1, 2. Kunnasi nga nipasingan ni apostol Pablo nga mabbala-balo yaya ta allo na Dios?

 A nga makagi ni Pablo: “Ay egga i nebalinan na nipagallo [na Dios] niakan.” (Bibbigan i 1 Corinto 15:9, 10.) Ammu ni Pablo nga ari nakuan yaya mepappangngo ta daka-dakal nga allo na Dios megafu ta dati yaya nga mameppersigi ta Cristiano ira.

² Turi ta aranni ngana yaya nga matay, nattura yaya kani Timoteo: “Mabbala-balo ngà kani Cristo nga Yafu tam nga nangiyawa ta sikak-ku nga mangngua ta annungak-ku. Mabbala-balo ngà ta nikwenta nà tu pammakatalakkan, sinullo nà nga masserbi sa.” (1 Tim. 1:12-14) Anni yatun nga passerbi? Kinagi ni Pablo ta mangiyorollu ira ta kongregasion na Efeso nu anni i kasali tatun: “Awan tu kwenta niakan na inango ku, basta laman mabalik-ku i pangilammuyag ku ta Mapia nga Dumug nga meyannung ta allo na Dios.”​—King. 20:24.

3. Anni nga espesial nga serbisio i neyawa kani Pablo? (Innan i letratu ta gafu na artikulo.)

³ Anni nga ‘mapia nga dumug’ i nilayyagayya ni Pablo nga  nangipasingan ta allo ni Jehova? Kinagina ta Cristiano ira ta Efeso: “Nadumug nu ngana tu, gafu ta allo na Dios, niyawa na niakan yaw nga trabahu nga masserbi ta pammakapianan nu.” (Efe. 3:1, 2) Natunno si Pablo nga ilammuyag i mapia nga dumug ta ari nga Judio tapenu makasali gapa ira ta nagalan nga mammaguray kavulu ni Cristo ta Mesianiko nga Pappatulan. (Bibbigan i Efeso 3:5-8.) Makasta nga ehemplo para nittam nga moderno-aggaw nga Cristiano i talikarag ni Pablo ta ministerio. Ipasinganna gapa yatun nga “egga i nebalinan na nipagallo na Dios” sa.

4, 5. Ngatta makagi tam nga parehu i “Mapia nga Dumug na Pammaguray na Dios” ta “Mapia nga Dumug nga meyannung ta allo na Dios”?

⁴ Taw nga tiempo na pangurianan, nebilin ta totolay ni Jehova nga “melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay.” (Mat. 24:14) I mensahe nga ilayyagayya tam ay mensahe gapa na “Mapia nga Dumug nga meyannung ta allo na Dios” megafu ta malawà tam i ngamin nga iddanamattam nga bendision ta Pappatulan gukaban na allo ni Jehova nga nepasingan gukaban ni Cristo. (Efe. 1:3) Paparigattam kari si Pablo ta pangipasingan ta pappabalo ta allo ni Jehova gukaban na matalikarag nga pamministerio?​—Bibbigan i Roma 1:14-16.

⁵ Ta nappasa nga artikulo, nagigiammu tam nu kunnasi mabenefisiowan ta allo ni Jehova maski nu minattagaruli tam. Yatutta responsibilidad tam nga ipakannammu ta ngamin nga totolay nu kunnasi nga ipasingan ni Jehova i ayana anna nu kunnasi ira nga mabenefisiowan. Anni i karuan ta aspeto na allo ni Jehova nga mawag nga uffunattam i tanakuan tapenu maappresiada yatun?

6, 7. Nu iyesplika tam i tavvung ta totolay, kunnasi nga ilamma-lammuyag tam i mapia nga dumug nga meyannung ta allo na Dios?

⁶ Ta kaggawattam, aru i ari ngana makokkonsensia nu makaliwa ira, yatutta ariadda malippawa nu ngatta kawagan i tavvung. Ngem napakurug gapa na aru nga ariadda matageno i kurug nga pagayaya maski nu makuada lagapa i kayàda. Nu maka-uvovugda i Saksi ira ni Jehova, tari da laman malippawa i kebalinan na liwa, nu kunnasi nga makafekto nittam yatun, anna nu anni i mawag nga kuattam tapenu mapaliag tam ta pakka-aripan tatun. Nabanna-bannayan i mapia i giffutuadda ira nga mammuan nga megafu ta dakal nga aya anna allo ni Jehova, zinogna i anana ta davvun bilang tavvung tapenu mapaliag tam ta liwa anna ta resultana nga patay.​—1 Juan 4:9, 10.

