1. Kunnasi tam nga meddan tu tiempo si Jehova?

KAKAYÀ tam nga iddan tu tiempo i pakikavulu tam turi ira ta madukko ta nittam. Angngarigan na, magayayya i magatawa nu makkavulu ira. Ma-enjoy gapa na kabataan nu kavulu da i madukko ira nga kokkofudda. Magayayya ittam gapa ngamin ta tiempo ira nga kavulu tam i wawwaragi. Ngem i pinaka-importante ta ngamin, kakayà tam nu egga i tiempo tam para ta Dios. Makua tam yatun nu makimallo ittam ta nisa, bibbigattam i Uvovug na, anna pannonopattam tu mapia i gakkag na anna i makasta ira nga kualidad na. Nabala-balor i tiempo nga iyayawa tam para kani Jehova!—Sal. 139:17.

2. Ngatta marigatan ittam nu mittan nga iddan tu tiempo si Jehova?

² Maski nu magayayya ittam nga iddan tu tiempo si Jehova, baka marigatan ittam nga kuan yatun nu mittan. Sobra gare i ka-busy tam yari tu baka marigatan ittam nga iyiskediul i tiempo tam para ta espiritual ira nga aktibidad. Baka mofu i tiempo tam ta trabahu, responsibilidad ira ta familia, anna karuan paga nga importante nga gannug. Yari tu awayya na nga manono tam nga awan ngana tu tiempo tam nga makimallo, maggigiammu, onu mannono tu mapia.

3. Anni paga i makofu ta tiempo tam?

³ Egga paga i makofu ta tiempo tam nga baka ariattam mataga-tageno. Nu ari ittam nga magimmugug, baka ufutan na gannug ira nga ari mabba nga marake i tiempo tam nga awayya tam nakuan nga usan tapenu mas maddukko kani Jehova. Angngarigan na, kawagattam ngamin i tiempo tapenu marrelaks.  Ngem maski nu ari nga marake i dibersiottam, nu sosobra ngana yatun, baka awan ngana saw tu tiempo tam para ta espiritual ira nga aktibidad. Daddammattam gafu nga ari nakuan tu i dibersion i pinaka-importante ta nittam.​—Prov. 25:27; 1 Tim. 4:8.

4. Anni i gigiammuattam taw nga artikulo?

⁴ Ammuattam taw nga artikulo nu ngatta mawag tu ammu tam i prayoridad tam. Gigiammuattam gapa nu kunnasi tam nga meyusa ta kapianan i tiempo tam para kani Jehova anna nu ngatta mammakapia ittam ta pagangngua tam tatun.

5. Kunnasi makoffun ta tadday nga kabataan i tabarang ta Efeso 5:15-17 tapenu meyusa na ta kapianan i pattolena?

⁵Pilian i kapianan nga pattolay. Maruddu nga nononopan na kabataan ira nu kunnasi da nga meyusa ta kapianan i pattolay da. Awayya na nga ikakkagi ta nira na memestru da anna na ari tu Saksi nga kafamilia da nga makasta nu mak-college ira tapenu egga saw i makasta nga trabahu da anna aru saw i kuartu da. Aru nga tiempo i mofu natun. Ngem pagaramman gapa ira na magana da anna na kokkofudda ta kongregasion nga usadda i pattoleda tapenu passerbian si Jehova. Anni i makoffun ta tadday nga kabataan nga mangaya kani Jehova tapenu makapaddesision tu mapia? Makasta nu bibbigan na tapus pannonopan na tu mapia i Efeso 5:15-17, NW. (Bibbigan.) Kabalin na nga bibbigan yatun, awayya na nga iyavu ta baggi na: ‘Anni kari “i uray ni Jehova”? Anni nga desision i mamagayayya ta nisa? Anni nga desision i makoffun niakan tapenu mosà ta kapianan i tiempò?’ Daddamman nga “marake ngana i aggaw nga pattolayattam” anna aranni ngana nga madaral yaw i mundo nga pammagurayan ni Satanas. Mas makasta gafu nu usattam i pattoletam tapenu mapagayayya tam si Jehova.

