1. Iyilustra nu ngatta importante nga ammu tam nu anni ngana i oras anna nu anni i mesissimmu ta pallevu tam. (Innan i letratu ta gafu na artikulo.)

 FIVE, four, three, two, one! Durante nga masingattam yatun nga countdown ta video screen ta entablado, ammu tam nga tiempo ngana nga magitubattam tapenu ginnan i musika ta pamegafu na sesion na kombension. Oras ngana tapenu ginnattam i makakkasta nga musika na orkestra na Watchtower anna, i pinaka-importante, meprepara i nono anna futu tam ta tumunug ira nga palappa. Ngem kunnasi nu ari paga nga nakafokus i karuan, makikkistoria anna makalaka-lakag paga laman ira kavulu i kokkofudda, gittana ariadda ammu nga mamegafu ngana i programa? Ariadda nasifutan nu anni ngana i oras anna nu anni i mesissimmu ta pallevuda​—egga ngana i tserman ta entablado, maddaggun ngana i musika, anna naka-itubang ngana i totolay. Makoffun yatun nga eksena tapenu maappresia tam i “countdown” ta mas importante nga mesimmu ta mappange, nga mas kawagattam i mappara-paran. Anni yatun?

2. Ngatta kinagi ni Jesus ta disipulosna nga ‘mappara-paran’ ira?

² Turi ta kinagi ni Jesu-Cristo ta disipulosna i meyannung ta “panuppalan na mundo,” nipagaramna: “Magimmugug kamu  gafu anna mawag tu sigga-parak-kamu ta arian nu ammu i dattal natun nga tiempo.” Kabalinna yatun, kinagina mangana: “Mawag tu sigga-parak kamu.” (Mat. 24:3; bibbigan i Marcos 13:32-37.) Ipasingan na nitura ni Mateo nga sinabarangngan ni Jesus i disipulosna nga magalerto: “Yatun tu mappara-parak-kamu ta arian nu ammu nu anni nga aggaw i panoli na Yafu nu. . . . Mawag gafu tu kanayun kamu gapa nga agga-paran, ta manoli i Ana na Tolay ta oras nga arian nu nga iddanaman.” Kinagina mangana: “Yatun tu mappara-parak-kamu, ta arian nu nga ammu i aggaw onu oras na panolì.”​—Mat. 24:42-44; 25:13.

3. Ngatta mawag tu ginnattam i tabarang ni Jesus?

³ Bilang Saksi ni Jehova, seriosowattam yatun nga tabarang ni Jesus. Ammu tam nga araranni tam ngana ta “panuppalan na mundo” anna baddi ngana laman i oras nige nga mamegafu i “kanninipang noka nga ziga-riga”! (Dan. 12:4; Mat. 24:21) Masingi-singattam i kavvuru-vurung nga gerra, umara-aru nga immoralidad anna kinamarake, gulu ta relihion, bisin, epidemia, anna lunig ira nga mesissimmu ta interu mundo. Ammu tam i makapabbaw nga pallayyagayya ta Pappatulan nga kukukuan na totolay ni Jehova ta interu mundo. (Mat. 24:7, 11, 12, 14; Luc. 21:11) Ini-innaggattam nu anni i kebalinanna para nittam na panoli na Yafu anna i ketuppal na gakkag na Dios.​—Mar. 13:26, 27.

4. (a) Ngatta makagi tam nga ammu ngana ni Jesus i dattal na Armagedon? (b) Maski nu ari tam ammu i pamegafu na dakal nga ziga, anni i masiguradu tam?

⁴ Ammu tam nga egga i eksakto nga oras na pamegafu na kada sesion na kombension. Ngem maski anni kuattam, ari tam mannammuan i eksakto nga dagun, yammanno ngana i aggaw anna oras na pamegafu na dakal nga ziga. Kinagi ni Jesus turi ta egga yaya ta davvun: “Awan vuluvuga tu makannammu ta idadattal natun nga aggaw onu oras, maski i anghel ira ta langi onu i Ana; i Yama laman i makannammu.” (Mat. 24:36) Ngem neddan tu autoridad si Jesus ta langi nga makiggerra kontra ta mundo ni Satanas. (Nep. 19:11-16) Yari tu rasonable nga mekagi tam nga ammu ngana ni Jesus nu sonu anni i dattal na Armagedon. Ngem ariattam ammu yatun. Yatutta mawag tu sigga-paran ittam adde ta dattal na dakal nga ziga. Siguradu nga ammu ni Jehova i oras na kesimmuna yatun. Sinunnona ngana i eksakto nga oras na panuppalan. Namegafu ngana i “countdown” para ta pamegafu na dakal nga ziga, anna ari nga “matalattan” yatun! (Bibbigan i Habakuk 2:1-3.) Kunnasi tam nga masiguradu yatun?