⁷ Meyannung ta ideddukan ni Jehova nga Anana, nitura ni Pablo: “Ta megafu ta patay ni Cristo . . . napalubbangan ittam anna napakoma ittam ta katagaruliat-tam. Anni mabba i kadakal na inagallallo nga niyawa na Dios nittam! Ari nga maguku-gukug!” (Efe. 1:7) I sakrifisio nga tavvung ni Cristo i kadakallan nga prueba na aya ni Jehova nittam. Ipasinganna gapa yatun i abundansia nga allona. Kuruga makapabannay nga mammuan nga nu mangurug tam ta nevuvvu nga daga ni Jesus, mapakoma i liwi-liwa tam anna mapakarenuan i konsensia tam! (Heb. 9:14) Talaga makasta nga dumug yatun nga mawag tu mekagi ta tanakuan!

8. Ngatta mawag na imperfekto nga totolay i makikkofun ta Dios?

⁸ Nu ari nga mangurug i totolay ta tavvu ni Jesus, kontra i paningan na Dios nira. Yatutta responsibilidad tam nga ipakannammu  ta kasittoletam nga awayyada makikofun ta Dios. Nitura ni apostol Juan: “I sinni laman nga mangurug ta Ana na Dios ay egga sa i inango nga adde ta ngangangay. Ngem i sinni laman nga ari mangurug ta Ana na Dios ay awan sa yaw nga inango ngem mannanayun sa i batù na Dios.” (Juan 3:36) Pia ngana laman ta megafu ta sakrifisio ni Cristo, awayyana nga metoli i makasta nga relasiottam ta Dios. Kinagi ni Pablo: “Arayyu kamu gari ta Dios, anna nikalussaw nu yaya megafu ta marakay nga kukukuan anna appana-panono nu. Ngem sangoye, gafu ta patay na Ana na, pinabbalin nakamu na Dios tu kakkofun na.”​—Col. 1:21, 22.

9, 10. (a) Anni nga responsibilidad i niyawa ni Cristo ta nazelugan nga wawwaragina? (b) Kunnasi nga uffunan na tanakuan nga karneru i nazelugan nga wawwaragida?

⁹ Niyawa ni Jesus ta nazelugan nga wawwaragina ta davvun i kinagi ni Pablo nga “annungan nga mamabbalin ta karuan tu kakkofun na [Dios].” Ta pangiyesplikana taw, nitura ni Pablo ta ollu-siglo nga nazelugan ira nga Cristiano: “Ngamin danaw ay kingngua na Dios. Ay megafu kani Cristo, pinabbalin na ittam tu kakkofun na—ari ngana tu kontra na, anna niyawa na nittam i annungan nga mamabbalin ta karuan tu kakkofun na gapa. Yaw i ilammuyag mi: tu i Dios ay ikaya na i makipammapia ta ngamin nga totolay gafu kani Cristo. Arian na ngana nga ibilang tu mekontra nira i katagaruliad-da, anna nikargo na nittam i dumug nga mangipakannammu nu kunnasi na pakipammapia na nira. Sikami gafu i mangibaggi kani Cristo. Iyusa nakami na Dios nga makiyuvovug nikamu; ipakimemallo mi nga kagitta na si Cristo mismu i makimemallo nikamu: makipammapia kamu ta Dios!”​—2 Cor. 5:18-20.

¹⁰ Ibilang na tanakuan nga karneru nga pribilehio i panguffudda ta nazelugan nga wawwaragi ta ministerio. (Juan 10:16) Bilang representante ni Cristo, talaga dakal i billeda ta pattuddu tu espiritual nga kinakurug ta totolay anna panguffun nira nga mapeggan tu personal nga relasion kani Jehova. Importante yaw nga parte na trabahu nga pangipakannammu ta mapia nga dumug meyannung ta allo na Dios.

