“Paray Nakuan tu . . . Pattuppalan Na ta Mapia Ngamin i Planom Ira”
“Aleram-mu i pagayaya mu ta YAFU, ay iyawana nikaw i karagatam-mu.”—SAL. 37:4.
KANSION: 89, 140
1. Anni nakuan i desisionan na kabataan meyannung ta mappange? Ngatta ariadda nakuan kuruga nga mavurung? (Innan i letratu ta gafu na artikulo.)
SIKAMU nga kabataan ira, awayyana nga umanugu kamu nga nigenu mabbiahe, masirib nu egga i planonu nga angayan. I pattolay ay kagitta na pabbiahe, anna i tiempo tapenu planowannu i angayannu ay durante nga abbikkamu paga. Siempre, mariga i mapplano. Kunna mabbing nga si Heather: “Kananassing yatun. Kawagammu i maddesision nu anni i kuammu ta interu pattolem.” Ngem, pasikannammu i nono mu. Kinagi ni Jehova ta totolena: “Ari ka nga maganassing, ta egga ngà nikaw. Ari ka nga mavurung, ta sakan i Diosmu. Patuyaggattaka, wan, uffunattaka.”—Isa. 41:10.
2. Ngatta ammum nga kayà ni Jehova nga mapplano ka para ta magayaya nga mappange?
2 Pagaramman nakamu ni Jehova nga planowannu tu mapia i mappange. (Ecl. 12:1; Mat. 6:20) Kayàna nga magayaya kamu. Pakuruganna yatun ta pinaratu nga makasta nga pallevu, musika, anna ta makan. Ikonsidera gapa i pangikavurunna anna panudduna nittam ta kapianan nga pattolay. Kagian ni Jehova turi ta mammanaki ta tabaranna: “Pinilinu nu anni i ikalussò. . . . Innannu! Magayaya i aripakku ira, ngem mepasiranakkamu. Innannu! Makkulle ta pagayaya i aripakku ira megafu ta makasta nga kondision na futuda.” (Isa. 65:12-14) Medayaw si Jehova nu masirib i pilian ira na totolena ta pattolay.—Prov. 27:11.
I PLANO IRA NGA MAMAGAYAYA NIKAW
3. Anni i irekomenda ni Jehova nikaw?
3 Anni nga plano i irekomenda ni Jehova nikaw? Pinarona i totolay nga makapagayaya nu ammuan anna matalo nga passerbiadda yaya. (Sal. 128:1; Mat. 5:3) Daka-dakal i neruman naw ta ayam ira nga pinaratuna nga gakkagda laman i kuman, minum, anna maggaka. Kayà na Dios nga makapagayaya ka gukaban na papplano ta tanakuan nga gannug anne ta makapagayaya ta aya-ayam. I Namaratu nikaw ay “Dios nga minaggiddu,” “magayaya nga Dios,” nga pinaddena i totolay ‘ta imahena.’ (2 Cor. 13:11; 1 Tim. 1:11, NW; Gen. 1:27) Magayaya ka nu parigammu i meddu nga Dios tam. Naekspiriensam ngana kari i kinakurug naw nga teksto: “Mas dakal i pagayaya ta pangiyawa anne ta pangalawa”? (King. 20:35) Simple nga kinakurug yatun meyannung ta pattolay. Yatutta, karagatan ni Jehova nga nakafokus i planom ira ta pangipasingan tu aya ta tanakuan anna ta Dios.—Bibbigan i Mateo 22:36-39.
4, 5. Ngatta magayaya si Jesus?
4 Nangipasingan tu perfekto nga ehemplo si Jesu-Cristo para ta kabataan ira. Bilang mabbing, siguradu nga naggayang anna naddibersion yaya. Kinagi na Uvovug na Dios nga egga “tiempo na paggalo . . . anna tiempo na pattala.” (Ecl. 3:4) Naddukko gapa si Jesus kani Jehova gukaban na paggigiammu ta Katurakan. Turi ta 12 anios yaya, nappabbaw i mestru ira ta templo megafu ta “kalalaki na annabba-tabbag na” ta espiritual nga ganna-gannug.—Luc. 2:42, 46, 47.
