1, 2. Taw nga sistema na ganna-gannug, ngatta kanayun nga egga lagapa i mariga nga totolay?

I SISTEMA na ekonomia ta maddaggun ay marake anna ari patas. Awan tu serbi na pagaleg tu trabahu na kabataan ira. Pappeligrowan na aru i inangoda tapenu makangay ta mas mariku ira nga nasion. Napakaru i mariga, maski ta progresibo ira nga nasion. Mas dumaka-dakal i diferensia na mariku ta mariga. Segun ta bagu nga pattantia, mapantayan na kinariku na 1 porsiento na pinakamariku ira ta mundo i kinariku na 99 porsiento nga nabattang. Maski mariga makumpirma yatun nga numero, awan tu makakontra nga binillion nga totolay i talaga mariga, tapus makalanno i kinariku na karuan adde ta aru nga henerasion. Nalippawa ni Jesus yaw nga realidad nga kunna: “Kanayun nga egga i mariga ira ta pallevu nu.” (Mar. 14:7) Ngatta ta egga i kunnatun nga padduruma?

² Nalippawa ni Jesus nga ari manguli i maddaggun nga sistema na ekonomia adde ta paddattal na Pappatulan na Dios. Kavulu ta parte na mundo ni Satanas i pulitikal anna relihioso nga elemento, minakkakkam nga sistema na komersio, nga nirepresenta na “komersiante ira” ta Nepakannammu 18:3. Mapattalupaddian na  aripan ira na Dios nga interamente nga ari makisali ta pulitika anna falso nga relihion, ngem aru nira i marigatan nga interamente nga isinna i baggida ta komersial nga parte na mundo ni Satanas.

3. Anni ira nga pakkiavu i ikonsidera tam?

³ Bilang Cristiano, usitakkattam nakuan tu mapia i pagimamma tam ta maddaggun nga sistema na komersio gukaban na pangiyavu ta baggi tam: ‘Kunnasì meyusa i material ira nga pakkukuà tapenu mepasingakku i kinamatalo ta Dios? Kunnasì mapakarianan i kelagum ku ta komersialismo? Anni ira nga ekspiriensa i nangipasingan nga buu i pattalo na totolay na Dios taw nga mariga nga pallevu?’

4, 5. (a) Anni nga situasion i neparubang ta katiwala ta ilustrasion ni Jesus? (b) Anni nga tabarang i niyawa ni Jesus ta disipulosna?

⁴ Bibbigan i Lucas 16:1-9. Makapa-interes i ilustrasion ni Jesus meyannung ta ari matunung nga katiwala. Kabalin nga akusan tu gastaderu, nangipasingan tu ‘kalalaki nga marremedio’ (“praktikal nga sirib,” NW) yatun nga katiwala tapenu ‘makikkofun’ turi ta makoffun sa sonu malsa yaya bilang katiwala. * Siempre ari pagaramman ni Jesus i disipulosna nga mangngua tu marake nga gannug tapenu mapaliag taw nga mundo. Kinagina nga i kunnatun ay ugali na “tolay toye ta davvun,” ngem inusana yatun nga ilustrasion tapenu mapalawan i punto.

⁵ Ammu ni Jesus nga gittana katiwala nga neparubang ta mariga nga situasion, kawagan na aru ta disipulosna nga mattrabahu taw nga ari patas nga mundo na komersio. Yatutta pinagaramna ira: ‘Iyusa nu nga pakikkofun i kukua ira nga neravvunan tapenu sangaw nu mofu ngana, alawatan kamu [ni Jehova anna ni Jesus] ta mannanayun nga paddianan.’ Anni i magigiammu tam ta tabarang ni Jesus?

6. Kunnasi tam nammuan nga ari tu parte na gakkag na Dios i maddaggun nga sistema na komersio?

⁶ Manawag nga kinagi na Biblia nga ari tu parte na gakkag na Dios i komersialismo​—i darogas nga pagganansia. Pinagustuan ni Jehova si Adan anni Eva ta pakawagadda turi ta Eden. (Gen. 2:15, 16) Turi kua, napeggan tu masanto nga espiritu i ollu-siglo nga kongregasion na nazelugan ira, yatutta “awan nira tu nangibilang ta anni laman nga egga sa tu kukua na laggapa, nu ari i kukua ira na tadday ay kukua da ngamin.” (King. 4:32) Kinagi ni profeta Isaias i tiempo sonu ngamin nga totolay ay talaga makapagayaya ta material nga ganna-gannug ta mundo. (Isa. 25:6-9; 65:21, 22) Ngem ta maddaggun, kawagan na disipulos ni Jesus i “praktikal nga sirib” tapenu makapattrabahu nga usan i “kukua ira nga neravvunan” naw nga mundo durante nga mapagayaya i Dios.

