1, 2. (a) Anni i ilustrasion ni Jesus meyannung ta makakkua ta koman? (b) Kunnasi nga ipasingan na istoria i vuka nga palag anna allo?

 NAGGAGGAMMIA nga minay ta plasa i makakkua ta koman nga namulan tu ubas tapenu magaleg tu mataddanan nga mattrabahu. Nakka-anugu ira na mataddanan ira tapus minay ngana ira ta koman. Ngem mawag paga na makakkua i mas aru nga trabahador, yatutta nanotoli yaya ta plasa tapenu magaleg tu aru paga nga taddananna, nga mangiyawa tu parehu nga sueldo maski nu fugag laman ira mattrabahu. Turi ta gabi ngana, inagalanna ngamin nga trabahadorna tapenu iyawa i pagada. Para-parehu i taddan nga niyawana ta kataggi-tadday, maski nu tangaggaw ira nattrabahu onu tangoras laman. Turi ta nannammuan yatun na napollu ira nga nataddanan, narreklamo ira. Siminabbag i makakkua ta koman: ‘Ari kari nga minanugu kamu ta nattratuattam nga taddan ta tangaggaw? Awan kari tu pakawayyà nga mangngua ta kayà ku ta kuartù lagapa? Onu mamassil kamu megafu ta vuka i palag ku nga manguffun?’​—Mat. 20:1-15.

² Iperaddamna yatun nittam nga istoria ni Jesus i tadday ta kualidad ira ni Jehova nga maruddu nga mabibbig ta Biblia​—i  ‘allona.’ (Bibbigan i 2 Corinto 6:1.) Gittana ari tu mepappangngo ta buu nga taddan i tangoras laman nga nattrabahu, ngem nangipasingan nira i makakkua tu nerumu-ruma nga pagallo. Meyannung taw nga termino nga “allo” segun ta aru nga bersion na Biblia, kinagi na tadday nga iskolar: “I simple nga kebalinanna yatun nga termino ay awan tu pagana anna ari nakuan mepappangngo nga regalu, gannug nga meyawa ta tadday nga tolay maski nu arianna pinabbannagan onu kepangngattan yatun.”

3, 4. Ngatta anna kunnasi nga nangipasingan si Jehova tu allo ta ngamin nga totolay?

³ Mabibbig ta Biblia i “neruma-ruma nga regalu nga niyawa na Dios.” (Efe. 3:7) Ngatta anna kunnasi nga iyawa ni Jehova yatun nga “nerumu-ruma nga regalu”? Nu nakua tam nakuan i ngamin nga ikiddaw nittam ni Jehova, mepangngo ittam ta allona. Ngem ariattam makua yatun. Yari tu nitura ni Patul Solomon: “Megafu ta awan tu matunung nga tolay ta davvun nga kanayun nga magangngua tu mapia anna ari vuluvuga nga makaliwa.” (Ecl. 7:20) Kunnatun gapa i kinagi ni Pablo: “Ta ngamin i totolay ay nattagaruli anna arayyu ira ta pamaliag na Dios” anna “i balo na pattagaruli ay patay.” (Rom. 3:23; 6:23a) Yatun i mepangngo nittam.

⁴ Ngem nipasingan ni Jehova i ayana ta minattagaruli nga totolay gukaban na awan tu kegittanna nga allo. Zinogna ta davvun tapenu matay para nittam “i tattadday nga Ana na,” i kadakallan nga regaluna. (Juan 3:16) Yari tu nitura ni Pablo meyannung kani Jesus “nga nabarungutan ta sangoye ta dayaw anna kekakua gafu ta inattamman na i patay, tapenu megafu ta allo na Dios, pammakapianan ngamin na totolay i patay na.” (Heb. 2:9) Wan, i “regalu na Dios ay i ngangangay nga pattolay gafu ta niketadday tam kani Cristo Jesus nga Yafu tam.”​—Roma 6:23b.

5, 6. Anni i resultana nu pammagurayan ittam na (a) liwa (b) allo?