6. Anni i pinili ni Maria, anna ngatta makasta yatun nga pinili na?

⁶Ammum nakuan i prayoridad mu ira. Tapenu meyusa tam ta kapianan i tiempo tam, baka mawag tu maddesision ittam nu anni i piliattam ta dua nga gannug nga parehu mabba nga ari nga marake. Makagigiammu ittam ta pinabbisita ni Jesus ta balay da Maria anna Marta. Siguradu nga magayayya si Marta nga padulakkan si Jesus yari tu napakaru i niprepara na nga makan. Ngem ari tu kunnatun i kingngua na wagi na nga si Maria. Inapprobetcha ni Maria i pinabbisita na Yafu na nga si Jesus yatutta nagitubang yayya aranni ta nisa anna nagginna yayya ta ituttuddu na. Ari mabba nga ugal i kingngua ni Marta, ngem “pinili ni Maria i mapia.” (Luc. 10:38-42) Ta pappasa na tiempo, awayya na nga nakattaman ngana ni Maria nu anni i kinnan na tatun nga aggaw. Ngem magga ari na vuluvuga nakattaman i nagigiammu na kani Jesus. Tinagibalor ni Maria yatun nga tiempo nga kavulu na si Jesus. Tagibalorattam nakuan gapa i tiempo tam para kani Jehova. Kunnasi tam gafu meyusa ta kapianan yatun nga tiempo?

7. Ngatta kuruga importante i pakimallo, paggigiammu, anna pannono tu mapia?

⁷Parte na paddayaw tam i pakimallo, paggigiammu, anna pannono tu mapia. Nu makimallo ittam, makikomunika ittam ta Yama tam ta langi nga kuruga mangiddu ta nittam. (Sal. 5:7) Nu gigiammuattam gapa i Biblia, manga ittam tu “pakannammu ta Dios,” i Paggafuan na ngamin nga sirib. (Prov. 2:1-5) Nu mannono ittam gapa tu mapia, masingattam i  makasta ira nga kualidad ni Jehova anna i kappabbaw nga gakkag na para nittam anna ta ngamin nga pinaratu na. Danatun i kapianan nga pangusattam ta tiempo tam. Ngem kunnasi tam makua danatun nu limitadu i tiempo tam?

8. Anni i magigiammu tam ta pinangusa ni Jesus ta tiempo na ta tana-tana?

⁸Nu posible, mappili ka tu memammo nga lugar. Kunnatun i kingngua ni Jesus. Nige na nga pinegafuanan i ministerio na, 40 nga aggaw labbi yayya ta tana-tana. (Luc. 4:1, 2) Megafu ta memammo tari, awayya na i makimallo kani Jehova anna mapannonopan na tu mapia i uray na Yama na para ta nisa. Yatun i nangiprepara kani Jesus para ta kapurueba ira nga aranni na ngana nga pappasan. Kunnasim nga maparigan si Jesus? Nu dakal i familia nu, baka marigatakka nga magaleg tu memammo nga puestu onu lugar ta balenu. Baka puedem nga purueban ta lawan. Kunnatun i kukukuan ni Julie nu makimallo yayya kani Jehova. Gafu ta maddian ira na atawa na ta baddi laman nga apartment ta France, marigatan yayya nga magaleg tu puestu nu sitaw tattaddena laman anna awan tu mangistorbo ta nisa. Kinagi ni Julie: “Kadaggaw, umay ngà ta park tapus lumaka-lakag ngà. Makasta tari ta tattaddè laman, maka-concentrate ngà, anna talaga makibbidà si Jehova.”

9. Maski nu aru i mawag tu kuan ni Jesus, kunnasi na nga nipasingan nga importante ta nisa i pappakimallo kani Jehova?

⁹ Napakaru i mawag tu kuan ni Jesus. Ta ministerio na taw ta davvun, zinaddanan yayya na magaru nga tolay maski sitaw i angngayan na. Kayà da gare nga makikavulu ta nisa. Mittan paga lagu, ‘ngamin i totolay ta ili ay naggarammammung ta arubang na balay’ nga naddianan da Jesus tapenu laman masingadda yayya. Ngem maski kunnatun, siniguradu ni Jesus nga kanayun nga egga i tiempo na nga makimallo kani Jehova. Nige nga luttuag i bilag, minay yayya ta “lugar nga awan tu totolay” tapenu makimallo ta Yama na.​—Mar. 1:32-35.

10-11. Anni i mepappangngo nga tabarang ni Jesus ta disipulo na ira ta Mateo 26:40, 41, ngem anni i nesimmu?

¹⁰ Ta ultimu nga gabi ni Jesus taw ta davvun, turi ta aranni ngana mangultimu i ministerio na, nagaleg mangana yayya tu memammo nga lugar nu sitaw makapannono yayya tu mapia anna makimallo. Minay ira na apostoles na ta hardin na Getsemani. (Mat. 26:36) Tatun nga gabi, mepappangngo i tabarang ni Jesus ta disipulo na ira meyannung ta pakimallo.