5. Anni nga angngarigan i mangipasingan nga kanayun nga matuppal ta eksakto nga tiempo i profesiya ira ni Jehova?

⁵ Kanayun nga matuppal ta eksakto nga tiempo i profesiya ira ni Jehova! Ikonsidera i eksakto nga niketuppal na pamaliagna ta Israelita ira ta Ehipto. Meyannung ta Nisan 14, 1513 B.C.E., kinagi ni Moises: “Ta ultimo na meka-430 nga dagun, taw mismu nga aggaw, ngamin nga napakaru nga totolay ni Jehova ay nallawan ta davvun na Ehipto.” (Ex. 12:40-42) Namegafu yatun nga “430 dagun” turi 1943 B.C.E. turi ta nagafekto i pakkasinabban ni Jehova kani Abraham. (Gal. 3:17, 18) Turi kua, kinagi sa ni Jehova: “Ammuammu tu siguradu nga i gakam ay mabbalin tu dayu ta lugar nga ari da kukua, anna aripannan ira na totolay tari anna persigiadda ira ta 400 nga dagun.” (Gen. 15:13; King. 7:6) Manawag nga namegafu yatun nga pameppersigi ta 1913 B.C.E. turi ta inuyaw ni Ismael si Isaac turi ta tiempo nga nafutà, anna nagultimo yatun turi ta nanaw ta Ehipto i Israelita ira ta 1513 B.C.E. (Gen. 21:8-10; Gal. 4:22-29) Wan, appa-siglo  nigena nga mesimmu yatun, sinunno ngana ni Jehova i eksakto nga tiempo na kapaliag na totolena!

6. Ngatta siguradu ittam nga ipaliag ni Jehova i totolena?

⁶ Si Josue nga tadday ta napaliag ta Ehipto, niperaddamna ta interu Israel: “Kurug tu ammunu ta interu nga futunu anna ta interu nga kararuanu nga awan tu maski tadday nga uvovug ta ngamin nga makakkasta nga nipromesa ni Jehova nikamu i ari nga natuppal. Natuppal ngamin yatun ira para nikamu. Awan tu maski tadday nga ari natuppal.” (Jos. 23:2, 14) Makasiguradu ittam gapa nga ari maffaliu i nipromesa ni Jehova nga kapaliag tam ta dakal nga ziga. Ngem nu kayà tam i mapaliag ta karadaralna yaw nga sistema, mawag tu mappara-paran ittam.

7, 8. (a) Anni i papel na guardia ta ollu tiempo, anna anni i magigiammu tam tatun? (b) Mangiyawa tu angngarigan na awayyana nga mesimmu nu makakatrug i guardia.

⁷ Makagigiammu ittam ta importansia na passifi-sifu gari. Aru nga darakal nga siudad gari​—kagitta na Jerusalem​—i napalevutan tu atannang ira nga pader. Yatun i mapprotekta nira ta panallung na kalaban. Egga gapa atannang nga torena, nga tatun nga meripa i interu siudad. Aggaw anna gabi nga nakapuestu ta pader anna ta trangka i guardia ira. Ira i mangalerto ta totolay ta siudad nu egga i duttal nga peligro. (Isa. 62:6) Mappeligro i inango nu ari nga mattalupaddian nga alerto anna atentibo ta puestuda i magguardia ira.​—Eze. 33:6.

⁸ Kinagi na Judio nga historiador nga si Josefus nga ta 70 C.E., natallung na armada na Romano i Tore na Antonia, nga nakatuvvug ta pader na Jerusalem, megafu ta nakakatrug i guardia ira ta trangka. Tatun i nattallungan na Romano ira tapus sinuggida i templo. Narresulta yatun ta kadakallan nga ziga nga naekspiriensa ta Jerusalem anna ta nasion na Judio.

