1, 2. Ngatta kawagattam nga paguruvovugan nu kunnasi mamanna-bannay ta natayan? (Innan i letratu ta gafu na artikulo.)

“MATTANGA-RAGUN kabalin na patay na anami nga lalaki, nakatageno kami tu sobra nga taki,” kunni Susi. Tadday gapa nga brother nga gavva natayan tu atawa i naka-ekspiriensa tu “ari makomprendi nga taki ta pisikal.” Kaddaraddam nga napakaru i naka-ekspiriensa tu kunnaw nga nepallo nga daddam. Ari ekspektan na aru ta Cristiano nga kongregasion nga matayan tu iddeddukan nige na Armagedon. Maski natayakka tu iddeddukan onu egga ammum nga natayan, baka manono mu, ‘Kunnasi moffunan danuri natayan nga arubangan i parraddamda?’

² Awayyana nga naginnam ngana nga malalaki makoru i tiempo. Kurug kari nga talaga malsa i parraddam ta pappasa na tiempo? Naobserba na tadday nga balu, “Talaga nammuakku nga i kurug nga makoru ay nu anni i kuan na tadday ta tiempona.” Wan, kagitta na bigag ta pisikal, i bigag ta emosion ay sesenu nga mammapia ta pappasa na tiempo nu matangngallan tu mapia. Anni i espesipiko nga makoffun ta marraddam ira tapenu mammapia i emosional ira nga bigagda?

3, 4. Ngatta makasiguradu ittam nga malippawa ni Jehova i pakawagan tu banna-bannay na natayan?

³ Siguradu nga i primeru nga paggafuan na banna-bannay ay i minangngikabbi nga nelangitan nga Yama tam, si Jehova. (Bibbigan i 2 Corinto 1:3, 4.) Si Jehova nga kakastan nga ehemplo na empatia, ay namasiguradu ta totolena: “Sakan mismu i Tadday nga mamanna-bannay nikamu.”​—Isa. 51:12; Sal. 119:50, 52, 76.

⁴ Naekspiriensa mismu na minaggallallo nga Yama tam i matayan tu iddeddukan, gitta da Abraham, Isaac, Jacob, Moises, anni Patul David. (Num. 12:6-8; Mat. 22:31, 32; King. 13:22) Ipasiguradu na Uvovug na Dios nga talaga iinnaggan ni Jehova​—fermi nga kanappanna​—i tiempo sonu paginnolayanna ira. (Job 14:14, 15) Magayaya noka ira anna egga i makasta nga gawa-gawayyadda. Ikonsidera gapa nga i meddu nga Ana na Dios​—“i kakayàna”—​ay mataka-taki i nikapatena. (Prov. 8:22, 30) Awan tu makalippawa ta taki nga inattamman ni Jehova.​—Juan 5:20; 10:17.

5, 6. Kunnasi ittam banna-bannayan ni Jehova?

⁵ Talaga makapakkomfiansa ittam nga magguyu si Jehova para nittam. Kampante nakuan nga ivuvvu i futu tam sa ta pakimallo meyannung ta personal nga paddaddam tam. Kurug nga makapabannay ammuan nga malippawa ni Jehova i daddam tam anna mangiyawa yaya tu banna-bannay nga talaga kawagattam! Ngem kunnasina kuan yatun?

⁶ Tadday nga pamanna-bannay na Dios i “panguffun na Espiritu Santo.” (King. 9:31) I aktibo nga fuersa na Dios ay talaga makapangngua nga paggafuan na banna-bannay. Nipromesa ni Jesus nga talaga i-innaggan na Yama ta langi nga “iddan na ta Espiritu Santo danuri i makkiddaw sa!” (Luc. 11:13) Kunni Susi nga nakagi ta gafu: “Aru i tiempo nga mappalittukag kami anna makimemallo nga banna-bannayan kami ni Jehova. Ta kada situasion, talaga sinangngallan na imammo na Dios i nono anna giffutuammi.”​—Bibbigan i Filipos 4:6, 7.

7, 8. Ngatta makapakkomfiansa ittam nga mamanna-bannay si Jesus?

⁷ I meddu nga empatia ni Jehova ay perfekto nga nekagi anna nepasingan na minangngikabbi nga Anana, si Jesus, turi ta egga yaya ta davvun. (Juan 5:19) Nadog si Jesus tapenu mamanna-bannay ta “nabigaran nga futu” anna ta ‘ngamin nga marraddam.’ (Isa. 61:1, 2; Luc. 4:17-21) Yatutta, primeru nga kualidad ni Jesus i pangikabbi​—minakkisimpatia nga pakannammu ta ziga-riga na totolay anna napafutuan nga pakkaraga nga pawanan yatun.​—Heb. 2:17.

⁸ Ta kabbinna, siguradu nga natayan yaya tu miembro na familia anna kokkofun. Natay i siminaddag nga yama ni Jesus, nga si Jose, turi ta abbing paga yaya. * Daddamman si Jesus nga malapo i futuna, awayyana tinedyer paga laman yaya onu maturu tu bente i dagunna, nga arubangan i mismu nga parraddamna, anna parraddam na yena anna na wawwaragina.