5 Ta pagadulto ni Jesus, magayaya yaya. Ngatta? Ammuna nga fuera paga ta tanakuan nga gannug, kayà na Dios nga ‘mangilayya-gayya yaya ta Mapia nga Dumug ta mariga ira . . . anna mangiyawa yaya ta paningan na vuling ira.’ (Luc. 4:18) Nappagayaya kani Jesus i pattuppalna ta kinagi na Dios. Netura ta Salmo 40:8 i natagenona: “Pagayaya ku nga kuan i urem, Dios ku!” Kakayàna nga ituddu i meyannung ta nelangitan nga Yamana. (Bibbigan i Lucas 10:21.) Kabalinna tudduan i tadday nga babay meyannung ta kurug nga paddayarayaw, kunna ta disipulosna: “I pakkatolè onu i kanakku ay i pamarulo ku ta uray na Dios nga naddog niakan anna i pangituppal ta ipakua na.” (Juan 4:31-34) Nappagayaya sa i pangipasinganna tu aya ta Dios anna ta tanakuan. Makapagayaya gapa nikaw yatun.
6. Ngatta sulit nga ipakiyuvovug i planom ira ta mappange ta manakam ira nga Cristiano?
6 Aru nga Cristiano i naka-ekspiriensa tu pagayaya ta kabataadda gukaban na pappayunir. Ngatta ariammu ipakiyuvovug i planom nira? “Ari matuppal i plano nu awan tu paggararubang, ngem egga i metuppal gukaban na aru nga gumattabarang.” (Prov. 15:22) Makagi danatun nga manakam ta espiritual nga makeyawa tu edukasion i ngamin-tiempo nga ministerio nga makabenefisio ta interu nga pattolem. Kabalin nga tudduan si Jesus na Yamana ta langi, nitulu-tuloyna lagapa i maggigiammu ta ministeriona ta davvun. Angngariganna, nagigiammuna i ayayya na pangiyadde ta mapia nga dumug ta futu na totolay kunne na gapa i ayayya na pammakatalo maski nu mapurueban. (Bibbigan i Isaias 50:4; Heb. 5:8; 12:2) Ikonsidera tam i karuan nga aspeto na ngamin-tiempo nga serbisio nga makapagayaya nikaw.
NU NGATTA MAKASTA I PATTUPPALAN DANURI MANGNGUA TU DISIPULO
7. Ngatta aru ta kabataan ira i magayaya ta pangngua tu disipulos?
7 Kinagi ni Jesus: “Umay kamu gafu ta ngamin nga totolay ta ngamin nga lugu-lugar anna pabbalinan nu ira tu disipulò.” (Mat. 28:19, 20) Nu planom i ngamin-tiempo nga serbisio, pinilim i kuruga kappagayaya nga karera nga makedayaw ta Dios. Kagittana maski anni nga karera, mawag i tiempo tapenu mabbalikka tu malalaki. Kunna tinedyer nga brother nga bagu paga laman nga payunir nga si Timothy: “Kayà ku passerbian si Jehova ta ngamin-tiempo megafu ta yatun i kapianan nga mepasingakku i aya ku sa. Ta gafuna, ariakku makegafu tu Bible study ira, ngem ari nabbayag nagali ngà tu teritoria, tapus awan paga tu tanga-vulanna nakegafu ngà ngana tu aru nga study. Namegafu gapa nga umay ta Kingdom Hall i tadday ta estudiantè. Kabalikku naggradua ta Bible School for Single Brothers, * nakalawa ngà tu bagu nga asayment nu sitaw nakegafu ngà tu appa nga Bible study. Kakayà ku manuddu tu totolay megafu ta masingakku nga ulian ira na masanto nga espiritu.”—1 Tes. 2:19.
8. Anni i kingngua na karuan nga kabataan tapenu mas makapartisipa ta pangngua tu disipulos?
8 Naggigiammu tu tanakuan nga lengguahe i karuan nga Cristiano nga kabataan. Angngariganna, nitura ni Jacob nga taga-North America: “Turi ta pitu dagukku, Vietnamese i aru ta kaklasè. Kayà ku kagian nira i meyannung kani Jehova, yatutta napplano ngà nga gigiammuan i lengguaheda. Aru i nagigiammù gukaban na pangikumpara ta English anna Vietnamese nga edision na The Watchtower. Nakikofunnà gapa ta aranni nga Vietnamese-language nga kongregasion. Turi 18 anios ngà, nappayunir ngà. Tapus, nagiskuela ngà ta Bible School for Single Brothers. Nakoffun yatun ta maddaggun nga asayment ku, nu sitaw sakan laman i tattadday nga elder ta grupo na Vietnamese-language. Aru nga Vietnamese i nakaddag megafu ta ammù i lengguaheda. Imbitaddà ta baleda, anna maruddu nga makekondukta ngà tu Bible study nira. Napprogreso i karuan adde ta bawtismo.—Ikumpara i Kingngua 2:7, 8.