9. Anni i ari ammu na aru nga totolay ta maddaggun?

⁹ Aru nga nasion ta kaggawattam i egga “guardiada”​—patrol ira ta pagaddetan na nasiodda anna high-tech ira nga surveillance system. Magguardia ira ta sinni laman nga mattallung ta teritoriada anna ta kalabadda nga mamappeligro ta seguridad na nasion. Masingan laman na kunnatun nga “guardia” i peligro ira nga maggafu ta gobierno na tolay onu ta totolay. Ariadda ammu i kegga anna kukukuan na nelangitan nga Pappatulan na Dios ta pammaguray ni Cristo anna i papelna yatun ta mappange nga pangukum ta ngamin nga nasion. (Isa. 9:6, 7, ftn.; 56:10; Dan. 2:44) Ngem gukaban na pabbalittam tu alerto anna na passifi-sifu ta espiritual, sigga-paran ittam sonu duttal yatun nga aggaw na pangukum.​—Sal. 130:6.

10, 11. (a) Anni i pagimmugurattam, anna ngatta? (b) Anni i makakumbinsi nikaw nga nainfluwensian ngana na Diablo i totolay nga ari maginteres ta profesiya na Biblia?

¹⁰ Nonopammu i tadday nga guardia nga interu gabi nga agga-sikkag. Nababbannag anna sikkatrug ngana yaya sonu aranni ngana mabalin i pagguardiana. Kunnatun gapa nittam, durante nga umara-aranni ittam ta panuppalan na sistema na ganna-gannug, mas mariga ngana para nittam i mattalupaddian nga agga-lukag. Talaga kaddaraddam nu ariattam makapassifu! Gigiammuattam i tallu ta marake ira nga influwensia nga nu ariattam makapagimmugug, ari ittam makapagalerto anna makapassifu.

¹¹ I-influwensian na Diablo i totolay nga ari maginteres ta espiritual. Nige na patay  ni Jesus, mamittalluna nga sinabarangngan i disipulosna meyannung ta “mammaguray ta mundo.” (Juan 12:31; 14:30; 16:11) Ammu ni Jesus nga pattalupaddianan na Diablo i totolay ta espiritual nga zibbo tapenu ariadda matageno i ketuppal na profesiya ira na Dios meyannung ta mappange. (Zef. 1:14) Vinulag ni Satanas i ginnonopan na totolay gukaban na imperio na falso nga relihion. Anni kari i nammuammu ta pakiyuvovugmu ta tanakuan ira? Ari kari nga sinakkabban ngana na Diablo i ginnonopan na ari ira mangurug meyannung ta panuppalan na sistema na ganna-gannug anna ta kinakurug nga maddaggun ngana mammaguray si Cristo ta Pappatulan na Dios? (2 Cor. 4:3-6) Ari kari nga kanayummu nga magigginna nga kagian na totolay, “Ari ngà interesadu”? Kanayun nga awan tu interesda nu ikagi tam i meyannung ta pappangetan na mundo.

12. Ngatta ariattam nakuan nga mappelogo ta Diablo?

¹² Ariammu pavulunan nga makadismaya ta passifi-sifumu i kawan tu interes na tanakuan. Mas aru i ammum anne nira. Nitura ni Pablo ta kapangngurugna: “Ta ammu nu tu duttal i Aggaw na Panoli na Yafu.” Tapus kinagina paga: “Kagitta [yatun] na gavva nga angay na makkoko nu gabi.” (Bibbigan i 1 Tesalonica 5:1-6.) Nitabarang ni Jesus nittam: “Sigga-parak-kamu, ta i Ana na Tolay ay manoli ta oras nga arian nu nga iddanaman.” (Luc. 12:39, 40) Aranni ngana nga ilogo ni Satanas i magaru nga kurugadda nga “mapia i paddia-paddian anna awan tu mekassing.” Ilogona i totolay tapenu nonopadda nga makasta i paddia-paddian ta mundo. Kunnasi gapa nittam? Ari nga “duttal yatun nga Aggaw [nittam] nga kagitta na dattal na makkoko” nu mattalupaddian nga “agga-lukag anna kanayun nga alerto i appana-panono tam.” Yatutta mawag tu kagaggaw nga bibbigattam i Biblia anna monag nga pana-panonotan i ikakkagi ni Jehova nittam.