11, 12. Ngatta makasta nga dumug para ta totolay nga mammuan nga awayyada makimallo kani Jehova?

¹¹ Aru i maddasal megafu ta mabanna-bannayan ira tatun, ngem ariadda gamma mangurug nga tabbagan na Dios i pakimalloda. Mawag nga mammuadda nga ‘tattabbagan [ni Jehova] i dasa-dasal.’ Nitura ni salmista David meyannung ta Dios: “Ta tabbagam-mu i dasa-dasal mi ira. Ngamin i totolay ay aranniad-daka, megafu ta katagaruliad-da. Affutan nakami na katagaruliam-mi ira, ngem sikaw i mamakoma nira.”​—Sal. 65:2, 3.

¹² Kinagi ni Jesus ta disipulosna: “I anni laman nga ikiddaw nu gafu ta ngagak-ku ay kuak-ku.” (Juan 14:14) Kebalinanna nga awayya tam ikiddaw i “anni laman” nga mekunnay ta uray ni Jehova. Nipasiguradu ni Juan nittam: “Masikan i pammakatalo tam ta Dios, ta ammu tam tu tangngagan na ittam ta anni laman nga kiddawat-tam sa metuttul ta uray na.” (1 Juan 5:14) Anni mabba kastana nga ituddu ta tanakuan nga ari laman nga pamannabannay i pappakimallo, nu ari, kappabbaw nga dalan tapenu makaranni ta “trono na Dios nga minaggallallo.” (Heb. 4:16) Gukaban na pattuddu nira nu kunnasi i fustu nga pappakimallo, sinni nga Persona i paddasallan, anna nu anni i ipakimallo tam, moffunattam ira nga maddukko kani Jehova anna mabannayan ira ta tiempo na problema.​—Sal. 4:1; 145:18.

13, 14. (a) Anni i daka-dakal nga pribilehio na nazelugan ira ta mappange? (b) Anni nga makapabbaw nga trabahu i kuan noka na nazelugan para ta totolay?

¹³ Ari laman ta pangultimuan na maddaggun nga marake nga sistema na ganna-gannug i pagaddetan na allo ni Jehova. Meyannung ta makapabbaw nga pribilehio nga niyawa na Dios ta 144,000 nga nagalan tapenu mammaguray kavulu ni Cristo ta nelangitan nga Pappatulan, nitura ni Pablo: “Ngem ari nga maguku-gukug i inaggallallo na Dios anna kuruga dakal i pangaya na nittam. Ta nesipo ittam nga nakipaginnolay kani Cristo, maski nu nekwenta ittam tu natay ngana megafu ta ariat-tam nga angnguru-kurug. Ay napaliag kamu megafu ta inaggallallo na Dios! Gafu ta niketadday tam kani Cristo Jesus, pinaginnolay ittam na Dios nga nesipo kani Cristo tapenu makipammaguray ittam sa ta langi. Kingngua na yaw tapenu ta tiempo ira nga mappange, ipamamma na i ari nga matuku-tukug nga inaggallallo na nga masingan ta aya na nittam gafu ta kani Cristo Jesus.”​—Efe. 2:4-7.

¹⁴ Mariga nga nonopan i makapabbaw nga nireserba ni Jehova para ta nazelugan ira sonu magitubang ira ta trono nga mammaguray ta langi kavulu si Jesus. (Luc. 22:28-30; Fil. 3:20, 21; 1 Juan 3:2) Partikular nga ipamamma ni Jehova ta nazelugan ira “i ari nga matuku-tukug nga inaggallallo na.” Ira i mabbuu ta “bagu nga Jerusalem,” i atawa ni Cristo. (Nep. 3:12; 17:14; 21:2, 9, 10) Kavulu ira ni Jesus ta ‘panguru ta tulagan na nasa-nasion,’ nga igiggiya i minattuppal nga totolay tapenu mapalubbangan ira ta liwa anna patay anna mapabbalin ira tu perfekto.​—Bibbigan i Nepakannammu 22:1, 2, 17.

15, 16. Kunnasi nga ipasingan ni Jehova ta mappange i allona ta tanakuan ira nga karneru?