7. Anni nga tabarang i mabibbig ta Lucas 16:10-13?

⁷ Bibbigan i Lucas 16:10-13. Nakikofun i katiwala ta ilustrasion ni Jesus para ta personal nga pakabenefisiowanna. Ngem, pinagaram ni Jesus i disipulosna nga makikofun ta egga ira ta langi ta ari makasarili ira nga gakkag. Ta tumunug ira nga bersikulo na ilustrasion, egga i koneksion na pangusa ta “kukua ira nga neravvunan” ta kinamatalo ta Dios. Kayà kagian ni Jesus nga mapakurug tam nga ‘matalo ittam nga makkargo’ nu makontrol tam i kinariku nga malà tam. Kunnasi?

8, 9. Mangistoria nu kunnasi mangipasingan tu kinamatalo i tanakuan ta pangiyusada ta ari matunung nga kinarikuda.

 ⁸ I kapianan nga kuan tapenu mapakurug ta baggi tam nga matalo tam ay gukaban na finansial nga donasion ta interu-mundo nga pallayyagayya nga neprofesiya ni Jesus. (Mat. 24:14) Egga i tadday nga abbing ta India nga egga i baddi nga pattubunganna tapus sesenu nga mangipay tu barya, maski paga ari makagatang tu gayamanna. Nu mapannu ngana yatun, idonana para ta trabahu nga pallayyagayya. Egga gapa pammulan tu niyog na tadday nga brother ta India tapus naddona yaya tu aru nga niyog ta Malayalam remote translation office. I rasonna ay megafu ta kawagan na ofisina nga gumatang tu niyog, mas mapia i direkta nga pangisuplayna nira anne ta pangiyawana tu kuartu. Praktikal nga kinasirib yatun. Kunnatun gapa i wawwaragi ira ta Greece nga regular nga maddona tu olive oil, keso, anna tanakuan paga nga makan ta familia na Bethel.

⁹ Egga i brother ta Sri Lanka nga maddian ngana ta abroad, nga ipeyusana i balena para ta study anna asembli ira anna paddianan na ngamin-tiempo ira nga wawwaragi. Sakrifisio ta finansial yatun para ta brother ngem dakal nga uffun ta lokal ira nga publisher nga awan tu awawayyada. Ta nasion nga megamma i pallayyagayya, ipeyusa na wawwaragi i babaleda bilang Kingdom Hall tapenu makapaggarammammung i papayunir anna i tanakuan nga marigatan ta finansial.

10. Anni ira nga bendision i malawà tam nu minangngiyawa tam?

¹⁰ Ipasingan natun ira nga ehemplo nu kunnasi mepasingan na totolay na Dios nga ‘mekatalo ira ta baddi,’ ta pangiyusada ta material nga gannug, nga baddi i balorna kumpara ta espiritual nga kinariku. (Luc. 16:10) Anni i matageno danaw nga kofun ni Jehova meyannung ta sakrifisioda? Malippawada nga marresulta ta “mannanayun” nga kinariku i pabbalin tu minangngiyawa. (Luc. 16:11) Kagian na sister nga regular nga maddona para ta Pappatulan: “Megafu ta kanayun nga pangibillè tu material, makakkasta i panageno ku ta baggì ta nappasa nga daga-ragun. Nasifu ku nga nu kanayun nga mangiyawa ta material, mas minangngiyawa i disposisiokku ta tanakuan. Mas minammakoma ngà, mapasensia, anna mabì ku nga alawatan i pakkadismaya anna tabarang.” Nammuan na aru nga makoffun ta espiritual i pabbalin tu minangngiyawa.​—Sal. 112:5; Prov. 22:9.

11. (a) Ngatta pangipasingan tu “praktikal nga sirib” i pangiyawa tam? (b) Kunnasi i pakka-uffu-uffun ta finansial na totolay na Dios? (Innan i letratu ta gafu na artikulo.)