⁵ Kunnasi nga narensia na totolay i liwà anna patay nga mamarriga nittam ngamin? Niyesplika na Biblia: “Gafu ta nipattagaruli na tadday nga tolay​—si Adan,” nammaguray i patay ta gaka-gakana. (Roma 5:12, 14, 17) Ngem mapia ngana laman ta awayya tam maddesision nga ari mapammagurayan na liwa. Gukaban na pangurug ta sakrifisio nga tavvu ni Cristo, makimoray ittam ta allo ni Jehova. Kunnasi? “Ngem nu kunnasi na nepabbalin tu aru na katagarulian, ay mas paga lallagu nga ziminakal i allo na Dios. Nu kunnasi gafu na pammaguray na katagarulian megafu ta patay, kunnatun gapa i pammaguray na allo na Dios megafu ta pamakatunung na ta tolay. Ay yaw i mangiyadde nittam ta mannanayun nga attolay gafu kani Jesu-Cristo nga Yafu tam.”​—Roma 5:20, 21.

⁶ Maski nu minattagaruli ittam, ariattam pagurayan nga i liwa i mammaguray ta pattoletam. Nu makaliwa ittam, ikiddaw tam i pamakoma ni Jehova. Nitabarang ni Pablo: “Ari nga mepangngo tu pammagurayan nakamu pagalaman na katagarulian, ta ari kamu nga mattolay ta pakawayya na dob, nu ari ta pagallo na Dios.” (Roma 6:14) Yatutta egga tam ngana ta pammaguray na allo. Kunnasi? Niyesplika ni Pablo: “I inaggallallo na [Dios] . . . i mangituddu nittam tu pallikurat-tam i attolay nga ari nga mekunnay ta Dios, tuange ta pakkaraga ta neravvunan ira nga ganna-gannug, ay tu mattolay ittam toye ta utun na davvun nga matangngallat-tam i ginnonopat-tam, matunung ittam anna mekunnay ta Dios.”​—Tito 2:11, 12.

7, 8. Anni i kebalinan na “madduma-ruma i pakawayya na allo” ni Jehova? (Innan i letratu ira ta gafu na artikulo.)

⁷ Nitura ni apostol Pablo: “I kataggi-tadday nikamu ay niddan na Dios ta awayya na nga makua. Kunna mapia nga manangngal, iserbi nu ta pammakapian na kataggi-tadday danaw nga madduma-ruma nga pakawayya nga neyawa na dios nikamu.” (1 Ped. 4:10) Anni i kebalinanna yatun? Maski nu anni nga kapurueba ta pattolay i mepa-arubang nittam, moffunan ittam ni Jehova. (1 Ped. 1:6) Kanayun nga ipasingan na Dios i allona ta kada problema tam.

⁸ Kakuruganna, naddumu-ruma i pakawayya na allo ni Jehova. Nitura ni apostol Juan: “Megafu ta pagallo na nga ari makkurang, inalawa tam ngamin sa i mattutunug nga bendision.” (Juan 1:16) Marresulta ta aru nga bendision i nadduruma nga pangipasingan ni Jehova tu allona. Anni i karuan tatun?

9. Kunnasi ittam nga mabenefisiowan ta allo ni Jehova, anna kunnasi tam ipasingan i appabalo tam tatun?

⁹ Kapakoma na liwi-liwa tam. Megafu ta allo ni Jehova, mapakoma ittam ta liwi-liwa tam, basta mabbabawi anna tulu-tuloy ittam nga mappursigi nga labanan i marake ira nga pakkaraga tam. (Bibbigan i 1 Juan 1:8, 9.) Mabbala-balo ittam nakuan megafu ta allo na Dios anna yatun nakuan i mamaguyu nittam nga dayarayawan yaya. Turi ta sinurakan ni Pablo i Cristiano ira nga kagittana gapa nga nazelugan, kinagina: “Pinaliag na ittam [ni Jehova] ta pakapangngua na zibbo anna niyali na ittam ta pammagurayan na meddu nga ana na, ay gafu sa, napalubbangan anna napakoma ittam ta katagarulian.” (Col. 1:13, 14) Megafu ta napakoma i liwi-liwa tam, vuka nittam i aru nga makapabbaw nga bendision.

