KURUGAN NA KARUAN nga inimbento laman na totolay i relihion; nonopan gapa na karuan nga usan na Dios i relihion tapenu uffunan i totolay nga makaranni sa. Anni makagim?

I KAGIAN NA BIBLIA

Egga “i kurug anna marenu nga relihion nga ikaya na Dios.” (Santiago 1:27) Naggafu ta Dios i marenu, onu kurug nga relihion.

ANNI PAGA I MAMMUATTAM TA BIBLIA?

• Tapenu mapagayaya i Dios, mawag tu nebase i relihion ta kinakurug ta Biblia.​—Juan 4:23, 24.

• Awan tu kuenta na relihion nga nebase ta ideya na totolay.​—Marcos 7:7, 8.

ANNI MAKAGIM?

• Wan

• Ari

• Depende

I KAGIAN NA BIBLIA

“Nonopat-tam nu kunnasi na pakka-uffu-uffut-tam nga mangipasingan ta aya anna pangngua ta mapia. Ariat-tam nga immangan i paggarammammung tam.” (Hebreo 10:24, 25) Kayà na Dios nga maggarammammung i maddayarayaw ira sa bilang organisado nga grupo.

ANNI PAGA I MAMMUATTAM TA BIBLIA?

• Mawag tu para-parehu i angngurug na mattaradday nga maddayarayaw ta Dios.​—1 Corinto 1:10, 11.

• Egga i pattaradday ta interu mundo na miembro ira na kurug nga relihion.​—1 Pedro 2:17.