¹⁵ Mabibbig tam ta Efeso 2:7 nga mepasingan i allo ni Jehova ta “tiempo ira nga mappange.” Siguradu nga masingan ta bagu nga sistema ta davvun i “ari nga matuku-tukug nga inaggallallo” ni Jehova. (Luc. 18:29, 30) I paginnolay na totolay ta “Patay” i tadday ta kadakallan nga pangipasingan ni Jehova tu allona ta davvun. (Job 14:13-15; Juan 5:28, 29) Mapaginnolay i matalo nga lallaki anna babbay gari nga natay nige na sakrifisio nga patay ni Cristo, tuange ta tanakuan ira nga karneru nga matay nga matalo ta pangurianan nga aggaggaw, tapenu mebala-balayudda i masserbi kani Jehova.

¹⁶ Mapaginnolay gapa i minillion nga totolay nga natay nga ariadda nannammuan i meyannung ta Dios. Meddan ira tu tiansa nga makimoray ta kepangngattan ni Jehova nga mammaguray. Nitura ni Juan: “Ay nasingak-ku paga nga agga-taddag ta arubang na trono ngamin danuri i natay ngana, nga atannang anna alinno i paddia-paddiad-da. Ay navullag i libru ira anna navullag gapa i tadday paga nga libru​—i libru na matolay. Nasentensian i natay ira segun ta kikkingngua da nga netura ta libru ira. Pinalawan na bebay ngamin i natay nga egga sa anna pinalawan gapa na Patay tuange ta Hades nga dian na natay ira ngamin i natay nga egga nira. Nasentensian ira ngamin segun ta kikkingngua da.” (Nep. 20:12, 13) Siempre, mekiddaw ta napaginnolay ira nga gigiammuadda nu kunnasida nga iyaplika i prinsipio ira na Biblia. Tapus, mawag nga tuttuladda i makabenefisio nga instruksion nga egga ta naluku nga “libru,” nga tatun mannammuan i estandarte ni Jehova ta pattolay ta bagu nga sistema na ganna-gannug. Tadday mangana nga pangipasingan  tu allo ni Jehova i pangipakannammu ta naddianna yatun ira nga libru.

17. Anni nakuan i daddammattam kada mallayyagayya ittam?

¹⁷ Kuruga importante nga ilayyagayya tam i mapia nga dumug na Pappatulan megafu ta aranni ngana i panuppalan! (Mar. 13:10) Siguradu nga ipasingan na mapia nga dumug i allo na Dios. Daddammattam nakuan yaw kada mallayyagayya tam. I gakkag tam nu mallayyagayya tam ay idayaw si Jehova. Makua tam yaw gukaban na pangipasingattam ta totolay nga pangipasingan ta kappabbaw nga allo ni Jehova i ngamin nga bendision ta napabagu nga mundo.

18, 19. Kunnasi tam nga medayaw i allo ni Jehova?

¹⁸ Durante nga mallayyagayya tam ta tanakuan, awayya tam ipakanawag nga gukaban na pammaguray na Pappatulan ni Cristo, mabenefisiowan i totolay ta interu nga keyaplika na sakrifisio nga tavvung anna sesenu nga mabbalin tu perfekto i totolay. Kinagi na Biblia: “Ta egga noka i aggaw nga mapalubbangan ngamin i pinaratu ta naripannad-da nga kadaral. Ngamin noka ay mesipo gapa ta makapabbaw nga kapalubbang na ána na Dios.” (Roma 8:21) Posible laman yaw megafu ta daka-dakal nga allo ni Jehova.

¹⁹ Egga i pribilehio tam nga ipakannammu ta maggigginna ira, i makapabbaw nga promesa ta Nepakannammu 21:4, 5: “Funatan na [Dios] ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki. Ta napawan ngana ngamin i dana nga ganna-gannug.” Tapus kinagi ni Jehova, i agga-itubang ta trono, “Talibaguak-ku sangoye ngamin i ganna-gannug!” Kinagina paga: “Itura mu yaw ta kurug danaw nga uvovug ku anna awan tu paddudam-mu nira.” Medayaw tam i allo ni Jehova nu matalikarag nga ilayyagayya tam i mapia nga dumug ta tanakuan!