Awan tu libru nga meyannung ta relihion i kagitta na Biblia. Yaw laman i libru nga naka-influwensia ta angngurug na aru nga totolay ta unag na apaddu nga tiempo. Yaw gapa laman i libru nga kuruga nainspeksion anna nakritika.

Angngariganna, duda i karuan nga iskolar nu talaga kagitta na orihinal ira nga kopia i moderno nga Biblia. “Ariattam masiguradu nu nalà anna netransleyt tam tu fustu i orihinal nga teksto,” i kinagi na tadday nga propesor nga maggigiammu meyannung ta relihion. “Puru kopia nga napannu tu kamali i egga nittam, anna nakua i aru taw nga kopia aru nga siglo kabalin nga netura i orihinal, anna manawag nga talaga neruma yatun ira.”

Kuestionan gapa na karuan nu talaga kurug i Biblia megafu ta relihion nga neyanakadda. Angngariganna, netuddu kani Faizal na ari-Cristiano nga familiana nga masanto nga libru i Biblia ngem noli. “Yatutta duda ngà kada egga makiyuvovug niakan meyannung ta Biblia,” kinagina. “Tutal, awan gamma nira i orihinal nga Biblia. Noli ngana yatun!”

Importante kari nga mammuan nu noli onu ari i Biblia? Ikonsidera tam yaw ira nga pakkiavu: Mangurug ka kari ta makapabannay nga promesa ira na Biblia ta mappange nu ariammu ammu nu egga ta orihinal nga manuskrito yatun? (Roma 15:4) Usammu kari i prinsipio ira na Biblia nu maddesisiokka meyannung ta trabahu, familia, onu paddayarayaw, nu i Biblia ta kaggawattam ay ari fustu nga kopia nga nitura na totolay?

Maski nu awan ngana i orihinal ira nga libru na Biblia, awayya tam makkonsulta ta dadana ira nga kopiana—kasali ngana i rinivu nga manuskritona. Kunnasi nga nakapattalupaddian ira yatun nga manuskrito, maski nu posible nga madaral, egga pangokkontra, anna plano nga matalianan? Kunnasi nga mapaladdana yatun i pattalomu nga kurug i naddian na Biblia nga egga nikaw? Innammu i tabbag ira ta tumunug nga istoria.