¹¹ I pangiyusa ta material ira nga pakkukua para ta interes na Pappatulan ay pangipasingan tu “praktikal nga sirib” ta tadday paga nga gannug. Ipamavulunna yatun nga approbetsattam i situasiottam tapenu uffunan i tanakuan. Maski ariattam makapasserbi tu ngamin-tiempo onu makali ta lugar nga dakal i pakawaganna, makoffun ittam lagapa ta tanakuan. (Prov. 19:17) Makoffun i boluntario ira nga donasion ta passuplay tu literatura anna passuporta ta pallayyagayya ta teritoria ira nga mariga ngem progresibo ta espiritual. Ta aru nga dagun, ta nasion ira nga gittana Congo, Madagascar, anna Rwanda, talaga  mangina i Biblia. Nu mittan katumbasna i tanga-ligguan onu tanga-vulan nga sueldu. Maruddu nga mappili i wawwaragi nu gumatang ira tu makan para ta familiada onu mapeggan ira tu Biblia. Ngem, megafu ta kontribusion na aru anna pakka-uffu-uffun ta finansial, nasuportan na organisasion ni Jehova i translation anna pangitaneg tu Biblia ta kada miembro na familia anna ta mabisin ta espiritual ira nga estudiante ta Biblia. (Bibbigan i 2 Corinto 8:13-15.) Yatutta, awayyana nga makikofun kani Jehova danuri mangiyawa anna i mangalawa.

12. Kunnasi nipasingan ni Abraham i pattalona ta Dios?

¹² Tapenu mabbalin tu kofun ni Jehova, limitattam i pakisali ta komersialismo anna iyusa i situasiottam tapenu magaleg tu “mannanayun” nga kinariku. Sigga-paran nga pinanawan ni Abraham​—tolay nga egga i pangurugna—​i mariku nga Ur tapenu maddian ta tolda anna makikofun kani Jehova. (Heb. 11:8-10) Kanayun yaya nga nattalo ta Dios bilang Paggafuan na kurug nga kinariku, nga arianna vuluvuga inaleg i bentaha ta material, nga mangipasingan tu kawan na pattalo. (Gen. 14:22, 23) Kunnatun i pangurug nga ipagaram ni Jesus, nga kunna ta riku nga tolay: “Nu ikaya mu tu awan tu pakkurangam-mu, em-mu nga ilaku ngamin i kukuam ira anna iyawa mu i pallakuam-mu ta mariga ira; ay riku ka noka ta langi. Ay manoli ka anna tumuttul ka ngana niakan.” (Mat. 19:21) Awan tu pangurug natun nga lalaki gittana pangurug ni Abraham, ngem mananawag nga nattalo ta Dios i tanakuan.

13. (a) Anni nga tabarang i niyawa ni Pablo kani Timoteo? (b) Kunnasi tam meyaplika i tabarang ni Pablo?

¹³ Si Timoteo ay lalaki nga egga pangurugna. Kabalin yaya nga tinukoy ni Pablo nga “mekatalo nga suddalu ni Cristo Jesus,” kunna paga: “I suddalu nga egga ta serbisiu ay kagumanan na nga pagustuan i ofisial na. Ay gafu taw, arian na nga ikaba-kaba i baggi na ta kukukuan na totolay ira nga ari nga suddalu.” (2 Tim. 2:3, 4) Iyaplika na disipulos ni Jesus ta maddaggun kunne na gapa i muturu tu tadday million ira nga ministro i tabarang ni Pablo nu ipamavulun na situasiodda. Ta pangibitada ta panenta na advertisement anna na mundo, meraddammadda yaw nga prinsipio: “I minaggikkaw ay aripan na mappekkaw.” (Prov. 22:7) Kakayà ni Satanas nga ufutattam i tiempo anna sikattam tapenu mappa-aripan ta komersialismo na mundona. Awayya tam melammag ta gata-gatu tu aru nga dagun megafu ta desisiottam ira. Mamakadammo ta finansial i daka-dakal nga loan ta balay, mangina nga paga ta takay, maski i magarbo nga kasal. Makepasingattam tu praktikal nga sirib nu pasimpleyattam i pattoletam anna pakarianan i gatu anna gastus. Megafu tatun, mas makapasserbi ittam ta Dios anne ta maddaggun nga sistema na komersio.​—1 Tim. 6:10.

14. Anni nakuan i determinasiottam? Mangiyawa tu angngarigan ira.

¹⁴ Nelagum ta pappasimple tu pattolay i kapeggan tu prayoridad. Egga i tadday nga magatawa nga makakkasta i negosioda. Kayàda nga manoli ta ngamin-tiempo nga ministerio ngem kawagan nga ilakuda i negosioda, i barangay, anna tanakuan paga nga materialda. Tapus, nabboluntario ira ta konstruksion ta world hedkuarter ta Warwick, New York. Espesial nga bendision i nalawàda ta passerbi ta Bethel ta piga nga ligguan kavulu i anada nga babay anna i atawana, kunne na gapa i magana na brother, nga nattrabahu gapa ta Warwick. Egga i tadday nga payunir nga sister ta Colorado, U.S.A., nga nakaleg tu part-time nga trabahu ta bangku. Nagustuadda i attrabahuna yatutta  na-oferan tu permanente nga posision nga triple i suelduna. Ngem megafu ta malsa natun i fokusna ta ministerio, nammanakitanna yatun. Piga laman yaw ta ehemplo ira ta ari mabilang nga sakrifisio na aripan ira ni Jehova. Ipasingan na kunnatun nga determinasion nga pangipollu ta interes na Pappatulan nga mas tagibalorattam i pakikkofun ta Dios anna i espiritual nga kinariku anne ta meyawa ira na komersio na mundo.