9. Ngatta makasta nga edukasion i pangngua tu disipulos?
9 I pangngua tu disipulo ay makasta nga edukasion nga manuddu nikaw tu mapia ira nga ugali ta attrabahu, abilidad nga makikomunika, komfiansa, anna taktika. (Prov. 21:5; 2 Tim. 2:24) Talaga makapagayaya paga yatun megafu ta uffunannaka nga mas mabbalin tu familiar ta basehan na pangurugmu ta Biblia. Magigiammum paga nu kunnasi nga makikoopera kani Jehova ta trabahu.—1 Cor. 3:9.
10. Kunnasi ka mapeggan tu pagayaya ta pangngua tu disipulos maski ta matagga nga teritoria?
10 Makapagayaya ka gapa ta pangngua tu disipulos maski baddi laman i magginna ta mapia nga dumug. Gitta na teamwork i pangngua tu disipulos. Interu kongregasion i magaleg turi ta mapia-giffutuadda. Maski tadday laman nga brother onu sister i makaleg tu interesadu nga mabbalin tu disipulo, ngamin ay egga i billena ta pagaleg yatutta ngamin ay magayaya. Angngariganna, siam nga dagun nappayunir si Brandon ta matagga nga teritoria. Kunna: “Enjoy ngà ta pangilayyagayya tu mapia nga dumug megafu ta yatun i ikikkiddaw ni Jehova nittam. Nappayunir ngà kabalikku ta haiskul. Kakayà ku pagaramman i kabataan ira ta kongregasion anna innan i papprogresoda ta espiritual. Kabalikku ta Bible School for Single Brothers, nakalawa ngà tu bagu nga asayment bilang payunir. Fustu nga awan vuluvuga tu nalegakku nga napprogreso ta bawtismo, ngem nakaleg i kakavvulu ku. Magayaya ngà Ecl. 11:6.
nga neplanò nga suportan tu buu i trabahu nga pangngua tu disipulos.”—NU SITAW NAKA IYANGAY NA PLANOM IRA
11. Anni nga forma na sagradu nga serbisio i nappagayaya ta kabataan ira?
11 Aru i oportunidad tapenu passerbian si Jehova. Angngariganna, aru nga kabataan i nabboluntario ta konstruksion. Ginatu nga bagu nga Kingdom Hall i kawagan. Sagradu nga serbisio nga makedayaw ta Dios i pappataddag anna makapagayaya yatun nikaw. Kagitta na karuan nga forma na sagradu nga serbisio, kekkasta gapa i makikavulu ta kapangngurug ira. Edukasion gapa i pattrabahu ta teokratiko nga konstruksion megafu ta tudduannaka nga magimmugug, mabbalin tu malappo nga trabahador, anna makikoopera ta mangiyorollu.
Aru nga bendision i maginnag turi ta egga ta ngamin-tiempo nga serbisio (Innan i parapo 11-13)
12. Anni ira nga oportunidad i ivuka na pappayunir?
12 Kunna brother nga si Kevin: “Abbing ngà paga laman, pinlanò ngana nga passerbian si Jehova ta ngamin-tiempo. Tapus, nappayunir ngà turi ta 19 ngà. Sinuportakku i baggì gukaban na pattrabahu tu part-time ta brother nga kontratista. Nagigiammù i mangikabit tu ato, benta, anna puerta. Tapus, dua ragun ngà nabboluntario ta relief team, nga mangipataddag tu nadaral ira nga Kingdom Hall anna babalay na wawwaragi. Turi ta naginnà nga egga pakawagan para ta konstruksion ta South Africa, nagaplay ngà tapus nembitannà. Taw ta Africa, magala-ali ngà tu proyekto nga Kingdom Hall kabalin na piga ligguan. Kagitta na familia i grupomi ta konstruksion. Tattadday i paddianammi, makkaruvulu kami magistudy, anna mattrabahu. Kakayà ku gapa i mallayyagayya kavulu i lokal ira nga brother kada ligguan. Ariakku inekspekta nga i planò turi ta kabbikku i nappagayaya niakan ta aru nga gannug.”