9. Kunnasi nangipasingan tu empatia si Jesus turi ta natay si Lazaro?

⁹ Turi ta pinegafuanan ni Jesus i ministeriona, nipasinganna nga talaga malippawana i totolay anna naki-empatia yaya  nira. Masingan yatun turi ta natay i iddeddukanna nga kofun nga si Lazaro. Maski ammu ni Jesus nga paginnolayanna yaya, natagenona lagapa i mataki nga efekto na daddam nga namakkafi kada Maria anna Marta. Kuruga nabigaran i futuna yari tu napatangi yaya megafu ta empatia.​—Juan 11:33-36.

10. Ngatta makapakkomfiansa ittam nga egga i simpatia ni Jesus ta maddaggun?

¹⁰ Kunnasi makoffun nittam i simpatia anna pammanna-bannay ni Jesus? Ipasiguradu na Katurakan nittam nga “si Jesu-Cristo ay yaya gabbalaman gari anna sangoye anna adde noka.” (Heb. 13:8) Megafu ta personal nga malippawa na “paggafuan na inango” i marraddam, “moffunan na i matenta ira.” (King. 3:15; Heb. 2:10, 18) Yatutta, makapakkomfiansa ittam nga mafektan lagapa si Cristo ta pazziga-riga na tanakuan, malippawana i paddaddamda, anna banna-bannayan ira “ta tiempo na pagawag.”​—Bibbigan i Hebreo 4:15, 16.

11. Anni ira nga teksto i nakapabannay nikaw?

¹¹ Tadday laman i nerekord meyannung ta fustu nga parraddam ni Jesus ta patay ni Lazaro ta aru nga teksto nga mabibbig ta makapabannay nga Uvovug na Dios. Yatutta, “ngamin i egga ta Masanto nga Tura ay netura tapenu matudduan ittam nga magiddanama gafu ta pappasa-pasensia anna kapasikan na nono nga maggafu ta Masanto nga Tura.” (Roma 15:4) Nu natayakka, makaleg ka tu banna-bannay ta tumunug ira nga teksto:

• “Si Jehova ay aranni ta nabigaran i futuna; paliaranna danuri nadammakkan i espirituda.”​—Sal. 34:18, 19, NW.

• “Nu aru i kavuru-vurungan na nono ku, i pamanna-bannem [Jehova] i mangiyawa ta pagayaya ku.”​—Sal. 94:19

• “Megafu ta inaggallallo na Yafu tam nga Jesu-Cristo anna Dios nga Yama tam, nga mangaya anna nangiyawa nittam ta masikan nga pagiddanama anna sikan na nono, paray nakuan tu maggutu anna mapasikan kamu.”​—2 Tes. 2:16, 17. *

12. Anni i tadday nga importante nga kuan tapenu makapabannay ittam ta tanakuan?

¹² Tadday paga nga paggafuan na pamanna-bannay ta natayan ay i Cristiano nga kongregasion. (Bibbigan i 1 Tesalonica 5:11.) Kunnasim pasikannan anna banna-bannayan danuri “natazza-tazzian nga espiritu”? (Prov. 17:22) Daddamman nga egga i “tiempo na ari pattannug, anna tiempo na paguvovug.” (Ecl. 3:7) Niyesplika na balu nga mangngagan tu Dalene: “Mawag nga isikka na natayan ira i egga ta nono anna mataga-tagenoda. Yatutta, i pagginna i pinaka-importante nga makua para ta natayan, pagurayammu laman yaya nga magistoria.” Si Junia, nga egga i manungna nga nappakamatay, kunna: “Maski nu ariammu matindian tu fermi i paddaddamda, i mas importante ay kayà mu nga alippawatan nu anni i mataga-tagenoda.”

13. Anni nakuan i daddammattam meyannung ta paddaddam?

¹³ Daddamman gapa nga ari tu parehu i paddaddam na ngamin. Egga ira i tiempo nga i futu laman na mismu nga maddaddam i makannammu ta konag na emosional nga taki, anna marigatan yaya nga ikagi i kononagganna. Kagian na Biblia: “Ammu na futu i lussona mismu, anna awan tu  tanakuan nga makibillay ta pagayayana.” (Prov. 14:10) Maski paga kagian na tadday i mataga-tagenona, ari tu kanayun alistu para ta tanakuan nga alippawatan i kayàna kagian.

14. Kunnasi ittam makeyawa tu makapabannay nga uvovug ta natayan?

¹⁴ Ammu tam nga mariga nonopan nu anni i kayà tam kagian ta tadday nga nepallo i daddamna. Ngem, kagian na Biblia nga “i zila na masirib ay makoru.” (Prov. 12:18) Aru i nakaleg tu makapabannay ira nga uvovug ta brosiur nga Kapag Namatay ang Iyong Minamahal. * Ngem, maruddu nga i pinakamakoffun nga makuam ay ‘makipaddaraddam ta maraddam.’ (Roma 12:15) “Itatangi ku laman i mataga-tageno ku,” kunni Gaby, nga natayan tu atawa. “Yatutta mabanna-bannayannà nu makipattangi niakan i kokkofukku. Matageno ku nga ari ngà magitetadday ta paddaddam ku.”