15. Anni nga kinariku i mangiyawa tu kadakallan nga pagayaya?

¹⁵ Ari tu kanayun nga indikasion na bendision na Dios i material nga kinariku. Bendisionan ni Jehova danuri ‘mapia i pangnga-pangnguada.’ (Bibbigan i 1 Timoteo 6:17-19.) Angngariganna, turi ta nammuan ni Lucia * nga taga-Italy i pakawagan tu ministro ira ta Albania, nagali yaya tatun turi ta 1993 nga awan tu trabahuna, ngem buu i pattalona kani Jehova. Nabbalin yaya tu malalaki ta lengguahe nga Albanian anna noffunan i maturu tu 60 nga mappabawtismo. Ari tu mallayyagayya i kakaruan ta totolay na Dios ta kunnatun nga progresibo nga teritoria, ngem tagibaloradda ta mannanayun i anni laman nga kuattam tapenu uffunan i tanakuan nga malegan anna mattalupaddian ta dalan na inango.​—Mat. 6:20.

16. (a) Anni i mesimmu ta maddaggun nga sistema na komersio? (b) Kunnasi afektan na pakannammu tam ta mappange i pagimamma tam ta material nga kinariku?

¹⁶ Kinagi ni Jesus: “Sangaw nu mofu ngana [i kukua ira nga neravvunan],” ari nga ‘nu mofu ngana.’ (Luc. 16:9) Awan tu kuenta na krisis nga nesimmu ta bangku anna ekonomia taw nga pangurianan ira nga aggaw kumpara ta mesimmu ta interu mundo ta mappange. Siguradu nga madaral i interu nga sistema ni Satanas​—i pulitikal, relihioso, anna komersio. Niprofesiya da profeta Ezekiel anna Zefanias nga mabbalin tu awan tu balor na vulawan anna pira, nga gagangay ta komersio ta aru nga siglo. (Eze. 7:19; Zef. 1:18) Anni i matageno tam nu nammuattam ta panuppalan na pattoletam taw nga mundo anna nalippawa tam nga nisakrifisio tam i kurug nga kinariku para ta “kukua ira nga neravvunan”? Gitta tam i tadday nga tolay nga nattrabahu ta interu pattolena para ta aru nga kuartu, ngem nammuanna nga feke yatun. (Prov. 18:11) Wan, maffaliu noka i kunnatun nga kinariku, yatutta ariattam wawanan i oportunidad nga usan yatun tapenu ‘makikofun’ ta egga ira ta langi. Mamarriku nittam ta espiritual i anni laman nga kuattam para ta papprogreso na interes na Pappatulan ni Jehova.

17, 18. Anni i bendision para ta kokkofun na Dios?

¹⁷ Sonu duttal i Pappatulan na Dios, awan ngana tu renta anna loan, aru anna libre ngana i makan, awan ngana tu mattaki. Talaga magayaya noka i neravvunan nga familia ni Jehova ta kapianan nga malàda ta davvun. Mabbalin tu paddekora onu pappaguapa i vulawan, pira, anna mangina nga bata-batu, ari tu para ta sobra nga pagunnug onu ta negosio. Libre ngana laman noka i makasta ira nga klase na kayu, batu, anna balayang ta pappataddag tu makasta nga babalay. Uffunan ittam na kokkofuttam megafu ta kayàda kuan yatun, ari tu para ta kuartu. Normal ngana laman noka i pabbirillay ta kinariku na davvun.

¹⁸ Parte laman yaw na ari mapaga-pagan nga rensia para ta nakikofun ta egga ira ta langi. Tulu-tuloy noka i pagayaya na neravvunan nga maddayarayaw kani Jehova sonu ginnadda i kagian ni Jesus: “Sikamu i totolay nga binendisionan na Yamà! Tullung kamu ta pammagurayan na nga neparan nga paddianan nu namegafu gari paga ta nikaparo na mundo.”​—Mat. 25:34.