10. Anni nga bendision i nalawa tam megafu ta allo na Dios?

¹⁰ Memammo nga relasion ta Dios. Megafu ta narensia tam nga liwa, kontra ittam ngana na Dios ta nikeyana tam paga laman. Ammu ni Pablo yatun: “Gari ay kontra ittam na Dios, ngem gafu ta patay na Ana na, pinabbalin na ittam tu kakkofun na.” (Roma 5:10) Egga memammo nga relasiottam kani Jehova megafu tatun nga pakkofun. Segun kani Pablo egga i koneksionna yatun ta allo ni Jehova. Kinagina ta nazelugan nga wawwaragi ni Cristo: “Ay sangoye ta napakatunung ngana ittam gafu ta angngurug, kakkofun ittam ngana na Dios gafu ta Yafu tam nga Jesu-Cristo. Gafu ta angngurug sa, neyaranni ittam ta inaggallallo na Dios, ay yaw i matageno tam toye ta maddagga-raggun.” (Roma 5:1, 2) Anni kastana nga bendision!

11. Kunnasi nga inuffunan na nazelugan i minillion nga tanakuan nga karneru nga mabbalin tu matunung?

¹¹ Mebilang ittam nga matunung. Neyanà tam ngamin nga ari matunung. Ngem niprofesiya ni profeta Daniel nga durante ta pangurianan nga aggaggaw, “danuri egga pakalippawana,” i nazelugan ira, ay “mangirattal ta aru ta kinatunung.” (Bibbigan i Daniel 12:3.) Gukaban na pallayyagayya anna panudduda, nabbalin tu matunung ta arubang ni Jehova i minillion nga tanakuan nga karneru. (Juan 10:16) Ngem nabbalin laman yatun nga posible megafu ta allo ni Jehova. Nipakanawag ni Pablo: “Gafu ta ari kapaga-pagan nga inaggallallo na Dios, pinabbalin na ittam ngamin tu matunung gafu kani Cristo Jesus nga namalubbang nittam.”​—Roma 3:23, 24.

12. Anni i koneksion na pakimallo ta allo na Dios?

¹² Makaranni ta trono na Dios gukaban na pakimallo. Megafu ta allo ni Jehova, makaranni ittam ta nelangitan nga tronona gukaban na pakimallo. Kakuruganna, kinagi  ni Pablo: “Ari ittam gafu nga mabbabang nga umaranni ta trono na Dios nga minaggallallo.” (Heb. 4:16a) Niyawa ni Jehova nittam yatun nga pribilehio, “megafu ta niketadday anna angngurug tam kani Cristo, egga nittam i sikan na nono nga umay nga sigga-ammakatalo ta arubang na Dios.” (Efe. 3:12) Talaga makapabbaw nga pangipasingan ni Jehova tu allona i pakaranni tam sa gukaban na pakimallo.

13. Kunnasi nga makoffun nittam i allo “ta tiempo na pagawag tam”?

¹³ Uffun ta mepangngo nga tiempo. Nipagaram ni Pablo nga makimallo ittam kani Jehova nga ari ittam mabbabang, “tapenu alawatat-tam i allo anna bendision nga manguffun nittam ta tiempo na pagawag tam.” (Heb. 4:16) Kada mepa-arubang ittam ta problema onu kavurungan, awayya tam makkiddaw tu uffun kani Jehova. Maski nu ari tam nakuan mepappangngo, tattabbaganna i pakimallo tam, maruddu nga gukaban na kapangngurug tam, “yatun tu awayya tam nga kagian nga sigga-ammakatalo, ‘I Yafu i manguffun niakan, awan tu ek-ku nga paganassingan. Anni i makua na tolay niakan?’”​—Heb. 13:6.

14. Kunnasi nga mabenefisiowan i giffutuattam ta allo ni Jehova?

¹⁴ Mabanna-bannayan i giffutuattam. Megafu ta allo na Dios, mabanna-bannayan i natakitan nga futu tam. (Sal. 51:17) Nitura ni Pablo ta Cristiano ira ta Tesalonica nga mapeppersigi: “Ay megafu ta inaggallallo na Yafu tam nga Jesu-Cristo anna Dios nga Yama tam, nga mangaya anna nangiyawa nittam ta masikan nga pagiddanama anna sikan na nono, paray nakuan tu maggutu anna mapasikan kamu nga mangngua anna maguvovug ta anni laman nga mapia.” (2 Tes. 2:16, 17) Kuruga makapabannay nga mammuan i meddu nga panangngal ni Jehova nittam megafu ta allona!