¹¹ Mattangnga-na-gabi ngana ta pakadde da ta hardin na Getsemani. Kinagi ni Jesus ta apostol na ira nga “ari kamu nga makkaturug” tapus nanaw yayya tapenu makimallo. (Mat.  26:37-39) Durante nga makimallo yayya, nakakatrug i apostol na ira. Turi ta nadanganan na ira nga gikaturugan, kinagi mangana ni Jesus ta nira nga “mawag tu lukag kamu anna maddasal kamu.” (Bibbigan i Mateo 26:40, 41.) Mantindian ni Jesus nga fermi i vurung na apostol na ira anna nababbannag ngana ira. Yari tu megafu ta allo na ta nira, kinagi na nga “makafi i baggi.” Mamiddua paga nga nanaw si Jesus tapenu makimallo. Ngem ta panoli na, nadanganan na lagapa i disipulo na ira nga agga-katrug imbes tu makimallo.​—Mat. 26:42-45.

12. Anni i makua tam nu marigatan ittam nga makimallo gafu ta sobra i stress tam onu nababbannag ngana ittam?

¹²Pilian i kapianan nga tiempo. Nu karuan, baka marigatakka nga makimallo megafu ta stress ka onu nababbannag ngana. Ngem ari laman tu sikaw i kunnatun. Anni gafu i makuam? Nasanay i karuan nga makimallo kani Jehova nige da nga makkatrug ta gabi. Ngem nasingadda nga mas makasta nu dati ngana ira nga makimallo nu ari paga ira nga sikkatrug anna ari paga nga nababbannag. Mas maka-concentrate gapa i karuan nu makasta i posisiodda nga makimallo. Puede nga agga-itubang ira onu agga-palittukag. Ngem kunnasi nu grabe i vuru-vurummu onu nakkafi i nono mu yari tu marigatakka nga makimallo? Ikagim lagapa kani Jehova i mataga-tageno mu. Siguradu nga malippawa naka na minangngikallo nga Yama tam.​—Sal. 139:4.

13. Ngatta awayya na tu maka-istorbo i gadyet ira ta tiempo tam para kani Jehova?

¹³Alsammu i maka-istorbo ira ta paggigiammum. Ari laman tu pakimallo i makoffun ta nittam tapenu maddukko kani Jehova. Makoffun gapa i paggigiammu tam ta Biblia anna i pakistudy. Egga kari i makuam tapenu meyusam ta kapianan i tiempom ta paggigiammu anna pakistudy? Iyavu mu ta baggim: ‘Anni ira i maka-istorbo niakan nu maddaggun i study onu nu mappersonal study ngà?’ Egga kari i mattawag, ma-email, onu mattext nikaw ta gadyet mu ira? Binillion ngana i mangusa ta kunnatun ira nga gadyet. Kagian na karuan nga researcher nga marigatan ittam nga mak-concentrate nu egga laman ta biko tam i cellphone tam. “Ari ka gare nga makafokus ta kukukuammu,” kagian na tadday nga profesor ta psychology. “Tanakuan i  nononopammu.” Nige gapa nga mamegafu i asembli anna kombensiottam ira, kanayun nga meperaddam nga i-silent onu addappattam i gadyet tam ira tapenu ari nga maistorbo i tanakuan. Puede tam kari gapa nga kuan yatun nu magitetadday ittam tapenu ari ittam maistorbo ta gadyet tam ira anna meddattam tu tiempo si Jehova?

14. Segun ta Filipos 4:6, 7, kunnasi ittam nga uffunan ni Jehova tapenu maka-concentrate ittam?

¹⁴Mappoffukka kani Jehova tapenu maka-concentrate ka. Nu matageno mu nga kokkomforme i nononopammu durante nga mappersonal study ka onu nu maddaggun i study, mappoffukka kani Jehova. Nu egga gapa ira i pakavurungammu tapus agga-nono mu yatun, ikagumammu nakuan lagapa nga maffokus. Ikiddom kani Jehova i imammo nga manangngal ta futum anna ta “nono” mu.​—Bibbigan i Filipos 4:6, 7.

15. Anni i tadday nga pammakapianattam nu egga i tiempo tam para kani Jehova?

¹⁵ Mammakapia ittam nu iddattam tu tiempo i pakibbida anna pagginna tam kani Jehova kunne na gapa nu pannonopattam i meyannung ta nisa. Kunnasi? Ollu, mas makapaddesisiokka tu mapia. Kagian nittam na Biblia nga “i makikakkavulu ta masirib ay mabbalin tu masirib.” (Prov. 13:20) Ammu tam nga si Jehova i Paggafuan na sirib. Nu egga gafu i tiempo tam para ta nisa, mas mabbalin ittam gapa tu masirib. Mas malippawa tam gare nu kunnasi tam yayya nga mapagayayya anna malillitattam i desision ira nga makapataki ta nisa.