13. Kunnasi makafekto ta totolay i espiritu na mundo, anna kunnasi tam nga malillitan yatun?

¹³ Pakpakatrugan na espiritu na mundo i totolay ta espiritual. Aru i okupadu ta inaggaw nga pattoleda yatutta ariadda nga sigga-nono ta espiritual nga kawagadda. (Mat. 5:3) Okupadu ira ta material nga ganna-gannug ta mundo nga mangipagaram ta  “karagatan na baggi, ganna-gannug ira nga makatenta ta mata.” (1 Juan 2:16) Kuruga ininfluwensian na industriya na dibersion i totolay ta “pappaga-pagayaya” anna mas massikan i tentasion ira ta pappasa na kada dagun. (2 Tim. 3:4) Yari tu kinagi ni Pablo ta Cristiano ira nga “immangan nu ngana i pamagustu nu ta neravvunan nga karagatan na baggi nu,” nga mappakatrug ta espiritual.​—Roma 13:11-14.

14. Anni i pagimmugurattam segun ta Lucas 21:34, 35?

¹⁴ Imbes nga espiritu na mundo, i espiritu na Dios nakuan i manginfluwensia ta pattoletam. Gukabanna yatun, niyawa ni Jehova nittam i manawag nga pakalippawa ta mesimmu ira ta mappange. ^[1] (1 Cor. 2:12) Ngem ammu tam nga ari tu mawag nga egga kappabbaw nga gannug i mappalomag nittam ta espiritual. Maski ordinario nga ganna-gannug ay awayanna mappakatrug nittam ta espiritual. (Bibbigan i Lucas 21:34, 35.) Uyu-uyawan ittam na tanakuan megafu ta passifi-sifu tam, ngem ari nga rason yatun tapenu mawawattam i pabbalittam tu alerto. (2 Ped. 3:3-7) Regular ittam lallagu nakuan nga makilallang ta kapangngurug tam ta study ira, nga dian na espiritu na Dios.

15. Anni i nesimmu kada Pedro, Santiago, anni Juan, anna kunnasi nga posible nga mesimmu yatun nittam?

¹⁵ Pakkafian na kina-imperfekto tam i determinasiottam nga mattalupaddian nga alerto. Ammu ni Jesus nga imperfekto i totolay anna egga i pakkafiadda. Nonopattam i nesimmu ta gabi nige nga patayadda si Jesus. Tapenu mattalupaddian yaya nga matalo, kawaganna i makkiddaw tu sikan ta nelangitan nga Yamana. Kinagina kada Pedro, Santiago, anni Juan nga ‘mawag tu lukag ira’ durante nga makimallo yaya. Ngem ariadda pinanono nu kunnasi kaseryoso i mappange nga mesimmu. Imbes nga bantayadda i Yafuda, nappaffu ira ta pakkafiadda tapus nakkatrug ira. Ngem maski nu nababbannag si Jesus, lukag lagapa yaya anna nakimallo ta Yamana. Kunnatun nakuan i kingngua na kakavvuluna.​—Mar. 14:32-41.

16. Segun ta Lucas 21:36, kunnasi nga kinagi ni Jesus nga mattalupaddiattam nga “lukag ta espiritual”?

¹⁶ Ari laman nga makasta nga motibo i kayà kagian na “lukag ta espiritual.” Piga aggaw nige na nesimmu ta Getsemane, kinagi ni Jesus tatun gabbalaman nga disipulosna nga makimemallo ira kani Jehova. (Bibbigan i Lucas 21:36.) Tapenu mattalupaddian nga alerto ta espiritual, mawag gapa nga kanayuttam makimallo.​—1 Ped. 4:7.

17. Kunnasi tam masiguradu nga nakaparan ittam ta aranni ngana nga mesimmu ta mappange?

¹⁷ Megafu ta kinagi ni Jesus nga duttal i panuppalan ‘ta oras nga ariattam nga iddanaman,’ ari nga yaw i oras tapenu makkatrug ittam ta espiritual, ari nga oras tapenu mappursigi ittam ta ilusion anna fantasia ni Satanas anna na mundona anna ta pakkaraga na baggi tam. (Mat. 24:44) Gukaban na Biblia, ipakannammu nittam na Dios anna ni Cristo i aranni ngana nga iyawada nittam ta mappange anna nu kunnasi ittam nga mattalupaddian nga massifi-sifu. Mawag tu maffokus ittam ta espiritualidad tam, relasiottam kani Jehova, anna ta interes ira na Pappatulan. Mawag nga ammu tam i tiempo anna i mesissimmu tapenu nakaparan ittam ta anni laman nga duttal. (Nep. 22:20) Mappeppeligro i inango tam!