1-3. (a) Kanni netura i Salmo 147? (b) Anni i magigiammu tam ta pangusito ta Salmo 147?

MEDAYAW i tadday nu makasta i pinattuppalna ta neyasayn nga annungan onu nangipasingan tu makakkasta nga Cristiano nga kualidad. Nu kurug yatun para ta totolay, mas nga egga i rasottam nga dayawan si Jehova nga Dios! Dayawattam yaya megafu ta sikan na pakapangnguana, gittana masingan ta pia na pamaratuna, onu ta napafutuan nga pakilallanna ta totolay, gukaban na probisionna nga sakrifisio nga tavvu na mismu nga Anana.

² Napaguyu i nattura ta Salmo 147 nga dayawan si Jehova. Pinagaramna paga i tanakuan nga mevulu sa ta paddayaw ta Dios.​—Bibbigan i Salmo 147:1, 7, 12.

³ Ariattam ammu nu sinni i nangitura taw nga salmo, ngem makagi nga nattolay yaw nga salmista turi ta tiempo nga pinanoli ni Jehova i Israelita ira ta Jerusalem kabalidda maaripan ta Babilonia. (Sal. 147:2) Siguradu nga napaguyu i salmista nga dayawan si Jehova megafu ta niketoli na totolay na Dios ta fustu nga lugar nga paddayarayawadda. Nangiyawa paga yaya tu tanakuan nga rason. Anni ira yatun? Anni ira i rason nga ikulle mu i “Alleluia!” onu Hallelujah ta pattolem?​—Sal. 147:1, NW; Nep. 19:1.

4. Turi ta pinaliag ni Patul Ciro i naaripan ira nga Israelita, anni i natagenoda, anna ngatta?

⁴ Nonopan nu anni i natageno na Israelita ira nga naaripan ta Babilonia. Tutturungadda ira: “Kansionan nu i meyannung ta Sion!” Tatun nga tiempo, napagurayan ngana i Jerusalem, i kadakallan nga rason tapenu dayawadda si Jehova. (Sal. 137:1-3, 6) Awan tu ganas na Judio ira nga makkansion. Nabigaran i futuda, anna kawagadda i banna-bannay anna kapalubbang. Ngem, netuppal i niprofesiya na Dios gukaban na pangipaliag ni Ciro nga patul na Persia. Sinakupna i Babilonia anna niproklamana: “Si Jehova ay . . . zinognà tapenu pataddaggan yaya tu balena ta Jerusalem . . . Nu sinni laman i egga tatun nga totolena, egga nakuan sa si Jehova nga Diosna, anna mapavulunan yaya nga manoli.” (2 Cro. 36:23) Talaga makapabannay yaw nga nesimmu ta Israelita ira nga maddian ta Babilonia!

5. Anni i naobserba na salmista meyannung ta pakapangngua ni Jehova nga manguru?

⁵ Nangiyawa si Jehova tu banna-bannay ari laman ta nasion na Israel, nu ari, ta kada indibidual. Kunnatun gapa ta maddaggun. Nitura na salmista meyannung ta Dios: “Pammapianna i nabigaran i futuna; babbagganna i bigi-bigagda ira.” (Sal. 147:3, NW) Wan, ikavurungan ni Jehova danuri egga i problemada ira​—ta pisikal onu ta emosional. Ta maddaggun, kakayà ni Jehova nga banna-bannayan ittam anna pakalman i emosional nga taki tam. (Sal. 34:18; Isa. 57:15) Mangiyawa yaya tu sirib anna sikan tapenu malabanattam i maski anni nga problema nga meparubang nittam.​—Sant. 1:5.

