Maski kawagan nga siguraduan na Cristiano ira i seguridadda, kuadda yatun segun ta prinsipio ira na Biblia. Tabarangngan ittam natun kontra ta pangusa tu armas ira nga pinadday na tolay para ta proteksion kontra ta tanakuan, gittana pistol, rifle, onu karuan paga nga palattug. Ikonsidera i tumunug ira:

Ta mata ni Jehova, sagradu i inango na tolay. Ammu na salmista nga si David nga si Jehova i ‘paggafuan na ngamin nga inango.’ (Sal. 36:9) Yatutta nu siguraduan na Cristiano nga defensan i baggi onu pakkukuana, kuanna i ngamin nga mawayyana tapenu ibita i pamatay tu tolay anna makaliwa ta daga.​—Deut. 22:8; Sal. 51:14.

Kurug nga maski anni nga gannug i usan na tolay tapenu idefensa i baggina, awayyana nga makaliwa yaya ta daga. Ngem, mas alistu nga makapatay i palattug​—aksidente onu sinadya. * Nu tensionadu i mangatake tapus makasingan tu palattug, maggrabe i situasion anna awayyana tu egga mapatay.

Turi ta nikiddaw ni Jesus ta disipulosna nga mangivulu ira tu espada ta ultimo nga gabi na pattolena ta davvun, ari tu agga-nonona i proteksion. (Luc. 22:36, 38) Ngem, nikiddaw yatun ni Jesus tapenu maketuddu tu leksion nira nga ari mabbalin tu vayolente, maski meparubang ta agga-armas nga totolay. (Luc. 22:52) Kabalin nga siniwagan ni Pedro i tadday ta aripan na atannang nga pari, minanduan ni Jesus si Pedro: “Ituku mu uli i espadam.” Tapus nikagi ni Jesus i importante nga kinakurug, tadday nga prinsipio nga mangigiya ta disipulosna adde ta maddaggun: “Ngamin i mangiyusa ta espada ay matay gabbalaman ta espada.”​—Mat. 26:51, 52.

Mekunnay ta Mikias 4:3, kawagan na totolay na Dios nga “paddayadda i espadada tu aradu anna i pikada tu paggapas.” Metonos yaw nga panakkilalan na kurug nga Cristiano ta nainspiran nga tabarang ni apostol Pablo: “Arian nu nga ibalo i marakay nga makua nikamu, . . . Kuan nu ngamin i adde na awayya nu nga makillivu-livu ta memammo ta ngamin nga totolay.” (Roma 12:17, 18) Maski aru nga problema i naekspiriensa ni Pablo, nelagum ngana i peligro ta “tulisan ira,” tinalakkurugna i kinagina, nga arianna vuluvuga nipoppollu i personal nga seguridadna nige na prinsipio ira ta Katurakan. (2 Cor. 11:26) Nattalo lallagu yaya ta Dios anna ta sirib nga mabibbig ta Uvovugna​—i sirib nga “mas makasta anne ta armas nga paggerra.”​—Ecl. 9:18.

Ikonsidera na Cristiano ira nga mas mabalor i inango anne ta material ira nga gannug. “Ari tu i karu na kukua ira [na totolay] i paggukuran ta kurug nga pattolay.” (Luc. 12:15) Yatutta, nu ari magamma na malumamo nga paguvovug i armadu nga tulisan, ginnan na masirib ira nga Cristiano i prinsipio ta uvovug ni Jesus: “Arian nu nga ibalo i marakay.” Baka mekiddaw paga nga alle-iyawa tam i sinnuttam. (Mat. 5:39, 40; Luc. 6:29) * Siempre i pinakamapia nga estratehia ay i pangibita. Nu lisiattam i “pappara-parayag” ta pakkukua tam ira anna kilala ittam na karruba tam nga memammo nga Saksi ira ni Jehova, melilli tam i mabbalin tu puntiria na vayolente ira nga kriminal.​—1 Juan 2:16; Prov. 18:10.

Irespeto na Cristiano ira i konsensia na tanakuan. (Roma 14:21) Nu makannammuan nga nangipappan i miembro na kongregasion tu palattug para ta proteksion kontra ta tanakuan, awayyana nga makaddag onu mesiddukal i kapangngurug ira. Paguyuan ittam na aya nga pagolluan i interes na tanakuan nige ta nittam, maski paga mesakrifisio i matageno tam nga legal nga kepangngattan.​—1 Cor. 10:32, 33; 13:4, 5.

Mappursigi i Cristiano ira nga mabbalin tu makasta nga ehemplo. (2 Cor. 4:2; 1 Ped. 5:2, 3) Kabalin nga matabarangngan ta Biblia i tadday nga Cristiano, tapus tulu-tuloy lagapa nga mangipappan tu armas para ta proteksion kontra ta tanakuan, ay ari mekonsidera nga makasta nga ehemplo. Arianna gafu nga makualipika ta responsibilidad ira onu espesial ira nga pribilehio ta kongregasion. Meyaplika gapa yatun ta Cristiano nga kanayun nga manammi tu palattug megafu ta trabahuna. Talaga mas makasta nu magaleg tu tanakuan nga trabahu! *

Siempre personal nga desision nu pilian na Cristiano nga protektan i baggina, familiana, onu i pakkukuana ira gittana gapa na pappilina tu trabahu. Yatutta, mepasingan ta prinsipio ira na Biblia i sirib na Dios anna i pangayana nittam. Megafu ta mekonsidera yatun ira nga prinsipio, pilian na manakam ira ta espiritual nga Cristiano nga ari mangipappan tu palattug para ta proteksion kontra ta tanakuan. Ammuda nga i kurug anna mannanayun nga seguridad ay merattal turi ta mangipasingan tu pattalo ta Dios gukaban na pattolay nga mekunnay ta prinsipio ira na Biblia.​—Sal. 97:10; Prov. 1:33; 2:6, 7.