Alerto si apostol Pablo kontra ta peligro na sataniko nga propaganda, ngem ari tu kunnatun i ngamin nga kapangngurugna. Angngariganna, sobra i komfiansa ta baggi na karuan ta Corinto​—abboda nga siguradu ngana i taddagda, nga ariadda matomba. (1 Cor. 10:12) Yatutta nitura ni Pablo yaw nga pamappalan: “Mavurung ngà ta marakay laman nu matabag kamu nga kagitta ni Eva, nga nelogo megafu ta panabag nuri na iraw; ay meyawawan i appana-panono nu anna pallikuran nu i napasikkal anna kurug nga pangaya nu kani Cristo.”​—2 Cor. 11:3.

Ipasingan na fermi nga pangikavurung ni Pablo nga awan tu lugar na pakkampante. Tapenu mangaffu ka ta pakillaban na nono mu, ammum nakuan i peligro na propaganda anna nu kunnasim protektan i baggim.

Anni i propaganda? Taw nga konteksto, tumukoy yaw ta ari patas onu makelogo nga informasion tapenu imanipula i pannono anna pagguyu na tolay. Kunna karuan, i propaganda ay “kinaladdug, pakkillu, pangilogo, pammaniobra, pangontrol ta nono, [anna] mental nga pakiggavvu” nga egga koneksionna ta “marake, makadannal, anna ari patas ira nga taktika.”​—Propaganda and Persuasion.

Kunnasi kadelikadu i propaganda? Makelogo yatun​—gittana kappatay nga gas nga ari masingan anna awan tu agugna—​umutto ta nono tam. Megafu ta ariattam masingan nu anni i propaganda, naobserba na espesialista ta kondukta nga si Vance Packard: “Aru nittam i influwensiadu onu kontroladu natun anne ta manono tam.” Kinagi  na tadday nga iskolar nga influwensian natun i lallaki anna babbay nga nangngua tu kuruga delikadu anna ari mepangngo ira nga kondukta nga narresulta tu pangufu tu lahi, gerra, anna pameppersigi megafu ta lahi onu relihion.​—Easily Led—​A History of Propaganda.

Nu melogo ittam ta propaganda na totolay laman, ari kari tu yammanno ngana ta propaganda ni Satanas? Kabisaduna i ugali ira na totolay namegafu ta nikaparatuda. Egga ngana ta pammagurena i interu “mundo.” Awayyana usan i maski anni nga parte natun tapenu iwara i kinaladdugna. (1 Juan 5:19; Juan 8:44) Talaga efektibo si Satanas ta ‘panakkag ta ginnonopan’ na totolay nga narresulta tu ‘panabagna ta tanga-ravvunan.’ (2 Cor. 4:4; Nep. 12:9) Kunnasim affutan i propagandana?

Niyawa ni Jesus yaw nga simple nga annuttulan nga pallaban ta propaganda: “Kannammuan nu i kurug anna yaw i mamalubbang nikamu.” (Juan 8:31, 32) Ta gerra, mawag nga ammu na suddalu nu sitaw i pangapan tu mapattalakkan nga informasion megafu ta mangiwara tu kinaladdug i kalaban tapenu ilogo yaya. Sitaw gafu i pakalegattam tu kunnatun? Niyawa ni Jehova i Biblia. Malegammu tatun i ngamin nga kawagammu tapenu malabanan i propaganda ni Satanas.​—2 Tim. 3:16, 17.

Siempre, ammu yaw na kalalakian nga propagandista, si Satanas. Yatutta usanna i sistema ira na gannug tapenu ariammu mabbibbig anna maggigiammu tu Biblia. Ariammu mappatabag ta makademonio ira nga taktikana! (Efe. 6:11) ‘Alippawatan nu’ tu mapia i kinakurug. (Efe. 3:18) Kawagan i appursigi ta partem. Ngem daddamman i simple nga kinakurug nga kinagi na autor nga si Noam Chomsky: “Awan tu tanakuan nga mangipay tu kinakurug ta uto mu. Yatun i tadday nga gannug nga alegammu mismu.” Yatutta “alegammu mismu” yatun gukaban na ‘pallallappo nga paggigiammu kagaggaw ta Masanto nga Tura.’​—King. 17:11.