6. Kunnasi ittam mabenefisiowan ta uvovug na salmista ta Salmo 147:4? (Innan i letratu ta gafu na artikulo.)

⁶ Siminangag i salmista ta langa-langi, anna kinagina nittam nga ammu ni Jehova i “bilang na biti-bitun ira” anna “i kataggi-tadday ta ngaga-ngagad-da.” (Sal. 147:4) Ngatta gavva natalianan i topiko anna tinukoyna i nelangitan ira nga pinaratu? Ikonsidera yaw: Masingan na salmista i bitun ira ta matana, ngem awan tu ideyana nu piga i fustu nga biladda. Ta daga-ragun, umara-aru i bilang na bitun ira nga masingattam. Nonopan na karuan nga binillion i bitun ira ta Milky Way galaxy laman. Ngem, egga i trillion ira nga galaxy ta uniberso! Siguradu nga ariattam mabilang i karu na biti-bitun! Ngem egga i ngagan onu agal nira ngamin na Namaratu. Kayà na kagian nga awan tu kaparehu na kada bitun kani Jehova. (1 Cor. 15:41) Kunnasi gapa i pinaratuna nga totolay ta davvun? I Dios nga makannammu ta kada bitun ta maski anni nga tiempo ay ammu naka gapa bilang indibidual​—i eksakto nga lokasion, matageno, anna i kawagammu ta maski anni nga tiempo!

7, 8. (a) Anni i ikonsidera ni Jehova ta pangiyeguna ta totolena ta problemada ira? (b) Iyilustra nu kunnasi uffunan na minangngikabbi nga si Jehova i imperfekto nga totolay.

⁷ Ari laman nga interesadu si Jehova nikaw bilang indibidual, egga gapa i pakapangngua anna empatiana tapenu moffunakka ta problemam ira ta pattolay. (Bibbigan i Salmo 147:5.) Baka matageno mu nga talaga mariga i situasiommu anna kuruga madammo para nikaw. Malippawa na Dios i limitasiommu, ‘ammu na tu gavu ka laman.’ (Sal. 103:14) Megafu ta kina-imperfekto, kanayun ittam mattagaruli. Pabbabawyattam i ari sadya nga nekagi, pallattuag na nepattaggan nga pakkaraga, onu i tendensia nga passilan i pakkukua na tanakuan! Ari maekspiriensa ni Jehova i kunnatun ira; ngem, ari nga matuku-tukug i pakalippawana nittam!​—Isa. 40:28.

 ⁸ Awayyana nga naekspiriensam ngana nu kunnasi naka noffunan na makapangngua nga lima ni Jehova nga arubangan i karuan nga kapurueba. (Isa. 41:10, 13) Angngariganna, talaga nadismaya si Kyoko, tadday nga payunir nga sister, turi ta nagali ta bagu nga asaymentna. Kunnasi nipasingan ni Jehova i pakalippawana ta problema ni Kyoko? Ta bagu nga situasionna, nalevutan yaya tu indibidual ira nga makalippawa ta mataga-tagenona. Kagittana kagian sa ni Jehova: “Iddukattaka, ari laman megafu ta payunir ka, nu ari, megafu ta ana taka anna dedikadu ka niakan. Kayà ku nga magayaya ka ta pattolay bilang tadday ta Saksì ira!” Ta situasiommu, kunnasi nipasingan na Makapangngua-sa-ngamin nga “ari nga matuku-tukug i pakannammu na”?

9, 10. Anni nga uffun i ollu nga iyawa ni Jehova? Iyilustra.

⁹ Nu mittan, egga i pakawagammu ta pisikal. Angngariganna, mavurukka nga makkurang i kanammu. Ngem, si Jehova ay namadday tu natural nga siklo tapenu egga i makan, maski ta abbing nga gayàng nga magawag tatun! (Bibbigan i Salmo 147:8, 9.) Nu interamente nga pakananna i gayàng ira, makapattalo ka gapa nga iyawa ni Jehova i material nga pakawagammu.​—Sal. 37:25.