13. Kunnasi mappagayaya ta kabataan i passerbi ta Bethel?
13 Egga ngana ta Bethel i karuan nga
nattuppal ta planoda nga passerbian si Jehova. Makapagayaya nga pattolay i passerbi ta Bethel megafu ta para kani Jehova ngamin nga kuammu. Manguffun i familia na Bethel tapenu mamakan ta espiritual. Kinagi na Bethelite nga si Dustin: “Kinaraga ku i ngamin-tiempo nga serbisio turi nuebe anios ngà, anna nappayunir kabalikku ta haiskul. Kabalin na tanga-ragun gaddua, nembita ngà ta Bethel, nu sitaw nagigiammù mangusa tu printing press anna mapprogram ta computer. Ta Bethel, enjoy ngà ta pagginna meyannung ta progreso na aktibidad ta interu mundo nga pangngua tu disipulos. Kakayà ku masserbi taw megafu ta i kuammi ay makoffun tapenu meyaranni i totolay kani Jehova.”ANNI IRA PLANOM PARA TA MAPPANGE?
14. Kunnasim planowan i pattallung ta ngamin-tiempo nga ministerio?
14 Kunnasim planowan i pabbalin tu ngamin-tiempo nga ministro? Pinaka-importante ta ngamin, makoffun i espiritual ira nga kualidad tapenu makasta i pattuppalammu ta passerbi tu buu kani Jehova. Yatutta, mallallappo ka ta paggigiammu tu Uvovug na Dios, pannonopan tu mapia i kebalinanna, anna approbetsammu i mangipasingan ta pangurug mu ta study ira. Durante nga magiskuela ka, makala ka tu ekspiriensa anna abilidad ta pangilayyagayya ta mapia nga dumug. Gigiammuan nu kunnasi maginteres ta totolay gukaban na pangiyavu ta opiniodda anna pagginna ta tabbagda. Awayyam gapa manguffun ta kongregasion, gittana pappakarenu anna pammentena ta Kingdom Hall. Magayaya nga usan ni Jehova danuri minappakalinno anna sigga-paran i espirituda. (Bibbigan i Salmo 110:3; King. 6:1-3) Inimbita ni apostol Pablo si Timoteo nga mammisionero megafu ta “mapia i ke-uvovugan ni Timoteo ta ngamin nga wawwagi.”—King. 16:1-5.
15. Kunnasim planowan i pagaleg tu trabahu?
15 Maruddu nga kawagan nga mattrabahu na ngamin-tiempo ira nga ministro. (King. 18:2, 3) Awayyam planowan mangà tu vocational nga kawagan ta lugarnu tapenu makapappart-time. Durante nga mapplano ka, makkonsulta ta manangngal ta sirkito anna ta papayunir ta sirkitonu. Iyavu nu anni i praktikal nga trabahu para ta papayunir. Kagian na Biblia, “ipakiyuvovug mu kani Jehova i anni laman nga kuammu, tapenu makasta i pattuppalan na planom ira.”—Prov. 16:3; 20:18.
16. Kunnasi naka iprepara ta responsibilidad ira ta mappange na passerbi kani Jehova durante nga abbikka paga?
16 Makasiguradu ka nga kayà ni Jehova nga ‘mala mu’ i makapagayaya nga mappange. (Bibbigan i 1 Timoteo 6:18, 19.) Iyaranni naka na ngamin-tiempo nga passerbi ta ngamin-tiempo ira nga aripan nga makoffun nikaw nga mammanakam ta espiritual. Nammuan na aru nga i passerbi kani Jehova durante nga abbing paga ay nakoffun nira ta mas makasta nga pagatawa. Maruddu nga danuri nappayunir nige na pagatawa ay nattulu-tuloy nga nappayunir adde ta pagatawada.—Roma 16:3, 4.
17, 18. Kunnasi nga nelagum i futu ta papplano?
17 Nelagum ta papplano i futu. Kunna Salmo 20:4 meyannung kani Jehova: “Paray nakuan tu i karagatam-mu ay iyawa na, anna pattuppalan na ta mapia ngamin i planom ira.” Yatutta, nonopammu nu anni i kuammu ta pattolem. Ikonsidera nu anni i kuan ni Jehova ta maddaggun anna nu kunnasi ka makibillay ta passerbi sa. Tapus planowan nga kuan i makapagayaya sa.
18 Makeyawa tu kurug nga pagayaya i buu nga passerbi kani Jehova megafu ta yatun i klase na pattolay nga makedayaw ta Dios. Wan, “aleram-mu i pagayaya mu ta YAFU, ay iyawana nikaw i karagatam-mu.”—Sal. 37:4.
^ par. 7 Sinalianan na School for Kingdom Evangelizers.