Daddamman nga manaki ni Satanas nga mannono onu marrason ka tu mapia. Ngatta? Megafu ta i propaganda ay “siguradu nga pinaka-efektibo,” kunna tadday nga libru, “nu i totolay . . . ay ari makapannono tu mapia.” (Media and Society in the Twentieth Century) Yatutta ari basta alawatan onu insigida kurugan i ngamin nga maginnam.  (Prov. 14:15) Usammu i naggafu ta Dios nga abilidad nga mannono anna pakawayyam nga marrason tapenu pasikannan i pangurug mu.​—Prov. 2:10-15; Roma 12:1, 2.

Mangiyusa i militar ira tu estratehia nga makadaral tu komfiansa anna mamakkafi tu nono. Awayyada parralabanan i kalabadda ira onu illokuan ira tapenu isinna i baggida ta grupo. Segun ta tadday nga heneral na Germany, i propaganda i tadday nga rason ta nikaffuda ta World War I. Inaminna nga talaga nainfluwensian i totolay na propaganda nga gittana namaniobra ira. Usan gapa ni Satanas i kunnatun nga taktika tapenu daralan i pattaradday na Cristiano ta maddaggun. Angngariganna, mamalattuag yaya tu ari pakkarantindian ta wawwaragi onu pagaramman ira nga isinna i baggida ta organisasion ni Jehova megafu ta pagabboda nga kawan tu hustisia onu taki na nonoda.

Ariammu mappa-illoko! Mappegiya ta Uvovug na Dios. Angngariganna, meyannung ta pattaradday na wawwaragi, pagarammannaka na Biblia nga kanayun nga “makkapaka-pakoma” anna solban insigida i ari pakkarantindian. (Col. 3:13, 14; Mat. 5:23, 24) Talaga pagimmuguranna ittam kontra ta pangisinna ta baggi tam ta kongregasion. (Prov. 18:1) Purueban i pangurug mu kontra ta sataniko nga propaganda. Iyavu mu ta baggim: ‘Anni kari i nanginfluwensia niakan turi ta egga kingngua na wagi tu makapataki niakan? Espiritu kari na mundo onu espiritu na Dios?’​—Gal. 5:16-26; Efe. 2:2, 3.

I tadday nga suddalu nga nadaral i komfiansana ta liderna ay ari makillaban tu mapia. Yatutta purueban na propagandista nga daralan i komfiansa anna tiwala na suddalu ira ta liderda. Awayyada usan i propaganda nga: “Ariannu mapattalakkan i lidernu ira!” anna “Ariannu ipamavulun nga pappeligrowadda kamu!” Tapenu pakurugan yatun ira, awayyada usan i maski anni nga kamali na lider ira. Kunnatun i kuan ni Satanas. Arianna vuluvuga nga immangan nga daralan i komfiansam ta mangiyorollu ira nga sinunno ni Jehova.

Anni i defensam? Determinadu ka nakuan nga ari panawan i organisasion ni Jehova anna matalo nga suportan i sinunnona nga mangiyorollu  maski nu imperfekto ira. (1 Tes. 5:12, 13) Ari kamu nga “malogon nga mataranta” nu meparubang ta gittana makadaral nga atake na apostata ira onu tanakuan nga mangilogo​—maski gittana rasonable i kagiadda. (2 Tes. 2:2; Tito 1:10) Tuttulan i netabarang ta mabbing nga si Timoteo. Ariammu panawan i nagigiammum nga kinakurug, anna daddamman nu sitaw mu nagigiammu yatun. (2 Tim. 3:14, 15) Siguradu nga aru i ebidensia nga mangipasingan nga makapattalo ka ta instrumento nga usu-usan ni Jehova ta maggi magatu nga dagun ngana nga mangituddu nittam ta kinakurug.—Mat. 24:45-47; Heb. 13:7, 17.