16. Nu egga i tiempo tam para kani Jehova, kunnasi ittam nga mabbalin tu mas malalaki ta panuddu tam?

¹⁶ Mekadua, mabbalikka tu mas malalaki ta panuddum. Nu egga i Bible study tam, tadday ta pinaka-importante nga goal tam ay uffunan yayya nga maddukko kani Jehova. Nu mas aru i tiempo tam nga makimallo kani Jehova anna gigiammuan i meyannung ta nisa, mas dumakal i aya tam ta nisa anna mas nga matudduattam i Bible study tam tapenu ayatan gapa si Jehova. Kunnatun si Jesus. Masingan ta paguvovug na nga ayatan na i Yama na. Yari tu napaguyu gapa i matalo ira nga tagatuttul na nga ayatan si Jehova.​—Juan 17:25, 26.

17. Ngatta paladdan na pakimallo anna na paggigiammu i pangurug tam?

¹⁷ Mekatallu, malladda i pangurug mu. Kada ipakimallo mu kani Jehova i giya, banna-bannay, onu uffun tapus tabbagan na yatun, malladda i pangurug mu ta nisa. (1 Juan 5:15) Anni paga i mamalladda ta pangurug mu? I pappersonal study. Daddammattam nga “i angngurug ay vunga na pagginna ta dumug.”  (Roma 10:17) Ngem tapenu mabbalin tu masikan i pangurug tam, ari nga makalanno i basta panga laman tu pakannammu. Anni gafu paga i mawag nga kuattam?

18. Ngatta importante i pannono tu mapia? Mangiyawa tu angngarigan.

¹⁸ Mawag tu pannonopattam tu mapia i magiggigiammu tam. Ikonsidera i ekspiriensa na nattura ta Salmo 77. Maguluan yayya megafu ta abbo na tu nawawadda ngana na kasi-Israelita na ira i fabor ni Jehova. Ari yayya nga makakatrug megafu tatun ira nga mamavvurung ta nisa. (Versikulo 2-8) Anni i kingngua na? Kinagi na kani Jehova: “Pana-panonopak-ku ngamin i kikkingnguam; ek-ku ira ngamin nga daddaddamman.” (Versikulo 12) Magga ammu na salmista i kingngua ira ni Jehova ta nappasa para ta totolena, ngem megafu ta vurung na, niyavu na lagapa i kunnaw: “I pagallo na Dios ay nagimmang pano ngana? Natalian pano ngana tu lussaw i pagiddu na?” (Versikulo 9) Ngem pinannonopan tu mapia na salmista i kikkingngua ira ni Jehova anna i pinangipasingan na tu allo ta nappasa. (Versikulo 11) Anni i efekto natun ta salmista? Nabbalin yayya tu kumbinsidu nga ari vuluvuga pagurayan ni Jehova i totolena. (Versikulo 15) Malladda gapa i pangurug mu nu pannonopammu i kingngua ira ni Jehova para ta totolena anna i kingngua na ira para nikaw.

19. Kunnasi ittam paga mammakapia nu egga i tiempo tam para kani Jehova?

¹⁹ I meka-appa anna i pinaka-importante ta ngamin, dumakal i pangaya mu kani Jehova. Aya i mamaguyu nikaw tapenu mattuppal kani Jehova, massakrifisio tapenu mapagayayya yayya, anna attamman i maski anni nga kapurueba. (Mat. 22:37-39; 1 Cor. 13:4, 7; 1 Juan 5:3) Awan ngana tu mas nabalor anne ta madukko nga pakikkofun kani Jehova!—Sal. 63:1-8.

20. Kunnasim nga meyusa ta kapianan i tiempom para kani Jehova?

²⁰ Daddammattam nga parte na paddayaw i pakimallo, paggigiammu, anna pannono tu mapia. Parigattam si Jesus nga nagaleg tu memammo nga lugar tapenu makimallo kani Jehova. Alsattam i maski anni nga mangistorbo ta nittam. Mappoffun ittam gapa kani Jehova tapenu maka-concentrate ittam nu egga i kukukuattam nga espiritual nga aktibidad. Nu usammu ta kapianan i tiempom sangawe, bala-balakkan naka noka ni Jehova tu mannanayun nga inango ta napabagu nga mundo.​—Mar. 4:24.