¹⁰ I pinaka-importante, mangiyawa si Jehova tu espiritual nga makan anna “imammo na nga ari malippawa na tolay.” (Fil. 4:6, 7) Ikonsidera si Mutsuo anna i atawana, nga naka-ekspiriensa ta pakapangngua ni Jehova kabalin na tsunami ta Japan turi ta 2011. Minune ira ta ato na baleda anna maggi ira natay tatun. Nawawan paga i maggi ngamin nga pakkukuada. Tanga-gabi ira ta mazibbo anna malummin nga kuarto ta utun na nadara-daral nga baleda. Ta kinommananna, nagaleg ira tu espiritual nga pamanna-bannay. I libru laman nga 2006 Taunang Aklat ng mga Saksi ni Jehova i nalegadda. Insigida nga nasingan ni Mutsuo i subtitulo nga “Mga Tsunami na Pinakamaraming Pinatay.” Meyannung yatun ta lunig ta Sumatra turi ta 2004 nga nangigafu ta pinakagrabe nga tsunami ira nga nerekord ta historia. Makatangi si Mutsuo anna i atawana durante nga bibbigadda i ekspiriensa ira. Natagenoda i pangaya ni Jehova ta pangiyawana nira tu espiritual nga pamanna-bannay ta tiempo nga kawagadda. Meddu gapa nga nangiyawa si Jehova tu pakawagadda ta material. Gukaban na wawwaragi, nakalawa ira tu relief supply. Ngem i talaga namasikan nira ay i pabbisita na representante na organisasion na Dios ta kongregasion. Kunni Mutsuo: “Natageno na kataggi-tadday nikami nga egga ta bikomi si Jehova anna tattangngallan nakami. Talaga makapabannay yatun!” Iyawa na Dios i espiritual ira nga pakawagattam, anna maski i pisikal ira nga pakawagattam.

11. Anni i mekiddaw turi ta magiddanama nga mabenefisiowan ta pakapangngua na Dios nga mamaliag?

¹¹ Sigga-paran si Jehova nga manguffun anna ‘iyatannanna i minappakalinno ira.’ (Sal. 147:6a) Ngem kunnasi ittam mabenefisiowan ta sigga-paran nga panguffunna? Mawag nga makasta i relasiottam sa. Tapenu mapeggan tu kunnatun, mawag nga mangipasingattam tu kinasippo. (Zef. 2:3) Innaggan na masippo ira i pangitunung ni Jehova ta anni laman nga marake anna pawanan i efektona yatun nira. Egga i fabor ni Jehova ta kunnatun ira.

12, 13. (a) Tapenu mabenefisiowan ta uffun na Dios, anni nakuan i lisiattam? (b) Sinni i makapagayaya kani Jehova?

 ¹² Kunne na gapa, ‘danuri i marakay ay daralan na [Yafu].’ (Sal. 147:6b) Madammo yaw ira nga uvovug! Tapenu mabenefisiowan ta matalo nga aya ni Jehova anna melisi ta panaralna, mawag nga ikalussotam i ikalussona. (Sal. 97:10) Angngariganna, mawag nga ikalussotam i seksual nga imoralidad. Kebalinanna nga arayyuattam i maski anni nga gannug nga marresulta tatun nga kamali, nelagum ngana i pornograpia. (Sal. 119:37; Mat. 5:28) Mariga yaw nga labanan, ngem sulit i pappursigi tam megafu ta bendisionan yatun ni Jehova.

¹³ Ta pakillaban tatun, kawagan nga mattalo ittam kani Jehova, ari tu ta baggi tam. Magayaya kari yaya nu ipaliag tam i baggi tam gukaban na “masikan nga kabayu,” nga pakiyoffunan na totolay? Ari! Ariattam gapa nga mattalo ta alle “magutu ira nga suddalu,” nga gittana sittam mismu onu i tanakuan ay makepaliag. (Sal. 147:10) Aranniattam lallagu si Jehova anna ipakimemallo i uffunna. Ari tu kagitta na tolay nga gumattabarang, arianna mabannag nga magginna ta pakimallo tam ira, maski kanayun nga makiyoffun tam sa. “Ngem makapagayaya ta YAFU i mangikakua ira sa, danuri i magiddanama ta mannanayun nga aya na.” (Sal. 147:11) Makapattiwala ittam nga arianna ittam panawan anna uffunanna ittam nga affutan i marake ira nga pakkaraga tam megafu ta matalo nga ayana.