15. Kunnasi ittam makapabannay nu marigatan ittam nga kuan yatun ta personal? (Innan gapa i kahon nga “ Makapabannay ira nga Uvovug.”)

¹⁵ Nu marigatakka mannono nu anni i kagiammu ta personal, awayyana tu mas malogon i makisimpatia gukaban na card, e-mail, text message, onu ta tura. Awayyam makkagi tu makapabannay nga teksto, tukuyan i makasta ira nga ugali na natay, onu istorian i makapagayaya ira nga ekspiriensam sa. “I pangalawa tu ababba nga makapabannay nga mensahe onu imbitasion kavulu i tadday nga sister i mas nakoffun niakan,” kunni Junia. “Natageno ku nga iddeddukan anna ikavurungaddà megafu tatun ira nga kingnguada.”

16. Anni i efektibo nga kuan tapenu makeyawa tu banna-bannay?

¹⁶ Ariammu tagibadditan i balor na  pakimallo mu kavulu i natayan nga kapangngurug anna i pangilagum nira tatun. Maski mariga nonopan nu anni i ipakimallo mu tatun nga emosional nga situasion, i napafutu nga pakimallo mu para nisa, maski nu makatangi ka onu maggaralgal i bosesmu, ay efektibo nga pallaban ta daddam. “Mittan nu umay ira i sister tapenu banna-bannayaddà,” neraddamman ni Dalene, “Iyavu ku nu kayàda i makimallo. Maruddu nga marigatan ira makimallo ta gafu, ngem kanayun nga kabalin na piga nga uvovug nga makagida, massikan gabbalaman i bosesda anna talaga mabbalin tu napafutuan i pakimalloda. Talaga makapasikan ta pangurug i matuyag nga pangurug, aya, anna pangikavurudda.”

17-19. Ngatta kawagan i tulu-tuloy nga pamanna-bannay?

¹⁷ Nadduruma i proseso na paddaddam na kada indibidual. Yatutta, kanayun nakuan nga egga i tiempom, ari laman ta piga nga aggaw ta kegga na kokkofun anna parientes ira, ngem maski ta tumunug ira nga vulan sonu nanoli ngana ira ta normal nga rutinada. “I kurug nga kofun ay mangaya ta ngamin nga tiempo, anna wagi nga meyana ta tiempo na ziga.” (Prov. 17:17) Paggafuan gapa na dakal nga banna-bannay i kapangngurug adde ta maattamman ngana na natayan i parraddamna.​—Bibbigan i 1 Tesalonica 3:7.

¹⁸ Daddamman nga awayyana nga maekspiriensa na natayan i nepallo nga paddaddam megafu ta anibersario, musika, letratu, aktibidad ira, onu maski espesipiko nga agug, maginna, onu tiempo na dagun. Aru nga gannug i magitetadday ngana laman nga kuan na nabalu​—kagitta na pagatende tu asembli onu Memorial—​i talaga makaparaddam. “Ekspektakku nga talaga mariga anna marraddam ngà ta wedding anniversary-mi,” kunna tadday nga brother. “Ngem napplano i karuan nga brother anna sister tu simple nga paggarammammung kavulu i madukko ira nga kofukku tapenu ari ngà magitetadday.”

¹⁹ Ammuan gapa nga ari laman tu kawagan na natayan i pamanna-bannay ta espesial ira nga okasion. “Mas makabenefisio i uffun anna pakikavulu nu awan tu espesial nga okasion,” kunni Junia. “Importante anna mas makeyawa tu banna-bannay i kanayun nga pangngua tu kunnatun ira.” Fustu nga ariattam mapawan ngamin i paddaddam onu interamente nga mapannuan i kawan megafu ta patay na iddeddukan, ngem makeyawa ittam tu banna-bannay gukaban na praktikal nga uffun ta natayan. (1 Juan 3:18) Neraddamman ni Gaby: “Talaga mappabalo ngà kani Jehova megafu ta meddu ira nga elder nga nangofun niakan ta kada mariga nga dakkua. Fermi nga nipatagenoda i meddu nga paggakko ni Jehova niakan.”

20. Ngatta paggafuan na dakal nga banna-bannay i promesa ira ni Jehova?

²⁰ Talaga makapabannay ammuan nga si Jehova, i Dios na ngamin nga banna-bannay, pawananna i ngamin nga daddam anna mangiyawa tu permanente nga pamanna-bannay sonu “duttal noka i aggaw nga ngamin i natay ira ay maginna da i ngaral [ni Cristo], anna mallalawan ira”! (Juan 5:28, 29) Nipromesa na Dios nga “pawananna i patay tu mannanayun, anna i Soberano nga Yafu nga si Jehova ay funatanna i lulua ta ngamin nga muka.” (Isa. 25:8, ftn.) Tapus, imbes nga ‘makipaddaraddam ta maraddam,’ ngamin noka nga totolay ta davvun ay ‘makipappagayaya ta magayaya ira.’​—Roma 12:15.