun ta nira tapenu metuppal da i dakal nga responsibilidad—i pallayyagayya anna i pagangngua tu disipulo ta interu mundo.​—Mat. 24:14; 28:19, 20.

12-13. Kunnasi paga suportan na tanakuan nga karneru i wagi ira ni Cristo?

¹² Piga ligguan nige na Memorial, ipasingan na tanakuan nga karneru i passuporta da ta  wagi ira ni Cristo gukaban na pagimbita ta interesadu ira para ta Memorial. Kuadda i ngamin nga mawayya da tapenu masuportan tu mapia yatun nga interu-mundo nga kampania. (Innan i kahon nga “ Mapplano Ka Para ta Tiempo na Memorial.”) Iyunnug da gapa i ngamin nga mawag tapenu meselebra na ngamin nga kongregasion ta interu mundo i Memorial, maski nu awan tu nazelugan ta kongregasiodda. Magayayya i tanakuan nga karneru nga kuan yatun ira tapenu suportan i wagi ira ni Cristo. Ammu da gare nga i kukukuadda para ta nazelugan ira nga wawwaragi ni Jesus ay gitta na kukukuadda ngana gapa para ta nisa.​—Mat. 25:37-40.

¹³ Maski anni paga i iddanama tam, anni paga i karuan nga rason nu ngatta magatende ittam ngamin ta Memorial?

14. Kunnasi nga nipasingan ni Jehova anna ni Jesus i dakal nga pangaya da para ta nittam?

¹⁴Mappabalo ittam ta pangipasingan ni Jehova anna ni Jesus tu pangaya ta nittam. Ta karu ngana na kiningngua ni Jehova tapenu ipasingan i pangaya na ta nittam, i pangidob na ta meddu nga Ana na tapenu mazziga-riga anna matay para nittam i kadakallan. (Juan 3:16) Nipasingan gapa ni Jesus i dakal nga pangaya na gukaban na sigga-paran nga pangiyawa na ta inango na para ta nittam. (Juan 15:13) Ariattam vuluvuga nga mapagan i pangaya nga nipasingan ni Jehova anna ni Jesus. Ngem mepasingattam i pappabalo tam ta nira gukaban na kukukuattam ta inaggaw nga pattoletam. (Col. 3:15) Magatende gapa ittam ta Memorial megafu ta kayà tam nga daddamman i aya nga nipasingadda ta nittam anna kayà tam nga ipasingan i pangaya tam ta nira.

15. Ngatta dakal i pattagibalor na nazelugan anna na tanakuan nga karneru ta regalu nga tavvu?

¹⁵Dakal i pattagibalor tam ta regalu nga tavvu. (Mat. 20:28) Tagibaloran na nazelugan ira i tavvu megafu ta pinapposible natun i kappabbaw nga iddanama da. Megafu ta pangurug da ta tavvu ni Cristo, napakatunung ngana ira kani Jehova anna inampun na ngana ira bilang ána na. (Roma 5:1; 8:15-17, 23) Mappappabalo gapa i tanakuan nga karneru ta tavvu. Megafu ta pangurug da ta tavvu ni Cristo, marenu i sinaddag da ta Dios anna iddanamadda nga mapaliag ira noka ta “dakal nga ziga.” (Nep. 7:13-15, NW ) Parefu nga ipasa-pasingan na nazelugan anna na tanakuan nga karneru i pappabalo da ta tavvu nu presente ira ta Memorial kada ragun.

16. Anni i tadday paga nga rason nu ngatta magatende ittam ta Memorial?

¹⁶Kayà tam nga tuttulan si Jesus. Yatun i tadday paga tu rason nu ngatta magatende ittam ta Memorial. Maski anni paga i iddanama tam ta mappange, kayà na kada tadday ta nittam nga tuttulan yaw nga nidob ni Jesus ta gabi nga pinegafuanan na i Memorial: “Kuan nu yaw tu panaddamman nu niakan.”​—1 Cor. 11:23, 24.

17. Ngatta mas maddukko ittam kani Jehova ta Memorial?

¹⁷Mas maddukko ittam kani Jehova. (Sant. 4:8) Gitta na nagigiammu tam ngana, iddan ittam na Memorial tu chansa nga pannonopan i iddanama nga niyawa ni Jehova ta nittam anna i dakal nga pangaya nga nipasingan na ta nittam. (Jer. 29:11; 1 Juan 4:8-10) Nu pannonopattam i kurug nga iddanama tam ta mappange anna i ari nga manguli nga pangaya nittam ni Jehova, mas ayatattam yayya  anna mas malladda i pakikkofuttam ta nisa.​—Roma 8:38, 39.

18. Nu pannonopattam i sakrifisio ni Jesus, mapaguyu ittam nga kuan i anni?

¹⁸Mapaguyu ittam nga parigan si Jesus. (1 Ped. 2:21) Piga aggaw nige na Memorial, maffokus ittam ta rekord ira na Biblia meyannung ta ultimu nga ligguan ni Jesus ta davvun, ta patena, anna ta paginnolena. Ta mismu gapa nga gabi na Memorial, iperaddam nittam na palappa i pangaya ni Jesus para ta nittam. (Efe. 5:2; 1 Juan 3:16) Nu bibbigan anna pannonopattam i sakrifisio ira ni Jesus, mapaguyu ittam nga ‘mattolay tu kagitta na nipattolena.’—1 Juan 2:6.

19. Kunnasi ittam mattalupaddian ta aya na Dios?

¹⁹Mas determinadu ittam nga mattalupaddian ta aya na Dios. (Judas 20, 21) Mattalupaddian ittam ta aya na Dios nu kuattam i ngamin nga mawayya tam tapenu tuttulan yayya, mapakasanto i ngagan na, anna mapagayayya i futu na. (Prov. 27:11; Mat. 6:9; 1 Juan 5:3) Mapaguyu ittam na Memorial tapenu mabbalin ittam tu mas determinadu nga mattolay kada aggaw nga gitta na kagiattam kani Jehova: ‘Kayà ku mattalupaddian ta aya mu tu mannanayun!’

20. Anni ira i mapia nga rasottam ta pagatende ta Memorial?

²⁰ Aru i mapia nga rasottam tapenu magatende ta Memorial, maski nu magiddanama ittam nga mattolay tu mannanayun ta langi onu ta davvun. Kada ragun, nu maggarammammung ittam tatun nga tiempo, daddammattam i patay na iddeddukattam nga si Jesu-Cristo. I pinaka-importante, manono tam i kadakallan nga pangipasingan tu aya ni Jehova gukaban na pangiyawa ta Ana na bilang tavvu. Taw nga dagun, iselebra tam i Memorial ta gabi na Biernes, Abril 15, 2022. Iddeddu tam si Jehova anna i Ana na, yari tu ta anibersario na patay ni Jesus, presente nakuan ittam ta Memorial. Yatun nakuan i pinaka-importante ta nittam tatun nga aggaw.