14. Anni nga kombiksion i namasikan ta salmista?

¹⁴ Niddan ittam ni Jehova tu rason tapenu mangurug nga uffunanna i totolena nu kawagadda. Ta pangipataddag uli ta Jerusalem, nikansion na salmista meyannung kani Jehova: “Ta pakaladdan na i trangka ira, anna i totolem ay bendisionan na. Iddan na ta imammo i lagum ira na pader mu.” (Sal. 147:13, 14) Talaga makapabannay ammuan para ta salmista nga paladdan na Dios i trangka ira na siudad tapenu protektan i maddayarayaw sa!

15-17. (a) Anni i matageno tam mittan meyannung ta problema tam ira, ngem kunnasi usan ni Jehova i Biblia tapenu uffunan ittam? (b) Mangiyawa ira tu angngarigan nu kunnasi nga ‘insigida nga maparulo i kagian’ na Dios tapenu uffunan ittam.

¹⁵ Awayyam meparubang ta problema ira nga mamavvurung nikaw. Iddannaka ni Jehova tu sirib tapenu arubangan yatun. Kinagi na salmista meyannung ta Diosna: “Toye ta utun na davvun ay mammandu yaya, ay insigida nga maparulo i kagian na.” Kabalinna tukuyan si Jehova nga ‘parattalan na i tiempo nga kuruga nepallo i lummin na, iwara na i yelo, itaga na i allalagu,’ nakagina, “awan tu makeyattam ta lummin na.” Kunna paga nga “manduan [ni Jehova] i yelo tu malunag.” (Sal. 147:15-18) I pinakamasirib, pinakamakapangngua nga Dios, anna i tadday nga mangontrol ta allalagu anna yelo, ay uffunannaka tapenu affutan i maski anni nga problema nga meparubang nikaw.

¹⁶ Igiya ittam ni Jehova ta maddaggun gukaban na Biblia. “Insigida nga maparulo i kagian na” yatutta sigga-paran nga iyawana i espiritual nga direksion nu kawagattam yatun. Nonopan nu anni nga benefisio i mala mu nu bibbigan i Biblia, usitakkan i publikasion ira na “mekatalo anna nannono nga doroban,” girawan i JW Broadcasting, bisitan i jw.org, makiyuvovug ta elder ira, anna makistoria ta kapangngurug ira. (Mat. 24:45) Masingammu kari nga insigida nga igiya naka ni Jehova?

¹⁷ Naekspiriensa ni sister Simone i pakapangngua na Uvovug na Dios. Tagibadditanna i baggina, nga nonopanna paga nga ari tu yaya i klase na tolay nga faboran na  Dios. Ngem, nu makkafi i nonona, tulu-tuloy yaya nga makimallo tapenu mappoffun kani Jehova. Okupadu gapa yaya kanayun ta personal nga paggigiammuna tu Biblia. Kunna, “Awan paga tu situasion nga neparubang niakan nga ariakku natageno i pamasikan anna pangigiya ni Jehova.” Nakoffun yatun tapenu makapappositibo yaya adde ta posible.

18. Ngatta matageno mu nga faboran naka na Dios, anna anni ira i rasommu nga mangikulle tu “Dayawan si Jehova!”?

¹⁸ Ammu na salmista nga kuruga faboran na Dios i totolena gari. Ira laman i nasion nga neyawatan tu “uvovug” anna “dorob” na Dios. (Bibbigan i Salmo 147:19, 20.) Ta maddaggun, sittam laman ta davvun i nabendisionan nga magalan ta ngagan na Dios. Megafu ta ammammu tam si Jehova anna iyaplika tam i Uvovugna ta pattoletam, napeggattam tu espesial nga relasion sa. Kagitta na nattura ta Salmo 147, ari kari tu aru i rasommu nga mangikulle tu “Dayawan si Jehova!” anna pagaramman i tanakuan nga kunnatun gapa i kuadda?