15. Megafu ta allò na Dios, anni i ma-iddanama tam?

¹⁵ Iddanama nga mannanayun nga inango.  Megafu ta minattagaruli ittam, awan tu iddanama tam nu awan i Dios. (Bibbigan i Salmo 49:7, 8.) Ngem nangiyawa si Jehova nittam tu makakkasta nga iddanama. Nipromesa ni Jesus ta disipulosna: “Ta ikaya na Yamà tu ngamin i makasingan anna mangurug ta Ana ay matolay adde ta ngangangay.” (Juan 6:40) Wan, tadday nga regalu i iddanama nga mannanayun nga inango, makapabbaw nga pangipasingan na Dios tu allona. Talaga nga naappresia ni Pablo yatun yari tu kinagina: “Ta nipemamma na Dios i inaggallallo na ta ngamin nga totolay tapenu mapaliag ira.”​—Tito 2:11.

16. Kunnasi nga inabuso na ollu ira nga Cristiano i allo na Dios?

¹⁶ Megafu ta mangiyawa nittam tu aru nga bendision i allo ni Jehova, ariattam nakuan nonopan nga kunsintianna i ngamin nga kondukta. Egga ira i Cristiano ta ollu tiempo nga “pabbalinad-da i allo na Dios tu ponnakig da nga mangngua ta neravvunan nga karagatan na baggi da.” (Judas 4) Pagabbo na ari matalo ira nga Cristiano nga awayyada makaliwa megafu ta pakoman gabbalaman ira ni Jehova. I mas marake paga, ininfluwensiadda i wawwaragida nga kuan gapa i marake nga kukukuadda. Maski ta kaggawattam, “manginsulto ta Espiritu nga minaggallallo” i sinni laman nga magangngua tu kunnatun.​—Heb. 10:29.

17. Anni i serioso nga nitabarang ni Pedro?

¹⁷ Ta kaggawattam, nelloko ni Satanas i karuan nga Cristiano ta pannono nga megafu ta allo na Dios, awayyada nga makaliwa nga ari ira nga panunnutan na Dios. Ngem maski nu sigga-paran si Jehova nga mamakoma ta mabbabawi ira, ekspektanna nga mappursigi ittam nga labanan i tendensia nga makaliwa. Ininspiranna si Pedro nga mattura: “Ngem sikamu nga iddeddukak-ku nga kakkofun, ammu nu ngana yaw. Magimmugug kamu gafu, ta marakay nu meyawawak-kamu megafu ta ugo nga tuddu na totolay nga minannadda ta dob, ay malonan nu lallagu i mapia ngana nga paddia-paddian nu. Ikana-kanayun nu lagu tu mammungan i pakannammu nu ta Yafu anna Manavvu nittam nga Jesu-Cristo, ay tu mammungan i pangalawa nu ta allo na.”​—2 Ped. 3:17, 18.

18. Megafu ta allo ni Jehova, anni ira i obligasiottam?

¹⁸ Megafu ta mabbala-balo ittam ta allo ni Jehova, responsibilidad tam sa anna ta karruba tam nga usan yatun nga regalu tapenu idayaw yaya anna mabenefisiowan i kasittoletam. Kunnasi? Simibbag si Pablo: “Iyusa tam i madduma-ruma nga niyawa na Dios nittam segun ta allo na ta kataggi-tadday. . . . Nu i niyawa na ay passerbi, masserbi ittam; nu pattuddu, mattuddu ittam; nu pamasikan ta nono, mawag tu kuat-tam; . . . ay nu mangipasingan ta allo, mangikallo ittam ta mapia nga nono.” (Roma 12:6-8) Megafu ta allo ni Jehova nittam, obligadu ittam nga mattalikarag ta pallayyagayya, tudduan i tanakuan meyannung ta Biblia, pagaramman i kapangngurug tam, anna pakoman i sinni laman nga nakataki

19. Anni nga responsibilidad tam i magigiammu ta tumunug nga artikulo?

¹⁹ Megafu ta mabbala-balo ittam ta aya na Dios, mapaguyu tam nakuan nga kuan i adde na mawayya tam ta ‘pangilammuyag ta Mapia nga Dumug nga meyannung ta allo na Dios.’ (King. 20:24) Detalyadu nga gigiammuattam ta tumunug nga artikulo yaw nga responsibilidad.