Ngem daddamman nga usu-usan gapa ni Satanas i direkta nga propaganda. Nu mittan, usanna i pangananassing—“i pinakadana nga klase na ngamin nga propaganda.” (Easily Led—A History of Propaganda) Nitura na British nga profesor nga si Philip M. Taylor, nga inusa na Asiriano i pangananassing anna i propaganda tapenu pakkummaggan i kalabadda. Usan ni Satanas i paganassing ta tolay, pameppersigi, paganassing nga matay, anna tanakuan paga nga klase na negatibo nga paganassing tapenu dominannaka anna iyarayyu ta passerbi kani Jehova.​—Isa. 8:12; Jer. 42:11; Heb. 2:15.

Ariammu ipamavulun nga usan ni Satanas i paganassing tapenu pakkafian i nono onu daralan i integridad mu. Kinagi ni Jesus: “Arian nu nga ikassing i mamapatay ta baggi laman ngem ta kabalin na, ay awan ngana tu awayya da nga makua.” (Luc. 12:4) Buu nakuan i pattalo mu ta promesa ni Jehova nga bantayannaka, nga iddannaka tu “ari maguku-gukug nga pakapangngua,” anna uffun nga labanan i maski anni nga pangananassing nga mamakkafi nikaw.—2 Cor. 4:7-9; 1 Ped. 3:14.

Siempre, awayyam meparubang ta kananassing anna mamakkafi tu nono ira nga situasion. Nonopan lallagu i makapagaram nga kinagi ni Jehova kani Josue: “Maggutu ka anna pasikannammu i nonomu. Ariammu makaddag onu maganassing, megafu ta si Jehova nga Diosmu ay egga nikaw maski sitaw i angayammu.” (Jos. 1:9) Nu mavurukka, ipakimallo mu insigida i ngamin nga pakavurungammu kani Jehova. Makasiguradu ka ta ‘imammo na [Dios] nga ari malippawa na tolay . . . i manangngal ta nono anna giffutuammu’ tapenu egga i sikammu nga labanan i ngamin nga propaganda ni Satanas.​—Fil. 4:6, 7, 13.

Neraddammammu kari i propaganda nga inusa na mensaheru na Asiriano, i Rabsaque, kontra ta totolay na Dios? Kagitta na kinagina: ‘Awan tu mapprotekta nikamu kontra ta Asiria. Maski i Diosnu, si Jehova, awan tu makuana para nikamu.’ Nipalagopogna paga: ‘Si Jehova mismu i nakkagi nikami nga daralan yaw nga nasion.’ Ngem, anni i tabbag ni Jehova? “Ariammu maganassing megafu ta uvovug ira nga naginnam, . . . nga pamara-parake niakan na representante ira na patul na Asiria.” (2 Pat. 18:22-25; 19:6) Tapus, naddog yaya tu tadday nga anghel nga namatay ta 185,000 nga Asiriano ta tanga-gabi laman!​—2 Pat. 19:35.

Nakagiraw ka ngana kari tu pelikula nga nu ta pagimammamu nga maggiraw, manawag nga masingammu nga egga i tadday nga melloko onu imanipula na tanakuan? Manono mu kari gapa: ‘Ariammu kuru-kurugan yatun! Malladdug ira nikaw!’ Nonopan gapa i anghel ira nga ikulle i parehu nga mensahe nikaw: “Ariammu mappelogo ta palladdug ni Satanas!”

Takkabbammu i talingam ta propaganda ni Satanas. (Prov. 26:24, 25) Ginnan si Jehova anna mattalo sa ta ngamin nga kuammu. (Prov. 3:5-7) Magginna ta meddu nga pangifaborna: “Mammasirib ka, anaku, anna pagayayatammu i futù, tapenu mawayyà nga matabbag i manutturia niakan.” (Prov. 27:11) Mangaffu ka ta pakillaban na nono mu!